1 Bʉʼka bʉʼʉ kie bəŋkɔʼnə-bɔ̄ŋ, mbʉətə bətieŋkɔŋ-bɔŋ, b̈ʉʼʉ sʉ̀ ŋwɔŋtə-ʉʼʉ ndə nubə ndə bəkɔ i bʉ́əhə mbʉəhə-ʉʼʉ ghɔŋbə lyʉʉhəkə-ʉʼʉ. B̈ʉʼʉ kə́ tòʼ ndə ntɛ ndə i bɛ ŋkʉʉ gɛ̀ kùu bʉʼka faa-Nyii-kə mu fyii-bʉʼʉ.

2 B̈ii ŋɔ́ʼhə fyiihə-ii tʉ baʼa. Baʼa chʉʼ chìi mɔ̀ʼmbɛ tʉ wo fɛ, təmə bɔŋ-nɔʼ-leʼ kwò fɔ-wo-kə fɛ, təmə nɔʼ kwɔ̀ŋhə shʉ-wo fɛ. 3 Mɔ tʉʼ gìe yɔ̄ŋ-yə ndə mədʉ̀ʼ mɔ̀ʼmbɛ-yii fɛ, bʉʼka mɔ nɔʼ kə fəŋ gìe bəshʉ mbɔ baʼa la kie bii mu fyii-baʼa jyujyu, kə baʼa kwú, kə baʼa kə́ chí mbi, bʉʼʉ nɔ bɛ mɔʼɔ. 4 Mɔ nɔ kie fyii shʉ́əshʉ́ə ndəŋ bii bɔŋ-kə́-leʼ ŋàʼtə te bii yɔ́ŋyɔ́ŋ. Bii nɔʼ yá fyii-ɔ yɔ́ŋyɔ́ŋ bɔŋleʼ chìi tʉʉ-ɔ bʉ̀ʉ daa mu ŋgʉəʼ nchəŋnchəŋ-ɛŋ ndə baʼa bɛ muŋgɔ.

5 Buŋ ndʉʉ ndə baʼa kə gwè dàa Masɛdonia, məkáa kə bɛ ghɔ tʉ baʼa fɛ. Bə chɔ́ŋhə baʼa bəviabəvia, ndə baʼa kə́ kie ntɔŋntɔŋ hə kəghɔ-bʉə mbi, faakə kə́ chɔ́ŋhə baʼa mu fyii-baʼa. 6 Bɔŋ Ñyii ndə ɔ yá fyii bʉə ndə fyiihə-ʉə tʉʼ chɔ́ŋhə bɔŋ, nɔ kə yá fyiihə-aʼ tíŋ hə bɔ̂ŋ Tatu ndʉʉ ndə ɔ kə gwè, 7 kaa bə haʼ tíŋ hə bɔ̌ŋ məgwe-e fɛ, bɔŋ tíŋ hə bɔ̌ŋ məyá fyii ndə bii kə yá fyii-i ghɔ. Ndʉʉ ndə ɔ kə shyíi baʼa nə ntɛ ndə bii kə kie fyii ndə mənyíɛ mɔ, ntɛ ndə bii tʉʼ gwía nukə ndə i fyú chíe mɔ, leʼnə ntɛ ndə bii kie mɔ mu fyii-bii, i chìi tʉʉ-ɔ bʉ̀ʉ bìʼ gɛ̀ nə shʉbə yɔ́ŋyɔ́ŋ.

8 Bʉʼka kaʼ buŋ ŋwɔʼnə ndə mɔ kə nyɔ̀ʼ tʉ bii kə byìi tʉʉ-yii, təmə i kə byʉ́ʼ mɔ fɛ. Buŋ ndə nɔ, i nɔ kə fəŋ byʉ́ʼ mɔ, i nɔ bɛ bʉʼka mɔ nɔ kə nyíɛ mbɔ i nɔ kə byʉ́ʼ bii bɔŋ haʼ ndəŋ vaa kəkʉʉ məniʼ. 9 Bɔŋ ndə nɔ, tʉʉ-ɔ nɔ tʉʼ bʉ̀ʉ, kaa bʉʼka tʉʉ-yii kə byʉ́ʼ fɛ, bɔŋ bʉʼka tʉʉ-yii nɔ kə byʉ́ʼ, i chìi bii shìe liɛŋtə-ii ndəŋ bʉ̂ʼtə-ii. Bʉʼka tʉʉbʉə ndə bii kə kie nɔ kə bɛ ntɛ yi-Nyii-yə, nɔ baʼa kə bʉ́əhə bii ndə nubɛʼkə təmiyɔŋ fɛ. 10 Bʉʼka m̃əlíŋ ndə bɛ ntɛ yi-yə ndə Nyii kɔ́, nɔ chìi wo shìe liɛŋ ndəŋ bʉ̂ʼʉ-e, i bɔŋleʼ gwè nə ŋkwaaNyii, təmə tʉʉ-wo mə byʉ́ʼ ndə ntɛ-maa-ɔ̄ŋ fɛ, bɔŋ m̃əlíŋ ndə bɛ yi-kəwʉʉnəmbi-yə, nɔ gwè nə kwu.

11 B̈ii nyíɛ nukə ndə məlíŋ ndə bɛ yi-Nyii-yə nɔʼ gwè nə yɔŋ tʉ bii ghɔŋbə ntɛ fyii ndə məchìi ŋwɔŋ-yii bɛ tʉ́ʉnə bəshʉ bʉə, ntɛ tʉʉbʉə ndə bii kə kie, ntɛ məfàa ndə bii kə fàa, ntɛ fyii ndə bii kə kie ndə mənyíɛ mɔ, bɔŋleʼ kie fyii ndəŋ bəbɛʼbʉə, bɔŋleʼ kie fyii ndə məchɔ́ŋhə wo ndə ɔ chìi bʉ̂ʼʉ. Bii nɔʼ kə dʉ̀ʼ tʉ bʉə mbɔ ghɔkə-i kə bɛ ndəŋ nubə nchəŋnchəŋ-ɛŋ ndə bə kə gwè nə yɔŋ tʉ bii fɛ. 12 Nɔ, kaʼ mɔ kə nyɔ̀ʼ tʉ bii, kaa bʉʼka wo ndə ɔ kə chìi mɔ̀ʼmbɛ fɛ, byuunɔ bʉʼka wo ndə bə chìi mɔ̀ʼmbɛ tʉ ɔŋ fɛ, bɔŋ nɔ bɛ mbɔ bii kínə ntɛ fyii ndə bii kie tʉ baʼa shʉ-Nyii. 13 Nɔ, yɔ̄ŋ-yə nɔʼ yá fyiihə-aʼ yɔ́ŋyɔ́ŋ.

Ndə məbìʼ ndəŋ məkwèʼhə ndə baʼa kə kie, tʉʉtə-aʼ nɔ kə bɛ jyujyu ghɔ ndə Tatu kə kie tʉʉjyu, bʉʼka bii bənchəŋ nɔ kə chìi fyii-i bìʼ bʉ̀ʉ yɔ́ŋyɔ́ŋ. 14 Bʉʼka ntɛ ndə mɔ kə ŋàʼtə tʉ ɔŋ te bii, bii kə mɔ̀ʼ tʉ-vyii-kə-ɔŋ fɛ. Bɔŋ haʼ ndə nubə inchəŋ ndə baʼa kə shyíi bii nə yɔŋ kə fyú shʉəŋ, nɔ bɛ haʼ nɔ ndə məŋàʼtə-yaʼ tʉ Tatu te bii kə fyú shʉəŋ. 15 Nduɔ, ntɛ ŋkʉ̂ʉ ndə ɔ kie tʉ bii nɔ bìʼ shʉ́ə gɛ̀ nə shʉbə ndʉʉ ndə ɔ kwɛ́nə ntɛ ndə bii kə́ yʉ́ chu-i bənchəŋ ghɔŋbə ntɛ ndə bii kə lʉ̀ ɔ nə ŋgwonəkə leʼnə faakə. 16 Tʉʉ-ɔ nɔ tʉʼ bʉ̀ʉ nduɔ, bʉʼka mɔ nɔ kie fyii ndəŋ bii gɛ̀ kùu.