Lucas 21

Kɔ-kwuʼ-woke-kə

1 Ndʉʉ ndə Jiso kə bɛ mu njaafɛ̀ʼndɛŋNyii, ɔ chɔ̀ʼhə shʉ-i nyíɛ ndə bʉə-kəfʉʼ tʉʼ mɔ̀ʼ kɔkə-ʉə mu tɔŋ-mɔ̀ʼ-kyʉə-kə mu njaafɛ̀ʼndɛŋNyii-ghɔ̄. 2 Ɔ bɔŋleʼ nyíɛ kwuʼ-wokebɛʼ ndə ɔ byúu daa, ɔ kə́ mɔ̀ʼ vâabədyʉʼ kyʉə-bi ibûu mu mbʉ kətɔŋ. 3 Jiso ghɔ̀ŋ mbɔ, "M̈ɔ shyíi bii nə shʉəŋ mbɔ, kwuʼ-woke-ɔ̄ nɔʼ kɔ́ kɔkə chàa bʉə bənchəŋ. 4 Bʉʼka bɔ̂ŋ bənchəŋ nɔ tʉʼ kɔ́ kɔkə-ʉə hə mu buŋmbi ndə bɔ̂ŋ kie. Bɔŋ kwuʼ-woke-ɔ̄ ndə ɔ gòʼ təmə kie fɛ, nɔʼ kɔ́ fɔkə təmiyɔŋ ndə ɔ kie."

Jiso núhə bəshʉ ndʉʉ buŋ yi kʉ̀ʼnə ntɛ məgwù njaafɛ̀ʼndɛŋNyii

5 Ndə bəbɛʼbʉə kə́ kwə́ʼ te njaafɛ̀ʼndɛŋNyii ndə bə shʉ̀tə nə ŋgoʼ-jyujyu-hə ghɔŋbə kɔkə ndə bə kɔ́ tʉ Nyii chɔ, Jiso ghɔ̀ŋ mbɔ, 6 "Fɔbə-ɔ̄ŋ ndə bii tʉʼ nyíɛ nɔ, ndʉʉ tʉʼ gwè ndə mbyu ŋgoʼ kʉʉ yi káa liɛŋ liŋ-iŋ chɔ təmə bə kùu mɛ̀ʼ sê fɛ."

Ŋgʉəʼ ndə bʉə-Nyii bu nyíɛ

7 Bɔ̂ŋ bíʼtə tʉ ɔŋ mbɔ, "Chicha, bɛ ndʉʉka ndə nubə-ɔ̄ŋ inchəŋ bu yi fyú chɔ, leʼnə ntɛ kəcheʼ ka ndə i bu yi dʉ̀ʼ mbɔ mbʉ ndʉʉ nɔʼ kʉ̀ʼnə?"

8 Ɔ bə̀ŋhə mbɔ, "Kə bii mə mɛ̀ʼtə wo fə́ʼhə bii fɛ, bʉʼka bʉə buŋmbi bu yi gwè yie-mɔ, kə́ ghɔ̀ŋ mbɔ, ‘Mɔ nɔ bɛ mbəŋ-ɛŋ!’ leʼ kə́ ghɔ̀ŋ mbɔ, ‘Mbʉ ndʉʉ nɔʼ kʉ̀ʼnə.’ Bɔŋ kə a mə bɛ́ŋ nukə ndə bɔ̂ŋ tʉʼ gìe fɛ. 9 Ndʉʉ ndə bii yʉ́ chɔ̂tə ghɔŋbə ntɔŋntɔŋ mu mbi, kə bii mə fàa fɛ. Nubə-ɔ̄ŋ bu yaʼ fəŋ fyú sê, bɔŋ təmə mbi kʉʉ lìʼ haʼ ndʉʉghɔfii fɛ."

10 Ɔ bìʼ ghɔ̀ŋ mbɔ, "Lɔʼ-bətə̂ŋ-tə bu lɔ̀ tə́nə ghɔŋbə bəbɛʼlɔʼ-bətə̂ŋ-tə, bəfɔŋ bətə̂ŋ bu lɔ̀ tə́nə ghɔŋbə bəbɛʼbəfɔŋ-bətə̂ŋ. 11 Chisêkə bu ŋʉ̀ʼnə shʉ́əshʉ́ə bəyəŋbəyəŋ, chyʉʉ bu gwù mbi ntɛntɛhə, yɔʼbə ntɛntɛhə, nu-fɛ̀ŋhə-bə ntɛntɛhə leʼnə fɔŋ-bəcheʼ ntɛntɛhə bu fyú yuo.

12 "Bɔŋ nubə-ɔ̄ŋ inchəŋ bu yi kə fyú nɔ, tʉ bə nɔʼ mɔ̀ʼ ghɔkə ndəŋ bii chɔ́ŋhə bii. Bə bu yá bii gɛ̀ nə bii mu njaafɛ̀ʼ-njaagháaNyii, kɔ́ bii chaŋ. Bɔ̂ŋ bu lʉ̀ bii, gwè nə bii bəshʉ bəfɔŋ ghɔŋbə bəgɔməna bʉʼka bii mɔ̀ʼfyiihə-ii ndəŋ mɔ. 13 Yɔ̄ŋ-yə bu bɛ saa tʉ bii ndə məlɔ̀ʼ ntəŋjyujyu. 14 B̈ii shʉ̀tə ndaahə-ii mbɔ bii kʉʉ lə̀ŋnə ndə nukə ndə bii bu gɛ̀ gìe mu njaafɛ̀ʼ fɛ, 15 bʉʼka mɔ bu kɔ́ ŋgie-tə́nə-bə chu-a ghɔŋbə ndaa təmə bʉə-bàa-ba mə bə̀ŋhə aŋ fɛ, təmə bɔ̂ŋ mə kíahə ŋgiekə-a fɛ. 16 Bətie-bii, bəliŋ-bii, bʉə-kəlɔŋ-bii, bətieŋkɔŋ-bii bu chɔ̀ʼhə bii kɔ́ kəghɔ-bɔŋ. Bə bu leʼ yítə bəbɛʼbə hə mu bii. 17 Bʉə bənchəŋ bu bàa bii bʉʼka bii mɔ̀ʼfyiihə-ii ndəŋ mɔ. 18 Bɔŋ bɛ le, mbyu nyu kʉʉ gwù sê hə kətʉ-a fɛ. 19 Kaʼ bii lyʉ̀ʉtə́nə i kɔ́ məchímbi tʉ bii.

Jiso kwə́ʼ te məgwu-Jɛlosalɛŋ

20 "Ndʉʉ ndə bii nyíɛ bəsɔge yə̀ŋ Jɛlosalɛŋ fúu, bii kínə mbɔ ndʉʉ kùunə-i nɔʼ kʉ̀ʼnə. 21 Ndʉʉmɛ, bʉə ndə bɔ̂ŋ bɛ mu Judia, b̈ɔ̂ŋ nyʉ́ʉ kóʼ ndəŋ kwɔŋhə. Bʉə ndə bɔ̂ŋ bɛ mu kəyəŋkwɛʼtəŋ, b̈ɔ̂ŋ nyʉ́ʉ fyú, bʉə ndə bɔ̂ŋ bɛ mbi, mə leʼ ŋíi mbɔ bɔ̂ŋ kʉ́ʉ yəŋ-chí-kə fɛ. 22 Bʉʼka mbɔ nɔ bɛ ndʉʉ ndə Nyii kie ndə mətyú bʉ̂ʼʉ, ndə məchìi nubə ndə bə nyɔ̀ʼ mu ŋwɔʼnə-Nyii fyú shʉəŋ. 23 I bu nə tɛ̀nə tʉ bəke gʉʼnə ghɔŋbə bəke ndə bɔ̂ŋ tʉʼ nyùuhə vâa ndəŋ chî-ghɔ̄-bə. Bʉə-Isilɛ bu nyíɛ fɔŋ ŋgʉəʼ ghɔŋbə tʉʉbʉə-Nyii ndə i bu gwè tʉ bɔŋ. 24 Bə bu yítə bəbɛʼbə nə setəbə, yátə bəbɛʼbə gɛ̀ nə bɔŋ ndəŋ fʉəhə mu lɔʼ-bətə̂ŋ-tə nchəŋnchəŋ-ɛŋ kəwʉʉnəmbi. Bə bu ghɔ́ʼ Jɛlosalɛŋ, bʉə təmə kínə Nyii fɛ, fyʉ́ʼhə bɔŋ tə ndʉʉ bʉə ndə bɔ̂ŋ gòʼ təmə kínə Nyii fɛ yi mì.

Məgwe-Vaa-Woməsʉʉ

25 "Nubəcheʼbə nɔ bu yi bɛ yuo ndəŋ chichi, ndəŋ chisuu leʼnə bəlɔʼɔ. Kəchisê-fɛ̄ŋ, lɔʼ-bətə̂ŋ-tə bu bɛ mu ŋgʉəʼ leʼnə mbyuutəmbyuutə bʉʼka muu ndə i tʉʼ yùɔnə leʼnə lɛɛŋhə-muu-bə ndə bɔ̂ŋ tʉʼ sɛ́ʼnə. 26 Bʉə bu kə́ gwònə gwùtə sê bʉʼka faa-kwu-kə ndə bɔ̂ŋ tʉʼ chyìi nu-ŋkwɔŋŋkwɔŋ-bə ndə i bɛ ndə məgwè mu kəwʉʉnəmbi. Bʉʼka bə bu ŋɛ̀hə nu-shʉ́əshʉ́ə-bə ndə bɔ̂ŋ bɛ yuo. 27 Ndʉʉmɛ, bɔ̂ŋ bu nyíɛ Vaa-Woməsʉʉ, ɔ kə́ shíʼ gwè hə mu kəmbɔʼ nə ghʉəʼkə ghɔŋbə məŋwɔ̀ʼkwɛʼtəŋ. 28 Ndʉʉ ndə b̈ii nyíɛ nubə-ɔ̄ŋ chʉ́ʉhə məfyú sê, b̈ii kie fyii, kə́ lɛ́nə fia mbɔ nchʉʼkətʉ-yii nɔʼ tʉʼ kə́ŋhə."

Lʉ̀ ndaa ndəŋ tyʉ-fik-kə

29 Ɔ mɔ̀ʼ chəŋkə tʉ bɔŋ ghɔ̀ŋ mbɔ, "B̈ii lɛ́nə tyʉ-fik-kə ghɔŋbə bəbɛʼtyʉbə inchəŋ. 30 Ndʉʉ ndə bɔ̂ŋ tɔ́ kə́ fyùʼtə, b̈ii nyíɛ nə mbəŋ-yii kínə mbɔ ndʉʉkəbyʉʉ nɔʼ tʉʼ kə́ŋhə. 31 Nɔ bɛ haʼ nɔ ghɔ, ndʉʉ ndə b̈ii nyíɛ nubə-ɔ̄ŋ kə́ fyú sê, bii kínə mbɔ Sɔ́ʼ-Nyii la nɔʼ kə́ŋhə. 32 Nɔʼ m̈ɔ shyíi bii nə shʉəŋ mbɔ, ŋgwie-wo-ɔ̄ kʉʉ mì təmə nubə-ɔ̄ŋ inchəŋ nɔʼ fyú sê fɛ. 33 Yuo ghɔŋbə chisêkə bu mì, təmə ŋgiekə-ɔŋ bɔŋ bu nə mì fɛ.

A nɔ kie ndə mə-kə́-kíi dyʉʼbə

34 "B̈ii láa bʉʼka i mə dìenə ndəŋ bii, ndə bii tʉʼ nú búu, jʉ̀ŋtə kə́ bɔŋleʼ kánə mbi. Təmə bii yi kwɔnə fyú ndəŋ chî-ghɔ̄-kə nə ŋkʉʼ. 35 Bʉʼka chî-ɔ̄-kə bu gwè tʉ bʉə bənchəŋ ndə bɔ̂ŋ bɛ kəchisê-fɛ̄ŋ inchəŋ. 36 B̈ii ŋɔ́ʼhə shʉtə-ii ndʉʉ tə mì ndʉʉ, kə́ gháaNyii mbɔ b̈ii kie ghʉəʼkə ndə mənyʉ́ʉ nubə-ɔ̄ŋ inchəŋ ndə i bu fyú nɔ, bɔŋleʼ tə́nə bəshʉ Vaa-Woməsʉʉ."

37 Jiso kə́ dàhə mu njaafɛ̀ʼndɛŋNyii chîbə inchəŋ. Kʉ̂ʉ bɛ ndʉʉbətyuʼ, ɔ fyú gɛ̀ chí ndəŋ kwɔŋ ndə bə tíi nə Kwɔŋ-bəTyʉ-Oli. 38 Kʉ̂ʉ bɛ ndʉʉsɛŋkə bətyuʼbətyuʼ, bʉə bənchəŋ gwè mu njaafɛ̀ʼndɛŋNyii ndə məgwè yʉ́ nukə ndə ɔ tʉʼ dàhə.