1 Bʉʼka bʉʼʉ nɔ kínə mbɔ kaʼ lɛʼkə-ɔ̄ŋ ndə bɛ mbʉəhə-ʉʼʉ ndə bʉʼʉ tʉʼ chí muŋgɔ kəwʉʉnəmbi-fɛ̄ŋ, bə kùu, bʉʼʉ bu kie njaa ndə i gwè hə kəghɔ-Nyii, njaa təmə bɔ́ŋ woməsʉʉ nə ghɔkə-i fɛ, kə́ bɛ təmə liʼ-i ghɔ fɛ, yuo. 2 Bʉʼka bʉʼʉ nɔ tʉʼ sɔ́ŋtə nduɔ mu kəlɛʼ-fɛ̄ŋ, kə́ mʉ̀ʉ ndə məŋíi mu njaa-yʉʼʉ ndə i bɛ yuo, 3 bʉʼka ndʉʉ ndə bʉʼʉ mɔ̀ʼ njaa-ɔ̄ mbʉə bʉʼʉ nə ndyi, bʉʼʉ mə leʼ bɛ kənchiʼtʉʉ fɛ. 4 Bʉʼka nduɔ ndə bʉʼʉ bɛ mu kəlɛʼ-fɛ̄ŋ nɔ, bʉʼʉ nɔ tʉʼ sɔ́ŋtə, bʉʼka ndə bə kóʼhə bɛʼkə liɛŋ-bʉʼʉ, təmə bɔŋ bɛ mbɔ bʉʼʉ tʉʼ kʉ́ʉ ndə mə shùɔ mbɔʼ-mbʉə kəwʉʉnəmbi-ɔ̄, mbʉə-bʉʼʉ bɛ kənchiʼmbʉə fɛ. Bʉʼʉ bɔŋ kə́ kʉ́ʉ bə ndə məmɔ̀ʼ mbɔʼ-mbʉə yuo mbʉə-bʉʼʉ, kə mbɔ fɔkə ndə bəkɔ i kwú, yi bə̀ŋtə ndə məbɛ fɔkə ndə i mə kwú fɛ. 5 Wo ndə ɔ kə shʉ̀tə bʉʼʉ ndə nukə-ɔ̄ŋ nɔ kə bɛ Nyii ndə ɔ kə kɔ́ mbʉ kəLyʉʉhə tʉ bʉʼʉ ndə mədʉ̀ʼ mbɔ nubə inchəŋ ndə ɔ kə kɔ̀ʼnə tʉ bʉʼʉ, ɔ bu fɔ̀ʼ.

6 Nɔ, b̃ʉʼʉ nɔ kie fyii bʉʼka bʉʼʉ nɔ kínə mbɔ ndʉʉ ndə bʉʼʉ bɛ mu kəlɛʼ ndə bɛ mbʉə, təmə bʉʼʉ bɛ kəyəŋ ndə Tiekətʉ bɛ chɔ fɛ. 7 Bʉʼka məchimbi-yʉʼʉ, nɔ bɛ məmɔ̀ʼfyii ndəŋ Nyii, kaa bə ndəŋ nubə ndə bʉʼʉ tʉʼ nyíɛ fɛ. 8 Haʼ ndə mɔ nɔʼ kə gìe, baʼa nɔʼ kie fyii shʉ́əshʉ́ə, bɔŋ bu kʉ̀ʉ ndə məmɛ̀ʼtə lɛʼkə-ɔ̄ŋ ndə i bɛ mbʉə, bɛ chunjaa ndə bu bɛ baʼabə Tiekətʉ chɔ. 9 Nɔ, kə baʼa bɛ chunjaa-fɛ̄ŋ ndə bɛ mbʉə byuunɔ gòʼ təmə bɛ chunjaa-fɛ̄ŋ fɛ, nukə ndə i bɛ fyii-baʼa nɔ bɛ mbɔ baʼa kɔ́ tʉʉjyu tʉ ɔŋ. 10 Bʉʼka bʉʼʉ bənchəŋ bu tə́nə mu fɛʼɛ bəshʉ Klai mbɔ ɔ chʉʼ lɔ̀ʼ wotəmiyɔŋ haʼ ghʉə ndə i kʉ̀ʼnə ndə fɔ̀ʼ ndə ɔ nə fɔ̀ʼ mu mbɔʼ-mbʉə-fɛ̄ŋ, kə i nə bɛ yi-jyujyu-yə byuunɔ bɛ yi-bʉəbʉə-yə.

11 Bʉʼka bʉʼʉ kínə nukə ndə bɛ yɔ̂ŋ-yə ndə məfàa Tiekətʉ, nɔ, bʉʼʉ nɔ tʉʼ kɔ̀ɔtə ndə məlóʼtə bəbɛʼbʉə. Nyii nɔ kínə baʼa, mɔ bɔŋ kwɔ̀ʼtə mbɔ mbəŋ-yii nɔ kínə baʼa mu ŋkwɔʼtə-yii ghɔ. 12 Baʼa tʉʼ kɔ̀ɔtə ndə mə-bìʼ-dʉ̀ʼ mbɔ baʼa bɛ bʉə jyujyu tʉ bii fɛ, bɔŋ baʼa nɔ tʉʼ kʉ́ʉ kɔ́ luu jyujyu tʉ bii ndə bəkɔ bii kwɛ̀ŋ fyiihə-ii chɔ te baʼa, mbɔ bii chʉʼ kie ŋgiekə ndə məbə̀ŋhə tʉ bʉə ndə bɔ̂ŋ tʉʼ kwɛ̀ŋ fyiihə-ʉə bʉʼka nubə ndə bɔ̂ŋ tʉʼ nyíɛ, təmə kə́ kwɛ̀ŋ bʉʼka nubə ndə i bɛ mu fyii fɛ. 13 Bʉʼka, kaʼ baʼa kə́ búu, baʼa kə́ búu ndə məgwè nə məgʉ́ə tʉ Nyii. Baʼa bɔŋ bɛ nə ndaahə-aʼ itə́nə, i bɛ ndə sii-yii. 14 Bʉʼka nɔ tʉʼ dʉ̀ʼ ŋkʉ̂ʉ-Klai dʉ̀ʼ fia tʉ baʼa nduɔ ndə baʼa chèʼnə mbɔ mbyu wo-imɔʼ kə kwú yie bʉə bənchəŋ, i nɔ dʉ̀ʼ mbɔ bʉə bənchəŋ nɔʼ kwú. 15 Ɔ nɔ kə kwú yie bʉə bənchəŋ mbɔ bʉə ndə bɔ̂ŋ tʉʼ chí mbi mə leʼ kə́ chí mbi ndə ŋkʉʉnə tʉʉ-yʉə fɛ, bɔ̂ŋ kə́ chí mbi bə ndə ŋkʉʉnə tʉʉ-Klai ndə ɔ kə kwú yie-bɔŋ bʉ̀nə kóʼ.

16 Lʉ̀ hə vɛʼ-ghɔ̄ gɛ̀ nə shʉbə, ndʉʉmɛ, mbəŋ-yaʼ leʼbíe lɛ́nə wo ndə wo-kəwʉʉnəmbi lɛ́nə fɛ. Buŋ ndə bʉʼʉ fəŋ kə lɛ́nə Klai ndə ntɛ ndə wo-kəwʉʉnəmbi bu lɛ́nə ɔŋ, bɔŋ nduɔ bʉʼʉ bieleʼ lɛ́nə ɔŋ nɔ fɛ. 17 Yɔ̄ŋ-yə nɔ dʉ̀ʼ mbɔ wo ndə ɔ nɔʼ fúu ŋwɔŋ-ɛŋ ghɔŋbə Klai nɔ bɛ wo fefe nduɔ. Nduɔŋ nuʼ nɔʼ tíŋ, nuʼ fefe nɔʼ gwè. 18 Nɔ chìi Nyii chìi nubə-ɔ̄ŋ inchəŋ, ndə ɔ lìʼ ntuu-yʉʼʉ bɔŋ tíŋ hə bɔ̌ŋ Klai, bɔŋleʼ kɔ́ fɔ̀ʼ tʉ bʉʼʉ ndə mə-kə́-liʼ ntuu. 19 I nɔ bɛ mbɔ Nyii nɔ kə́ lìʼ ntuu-yʉəbə wʉʉnəmbikə tíŋ hə bɔ̌ŋ Klai, təmə leʼ kə́ súu bʉ̂ʼtə-ʉə ndə bɔ̂ŋ kə fɔ̀ʼ fɛ, kɔ́ mbʉ ntəŋ ndə ɔ kə lìʼ ntuu-kəwʉʉnəmbi nə yɔŋ mu kəghɔ-bʉʼʉ. 20 Ndʉʉghɔfii, bʉʼʉ nɔ bɛ ntyukətʉ Klai, Nyii kə́ fʉ̀ʉtə wʉʉnəmbikə tíŋ hə bɔ̌ŋ bʉʼʉ. Baʼa nɔ tʉʼ fʉ̀ʉtə bii yie-Klai mbɔ bii lìʼ ntuu yiibə Nyii. 21 Bʉʼka bʉʼʉ, Nyii nɔ chìi ɔ, ɔ bɛ wo-bʉ̂ʼʉ təmə kínə bʉ̂ʼʉ fɛ, mbɔ bʉʼʉ chʉʼ bɛ ndyʉndyʉ tʉ Nyii ndʉʉ ndə bʉʼʉ fúu ŋwɔŋ-yʉʼʉ bʉʼʉbə Klai.