1 Nɔ, bʉʼka baʼa nɔ kie fɔʼɔ-ɔ̄ tíŋ hə ndəŋ tʉvyii-Nyii-kə, baʼa mə nə káa fɛ. 2 Baʼa nɔʼ mɛ̀ʼtə nu-bənyaʼtə-bə inchəŋ ghɔŋbə nu-kətʉvyiinə-bə. Baʼa nɔʼ kɔ́tuu yaʼ ndə nu-mənaa-bə byuunɔ nubə ndə i tʉʼ kíahə ŋgieNyiikə, baʼa bɔŋ kə́ gìe shʉəŋ bəshʉ-Nyii, wotəmiyɔŋ ndə ɔ bɛ wo-shʉəŋ nɔ kínə.

3 Bʉʼka kaʼ ntəŋjyujyu ndə baʼa tʉʼ lɔ̀ʼ gòʼ təmə bɛ isúunə fɛ, təmə i nɔ tʉʼ líi bə hə kəghɔ-bʉə ndə bɔ̂ŋ tʉʼ kwú bɛ́. 4 Sata, nyii-kəwʉʉnəmbi-ɔ̄ nɔʼ fʉ̀əŋtə shʉ bʉə ndə bɔ̂ŋ gòʼ təmə bɛ́ŋ Nyii fɛ, hə ndə mənyíɛ kɛʼɛ ndə i tʉʼ báa tʉ bɔŋ, kɛʼɛ ndə i gwè hə ndə ntəŋjyujyu te məgʉə-Klai, ndə ɔ bɛ kɛŋ finə-Nyii.

5 Bʉʼka nukə ndə baʼa tʉʼ lɔ̀ʼ bɛ te ŋwɔŋtə-aʼ fɛ, baʼa bɔŋ kə́ lɔ̀ʼ ntəŋ mbɔ Jiso Klai la bɛ Tiekətʉ bɔŋleʼ kə́ lɔ̀ʼ mbɔ mbəŋ-yaʼ la bɛ vâafɔʼɔ-bii bʉʼka Jiso. 6 Bʉʼka Nyii ndə ɔ ghɔ̀ŋ mbɔ, "Tə mbʉ kɛʼɛ báa mu njəŋkə," nɔʼ chìi mbʉ kɛʼɛ báa mu fyiihə-ʉʼʉ, mbɔ bʉʼʉ kínə məgʉə-Nyii, ndə i tʉʼ dʉ̀ʼ ndəŋ mbe-shʉ-Jiso Klai.

7 Bʉʼʉ bɔŋ kie lə̂ŋ-ɔ̄ŋ mu kyʉʉ-mbɔŋ-tə, ndə mədʉ̀ʼ mbɔ ghʉəʼkə ndə i chàa ghʉəʼbə inchəŋ nɔ gwè hə kəghɔ-Nyii, kaa hə kəghɔ-bʉʼʉ fɛ.

8 Ŋgʉəʼ nɔ dìenə ndəŋ bʉʼʉ bəviabəvia təmə bɔŋ mə ŋìʼtə bʉʼʉ fɛ, bʉʼʉ kə́ bɛ vɛʼbɛʼ nə tʉ-kwú-kə, təmə mə mɔ̀ʼfyiihə-ʉʼʉ ndəŋ Nyii bɔŋ mə nə mì fɛ. 9 Bə nɔ tʉʼ chɔ́ŋhə bʉʼʉ təmə Nyii bɔŋ nɔʼ ké bʉʼʉ fɛ. Bə kwɔ̀ŋ baʼa kɔ́ sê, təmə bɔŋ yítə baʼa fɛ. 10 Baʼa nɔ tʉʼ tòʼ ghʉ́ʉ nə ŋgʉəʼ mbʉə-baʼa tə i kə́ gɛ̀ ndə kwú haʼ ndə Jiso kə nyíɛ ŋgʉəʼ, kwú mbɔ məchimbi-i chʉʼ dʉ̀ʼ mu mbʉə-baʼa.

11 Bʉʼka bʉʼʉ nɔ chu-kwú bəchibəchi bʉʼka bʉʼʉ tʉʼ fɔ̀ʼ tʉ Jiso, mbɔ məchimbi-Jiso chʉʼ yi dʉ̀ʼ ŋwɔŋ-ɛŋ ghɔ ndəŋ mbɔʼ-mbʉə-yʉʼʉ ndə bəkɔ i kwú. 12 Nɔ, baʼa nɔ bɛ chu-kwú bɔŋ yɔ̄ŋ-yə nɔʼ gwè nə məchímbi tʉ bii.

13 Ŋwɔʼnə Nyii nɔ kə ghɔ̀ŋ mbɔ, "Mɔ nɔ kə kə́ kwə́ʼ bʉʼka mɔ nɔ kə mɔ̀ʼfyii-ɔ ndəŋ Nyii." Mu ntɛ məmɔʼfyii-maa-ɔ̄ŋ baʼa nɔ tʉʼ kwə́ʼ ghɔ bʉʼka baʼa nɔ mɔ̀ʼfyiihə-aʼ ndəŋ Nyii, 14 bʉʼka baʼa nɔ kínə mbɔ Nyii ndə ɔ kə bʉ̀nə kóʼhə Jiso Tiekətʉ, bu bʉ̀nə kóʼhə bʉʼʉbə Jiso ghɔ, gwè nə bʉʼʉ mɔʼɔ bəshʉ ɔ. 15 Nchəŋnchəŋ-ɛŋ nɔ bɛ sii-yii, mbɔ ndʉʉ ndə buuŋjyu-Nyii bu kə́ kə̀ŋ bʉə buŋmbibuŋmbi nɔ, i chʉʼ chìi ntyʉʉ-bʉə bìʼ ndə mə-kə́-kɔ́ ndɔ tʉ Nyii, məgʉ́ə bɔŋleʼ gɛ̀ tʉ Nyii.

16 Nɔ, baʼa mə nə káa fɛ. Buŋ ndə mbɔʼ-mbʉəhə-aʼ tʉʼ kùunə gɛ̀, bɔŋ bə nɔ tʉʼ chìi fyiihə-aʼ ndə məbɛ fefe bəchibəchi. 17 Bʉʼka vaadyʉʼʉ ŋgʉəʼ-yùhə-ɔ̄ŋ ndə i bɛ haʼ nduɔ, nɔ tʉʼ shʉ̀tə məgʉ́ə tʉ bʉʼʉ ndə i dìe təmə liʼ-i ghɔ fɛ təmə bə bɔŋ mə fʉ̀ʼ ndəŋ fɔbɛʼkə təmiyɔŋ fɛ. 18 Bʉʼka bʉʼʉ tʉ́ʼ shʉtə-ʉʼʉ ndəŋ nubə ndə bə tʉʼ nyíɛ fɛ, bʉʼʉ bɔŋ tʉ́ʼ bə ndəŋ nubə ndə bə mə nyíɛ fɛ. Bʉʼka fɔbə ndə bə tʉʼ nyíɛ bu mì, bɔŋ fɔbə ndə bə gòʼ təmə kə́ nyíɛ fɛ, kʉʉnə mì fɛ.