1 Ndʉʉ ndə Jiso kə mìʼtə ndə mətʉ́ʼ vâafɔʼɔ-bi njuɔ bûu nə wuŋ, ɔ lɔ̀ hə chɔ gɛ̀ kə́ dàhə bɔŋleʼ lɔ̀ʼ ŋgieNyiikə mu yəŋkwɛʼtəŋbə-ʉə.

2 Ndʉʉ ndə Jɔŋ ndə ɔ̃ kɔ́ muu kə bɛ mu njaa-chaŋ, yʉ́ nubə ndə Jiso, mbʉ Wo ndə Nyii Kùŋ Tə́ŋ, kə́ fɔ̀ʼ, ɔ tə́ŋ vâafɔʼɔ-bi tʉ ɔŋ, 3 bíʼtə tʉ ɔŋ mbɔ, "A bɛ mbʉ wo ndə ɔ kie ndə məgwè le mɛ, kə b̈aʼa kə́ kʉ̀ʼ wokədɔŋ?"

4 Jiso bə̀ŋhə tʉ bɔŋ mbɔ, "B̈ii gɛ̀, shyíi Jɔŋ nə nubə ndə bii yʉ́ bɔŋleʼ nyíɛ, 5 mbɔ bʉə ndə shʉtə-ʉə nɔʼ kə fʉ̀əŋtə nɔ tʉʼ nyíɛ nduɔ, bʉə ndə bɔ̂ŋ nɔʼ kə lɛ́ŋ nɔ tʉʼ tòʼ nduɔ, bʉə ndə bɔ̂ŋ kə kie lɔkə mbʉə-bɔŋ, mbʉəhə-ʉə nɔʼ bɛ jyujyu nduɔ, bʉə ndə tyunəbə-ʉə nɔʼ kə fʉ̀əŋtə nɔ tʉʼ yʉ́ nukə nduɔ, bʉə ndə bɔ̂ŋ nɔʼ kə kwútə nɔʼ bʉ̀nə kóʼ, bʉə-mbʉʼ bɔŋ-nɔʼ-leʼ yʉ́ ntəŋjyujyu ndə bə lɔ̀ʼ tʉ bɔŋ. 6 ‘Tʉʉjyu nɔ bɛ yi-bʉə-yə ndə bɔ̂ŋ gòʼ təmə kə́ jínə mɔ fɛ.’ "

7 Ndə bɔ̂ŋ kə́ bʉ̀nə, Jiso chʉ́ʉhə ndə məkwə́ʼ tʉ mbʉ nuɔ-bʉə te Jɔŋ mbɔ, "Bii kə gwè mu kwɔŋkəyəŋnə ndə mənyíɛ ka? Bii kə kə́ gɛ̀ ndə mənyíɛ ŋginəŋgʉəʼbə ndə fʉʉkə tʉʼ gháahə mɛ? 8 Bii kə kə́ gɛ̀ ndə mənyíɛ ka ndʉʉghɔfii? Mɛ kə bii kə́ gɛ̀ nyíɛ bə wo ndə ɔ kə mɔ̀ʼ ndyi-kyʉə-hə mbʉə-ɔ? B̈ii yʉ́, b̃ʉə ndə bɔ̂ŋ mɔ̀ʼ ndyi-kyʉə-hə mbʉə-bɔŋ, nɔ bɛ ntoʼ. 9 Bii kə kə́ gɛ̀ ndʉʉghɔfii mbi ndə məgɛ̀ nyíɛ ka? YʉkəŋgieNyii mɛ? Ɔŋ, m̈ɔ shyíi bii nə shʉəŋ mbɔ ɔ nɔ buŋ gʉ́ə tə chàa yʉkəŋgieNyii. 10 Nɔ bɛ mbəŋ-ɛŋ ndə bə kə nyɔ̀ʼ te ɔ mbɔ,

‘B̈ii nyíɛ, mɔ bu tə́ŋ wontəŋ-ɔŋ, ɔ kə́ gɛ̀ hə bəshʉ a,

ndə ɔ bu shʉ̀tə fia tʉ a bəshʉ.’ *

11 "Nɔʼ m̈ɔ shyíi bii nə shʉəŋ mbɔ hə mu bʉə ndə bɔ̂ŋ fyú hə bətɔ-bəke, wo kaa chɔ ndə ɔ gʉ́ə tə chàa Jɔŋ ndə ɔ̃ kɔ́ muu fɛ. Bɔŋ wo ndə ɔ bɛ ndyiʼtəkə mu Sɔ́ʼ Fɔŋ Yuo nɔ gʉ́ə chàa Jɔŋ. 12 Lʉ̀ hə ndəŋ chîbə ndə Jɔŋ ndə ɔ̃ kɔ́ muu kə chʉ́ʉhə ndə məlɔ̀ʼ ŋgieNyiikə tə gwè dàa laa, Sɔ́ʼ Fɔŋ Yuo nɔ tʉʼ gɛ̀ bəshʉ bə nə kwɛ̀ŋhə, bʉə-kwɛ̀ŋhə kə́ kʉ́ʉ ndə məbyùutə nə kwɛ̀ŋhə. 13 Bʉʼka lʉ̀ hə bəshʉ tə gwè dàa ndəŋ vɛʼ Jɔŋ, bʉəyʉkəŋgieNyii bənchəŋ ghɔŋbə nuʼ-Mushi nɔʼ kə kə́ téʼ ntəŋ ndə i gwè hə kəghɔ-Nyii te Sɔ́ʼ Fɔŋ Yuo. 14 Kaʼ a bɔŋleʼ kʉ̀ʉ ndə məbɛ́ŋ, ɔ nɔ bɛ Ɛlaja ndə ɔ kə́ bɛ ndə məgwè. 15 Wotəmiyɔŋ ndə ɔ kie tyunəkə ndə məyʉ́, ɔ̈ yʉ́.

16 "Bɔŋ bəkɔ mɔ fʉ̀ʼ ŋgwie-wo-ɔ̄ ndəŋ ka? I nɔ bɛ nə vâambuɔ ndə bɔ̂ŋ dùʼtə mu vyii, kə́ tíi bʉə-bəyɔ-bʉə ghɔ̀ŋ mbɔ,

17 ‘Baʼa nɔ tʉ́ʉ vâandʉ̂ʉ tʉ bii təmə bii kʉ̀ʉ fɛ,

baʼa tɔ́ kwú təmə bii gwía fɛ.’

18 Bʉʼka Jɔŋ ndə ɔ̃ kɔ́ muu nɔ nə gwè təmə kə́ yú bɔŋleʼ nú fɛ, bɔŋ bə kə́ ghɔ̀ŋ mbɔ, ‘Ɔ nɔ kie lyʉʉhəbʉəbʉəkə mu mbʉə-ɔ.’ 19 Mbʉ Vaa-Woməsʉʉ gwè kə́ yú bɔŋleʼ nú, bə kə́ ghɔ̀ŋ mbɔ, ‘B̈ii nyíɛ ɔŋ nyíɛ! Wo-məntɔ ghɔŋ mbuuməndʉʼ, tiekənu-bʉə-fí-tashi ghɔŋbə bʉə-bʉ̂ʼʉ!’ Bɔŋ m̃ukətʉ súunə nɔ dʉ̀ʼ ŋwɔŋ-ɛŋ ndəŋ ntɔŋmə ndə i tʉʼ kʉ́ʉnə."

20 Ndʉʉmɛ, Jiso chʉ́ʉhə ndə məmɔ́ yəŋkwɛʼtəŋbə ndə ɔ nɔʼ kə fɔ̀ʼ njɔŋnjɔŋ nufinəbə-i chɔ, bʉʼka bɔ̂ŋ kə shìe liɛŋ ndəŋ bʉ̂ʼtə-ʉə fɛ, 21 kə́ ghɔ̀ŋ mbɔ, "Ŋgʉəʼ ndəŋ bii bʉə-Kolasiŋ! Ŋgʉəʼ ndəŋ bii bʉə-Bɛsieda! Bʉʼka nufinəbə ndə bə kə fɔ̀ʼ mu bii, bə kʉ̂ʉ kə chìi mu Taa ghɔŋ Sidɔŋ, təmə bɔ̂ŋ nɔʼ kə shìe liɛŋ ndəŋ bʉ̂ʼtə-ʉə lʉ̀ hə mbibɛʼ nə ndyi-kəfʉəŋ-hə kùŋ bubə ndə mədʉ̀ʼ mbɔ bɔ̂ŋ la nɔʼ kɔ́ŋ lɛɛŋhəkə-ʉə tɔ̀ŋ mu kyʉ. 22 Bɔŋ nɔʼ m̈ɔ shyíi bii mbɔ i bu yi bʉ̀ʉ tʉ bʉə-Taa ghɔŋbə bʉə-Sidɔŋ ndəŋ chî-kwɛ̀-fɛʼɛ-kə tə chàa ndə i bu bɛ tʉ bii. 23 Bɔŋ bii bʉə-Kabanu, bə bu kóʼhə bii ghɔʼ mɛ? Bə bu shúʼhə bii mu viʼi. Bʉʼka nufinəbə ndə bə kə fɔ̀ʼ mu lɔʼɔbə-ii, bə kʉ̂ʉ kə fɔ̀ʼ mu Sodɔŋ, təmə i nɔ káa chɔ tə gwè dàa laa. 24 Bɔŋ nɔʼ m̈ɔ shyíi bii mbɔ i bu yi bʉ̀ʉ tʉ bʉə-Sodɔŋ ndəŋ chî-kwɛ̀-fɛʼɛ-kə tə chàa ndə i bu bɛ tʉ bii."

25 Kʉ̂ʉ bɛ vɛʼ-ghɔ̄, Jiso gháaNyii ghɔ̀ŋ mbɔ, "Mɔ nɔ kɔ́ ndɔ a Tie-ɔ, Tiekətʉ ndə a kie yuo ghɔŋbə chisêkə, mbɔ a nɔʼ lə̀ŋ nubə-ɔ̄ŋ kəghɔ-bʉə ndə bɔ̂ŋ kie mukətʉ súunə leʼnə ndaa, kɛ̀ʼ tʉ vâambuɔ. 26 Ɔŋ, Tie-ɔ, bʉʼka nɔ nə bɛ ŋkʉʉnə-tʉʉ-a mbɔ i bɛ nɔ. 27 Tie-ɔ nɔʼ kɔ́ fɔbə inchəŋ tʉ mɔ, wo kaa ghɔ ndə ɔ kínə mbʉ Vaa fɛ yaʼkɛŋ mbʉ Tie, təmə wo bɔŋ bɛ ghɔ ndə ɔ kínə mbʉ Tie fɛ yaʼkɛŋ mbʉ Vaa, leʼnə wotəmiyɔŋ ndə mbʉ Vaa kʉ̀ʉ ndə məkɛ̀ʼ ɔ tʉ ɔŋ."

28 Ndʉʉmɛ, Jiso ghɔ̀ŋ mbɔ, "B̈ii gwè tʉ mɔ, bʉə bənchəŋ ndə bii nɔʼ bɛ̀ʼ bɛʼkə, mbʉ kəbɛʼ dìe bii daa, mɔ bu kwáa bii, bii káa. 29 B̈ii lʉ̀ ŋwɔŋ-yii sê bəshʉ mɔ leʼnə nukə ndə mɔ tʉʼ dàhə, yétə kəghɔ-mɔ, bʉʼka mɔ nɔ búɔnə bɔŋleʼ lʉ̀ ŋwɔŋ-ɔŋ sê, mu fyiihə-ii bu kɛŋ yùtə, 30 bʉʼka mədahə-ɔŋ shʉ́ə fɛ, bɛʼkə-ɔŋ bɔŋleʼ yùhə."