1 Mɔ kie ndə mə-kə́-nyɔ̀ʼnyɔ̀ʼ tʉ bii te ŋkwaa ndə mətə́ŋ kɔ́ tʉ bʉə-Nyii mu Jɛlosalɛŋ fɛ. 2 Bʉʼka mɔ nɔ kínə mbɔ bii nɔ kie fyii ndə məkɔ́, ndə i chìi mɔ kə́ ŋàʼtə te bii tʉ bʉə-Masɛdonia ghɔ̀ŋ mbɔ, "Bii mu Akia la nɔʼ kə shʉ̀tə ŋwɔŋ-yii ndə məkɔ́ lʉ̀ hə shyʉʉnə. Ntɛ fyii ndə bii kie nɔʼ yə̀ŋ bʉə buŋmbi mbɛŋhə."

3 Mɔ bɔŋ kə́ tə́ŋ bələŋ-bɔ̄ŋ, mbɔ məŋàʼtə ndə baʼa kə ŋàʼtə te bii ndəŋ nukə-ɔ̄ŋ mə yi bɛ njʉnjʉ fɛ, mbɔ bii chʉʼ shʉ̀tə ŋwɔŋ-yii haʼ ndə mɔ kə shyíi bəbɛʼbʉə mbɔ bii bu shʉ̀tə. 4 Kaʼ i gòʼ təmə bɛ nɔ fɛ, təmə kaʼ mɔ gwè baʼabə bəbɛʼbʉə Masɛdonia nyíɛ mbɔ bii gòʼ təmə nɔʼ shʉ̀tə ŋwɔŋ-yii fɛ, baʼa kie tʉvyiikə, wo mə buŋ leʼ gìe yii-yə tʉvyiikə fɛ, nə ntɛ fyii shʉ́əshʉ́ə-ɔ̄ ndə baʼa kə kie ndəŋ bii. 5 Nɔ chìi yɔŋ, mɔ kwɔ̀ʼtə mbɔ mɔ nɔ kie ndə məkwèʼhə mbʉ bələŋ-bɔ̄ŋ, bɔ̂ŋ gwè tʉ bii bəshʉ, gwè shʉ̀tə nubə te mbʉ kəkɔ ndə bii nɔʼ kə kɔ̀ʼnə ndʉʉ-i buŋ yi kʉ̀ʼnə, mbɔ i chʉʼ bɛ kɔkə ndə i kóʼ mu fyii-bii, təmə bɛ yi-yə ndə bə kwɛ̀ŋhə bii kwɛ̀ŋhə chɔ fɛ.

6 B̈ii kə́ kwɛ́nə mbɔ wo ndə ɔ shùɔ shʉ̀əŋtə ghɔkə-i, ɔ bu lʉ̀ haʼ i shʉ̀əŋtə. Bɔŋ wo ndə ɔ shùɔ yɔ̀ʼ ghɔkə-i, ɔ bu lʉ̀ haʼ nə ghɔkə iyɔ̀ʼnə. 7 Wotəmiyɔŋ nɔ kie ndə məkɔ́ fɔkə ndə ɔ nɔʼ shʉ̀tə mu fyii-ɔ, təmə kə́ gwía fɛ byuunɔ fi nə bə kwɛ̀ŋhə ɔŋ kwɛ̀ŋhə fɛ, bʉʼka Nyii nɔ kʉ̀ʉ w̃o ndə ɔ kɔ́ nə tʉʉjyu. 8 Bəkɔ Nyii dʉ̀ʼ buuŋjyu yɔ́ŋyɔ́ŋ tʉ a ndə məkɔ́ nchəŋnchəŋ bəfɔ tʉ a ndə a tʉʼ byúu, mbɔ a chʉʼ kie nchəŋnchəŋ bəfɔ ndə a tʉʼ byúu tə buŋ kie yi-yɔ́ŋyɔ́ŋ-yə ndə i bu káa kəghɔ-a ndə məgyʉ̀ə bii bəbɛʼbʉə. 9 Haʼ ndə ŋwɔʼnə-Nyii ghɔ̀ŋ mbɔ,

"Bɔ̂ŋ nɔʼ kɔ́ yɔ̀ʼ ghɔkə-ʉə, bɔ̂ŋ nɔʼ kɔ́ tʉ bʉə-kəbyuu,

fɔʼ-jyujyu-tə-ʉə kʉʉnə kie liʼ-i fɛ."*

10 Nduɔ, Ñyii ndə ɔ kɔ́ ŋgwie tʉ bʉə shùɔ ŋgwie, ghɔŋbə baakə ndə məyú, bu kɔ́ ŋgwie tʉ bii tə bìʼ kɔ́ ndə məshùɔ, ndə məchìi bii kʉ́ʉnə ntɔŋ-fɔ̀ʼ-jyujyu-mə i bìʼ yɔ́ŋ gɛ̀ nə shʉbə.

11 Bii bu fʉ̀ʼ ndə fiatə inchəŋ mbɔ bəkɔ bii kɔ́ yɔ̀ʼ ghɔkə-ii yɔ́ŋyɔ́ŋ. Ndʉʉ ndə baʼa bu lʉ̀ kɔkə-ii gɛ̀ nə yɔŋ tʉ bʉə ndə bɔ̂ŋ byúu nɔ, bʉə buŋmbi bu kə́ kɔ́ ndɔ tʉ Nyii. 12 Bʉʼka fɔʼɔ-ɔ̄, kaa bə haʼ bʉə-Nyii ndə bɔ̂ŋ bɛ Jɛlosalɛŋ ndə bɔ̂ŋ bu kie fɔbə ndə bɔ̂ŋ kə́ byúu fɛ, bɔŋ tʉʉ-yʉə bu leʼ bʉ̀ʉ bɔ̂ŋ kɔ́ ndɔ tʉ Nyii yɔ́ŋyɔ́ŋ.

13 Bɔ̂ŋ bu kə́ kɔ́ kuŋhə tʉ Nyii bʉʼka buuŋjyu-yii tʉ bɔŋ ghɔŋbə bʉə ndə bɔ̂ŋ nɔʼ bɛ́ŋ Nyii bənchəŋ, ndə i dʉ̀ʼ mbɔ bii nɔ tʉʼ kɛŋ yʉ́ mbʉ ntəŋjyujyu-Klai. 14 Bɔ̂ŋ bu kə́ kie fyii ndə mənyíɛ bii bɔŋleʼ gháaNyii tʉ bii bʉʼka fɔŋ buuŋjyu yɔ́ŋyɔ́ŋ Nyii ndə ɔ nɔʼ dʉ̀ʼ tʉ bii. 15 Bɔŋ ndɔ tʉ Nyii ndə kɔkə-ɔ̄ŋ, ndə chu mə nə fʉ̀ʼtə fɛ.