1 Yɔŋbɛʼ, Jiso kə́ gháaNyii kəyəŋbɛʼ, kʉ̂ʉ liʼ, mbyu vaafɔ̀ʼ-ɛ gìe tʉ ɔŋ mbɔ, "Tiekətʉ-yaʼ, dàhə baʼa ndə məgháaNyii haʼ ndə Jɔŋ kə dàhə vâafɔʼɔ-bi le."

2 Ɔ gìe tʉ bɔŋ mbɔ, "Kaʼ bii kə́ gháaNyii, b̈ii ghɔ̀ŋ mbɔ,

‘Tie-yaʼ ndə a bɛ yuo, tə bə kóʼhə yie-a ndə i bɛ ŋkʉʉ ghɔʼ,

baʼa tʉʼ gháa a mbɔ, n̈dʉʉ gwè ndə a bu sɔ́ʼ bʉə bənchəŋ ndə fɔŋ.

3 Baʼa tʉʼ gháa mbɔ, tə a kɔ́ baʼa nə fɔyubə ndə baʼa kie ndə məyú, ndəŋ chîmbikə təmiyɔŋ.

4 Bɔŋleʼ sʉ̀fyii-a ndəŋ bʉ̂ʼtə-aʼ,

bʉʼka mbɔ, baʼa nɔʼ sʉ̀fyiihə-aʼ ndəŋ bʉ̂ʼtə ndə bəbɛʼbʉə chìi tʉ baʼa.

Kə a mə mɛ̀ʼtə baʼa gwù mu nubə ndə bəkɔ i chìi baʼa chìi bʉ̂ʼʉ fɛ.’ "

5 Ndʉʉmɛ, ɔ ghɔ̀ŋ tʉ bɔŋ mbɔ, "Kaʼ mbyu wo mu bii kie tieŋkɔŋ-ɛŋ, gɛ̀ kwɔ̀ŋ njaa-tieŋkɔŋ-ɛŋ-ghɔ̄ ndʉʉkwɔnəmbi, ghɔ̀ŋ tʉ ɔŋ mbɔ, ‘Tieŋkɔŋ, chɔ́ʼhə mɔ nə mbyu-bele-hə itia, 6 bʉʼka tieŋkɔŋ-ɔŋ ndə ɔ lɔ̀ hə dɔdɔ nɔʼ gwè mətòʼ tʉ mɔ, təmə mɔ kie fɔkə ndə mətía ɔ chɔ fɛ.’ 7 Ɔ bə̀ŋhə mu njaa mbɔ, ‘Kə a mə leʼ chɔ́ŋhə mɔ fɛ. Mɔ nɔʼ fʉ̀əŋ njaa, baʼabə vâa-bɔŋ, bɔŋ kə́ nʉ̀ʉ mɔ̀ʼ ndəŋ kəbɔ. Mɔ mə lɔ̀ hə sê kɔ́ fɔkə tʉ a fɛ.’ 8 M̈ɔ shyíi bii mbɔ kaʼ ɔ gòʼ təmə lɔ̀ hə sê kɔ́ fɔkə tʉ ɔŋ, bʉʼka mbɔ ɔ bɛ tieŋkɔŋ-ɛŋ fɛ, ɔ yi lɔ̀ bʉʼka məchɔ́ŋhə ndə ɔ tʉʼ chɔ́ŋhə ɔŋ, kɔ́ fɔbə inchəŋ ndə ɔ tʉʼ byúu.

9 "Nɔʼ m̈ɔ gìe tʉ bii mbɔ b̈ii bíʼtə bə bu kɔ́ tʉ bii, b̈ii kʉ́ʉ, bii bu nyíɛ, b̈ii kwɔ̀ŋ, bə bu ŋɔ́ʼhə chusii tʉ bii. 10 Bʉʼka w̃otəmiyɔŋ ndə ɔ bíʼtə nɔ kie, w̃o ndə ɔ kʉ́ʉ kə́ nyíɛ, bɔŋ w̃o ndə ɔ leʼ kwɔ̀ŋ bə bu ŋɔ́ʼhə chusii tʉ ɔŋ.

11 "Bɛ nda mu bii bətie-vâa, ndə kaʼ vaa-a bíʼtə mbɔʼ mu muu tʉ a, a kɔ́ yɔ tʉ ɔŋ? 12 Byuunɔ, kaʼ ɔ bíʼtə ghəŋ, a kɔ́ bə ŋɔŋ tʉ ɔŋ? Mɔ laa fɛ. 13 Kaʼ mbəŋ-yii ndʉʉmɛ, ndə bii bɛ bʉə-bʉ̂ʼʉ, kínə məkɔ́ yʉʼ kəkɔ tʉ vâa-bii, ndʉʉmɛ i kɛŋ dʉ̀ʼ mbɔ Tie-yii ndə ɔ bɛ yuo bu kɔ́ LyʉʉhəNyiikə tʉ bʉə ndə bɔ̂ŋ bíʼtə tʉ ɔŋ!"

14 Chibɛʼkə, Jiso jə̀ŋ lyʉʉhəbʉəbʉəkə ndə ɔ bɛ mu wobɛʼ ndə ɔ bɛ chie. Ndʉʉ ndə mbʉ kəlyʉʉhəbʉəbʉə mɛ̀ʼtə wo-ghɔ̄, ɔ kwə́ʼ, i chíe chu bʉə. 15 Bəbɛʼbʉə ghɔ̀ŋ mbɔ, "Ɔ nɔ tʉʼ jə̀ŋ nə ghʉəʼ-Bɛsɛbu-kə*, mbʉ fɔŋ-bəlyʉʉhəbʉəbʉə." 16 Bəbɛʼbʉə ghɔ̀ŋ tʉ ɔŋ mbɔ ɔ̈ chìi nukəcheʼkə ndə i lɔ̀ hə kəghɔ-Nyii b̈ɔ̂ŋ nyíɛ, kə́ kʉ́ʉ ndə məmùutə ɔŋ.

17 Jiso kə́ kínə nukə ndə bɔ̂ŋ kə́ kwɔ̀ʼtə ɔ ghɔ̀ŋ tʉ bɔŋ mbɔ, "Lɔʼɔ kətə̂ŋ təmiyɔŋ ndə bɔ̂ŋ gyʉ̀əhə ŋwɔŋ-yʉə tənuɔtənuɔ kə́ gwúu byuʼu nə ŋwɔŋtə-ʉə bu nʉ̀ʉ fuŋ, bɔŋ chufu ndə bɔ̂ŋ leʼ dùʼ nə gyʉʉ-buubuu-hə bu gwù. 18 Kaʼ Sata kə́ bʉ̀nə shùɔ shʉ-i nə mbəŋ-ɛŋ, lɔʼɔ-ɛ tə́nə təka? Mɔ nɔ tʉʼ ghɔ̀ŋ yɔ̄ŋ-yə, bʉʼka mbɔ bii nɔ tʉʼ ghɔ̀ŋ mbɔ mɔ la tʉʼ jə̀ŋ lyʉʉhəbʉəbʉəbə nə ghʉəʼ-Bɛsɛbu-kə. 19 Kaʼ mɔ kə́ jə̀ŋ lyʉʉhəbʉəbʉəbə nə ghʉəʼ-Bɛsɛbu-kə, bʉə-bii jə̀ŋ bɔŋ nə ka? Ndʉʉghɔfii, bʉə-bii bu dʉ̀ʼ mbɔ bii nɔʼ mɔ̀ʼ bɛ́. 20 Bɔŋ kaʼ mɔ kə́ jə̀ŋ lyʉʉhəbʉəbʉəbə nə ghʉəʼ-Nyii-kə, təmə i nɔ dʉ̀ʼ mbɔ Sɔ́ʼ-Nyii nɔʼ gwè mu bii. 21 Kaʼ wo shʉ́əshʉ́ə ndə Sata, ndə ɔ nɔʼ shʉ̀tə ŋwɔŋ-ɛŋ, kə́ chyìi fu-i, fɔbə-i mə nə bɛ́ fɛ. 22 Bɔŋ kaʼ wo ndə ɔ shʉ́ə chàa ɔ ŋíi ɔŋ, tə ghɔ́ʼ ɔ, ɔ fí fɔ-chɔ̂-bə-i ndə ɔ kə yʉ́əʼnə chɔ, gyʉ̀ə mbʉ bəfɔ ndə ɔ fí kəghɔ-ɔ.

23 "Wotəmiyɔŋ ndə ɔ gòʼ təmə bɛ tʉ mɔ fɛ, nɔ bɛ wobàa-ɔ, bɔŋ wo ndə ɔ gòʼ təmə leʼ kə́ chə̀ŋtə baʼa ɔ fɛ, nɔ tʉʼ wɔ̀ʼhəwɔ̀ʼhə."

24 Jiso kə́ bíe kwə́ʼ ghɔ̀ŋ mbɔ, "Ndʉʉ ndə l̃yʉʉhəbʉəbʉəkə fyú hə mu mbʉə wo nɔ, ɔ kə́ tòʼ kwɔŋkəyəŋnə, kə́ tòʼ kʉ́ʉ yəŋkə ndə məkáa chɔ, kʉ̂ʉ gòʼ təmə nyíɛ fɛ nɔ, ghɔ̀ŋ tʉ ŋwɔŋ-ɛŋ mbɔ, ‘Mɔ bu bʉ̀nə gɛ̀ mu njaa-mɔ ndə mɔ kə lɔ̀ hə chɔ.’ 25 Ndʉʉ ndə ɔ bʉ̀nə gwè nyíɛ mbʉ njaa tʉ bə nɔʼ yʉ̀əʼ mu-i, shʉ̀tə fɔbə tʉ́ʼtə, 26 ndʉʉmɛ, ɔ gɛ̀ lʉ̀ bəbɛʼlyʉʉhəbʉəbʉəbə təkwiitia ndə buŋtə-ʉə byʉ́ʼ chàa yi-yə, ghɔŋ bɔŋ gwè sʉ́ʉ kə́ chí chɔ, kə lìʼtə, məchimbi-wo-ghɔ̄ byʉ́ʼ tə chàa ndə i kə fəŋ bɛ."

27 Ndə Jiso kə́ gìe nubə-ɔ̄ŋ, wokebɛʼ tíi hə mu bʉə ghɔ̀ŋ mbɔ, "Naa-aŋ nɔ bɛ wo kətʉjyu, tɔbə ndə a hə fyú chɔ, leʼnə ŋwɔ̂ŋ ndə a nyúu."

28 Jiso bə̀ŋhə mbɔ, "Fɔŋ kətʉjyu nɔ bɛ tʉ wo ndə ɔ yʉ́ ŋgieNyiikə tə́nə chɔ."

29 Ndə bʉə kə́ yɔ́ŋ gwè, Jiso ghɔ̀ŋ mbɔ, "Ŋgwie wo-ɔ̄ nɔ ŋgwie-bʉ̂ʼʉ kə́ kʉ́ʉ cheʼkə, bɔŋ təmə bə kʉʉ dʉ̀ʼ cheʼkə tʉ bɔŋ fɛ, yaʼkɛŋ haʼ cheʼ-Jona-kə. 30 Ndə Jona kə bɛ cheʼkə tʉ bʉə-Ninɛvi, nɔ bɛ haʼ nɔ ndə Vaa-Woməsʉʉ bu bɛ tʉ yɔ̄ŋ-yə ŋgwie.

31 "Wontoʼ ndə ɔ lɔ̀ hə Byûumbɔŋ bu lɔ̀ tə́nə mu njaafɛ̀ʼ ghɔŋbə ŋgwie-wo-ɔ̄, ghɔ̀ŋ mbɔ bɔ̂ŋ nɔʼ gwù fɛʼɛ, bʉʼka ɔ nɔ nə lɔ̀ hə liʼ-mbi, gwè ndə məyʉ́ mukətʉ-súunə ndə Salamu kə kie, bɔŋ b̈ii nyíɛ, wo nɔ bɛ fɛ̄ŋ ndə ɔ gʉ́ə chàa Salamu. 32 Bʉə-Ninɛvi bu lɔ̀ tə́nə ndəŋ chî-kwɛ̀-fɛʼɛ-kə ghɔŋbə ŋgwie-wo-ɔ̄, ghɔ̀ŋ mbɔ bɔŋ la nɔʼ gwù fɛʼɛ bʉʼka mbəŋ-yʉə bʉə-Ninɛvi nɔ nə shìe liɛŋ ndəŋ bʉ̂ʼtə-ʉə, ndʉʉ ndə Jona kə lɔ̀ʼ ŋgieNyiikə tʉ bɔŋ, bɔŋ b̈ii nyíɛ, wo nɔ bɛ fɛ̄ŋ ndə ɔ gʉ́ə chàa Jona.

33 "Wo kə chúʼ kɛʼɛ, mɔ̀ʼ kəyəŋ-bəliinə fɛ, byuunɔ kwóhə shyiikə ndəŋ ghɔ fɛ. Ɔ chɔ̀ʼhə mɔ̀ʼ ndəŋ kəfɔ kə mbɔ bʉə ndə bɔ̂ŋ tʉʼ sʉ́ʉ mu njaa, bu nyíɛ məbáa-ɛ. 34 Shʉ-a nɔ bɛ kɛʼɛ-mbʉə-a, haʼ ndə kɛʼɛ kɛ̀ʼ yəŋbə nɔ. Kaʼ shʉ-a bɛ jyujyu, i kɛ̀ʼ mbʉə-a inchəŋ, bɔŋ kaʼ i bɛ bʉəbʉə, mbʉə-a inchəŋ bɛ kənjəŋ. 35 B̈ii láa le mbɔ fɔkə ndə a kwɔ̀ʼtə mbɔ bɛ kɛʼɛ mu mbʉə-a ndə bɛ shʉəŋ-Nyii, mə bʉ̀nə bɛ njəŋkə fɛ. 36 Kaʼ a kínə shʉəŋ-Nyii gɛ̀ kùu təmə mɔ̀ʼmbɛ bɛ mu ŋkwɔʼtə-a fɛ, ndʉʉmɛ, i bɛ fi nə mbʉə-a nchəŋnchəŋ-ɛŋ tʉʼ báa, nə wo ndə kɛʼɛ tʉʼ báa ndəŋ ɔŋ."

37 Jiso kʉ̂ʉ kwə́ʼ liʼ, wo-Falasibɛʼ kɔ̀ʼnə ɔŋ mbɔ ɔ̈ gwè ghɔŋ ɔŋ yú fɔbə. Ɔ ŋíi mu njaa ghɔŋ ɔŋ, dùʼ mbʉə tebele. 38 Mbʉ wo-Falasi kʉ̂ʉ nyíɛ ndə Jiso tʉʼ yú fɔbə təmə nɔʼ fəŋ sʉ̀ ghɔkə-i fɛ, i chàa ɔ daa. 39 Ndʉʉmɛ, Tiekətʉ ghɔ̀ŋ mbɔ, "Bii bʉə-Falasi, b̃ii nɔ sʉ̀ ndʉ̂ʉ ghɔŋ baŋ njəŋmbi, bɔŋ muŋgɔ bii kə́ bɛ ilə́ŋnə nə ntɔmə ghɔŋbə buuŋbʉə. 40 Bii bənɔ̌ʼɔ-bɔ̄ŋ! Wo ndə ɔ chìi mu-i, chìi haʼ ɔ chìi njəŋmbi fe? 41 Sʉ̀ mu baŋ ndə məkɔ́ fɔkə ndə i bɛ muŋgɔ tʉ wo mbʉʼ, nubə bu bɛ tʉ a itʉ́ʉnə.

42 "Ŋgʉəʼ kətʉ-bii, bʉə-Falasi. Bii nɔ chìi i kʉ̀ʼnə ndə məgyʉ̀əhə fɔbə-i ndəŋ yəŋbə wuŋ, bii kɔ́ yəŋkə imɔʼ tʉ Nyii. Bii nɔ tʉʼ kɔ́ vaabəfɔ nùʼ mbɔʼ, kɔ́ tʉ kɔ́ fyuŋ-nchyiinchyii-bə tʉ Nyii, təmə bii bɔŋ kə́ fɔ̀ʼ nubə ndə i kʉ̀ʼnə tʉ bəbɛʼbʉə fɛ, təmə bɔŋleʼ kʉ̀ʉ Nyii ghɔ fɛ. Bii nɔ kə kə́ kʉ̌ʉ kə́ fɔ̀ʼ nubə-ɔ̄ŋ təmə mɛ̀ʼtə bəbɛʼbə fɛ.

43 "Ŋgʉəʼ kətʉ-bii, bʉə-Falasi, bʉʼka mbɔ bii nɔ tʉʼ kʉ́ʉ fɔŋkwɛʼtəŋbə mu njaagháaNyii ndə mədùʼ chɔ, kə́ kʉ́ʉ mbɔ b̈ə kə́ bʉ́ʉnə tʉ bii ndə yəŋ-vyii-bə. 44 Ŋgʉəʼ kətʉ-bii, bii nɔ bɛ nə sětə ndə bə gòʼ təmə kə́ nyíɛ fɛ. Bə kə́ tòʼ ndəŋ ghɔ təmə kínə mbɔ fɔ-fɛ̀-bə bɛ muŋgɔ fɛ."

45 Mbyu wobɛʼ ndə ɔ kínə nuʼ-Mushi daa bə̀ŋhə tʉ ɔŋ mbɔ, "Chicha, a tʉʼ gìe nubə-ɔŋ nɔ kə́ chɛ̀ŋ baʼa chɛ̀ŋ ghɔ."

46 Jiso bə̀ŋhə mbɔ, "Bii ndə bii kínə nuʼ-Mushi daa, tə ŋgʉəʼ bɛ ndəŋ bii bʉʼka mbɔ bii nɔ tʉʼ kóʼhə bɛʼkə ndəŋ bʉə ndə i chàa bɔŋ ndə məbɛ̀ʼ, bɔŋ təmə bii mə ŋɛ̀hə ŋwɔŋ-yii ndə məkwáa bɔŋ fɛ. 47 Ŋgʉəʼ kətʉ-bii bʉʼka bii nɔ tʉʼ bɔŋ sě-bʉəyʉkəŋgieNyii-tə ndə bətietie-bii nə yítə bɔŋ. 48 I nɔ tʉʼ dʉ̀ʼ mbɔ, bii nɔ bɛ́ŋ nukə ndə bətietie-bii nə chìi. Bɔ̂ŋ yítə bʉəyʉkəŋgieNyii, bii bɔ́ŋ sětə-ʉə. 49 Bʉʼka yɔ̄ŋ-yə, Nyii nə ndaa-ɛ, ghɔ̀ŋ mbɔ, ‘Mɔ bu tə́ŋ bʉəyʉkəŋgieNyii ghɔŋbə bəlɔntəŋNyii mbɔ, bii yítə bəbɛʼbə, chɔ́ŋhə bəbɛʼbə.’

50 "Bʉʼka yɔ̄ŋ-yə, ŋgwie-wo-ɔ̄ bu lɔ̀ʼ fɔbʉə-bʉəyʉkəŋgieNyii-kə ndə i nɔʼ kə fyú, lʉ̀ hə ndəŋ ŋgwunə-mbi, 51 lʉ̀ hə ndəŋ fɔbʉə-Abɛ-kə tə gɛ̀ dàa ndə fɔbʉə-Sakalia-kə ndə bə kə yí ɔ ntəŋntəŋ kəyəŋfɛ̀ʼndɛŋNyii ghɔŋ njaafɛ̀ʼndɛŋNyii. Ɔŋ! Nɔʼ m̈ɔ shyíi bii, ŋgwie-wo-ɔ̄ bu lɔ̀ʼ nubə-ɔ̄ŋ inchəŋ.

52 "Ŋgʉəʼ kətʉ-bii, ndə bii kínə nuʼ-Mushi jyujyu bʉʼka bii nɔʼ lʉ̀ nchoʼ-ndaa-kə lə̀ŋ. Bii nə mbəŋ-yii, bii tʉʼ ŋíi fɛ, bɔŋ kə́ chíe fia kəghɔ-bʉə ndə bɔ̂ŋ tʉʼ ŋíi."

53 Ndʉʉ ndə Jiso kə lɔ̀, bʉə-Falasi ghɔŋbə bʉə dàhə nuʼ-Mushi chʉ́ʉhə kə́ dʉ̀ʼ chu-i shʉ́əshʉ́ə bɔŋleʼ kə́ bíʼtə nu-shʉ́əshʉ́ə-bə tʉ ɔŋ, 54 kə́ chyìi ndə məyá ɔ ndə nukə ndə ɔ bu gìe.