1 Zhu ri Bulus, riwa ri ti Izhi a he nji ri ndu Yeso Kristo.

Ri wa hu Izhi ri meme Afisa, wawa wa kpa nyɨme ri sron mba ri kabru tu ri Yeso kristo

2 No Ti mbu Izhi nga Bachi Yeso Kristo no yi dindi ti nga sisron.

3 No ta ki ngɨri ri Izhi nga Ti Bachi Yeso Kristo, ritu ri kabru tu mbu ri Kristo a tilɨbu sro ta ri no ta wawu tilɨbu ri Yuu rimi kpanchi wan ri shu. 4 Ka wa ran ti gbungblu mme rina, Izhi a zhu ta ki he wa ma hu ri kabru tu mbu ri Kristo, ritu riwa ki ri he Tsitsri nga ki ri ran ti meme ti kya kusi wan ran. Ritu nyɨme wan 5 Izhi ka dzi ri hu ri Yeso Kristo, ri wawu ri no ta ki he miriron nga mirimba wan ritu bibi ri dindi ti ri suu wan. 6 Ki gbre Izhi ritu nkpen dindi ti wan, ritu ide ri huri ri vren wan. 7 Ritu yii Kristo wa kpata chuwo, wa ka meme ti mbu chuwo. Nkpen dindi ti Izhi he ri se, 8 riwa a no ta ri nkon ri gra ri wawu wiwri wan ri towan. 9 Izhi a ti kya riwa a yosron, ran no ta ki to yayɨbi kyawa riwa a kadzi riwa a ri ti kre ri Kristo. 10 Rinyi he rimi ti riwa Izhi ka dzi riwa ari no vi no sho,ran ka kyawa kabru wawu rimi Kristo, wawu kya wan riwa a he ri shu nga ri mme.

11 Ritu kabru tu ri Kristo, Izhi chu ta ngawen no ta ki kpa kya riwa a ka dzi ri wawu ri no ta, a kadzi sisenmu riwa ari ti ngamba, a kre kongye bibi riwa a ka dzi rimi sron wan, 12 Ritu kita nji Yahuda wawa ki gbuchi yo sron ri kristo, ki gbre nkpen Izhi. 13 Ngha biyi ngawen wawa bi he wanji Izhi riwa bi wo tre ri kpunji tre, itre dindi riwa a ngɨzhi kpachuwo ye ri yi, bi kpanyɨme ri Yeso nga Izhi yo wo riwa nji ri kpi ritu mbi riwa a no yi Yuu Tsitsri riwa a ran ka tre dzi. 14 Iyu Tsitsri nye he jiji gado mbu hi chachu riwa ki fe wu, rinyi ngawen he ritu gbre nkpen wan nye.

15 Ritu nganyi, ranronmu me wo yo sron mbi rimi Bachi Yeso nga nyɨme mbi riwa bi nyɨme nyi wawa wa he wa Izhi, 16 me ran ka ngɨri ri Izhi chuwo ri tumbi ran. me taka mbi rimi ibrewon. 17 Ri Yosron ri Izhi riwa Bachi mbu Yeso Kristo, A ti riwa wa gbre wu, a no yi Yuu riwa ari de wiwiri ri la yi to Izhi bran. 18 Me ibre ngawen no sron mbi no bu ran kpan, riwa bi to kya riwa bi yo sron ritu yo riwa a yo yi, bibi wo ri ti sisri riwa a ka tre dzi ri wa nji wan, 19 nga bibi gbengbren wan rigra rimi ndu wan ri ta wawa ki kpa gbengbren nyi riwa a ti tindu rimi mbu a he riri ri bibi sen kpa ri gra, 20 riwa a ta Yeso shɨme rimi kuu riwu, ran no bubu son ku wo ri wan ri shu. 21 Kristo he ri gbengbren ri senkpa, nga kpanchi son kyawa wawa wa ti wa ri shu nga meme ngawen. 22 Izhi ka kongye ri ndo dza Kristo, nga ran ka-u no wa hu Izhi no he tu riwa a ngɨzhi kongye wawu, 23 Riwa wa he ri kpa Kristo, riwa a ka kyawa shu ko kutan kyuwan.