1 Mɔ nɔ kie ndə mə-kə́-bìʼ ŋàʼtə gɛ̀ nə shʉbə. Təmə i bɔŋ buŋ kie siibɛʼ ndə məkɔ́ tʉ mɔ fɛ, mɔ bu gɛ̀ nduɔ ndə njəŋhə ndə i chí mɔ təmə mɔ kə́ bɛ́ŋbɛ́ŋ fɛ ghɔŋbə nubə ndə Tiekətʉ kə kɛ̀ʼ tʉ mɔ. 2 Mɔ nɔ kínə wobɛʼ ndə ɔ nɔʼ kə bɛ́ŋ Klai, ndə i nɔʼ tíŋ ŋgʉʼhə njuɔ kwi nə wuŋ ndə bə lʉ̀ ɔ gɛ̀ nə nɔŋ, tə gɛ̀ dàa liʼ yuo, kə ɔ kə bɛ nə mbʉə-e, kə ɔ kə gòʼ təmə bɛ nə mbʉə-e fɛ, təmə mɔ kínə fɛ, nɔ bɛ Nyii ndə ɔ kínə. 3 Mɔ bɔŋ kínə mbɔ bə nɔ kə lʉ̀ wo-ɔ̄ gɛ̀ nə nɔŋ yuo, kə ɔ kə bɛ nə mbʉə-e, kə ɔ kə gòʼ təmə bɛ nə mbʉə-e fɛ, təmə mɔ kínə fɛ, nɔ kínə Nyii. 4 Ɔ yʉ́ nubə təmə bə mə nə mɛ̀ʼtə woməsʉʉ fʉ̀ʼtə fɛ, təmə woməsʉʉ mə kwə́ʼ fɛ.

5 Mɔ bu ŋàʼtə bʉʼka wo-ɔ̄, bɔŋ kaʼ bɛ ndə mbəŋ-ɔŋ, mɔ mə ŋàʼtə fɛ, yaʼkɛŋ mbɔ mɔ ŋàʼtə te nubə ndə mɔ lʉ́ʉtə chɔ. 6 Kaʼ mɔ buŋ kʉ̀ʉ ndə məŋàʼtə, mɔ bɛ bə nɔ̌ʼ fɛ, bʉʼka mɔ bu kə́ gìe shʉəŋ. Təmə mɔ bɔŋ kʉ̀ʉ ndə məchìi nɔ fɛ, bʉʼka mɔ kʉ̀ʉ mbɔ wo yi kɔ́ kuŋhə tʉ mɔ tə chàa nukə ndə ɔ tʉʼ nyíɛ mu məchimbi-mɔ leʼnə ŋgiekə ndə mɔ tʉʼ kwə́ʼ chu-mɔ fɛ. 7 Bɔŋ ndə məyá mɔ tʉ́ʼ bʉʼka mɔ mə kóʼhə ŋkwɔŋ liɛŋ-mɔ daa, ndə fɔŋ bənu chíechu ndə mɔ kə nyíɛ, bə kɔ́ njʉʉ liŋnə mbʉə-mɔ ndə i bɛ nə wontəŋ-Sata ndə məgwúu mɔ yá mɔ tʉ́ʼ bʉʼka mɔ mə-kə́-ŋàʼtə.

8 Mɔ fʉ̀ʉtə Tiekətʉ vɛʼ tia te yɔ̄ŋ-yə mbɔ ɔ fyúhə mbʉə-mɔ. 9 Ɔ bɔŋ ghɔ̀ŋ tʉ mɔ mbɔ, "Buŋjyu-ɔ nɔ bɛ nukə ndə i yɔ́ŋ daa tʉ a ndə məkie, bʉʼka g̃hʉəʼkə-ɔŋ nɔ dʉ̀ʼ ŋwɔŋ-ɛŋ gɛ̀ kùu ndə yəŋbə ndə wo lʉ́ʉtə chɔ." Ndʉʉmɛ, mɔ bu bìʼ ŋàʼtə yɔ́ŋyɔ́ŋ daa nə tʉʉjyu ndə nubə ndə mɔ lʉ́ʉtə chɔ, mbɔ bə chʉʼ nyíɛ ghʉəʼ-Klai-kə mu məchímbi mɔ. 10 Bʉʼka Klai ndʉʉmɛ, tʉʉ-ɔ nɔ tʉʼ bʉ̀ʉ ndə nubə ndə mɔ lʉ́ʉtə chɔ, nchɛŋhə, mu mbi shʉ́əshʉ́ə, məchɔ́ŋhə ndə bə tʉʼ chɔ́ŋhə mɔ leʼnə mu ŋgʉəʼ. Bʉʼka ndʉʉ ndə mɔ lʉ́ʉtə, ndʉʉmɛ mɔ nɔ shʉ́ə.

11 M̃ɔ nɔ chìi nubə nə nɔ̌ʼ! Nɔ kə kwɛ̀ŋhə bii kwɛ̀ŋhə mɔ ndə mə-kə́-chìi nɔ, bʉʼka nɔ kie bii ndə mədʉ̀ʼ tʉ bəbɛʼbʉə mbɔ mɔ bɛ wo jyujyu. Bʉʼka kaʼ mɔ buŋ gòʼ təmə bɛ fɔkə fɛ, mɔ tə́ʼ tə chàa bəlɔntəŋNyii-bɔ̄ŋ ndə bɔ̂ŋ lʉ̀ ŋwɔŋ-yʉə ghɔʼ daa nɔ fɛ. 12 Bʉʼka bə nɔ kə dʉ̀ʼ cheʼ-ŋkɛŋ-lɔntəŋNyii-bə mu bii nə məyá fyii yɔ́ŋyɔ́ŋ, bə dʉ̀ʼ nə nubəcheʼbə, nə nuchíechubə leʼnə fɔʼkwɛʼtəŋtə. 13 Bɛ ka bɛʼkə ndə mɔ kə chìi mu bəbɛʼbəchɔshi təmə chìi mu bii fɛ, yaʼkɛŋ mbɔ mɔ kə bɛ bɛʼkə tʉ bii ndə nu-kyʉə-kə fɛ? B̈ii bɔŋ sʉ̀fyii-yii ndəŋ bʉ̂ʼʉ-ɔ-yɔ̄ŋ!

14 B̈ii yʉ́! Nɔ bɛ vɛʼ tia nɔ ndə mɔ tʉʼ shʉ̀tə ŋwɔŋ-ɔŋ ndə məgwè tʉ bii. Təmə mɔ bɔŋ kʉ̀ʉ bɛ bɛʼkə tʉ bii fɛ. Bʉʼka mɔ tʉʼ kʉ́ʉ fɔkə ndə bɛ yi-yə fɛ, mɔ nɔ tʉʼ kʉ́ʉ bə mbəŋ-yii. Bʉʼka mbɔ vâambuɔ kie ndə məchúɔ tʉ́ʼtə tʉ bətie-bʉə fɛ, bɔŋ kie bətie-bʉə ndə məchúɔ tʉ́ʼtə tʉ bɔŋ. 15 Tʉʉ-ɔ nɔ bu bʉ̀ʉ ndə məbɛ́ fɔbə inchəŋ ndə mɔ kie ghɔŋbə məchimbi-ɔ ndə məkwáa bii. Kaʼ mɔ kʉ̀ʉ bii yɔ́ŋyɔ́ŋ, i dʉ̀ʼ mbɔ bii bu kʉ̀ʉ mɔ məniʼ mɛ?

16 Bii nɔ bɛ́ŋ mbɔ mɔ la kə bɛ bɛʼkə tʉ bii fɛ. Bɔŋ bəbɛʼbʉə bu kə́ ghɔ̀ŋ mbɔ mɔ la kə́ chìi mənaa, fə́ʼhə bii nə ndaa. 17 Mɔ kə kwò bii tíŋ hə bɔ̌ŋ bʉə ndə mɔ kə tə́ŋ tʉ bii mɛ? 18 Mɔ nɔ kə kwèʼhə Tatu ndə məgɛ̀, tə́ŋ ɔŋ ghɔŋbə ibɛʼ-yə liŋ-yaʼ mu njaa-Nyii. Ɔ kə kwò bii mɛ? Baʼa ɔ kə fɔ̀ʼ haʼ nə ntɛ fyii-maa-ɔ̄ŋ, kə́ lʉ̀ haʼ mbʉ ntɛ fia fe?

19 Bii tʉʼ kwɔ̀ʼtə lʉ̀ hə ndʉʉ mbɔ baʼa tʉʼ túunə bə tʉkə-aʼ hə kəghɔ-bii mɛ? Baʼa nɔ tʉʼ kwə́ʼ tʉ bii, kə́ bɛ bəshʉ-Nyii nə vâafɔʼɔ-Klai. Nchəŋnchəŋ bənu ndə baʼa tʉʼ kwəʼ kə́ bɛ ndə məbɔ́ bii, mbʉətə bətieŋkɔŋ-baʼa. 20 Bʉʼka mɔ nɔ tʉʼ fàa mbɔ ndʉʉbɛʼ mɔ yi gwè nyíɛ bii təmə bii kə́ bɛ bʉə ndə mɔ kə́ kʉ́ʉ mbɔ bii bɛ fɛ, mbəŋ-yii nyíɛ mɔ təmə mɔ kə́ bɛ wo ndə bii kə́ kʉ́ʉ mbɔ mɔ bɛ fɛ. Mɔ nɔ tʉʼ fàa mbɔ ndʉʉbɛʼ chyuutə, bəfyuʼ, tʉʉbʉə, shʉnə, məbʉ́əhə-yie, mətíi yie-bəbɛʼbʉə bɔ̌ŋbɔ̌ŋ, ŋaʼtəkə leʼnə mbyuutəmbyuutə bu bɛ mu bii. 21 Mɔ nɔ tʉʼ fàa mbɔ ndʉʉ ndə mɔ bu gwè mu bii nɔ, Nyii bìʼ shúʼhə mɔ sê bəshʉ bii, mɔ kie ndə məgwía bʉə ndə bɔ̂ŋ nɔʼ kə fəŋ chìi bʉ̂ʼʉ bəshʉ təmə nɔʼ shìe liɛŋtə-ʉə ndəŋ nu-nyàatəŋwɔŋ-bə, bəsəŋ leʼnə nu-kətʉvyiinə-bə ndə bɔ̂ŋ nɔʼ kə fɔ̀ʼ fɛ.