1 Mɔ nɔ kwɔ̀ʼtə mbɔ bii bu ghʉ́əhə fyiihə-ii ndə bənɔ̌ʼɔ-bɔŋ məniʼ. Bii yá fyiihə-ii ndə mɔ. 2 Mɔ nɔ tʉʼ túunə ntɛ bəfyuʼ ndə Nyii kie te bii bʉʼka mɔ nɔʼ kɔ̀ʼnə ndə məkɔ́ bii nə ŋkɛŋ vaaŋgwɔŋ woke haʼ tʉ woləŋ imɔʼ ndə bɛ Klai. 3 Mɔ bɔŋ kə́ fàa mbɔ nə yɔ kə fə́ʼhə If, nə mənaamə-i, ndʉʉbɛʼ, bə bu fə́ʼhə ndaahə-ii bii mɛ̀ʼtə məkɔ́ fyiihə-ii tʉ Klai təmə kwɔtəkə fɛ. 4 Bʉʼka tʉʉ-yii nɔ tʉʼ bʉ̀ʉ ndə məmɛ̀ʼtə fia tʉ ibɛʼ-yə wo ndə ɔ gwè tʉ bii, kə́ kwə́ʼ te Jiso kədɔŋ təmə bɛ yi-yə ndə baʼa kə kwə́ʼ tʉ bii te ɔ fɛ, tʉʉ-yii bɔŋleʼ kə́ bʉ̀ʉ ndə məbɛ́ŋ lyʉʉhə-kədɔŋ-kə ghɔŋbə ntəŋjyujyu kədɔŋ ndə i bɛ ŋkʉʉ ndə Lyʉʉhəkə ghɔŋbə ntəŋjyujyu ndə baʼa kə fəŋ gwè nə yɔŋ tʉ bii.

5 Təmə mɔ bɔŋ lʉ̀ ŋwɔŋ-ɔŋ mbɔ mɔ tə́ʼ tə chàa bəlɔntəŋ-bɔ̄ŋ ndə bɔ̂ŋ lʉ̀ ŋwɔŋ-yʉə ghɔʼ daa nɔ fɛ. 6 Kaʼ mɔ buŋ gòʼ təmə kínə kwə́ʼ fɛ, təmə mɔ bɔŋ byúu bɛ́ ndaa fɛ. Ndə shʉəŋ, baʼa nɔʼ chìi yɔ̄ŋ-yə i bɛ itʉ́ʉnə tʉ bii ndə fiatə inchəŋ.

7 Byuunɔ, bɛ nu-bʉə-kə ndə mɔ kə chìi ndə məlʉ̀ ŋwɔŋ-ɔŋ sê mbɔ bə chʉʼ kóʼhə bii ghɔʼ ndʉʉ ndə mɔ kə kwə́ʼ ŋgieNyiikə tʉ bii təmə lɔʼɔbə fɛ mɛ? 8 Mɔ nɔ kə lʉ́ʼ hə kəghɔ bəbɛʼbəchɔshi bʉʼka mɔ nɔ kə́ fí ŋkwaa kəghɔ-bɔŋ ndə məfɔ̀ʼ tʉ bii. 9 Bɔŋ ndə mə-leʼ-bìʼ chɔ, ndʉʉ ndə mɔ kə bɛ bʉʼʉ, mɔ kə bɛ mu kəbyuu, təmə bɔŋ kóʼhə bɛʼkə mbəʼ wotəmiyɔŋ fɛ, bʉʼka bʉə-Nyii ndə bɔ̂ŋ kə gwè hə Masɛdonia nɔ kə́ kɔ́ fɔbə ndə m̃ɔ kə́ byúu. Nɔ mɔ nɔʼ kɔ́tuu mbɔ mɔ kʉʉ bɛ bɛʼkə tʉ bii fɛ təmə bɔŋ kʉʉ nə leʼ bɛ bɛʼkə tʉ bii fɛ. 10 Ndə məgìe shʉəŋ-ɔŋ kə́ fàa Klai, wo mə nə chíe mɔ ndə mə-kə́-ŋàʼtə te yɔ̄ŋ-yə mu bie-Akia-hə fɛ. 11 Mɔ tʉʼ gìe yɔ̄ŋ-yə bʉʼka mɔ kʉ̀ʉ bii fɛ mɛ? Nyii nɔ kínə mbɔ mɔ nɔ kʉ̀ʉ bii.

12 Mɔ bɔŋ bu kə́ bìʼ fɔ̀ʼ nukə ndə mɔ nɔʼ kə́ fɔ̀ʼ kə́ gɛ̀ nə shʉbə. Yɔ̄ŋ-yə bu chíe chu bʉə ndə bɔ̂ŋ tʉʼ kʉ́ʉ fia ndə məŋàʼtə kə́ ghɔ̀ŋ mbɔ fɔʼɔ-yʉə ndə bɔ̂ŋ tʉʼ fɔ̀ʼ bɛ haʼ ndyʉndyʉ ghɔŋbə yi-yə ndə baʼa tʉʼ fɔ̀ʼ. 13 Bʉʼka ntɛ bʉə-bɔ̄ŋ nɔ bɛ bəlɔntəŋNyii nə mbii, bʉə-fɔʼɔ ndə bɔ̂ŋ tʉʼ fə́ʼhə shʉ, kə́ làhə shʉ mbɔ bɔ̂ŋ la bɛ bəlɔntəŋ-Klai. 14 Təmə bɔŋ bɛ ŋkwɔnəntɔ kənu fɛ, bʉʼka S̃ata nə mbəŋ-ɛŋ nɔ làhə shʉ mbɔ ɔ la bɛ wontəŋNyii báanə. 15 Nɔ, i mə bɛ ŋkwɔnəntɔ kənu fɛ kaʼ vâafɔʼɔ-bi ghɔ kə làhə shʉ nə vâafɔʼɔ ndə bɔ̂ŋ bɛ ndyʉndyʉ. Ndyiʼtə-i bu bɛ mbɔ njɔhə-ʉə bu bɛ haʼ ghʉə ndə fɔʼtə-ʉə kə bɛ.

16 Nɔʼ m̈ɔ bìʼ líʼnə, kə wo mə kwɔ̀ʼtə mbɔ mɔ bɛ nɔ̌ʼ fɛ. Kaʼ bii bɔŋ kwɔ̀ʼtə nɔ, b̈ii lʉ̀ mɔ nə nɔ̌ʼ, mbɔ mɔ chʉʼ ŋàʼtə ghɔ məniʼ. 17 Nukə ndə mɔ tʉʼ gìe te ŋaʼtə-fyii-shʉ́əshʉ́ə-kə-ɔ̄ŋ kaa yi ndə Tiekətʉ kʉ̀ʉ fɛ, mɔ nɔ tʉʼ kwə́ʼ nə nɔ̌ʼ. 18 Bɔŋ bʉʼka bʉə buŋmbi tʉʼ ŋàʼtə ndə ntɛ məŋàʼtə bʉə-kəwʉʉnəmbi, mbəŋ-ɔŋ ghɔ bu ŋàʼtə. 19 Mbəŋ-yii ndə b̈ii láa daa, nɔ tʉʼ bɛ́ŋ bənɔ̌ʼɔ nə tʉʉjyu! 20 B̃ii nɔ ghʉ́əhə fyiihə-ii ndʉʉ ndə wo chìi bii ndə fʉə, byuunɔ fí fɔbə ndə bii kie inchəŋ, byuunɔ nɔ́ chu-bii, byuunɔ kə́ gìe hə kətʉ-bii ndə nubə inchəŋ, byuunɔ gwúu ghɔkə shʉ-bii. 21 Tʉkə-ɔŋ tʉʼ vyíi, mɔ nɔ kie ndə məgìe, baʼa nɔ kə lʉ́ʉtə ndə məfɔ̀ʼ ntɛ-kənu-maa-ɔ̄ŋ.

Bɔŋ nukə təmiyɔŋ ndə wo kie fyii shʉ́əshʉ́ə ndə məŋàʼtə chɔ, mbəŋ-ɔŋ ghɔ nɔ kie fyii shʉ́əshʉ́ə ndə məŋàʼtə chɔ (mɔ nɔ tʉʼ bìʼ kwə́ʼ nə nɔ̌ʼ). 22 Bɔ̂ŋ bɛ bʉə-Hibulu mɛ? Mbəŋ-ɔŋ ghɔ nɔ bɛ wo Hibulu. Bɔ̂ŋ bɛ bʉə-Isilɛ mɛ? Mbəŋ-ɔŋ ghɔ nɔ bɛ wo-Isilɛ. Bɔ̂ŋ bɛ ŋgwie-wo Ablahaŋ mɛ? Mbəŋ-ɔŋ ghɔ nɔ bɛ ŋgwie-wo Ablahaŋ. 23 Bɔ̂ŋ bɛ vâafɔʼɔ-Klai mɛ? Mbəŋ-ɔŋ nɔ bɛ ŋkɛŋ-ɛŋ tə chàa bɔŋ. Mɔ nɔ tʉʼ kwə́ʼ nə wokəyɔʼ búu, bɔŋ kə́ kwɔ̀ŋ ŋwɔŋ-ɔŋ tə chàa bɔŋ gɛ̀ tə bɛ́. Mɔ nɔʼ ŋíi chaŋ təvɛʼtəvɛʼ tə chàa bɔŋ, bə gwúu mɔ təmə bə mə súu ntyʉʉ-i fɛ, bɔŋleʼ kə́ kə́ŋhə mbʉə kwú təvɛʼtəvɛʼ. 24 Bʉə-Juu nɔ kə gwúu mɔ vɛʼ taa. Vɛʼ mɔʼɔ kə́ bɛ ŋgwɔŋhə njuɔ bɔmɔʼ nə wuŋ tia ndə bə chìi nə gwo. 25 Bə gwúu mɔ nə ŋgwɔŋ kətyʉ vɛʼ tia. Túŋtə mɔ nə ŋgoʼhə vɛʼ mɔʼɔ. Buukwɛʼtəŋbə ŋkʉʉŋkʉʉ chètə mu muu nə mɔ chɔ vɛʼ tia, mbyu ndʉʉbətyuʼ ghɔŋbə ndʉʉnəchî mɔ chí ntəŋntəŋ muukwɛʼtəŋmə kə́ lʉ́ʉnə ndəŋ kəfɔ. 26 Nɔʼ kə́ tòʼ gɛ̀ dɔdɔ təvɛʼtəvɛʼ, nɔʼ tíŋ hə chu-kwú mu ŋgwɛŋhə ghɔŋbə bəlʉʼʉ shùɔ wo. Nɔʼ tíŋ hə chu-kwú hə kəghɔ yɔŋ-yə bʉə, kəghɔ-bʉə ndə bɔ̂ŋ gòʼ təmə bɛ bʉə-Juu fɛ. Nɔʼ tíŋ hə chu-kwú mu yəŋkwɛʼtəŋkə, mu kwɔŋkəyəŋnə, leʼ tíŋ hə chu-kwú mu muukwɛʼtəŋmə leʼnə bʉə ndə bɔ̂ŋ tʉʼ làhə shʉ mbɔ bɔ̂ŋ nɔʼ bɛ́ŋ Nyii. 27 Mɔ nɔʼ kwɔ̀ŋ ŋwɔŋ-ɔŋ, nɔʼ nyíɛ ŋgʉəʼ i dɔ̀ŋnə, nɔʼ chí nə mbɛŋhə ndə bəndʉʉbətyuʼ, nɔʼ dùʼ nə jyʉʉ leʼnə tʉʉ yə́ŋnə, dùʼ təmə kie fɔyubə fɛ təvɛʼtəvɛʼ, tòʼ mu fəʼə təmə kie fɔkə ndə məkwóhə mbʉə mɔ fɛ.

28 Bɔŋ ndə mətíŋ ndəŋ yɔ̄ŋ-yə, bɛʼkə nɔ bɛ ndəŋ mɔ bəchibəchi bʉʼka fyii ndə mɔ kie tʉ bəchɔshi nchəŋnchəŋ. 29 Bɛ nda ndə ɔ lʉ́ʉtə təmə mɔ lʉ́ʉtə ghɔ fɛ? Bɛ nda ndə bə chìi ɔ chìi mɔ̀ʼ bɛ́, təmə tʉʉ-ɔ byʉ́ʼ fɛ?

30 Kaʼ mɔ kie ndə məŋàʼtə, mɔ kə́ ŋàʼtə ndə nubə ndə mɔ lʉ́ʉtə chɔ. 31 Nyii, mbʉ Tie Tiekətʉ-yʉʼʉ Jiso ndə bə kie ndə mələ̀ʼtə ɔŋ təmə liʼ-i ghɔ fɛ, nɔ kínə mbɔ mɔ tʉʼ chʉ̀ə lɛɛŋkə fɛ. 32 Ndʉʉ ndə mɔ kə bɛ Damasiko, gɔməna ndə ɔ kə́ sɔ́ʼ tɔʼɔ Fɔŋ Alita nɔ kə tʉ́ʼtə nchyiihə ndə chu-lɔ̂ŋ-tə mu kəyəŋkwɛʼtəŋ ndə məyá mɔ. 33 Bə bɔŋ sʉ́ʉhə mɔ ndəŋ chu wundu ndəŋ sɔʼ-lɔ̂ŋ-kə mu kəshyii tʉ́ʼ mbi, mɔ nyʉ́ʉ kəghɔ-ɔ.