1 Nubə-ɔ̄ŋ kʉ̂ʉ tíŋ, Jiso bìʼ kɛ̀ʼ ŋwɔŋ-ɛŋ tʉ vâafɔʼɔ-bi mbʉə taanə-kəghəŋ-kə ndə bə kə́ tíi nə Tibelia.*21:1 Taanə-kəghəŋ-Tibelia-kə nɔ bɛ ibɛʼ yie taanə-kəghəŋ-Galili-kə. Ɔ nɔ nə kɛ̀ʼ ŋwɔŋ-ɛŋ mənɔ. 2 Samu Bita, Tɔmɔ ndə bə kə bɛ́ʼnə ɔŋ tíi ɔ nə vaanyii, Natania ndə ɔ lɔ̀ hə Kana mu Galili, vâa-Sabɛdi bəbûu, leʼnə bəbɛʼvâafɔʼɔ bəbûu nɔ nə bɛ chɔ.

3 Samu Bita ghɔ̀ŋ tʉ bɔŋ mbɔ, "Mɔ nɔ tʉʼ gɛ̀ ŋgwɔŋ." Bɔ̂ŋ ghɔ̀ŋ tʉ ɔŋ mbɔ, "Bʉʼʉ bu gɛ̀ mɔʼɔ." Bɔ̂ŋ fyú gɛ̀ kóʼ mu kəbuu, bɔŋ ndʉʉbətyuʼ-ghɔ̄ təmə bɔ̂ŋ yá fɔkə fɛ.

4 Ndə mbi kə fíi, Jiso gwè tə́nə ŋgwuu mbʉ kətaanə-kəghəŋ, bɔŋ təmə mbʉ vâafɔʼɔ-bi kínə mbɔ bɛ Jiso fɛ. 5 Jiso ghɔ̀ŋ tʉ bɔŋ mbɔ, "Vâambuɔ, bii nɔ̂ʼ yá mbyu mbɔʼ mɛ?"

Bɔ̂ŋ bə̀ŋhə mbɔ, "Mbee."

6 Ɔ ghɔ̀ŋ tʉ bɔŋ mbɔ, "B̈ii mɔ̀ʼ mbʉ kasinɛ kəvia mɔʼnə mbʉ kəbuu, bii bu yá mbɔʼ." Ndʉʉmɛ, bɔ̂ŋ mɔ̀ʼ, mùutə ndə mədùu kóʼhə mu muu kəŋkaa, bʉʼka ntyʉʉ mbɔʼ ndə i bɛ muŋgɔ.

7 Vaafɔ̀ʼ-ɛ̄ ndə Jiso kə kʉ̀ʉ le, ghɔ̀ŋ tʉ Bita ndʉʉghɔfii mbɔ, "Nɔ bɛ Tiekətʉ." Ndʉʉ ndə Samu Bita kə yʉ́ mbɔ bɛ Tiekətʉ, ɔ mɔ̀ʼ ndyi-fəʼə-ɛ, bʉʼka ɔ nɔʼ kə shùɔ ndə fɔʼɔ, gwù mu mbʉ kətaanə-kəghəŋ. 8 Bəbɛʼbə vâafɔʼɔ kóʼ mu mbʉ kəbuu, dùu mbʉ kasinɛ i kə́ bɛ ilə́ŋnə nə mbɔʼ, bʉʼka bɔ̂ŋ kə kwɛ̀ʼtə ŋgwuu-muu fɛ, bɔ̂ŋ nɔ kə kwɛ̀ʼtə tə i kə́ gɛ̀ nə bəghǔu njuɔ taa nə wuŋ kwi hə mbʉə mbʉ ŋgwuu-muu. 9 Ndʉʉ ndə bɔ̂ŋ kóʼ njəŋmbi, bɔ̂ŋ nyíɛ ŋkʉlʉʼ-viʼi-bə kə́ nʉ̀ʉ kəyəŋ, nə mbyu mbɔʼ ndəŋ ghɔ ghɔŋbə bele. 10 Jiso ghɔ̀ŋ tʉ bɔŋ mbɔ, "B̈ii gwè nə ibɛʼ-yə mbɔʼ ndə bii yá haʼ nduɔ." 11 Ndʉʉmɛ, Samu Bita kóʼ mbi gɛ̀ dùu mbʉ kasinɛ kóʼhə mbi nə bəlɔkɔʼɔ mbɔʼ chɔ ilə́ŋnə kɛŋ kə́ bɛ mbyu-mbɔʼ-hə ghyʉʉ nə njuɔ tia nə wuŋ taa. Mbʉ mbɔʼ kə yɔ́ŋ daa le təmə mbʉ kasinɛ, bɔŋ jɔ̀ʼnə fɛ.

12 Jiso ghɔ̀ŋ tʉ bɔŋ mbɔ, "B̈ii gwè yú fɔ-ndʉʉsɛŋkə-bə." Təmə mbyu vaafɔ̀ʼ leʼnə bíʼtə tʉ ɔŋ mbɔ, "A bɛ nda fɛ?" Bɔ̂ŋ kínə mbɔ nɔ bɛ Tiekətʉ. 13 Jiso gwè lʉ̀ mbʉ bele, kɔ́ tʉ bɔŋ leʼnə mbʉ mbɔʼ. 14 Yɔ̄ŋ-yə nɔ nə bɛ vɛʼ tia ndə Jiso kə kɛ̀ʼ ŋwɔŋ-ɛŋ tʉ vâafɔʼɔ-bi, lʉ̀ hə ndə ɔ kə kwú bə bʉ̀nə kóʼhə ɔŋ.

15 Ndʉʉ ndə bɔ̂ŋ kə yú fɔ-ndʉʉsɛŋkə-bə liʼ, Jiso ghɔ̀ŋ tʉ Samu Bita mbɔ, "Samu, vaa-Jɔŋ, a kʉ̀ʉ mɔ chàa bɔ̄ŋbə mɛ?" Ɔ ghɔ̀ŋ tʉ ɔŋ mbɔ, "Ɔŋ Tiekətʉ, a nɔ kínə mbɔ mɔ nɔ kʉ̀ʉ a." Jiso ghɔ̀ŋ tʉ ɔŋ mbɔ, "Yúʼ vâabinjyʉʉhə-ɔŋ." 16 Ɔ bìʼ gìe tʉ ɔŋ mbɔ, "Samu, vaa-Jɔŋ, a kʉ̀ʉ mɔ mɛ?" Ɔ ghɔ̀ŋ mbɔ, "Ɔŋ Tiekətʉ, a nɔ kínə mbɔ mɔ nɔ kʉ̀ʉ a." Ɔ ghɔ̀ŋ tʉ ɔŋ mbɔ, "Kə́ lɛ́nə binjyʉʉhə-ɔŋ." 17 Ɔ bìʼ gìe tʉ ɔŋ ndə vɛʼ tia mbɔ, "Samu vaa-Jɔŋ, a kʉ̀ʉ mɔ mɛ?" I bə́ʼtə Bita bʉʼka mbɔ ɔ nɔ nə bíʼtə tʉ ɔŋ ndə vɛʼ tia mbɔ, "A kʉ̀ʉ mɔ mɛ?" Ɔ ghɔ̀ŋ tʉ ɔŋ mbɔ, "Tiekətʉ, a nɔ kínə nubə inchəŋ, a nɔ kínə mbɔ mɔ nɔ kʉ̀ʉ a." Jiso ghɔ̀ŋ tʉ ɔŋ mbɔ, "Yúʼ binjyʉʉhə-ɔŋ. 18 M̈ɔ kɛŋ shyíi a nə shʉəŋ mbɔ ndʉʉ ndə a kə bɛ vaambuɔ, a nɔ nə kə́ shʉ̀tə ŋwɔŋ-aŋ, tòʼ gɛ̀ ndəŋ yəŋkə təmiyɔŋ ndə a kə kʉ̀ʉ, bɔŋ ndʉʉ ndə a nɔʼ dùɔŋ, a bu kə́ shyìi kwiitə-a wokədɔŋ shʉ̀tə ŋwɔŋ-aŋ, bɛ̀ʼ a gɛ̀ nə aŋ ndəŋ yəŋkə təmiyɔŋ ndə a gòʼ təmə kʉ̀ʉ fɛ." 19 Ɔ nɔ nə gìe yɔ̄ŋ-yə ndə mədʉ̀ʼ ntɛ kwú ndə ɔ bu kwú ndə məkɔ́ məgʉ́ə tʉ Nyii. Ndʉʉmɛ, Jiso ghɔ̀ŋ tʉ ɔŋ mbɔ, "Gwè hə bɔ̌ŋ mɔ."

20 Bita kíahə ŋwɔŋ-ɛŋ nyíɛ mbʉ vaafɔ̀ʼ ndə Jiso kʉ̀ʉ kə́ gwè hə bɔ̌ŋ liɛŋ-bɔŋ, wo ndə ɔ kə dùʼ kə́ŋhə mbʉə-Jiso ndəŋ tebele ndə ɔ kə ghɔ̀ŋ mbɔ, "Tiekətʉ, bɛ nda ndə ɔ bu fɛ̀ŋ aŋ?" 21 Ndʉʉ ndə Bita nyíɛ ɔŋ, ɔ ghɔ̀ŋ tʉ Jiso mbɔ, "Tiekətʉ, yɔ̄ŋ-yə wo bɛ təka?" 22 Jiso ghɔ̀ŋ tʉ ɔŋ mbɔ, "Kaʼ bɛ ŋkʉʉnə tʉʉ-ɔ mbɔ ɔ bu káa mbi tə mɔ yi gwè, ya-yə chɔ bɛ ka? Gwè hə bɔ̌ŋ mɔ nə mbəŋ-aŋ!" 23 Mbʉ kəŋgie wɔ̀ʼnə gɛ̀ mu bʉə-Nyii mbɔ vaafɔ̀ʼ-ɔ̄ la kʉʉ kwú fɛ, təmə Jiso bɔŋ nɔ nə ghɔ̀ŋ bə mbɔ ɔ kʉʉ yi kwú fɛ, bɔŋ ɔ kə nɔ ghɔ̀ŋ bə mbɔ, "Kaʼ bɛ ŋkʉʉnə tʉʉ-ɔ mbɔ ɔ bu káa tə mɔ yi bʉ̀nə gwè, ya-yə chɔ bɛ mbuka?"

24 Nɔ bɛ mbʉ vaafɔ̀ʼ nɔ ndə ɔ tʉʼ kwə́ʼ te nubə-ɔ̄ŋ, ndə nyɔ̀ʼ ɔ nyɔ̀ʼ nubə-ɔ̄ŋ, baʼa bɔŋleʼ kínə mbɔ nubə ndə ɔ tʉʼ gìe nɔ bɛ shʉəŋ.

25 Nubɛʼbə nɔ bɛ ghɔ buŋmbi ndə Jiso kə chìi, ndə mɔ kwɔ̀ʼtə mbɔ kaʼ bə kʉ̌ʉ nyɔ̀ʼ, təmə wʉʉnəmbikə nə mbəŋ-ɛŋ mə yá mbʉ bəŋwɔʼnə ndə bə nyɔ̀ʼ muŋgɔ kie fɛ.