1 Biyi miri, wo tre wa timbi wawu nye tsra. 2 <<No ti wen ri yi wen nkpen.>> Wawu nye he doka ri gbuchi ri ka tre dzi. 3 <<Ritu no son mbi no bi ri yi, nga riwa bi ti vi hari ri mgbumgblume.>>

4 Biyi wati, ran kpa sron miri mbi time ran, tsede bi ka tsro wa nkon dindi bi ri ŋoron wa yo ri nkon Bachi.

5 Biyi gran, hu tre wawa wa ngɨzhi yi ri mgbumgblu me ri nyi ri de nkpen ri ti sisiri, ri janji sron, bibi riwa wu ti ri hu Bachi. 6 Wo tre mba, ran ti bibi riwa wari wa ti ritu wa ri ka don sii nji sron ran, tsede bi ka ti bibi riwa wa hu Izhi wa ti riwa Izhi kpa nyɨme ri wu. 7 Ti ndu wen ri sron riri bibi riwa ka wu ti ri Bachi 8 Bi to bibi dindi ti riwa nji ti, ko a he gran, ko a ran he gran ran, Bachi ri han wu.

9 Biyi wawa bi ngɨzhi gran, biyi ngawen ti ri wa bibi kya riwa wa ti ri yi, ran no wa sisiri ran, to yi wawu riwa a he Bachi mbu ri biyi ngawen, a he ri shu, a ran ri lala ran.

10 Ri kre wan, kri mgbemgben ri Bachi, ri gbengbren wan. 11 Mɨlan ki ri kpi ku riwa Izhi, bi ri to vu meme nji. 12 Izran mbu ran he ritu nji ran, ama ritu meme Yuu wa shu wulu, ri kpanchi wawa gbungblume he ri wo mba. 13 Ritu nganyi ban kpi ku mbi wawu riwa Izhi, riwa bi mɨlan ki ritu meme vi nyi, kugon riwa bi kre kongye wawu, bi ka ki gbengben. 14 Ritu ngamba, ki mgbemgben no kpunji no he ka ntan ri lo tri mbi, no dindi ti mbi no he gbengbren mbi. 15 Ngɨzhi tre Izhi riwa ari ngɨzhi sisron ye no he ka ntan dza ri dza mbi. 16 Rimi wan wawu, ban gblukpa ri yosron, riwa bi to yɨbi nzan wulu ri meme-a ri wu. 17 No Yuu Izhi no he ka tsro tu ri ku mbi. 18 Ti rinyi wawu rimi bre, no Izhi no dzon yi. Bre bla vi bibi riwa Iyu Izhi la yi ritu nganyi, sondu ran srenton ran chu sron zho ran, sondu bre ri nji wa hu Izhi. 19 Bi ri bre ri mo ngawen, no Izhi no no wen tre ri vi riwa me tre, riwa me tre ri senkpa won meri dzu ri tre Izhi riwa a he ri rɨrɨ-a. 20 Riwa me he nji riwa wa ti wen ndu zizan riwa me he ri tra tren nji. Bre ri mo inde me tre tre Izhi me ka tre ri gbengbren me ran ti sisri ran.

21 Zizan, riwa bi to sikpa won, ri bibi he riwa me he rimi wan, ngye Tikikus, vayi riwa me nyɨme-u, wawu nji riwa ari tindu Izhi ri sron riri, a ri la yi kongye. 22 Me ti-u ndu ri yi ritu no yi to bibi riwa ki he, no no yi gbengbren sron. 23 Dindi ti riwa Izhi A ti ri riwa Bachi Yeso Kristo no wa he ri miri vayi, ri nyɨme nga kpanyɨme. 24 Dindi ti no he ri wawa wa nyɨme ri Bachi mbu Yeso Kristo wawu, ri nyɨme riwa a ran ri kre ran.