1 Tunde bi he miri Izhi riwa a kpa nyɨme ri yi, dole bi he ka wawu. 2 kii bibi kii ri nyɨme riwa Kristo nyɨme ta nga ran ka ngawan de ritu mbu ka sraka ri ro, a ka ngawan de ritu sro yi ri ro ri Izhi.

3 Tunde bi he wanji Izhi, no wa ran to yi ri wamba ran, ri ko bibi meme ti ri bibi tan ko itimbye rimi mbi, ritu kyawa wanyi wa ran bi ri wa Tsitsri wa Izhi ran. 4 Ko meme tre, ri tre ri kuklu riwa a ran he no wa tre ran, tsede bi ka ran ngiri ri Izhi. 5 Biyi bi to tinyi, njo riwa a wamba vava nga riwa ari ti kya riwa tsra nga riwa a ri no nji shan ari he rimi nji wawa Izhi he chu ritu mba ko wawa wa wa kya riwa a han kya riwa wa wa, bibi nji wanyi wa nyɨme ri kpi mba han Izhi. 6 Ran no njo gyuru yi ri meme tre, ritu kyawa wanyi nye ifu Izhi ri ye ritu wawa wana hu tre wan ran. 7 Ritu ngamba, ran ti kyari kabru iwawa ran.

8 Ritu risen, biyi bi he ri bu, ama zizan bi he kpan rimi Kristo. A he riwa bi he ka wawa wa he rimi kpan. 9 Ritu ikpan nye ri ngɨzhi kya riwa a tsra ye, wawa wa to kpunji riwa Izhi no wa ti kya riwa wa bi, dindi ti, Tsitsri nga kpunji. 10 Biyi ti kya riwa ari si Izhi sron. 11 He kpata ri ndu ri bu kuklu ri riwa a ran he nkon ran, tsede bi ka ngaran wa zhu ra. 12 A he kya ri shan no wa tre kyawa riwa wa ti ri yayɨbi. 13 Ama ka wa ngɨzhi ko ngye ye rimi kpan, kyawa mba wawu bibi riwa wa he a zhu raa, 14 Ikya ri wa wa zhu riwu ri raa a kɨma he kpan. Ritu ngamba nye wa tre ri:

<<Wurunde biyi wawa bi kruna,

bi ri tashɨme rimi kuu,

nga Kristo ri kpan ritu mbi.>>

15 Ritu ngamba, ti rereri ki mbi, ran ki ka wawa wa ran ti wiwɨri ran, ama bibi wawa wa he ri wiwiri, 16 Tindu ri vi riwa bi he riwu, ritu ivi riwa ki he rimi wan a he vi ri meme ti. 17 Ritu ngamba ran he wa ti nkpran ran, ama ti bi ri to kya riwa Bachi riwa no yi ti. 18 Ran hua ri hi ran, riwa ari ngɨzhi yi ban mme, tsede bi ka shu ri Yuu Izhi. 19 Tre ri ngambi ri tre ri Zabura ri wa se ri gbre, nga wa se ri Yuu, bi ri ran chu se ri gbre ri Izhi ri sron mbi. 20 Sondu ran ngɨri ri A ti Izhi ritu ko ngye, rimi nde Bachi Yeso Kristo.

21 Hu ngambi ritu to mkpen riwa Kristo.

22 Biyi mba, ka ngambi no wa ron mbi bibi riwa bi ka ngambi no Bachi. 23 Ritu ronron wawu nye ri gbengbren ritu wa wan bibi riwa Bachi he ri mgemgbren ritu wa hu Izhi, ikpa wan chuwo. 24 Ritu ngamba, imba wa ka ngamba no wa ron mba ri nkponkpon bibi riwa wau Izhi wa ka ngamba no Bachi.

25 Biyi ronron, nyɨme wa mba mbi bibi riwa Bachi nyɨme wa hu Izhi ran ka ngawan de ritu mba. 26 A ti nganyi ritu no he Tsitsri, no he pianpian ritu ngla ri ima zu ri wɨlo tre Izhi, 27 riwa ari ka wa hu Izhi no ngawan rimi nkpen, janji ri bi, riwa a ran he ri ji ran ri ngbron kyawa riwa wa ran bi ran. 28 Ritu ngamba a bi no ronron no wa nyɨme wa mbaa mba, ikpa mba nye wa ti ri wa nji riwa a nyɨme ri wa wan, a nyɨme ngawan nye mba. 29 Ritu njo ran kawan ri ngawan zari ran, tsede ka no ri ran milan-u ti bibi riwa Bachi ri ti ri wa hu Izhi; 30 kita ki he wa gbɨre kpa Yeso. 31 <<Ritu ngamba, nji ri ka iti wan nga yiwan don ran ka ngawan ngaan ri wa wan, haha mba wa he kpa riri.>> 32 Inchon kya ri yayibi riwa wa bu rimi mbe Izhi nyi, ame me tre ritu Kristo nye ri wa hu Izhi. 33 Kau ri ngamba, ko ngaa ka nyɨme wa wan bibi riwa a nyɨme ngawan, nga no wa no no ron wan mkpen.