1 Mbəŋ-ɔŋ Bɔɔ nɔ tʉʼ fʉ̀ʉtə bii nə mbuɔnəbə ghɔŋbə nuʼ jyujyu Klai, mbəŋ-ɔŋ ndə bə ghɔ̀ŋ mbɔ mɔ la lʉ̀ ŋwɔŋ-ɔŋ sê ndʉʉ ndə bʉʼʉ bɛ mɔʼɔ, bɔŋ fyii-ɔ tə́ŋ te bii ndʉʉ ndə bʉʼʉ gòʼ təmə bɛ mɔʼɔ fɛ! 2 Mɔ nɔ tʉʼ fʉ̀ʉtə bii mbɔ bii mə kwɛ̀ŋhə mɔ, mɔ yi gwè nə fyii shʉ́əshʉ́ə tʉ bʉə ndə bɔ̂ŋ tʉʼ ghɔ̀ŋ mbɔ luu-yaʼ ndə baʼa tʉʼ fɔ̀ʼ nə yɔŋ bɛ yi-kəwʉʉnəmbi-yə fɛ.

3 Nɔ bɛ shʉəŋ mbɔ bʉʼʉ nɔ bɛ mu kəwʉʉnəmbi təmə bʉʼʉ bɔŋ kə́ gwúu byuʼu nə bʉə-kəwʉʉnəmbi fɛ. 4 Bʉʼka fɔ-chɔ̂-bə-aʼ kaa yi-kəwʉʉnəmbi-yə fɛ, i bɔŋ bɛ yi-shʉ́əshʉ́ə-yə ndə i gwè hə kəghɔ-Nyii ndə məbyʉ̀hə yəŋ-shʉ́əshʉ́ə-bə ndə bɔ̂ŋ tʉʼ kwɛ̀ŋhə tʉ Nyii ndə i tʉʼ fə́ʼhə wʉʉnəmbikə. 5 Baʼa nɔ tʉʼ leʼ byùutə ŋkwɔʼtə tʉʉ gʉənəkwɛʼtəŋ təmiyɔŋ ndə i tə́nə ndə məbyùutə bʉə ndə məkínə Nyii bɔŋleʼ kɔ́ʼ ndaahə inchəŋ ndə məyʉ́ chu-Klai. 6 Ndʉʉ ndə bii yʉ́ chu-Nyii gɛ̀ kùu nɔ, baʼa bu kɔ́ ŋgʉəʼ tʉ wotəmiyɔŋ ndə ɔ gòʼ təmə kə́ yʉ́ chu-i fɛ.

7 Bii nɔ tʉʼ lɛ́nə yi-yə nubə hə njəŋmbi. B̈ʉə ndə bɔ̂ŋ tʉʼ kie fyii ndə məghɔ̀ŋ mbɔ bɔ̂ŋ bɛ tʉ Klai, chèʼnə mbɔ baʼa nɔ bɛ tʉ ɔŋ haʼ ndə bɔ̂ŋ bɛ. 8 Kaʼ bɛ mbɔ mɔ nɔʼ ŋàʼtə yɔ́ŋyɔ́ŋ te ghʉəʼkə ndə Tiekətʉ kɔ́ tʉ baʼa, i mə gwè nə tʉvyiikə tʉ mɔ fɛ, bʉʼka i nɔ bɛ ndə məbɔ́ bii nə yɔŋ, kaa ndə məshúʼhə bii sê fɛ.

9 Mɔ kʉ̀ʉ ndə məbɛ fi nə mɔ tʉʼ fɛ̀ŋhə bii nə bəŋwɔʼnə-bɔŋ fɛ. 10 Bʉʼka bəbɛʼbʉə tʉʼ ghɔ̀ŋ mbɔ, "Nubə ndə Bɔɔ tʉʼ nyɔ̀ʼ mu bəŋwɔʼnə, nɔ dìe bɔŋleʼ shʉ́ə, bɔŋ ndʉʉ ndə ɔ bɛ bʉʼʉ bɔŋ nə mbəŋ-ɛŋ nɔ, ɔ lʉ́ʉtə, kwəʼ-ɛ bɛ njʉnjʉ." 11 Bʉə-ghɔ̄bə nɔ kie ndə məkínə mbɔ nukə ndə baʼa gìe mu ŋwɔʼnə ndʉʉ ndə baʼa gòʼ təmə bɛ sê fɛ, baʼa nɔ bu fɔ̀ʼ haʼ yɔŋ ndʉʉ ndə baʼa bɛ sê. 12 Kaa mbɔ baʼa tʉʼ buŋ mùutə ndə məfʉ̀ʼ ŋwɔŋ-yaʼ baʼabə bəbɛʼbʉə ndə bɔ̂ŋ tʉʼ kʉ́ʉ ndə mədʉ̀ʼ ŋwɔŋ-yʉə mbɔ bɔ̂ŋ bɛ bʉə jyujyu fɛ. Bʉʼka ndʉʉ ndə bɔ̂ŋ lʉ̀ ŋwɔŋ-yʉə ndə fʉʼkənu kə́ fʉ̀ʼ ŋwɔŋ-yʉə ndəŋ ŋwɔŋ-yʉə, i dʉ̀ʼ mbɔ nɔ byúu ndaa.

13 Baʼa mə ŋàʼtə i tíŋ ntyʉʉ ndə baʼa kie ndə məŋàʼtə fɛ, bɔŋ bu ŋàʼtə haʼ ndə ghʉə fɔ̀ʼ ndə Nyii nɔʼ kə kɔ́ tʉ baʼa, ndə məfɔ̀ʼ nə yɔŋ ndə mbəŋ-yii bɛ muŋgɔ. 14 Bʉʼka baʼa tʉʼ lʉ̀ ŋwɔŋ-yaʼ ghɔʼ yɔ́ŋyɔ́ŋ daa, fi nə baʼa kə gòʼ təmə fɔ̀ʼ gwè dàa tʉ bii fɛ. Bʉʼka baʼa nɔ kə bɛ fəŋ-bʉə-tə ndə baʼa kə lɔ̀ hə dɔdɔ gwè nə ntəŋjyujyu-Klai tʉ bii.

15 Baʼa mə ŋàʼtə nə fɔ̀ʼ ndə bəbɛʼbʉə nɔʼ fɔ̀ʼ tə tíŋ ntyʉʉ ndə Nyii kɔ́ tʉ baʼa fɛ. Baʼa bɔŋ kə́ kwɔ̀ʼtə bə mbɔ məmɔʼfyiihə-ii ndəŋ Nyii bu bìʼ gɛ̀ nə shʉbə, mbɔ bəkɔ fiatə bìʼ ŋɔ́ʼnə tʉ baʼa yɔ́ŋyɔ́ŋ ndə məfɔ̀ʼ fɔʼɔ-Nyii mu bii haʼ ghʉə fɔ̀ʼ ndə Nyii kɔ́ tʉ baʼa, 16 mbɔ baʼa chʉʼ lɔ̀ʼ ntəŋjyujyu mu yəŋbə ndə i gɛ̀ bəshʉ tíŋ bii, təmə kə́ ŋàʼtə bə ndə fɔʼtə ndə bəbɛʼbʉə nɔʼ fɔ̀ʼ ndə ibɛʼ-yə yəŋbə fɛ. 17 Bʉʼka ŋwɔʼnə-Nyii nɔ ghɔ̀ŋ mbɔ, "Wo ndə ɔ kʉ̀ʉ ndə məŋàʼtə, ɔ̈ ŋàʼtə bə haʼ ndə nubə ndə Tiekətʉ nɔʼ fɔ̀ʼ."

18 Bʉʼka kaa wo ndə ɔ kʉ̀ʉ ndə mədʉ̀ʼ ŋwɔŋ-ɛŋ mbɔ bɛ wo jyujyu ndə bə bu bɛ́ŋ ɔŋ fɛ, bɔŋ nɔ bɛ wo ndə Tiekətʉ dʉ̀ʼ mbɔ ɔ bɛ wo jyujyu.