1 Bəliŋ-baʼa, baʼa nɔ tʉʼ kʉ́ʉ mbɔ bii kínə ntyʉʉ buuŋjyu-Nyii ndə ɔ kə dʉ̀ʼ mu bəchɔshi ndə i bɛ Masɛdonia. 2 Bə nɔʼ kə yúotə bɔŋ nə ŋgʉəʼ shʉ́əshʉ́ə ndə bɔ̂ŋ kə tíŋ hə muŋgɔ, bɔŋ tʉʉjyu yɔ́ŋyɔ́ŋ ndə bɔ̂ŋ kə kie, chìi bɔ̂ŋ kɛŋ kɔ́ yɔ̀ʼ ghɔkə-ʉə daa, buŋ ndə bɔ̂ŋ kə bɛ mu fɔŋ kəbyuu yɔ́ŋyɔ́ŋ ndə i tíŋ ghʉəʼkə-ʉə.

3 Bʉʼka, bəkɔ mɔ nú gwù mbɔ bɔ̂ŋ nɔ kə kɔ́ ghʉə ndə bəkɔ bɔ̂ŋ kɔ́, tə buŋ kɔ́ i tíŋ, ndə ŋkʉʉnə tʉʉ-yʉə. 4 Bɔ̂ŋ fʉ̀ʉtə baʼa shʉ́əshʉ́ə mbɔ bəkɔ bɔ̂ŋ kie fia ndə məkwáa ndə məshúʼhə bɛʼkə mbəʼ bʉə-Nyii mɛɛ. 5 Bɔ̂ŋ kə chìi ndə ntɛ ndə baʼa kə buŋ kə́ kwɔ̀ʼtə fɛ, bɔ̂ŋ fəŋ kɔ́ ŋwɔŋ-yʉə tʉ Tiekətʉ ndʉʉmɛ, leʼ kɔ́ ŋwɔŋ-yʉə tʉ baʼa ndə ntɛ ndə Nyii kə kʉ̀ʉ mbɔ i bɛ.

6 Nɔ, baʼa kwèʼhə Tatu mbɔ ndə ɔ nɔʼ kə chʉ́ʉhə fɔʼɔ-ɔ̄, ɔ̈ bìʼ gɛ̀ nə shʉbə, chìi b̈ii mìʼtə dʉ̀ʼ fɔ̀ʼ buuŋjyu-ɔ̄ mu bii. 7 Bɔŋ ndə bii lʉ̀ shʉbə ndə nubə buŋmbi nə məmɔ̀ʼfyii ndəŋ Nyii, nə kwə́ʼ, nə ndaa, nə ntɛ fyii ndə bii kie ndə məkwáa ghɔŋbə ŋkʉ̂ʉ-yii tʉ baʼa, mɔ nɔ tʉʼ kʉ́ʉ mbɔ bii bìʼ lʉ̀ shʉbə ndə fɔ̀ʼ buuŋjyu-ɔ̄ yɔ́ŋyɔ́ŋ.

8 Mɔ tʉʼ gìe yɔ̄ŋ-yə ndə məkàhə bii fɛ, bɔŋ mɔ nɔ tʉʼ kʉ́ʉ yúotə ŋkʉ̂ʉ-yii mbɔ bɛ ŋkɛŋ-ɛŋ mɛɛ, kə fʉ̀ʼ ndəŋ fyii ndə bəbɛʼbʉə kie ndə məkwáa. 9 Bʉʼka bii nɔ kínə ntɛ buuŋjyu ndə Jiso Klai Tiekətʉ-yʉʼʉ kə kie, mbɔ buŋ ndə ɔ kə bɛ wo-kəfʉʼ, ɔ lʉ̀ ŋwɔŋ-ɛŋ ndə wokəbyuu bʉʼka bii, mbɔ bii chʉʼ bɛ bʉə-kəfʉʼ tíŋ hə ndəŋ byuukə-i.

10 Nɔ, nɔʼ mɔ mɔ̀ʼ yɔŋ-yə tʉ̂ʼ te nukə-ɔ̄ŋ, i nɔ bu bʉ̀ʉ tʉ bii ndə mìʼtə nukə ndə bii kə chʉ́ʉhə lʉ̀ hə shyʉʉnə. Nɔ kə bɛ shyʉʉnə, bii bɛ fəŋ-bʉə-tə ndə bii kə kʉ̀ʉ ndə məkɔ́, bii bɔŋleʼ bɛ fəŋ-bʉə-tə ndə bii kə chʉ́ʉhə ndə məkɔ́. 11 Nɔ, b̈ii mìʼtə fɔʼɔ-ɔ̄ ghɔ, mbɔ ntɛ fyii ndə bii kə kʉ̀ʉ ndə məkɔ́ chʉʼ tòʼ ghɔŋbə məkɔ́ mbʉ kəfɔ ndə bii kie ndə məkɔ́. 12 Kaʼ wo kie mbʉ fyii ndə məkɔ́, Ñyii bɛ́ŋ kɔkə-i bʉʼka mbʉ kəfɔ ndə ɔ kie ndə məkɔ́, kaa bʉʼka fɔkə ndə ɔ gòʼ təmə kie ndə məkɔ́ fɛ. 13 Mɔ tʉʼ ghɔ̀ŋ mbɔ bɛʼ-bəbɛʼbʉə-kə kie ndə məyùhə, bii bɛ̀ʼ yi-dìe-yə fɛ, bɔŋ ndə məchìi nubə i bɛ ndyʉndyʉ. 14 Nduɔ ndə bii kie yɔ́ŋyɔ́ŋ nɔ, bəkɔ bii kwáa bʉə ndə bɔ̂ŋ gòʼ təmə kie fɛ, kʉ̂ʉ leʼ bɛ ndʉʉ ndə bɔ̂ŋ bu kie yɔ́ŋyɔ́ŋ nɔ, bɔ̂ŋ kwáa bii, mbɔ nubə chʉʼ bɛ ndyʉndyʉ. 15 Haʼ ndə ŋwɔʼnə-Nyii ghɔ̀ŋ mbɔ,

"Wo ndə ɔ kə byíi yɔ́ŋyɔ́ŋ kie fɔkə ndə i bə́ʼ fɛ,

wo ndə ɔ kə byíi məniʼ kə byúu fɔkə fɛ."*

16 Bɔŋ ndɔ tʉ Nyii ndə ɔ kə kɔ́ fyii tʉ Tatu te bii, kə́ bɛ haʼ ntɛ ndə baʼa kie tʉ bii. 17 Ɔ kə bɛ́ŋ bə haʼ nukə ndə baʼa kə kwèʼhə ɔŋ ndə məfɔ̀ʼ fɛ, ɔ bɔŋ nɔ kə kie fyii nə mbəŋ-ɛŋ ndə məgwè tʉ bii. 18 Baʼa nɔ tʉʼ tə́ŋ Tatu ghɔŋbə ibɛʼ-yə liŋ-yʉʼʉ, ndə bəchɔshi inchəŋ tʉʼ tíi yie-e jyujyu ndə ntɛ ndə ɔ tʉʼ lɔ̀ʼ ntəŋjyujyu. 19 Bɔŋ lí haʼ yɔŋ fɛ, bəchɔshi nɔ kə chóʼ ɔ ndə mətòʼ baʼa bɔŋ, ndə baʼa tʉʼ gyʉ̀ə kɔ-buuŋjyu-kə-ɔ̄ŋ, kə́ bɛ fɔ̀ʼ ndə i tʉʼ kɔ́ kuŋhə tʉ Tiekətʉ nə mbəŋ-ɛŋ bɔŋleʼ kə́ dʉ̀ʼ ntɛ fyii jyujyu ndə baʼa kie.

20 Baʼa bɔŋ kə́ láa bʉʼka bʉə mə yi tyú yie kətʉ-baʼa te ntɛ ndə baʼa tʉʼ gyʉ̀ə kɔ-yɔ̀ʼ-kəghɔ-kə-ɔ̄ŋ. 21 Fyiihə-aʼ nɔ bɛ ndə məfɔ̀ʼ nukə ndə i bɛ kʉ̀ʼnə, kaa haʼ bəshʉ Tiekətʉ fɛ, bɔŋ bəshʉ bʉəməsʉʉ ghɔ.

22 Nɔ, baʼa nɔ tʉʼ tə́ŋ ibɛʼ-yə liŋ-yaʼ ghɔŋ bɔŋ tʉ bii ndə baʼa nɔʼ yúotə ɔŋ təvɛʼtəvɛʼ, nyíɛ mbɔ ɔ nɔ kie fyii ndə məkwáa ndə nubə buŋmbi. Bɔŋ nduɔ ndə ɔ kie fyii shʉ́əshʉ́ə yɔ́ŋyɔ́ŋ ndəŋ bii nɔ, ɔ nɔ buŋ bìʼ kie fyii yɔ́ŋyɔ́ŋ ndə məkwáa. 23 Ndə Tatu, ɔ nɔ bɛ wo ndə baʼa ɔ tʉʼ fɔ̀ʼ mɔʼɔ, kə́ tùo fɔ̀ʼ ndə məkwáa bii, bɔŋleʼ ndə bəbɛʼbəliŋ-baʼa ndə ghɔŋ bɔŋ tʉʼ gɛ̀, nɔ bɛ bʉə ndə chɔshi kə chóʼ bɔŋ tə́ŋ, kə́ bɛ bʉə ndə məkɔ́ məgʉ́ə tʉ Klai. 24 Nɔ, b̈ii dʉ̀ʼ ŋkʉ̂ʉ-yii tʉ bɔŋ, bɔŋleʼ dʉ̀ʼ tʉ bəchɔshi inchəŋ mbɔ məŋàʼtə-yaʼ te bii nɔ bɛ kʉ̀ʼnə.