1 Ndʉʉmɛ, bʉə-Falasi ghɔŋbə bʉə dàhə nuʼ-Mushi gwè hə Jɛlosalɛŋ gwè ghɔ̀ŋ tʉ Jiso mbɔ, 2 "Chìi ka vâafɔʼɔ-ba kə́ bə́ʼ nuʼ bəntəŋbəshʉ*? Bʉʼka mbɔ bɔ̂ŋ kyinə sʉ̀ ghɔbə-ʉə buŋ yú fɔbə fɛ."

3 Ɔ bə̀ŋhə tʉ bɔŋ mbɔ, "Chìi ka bii kə́ bə́ʼ nuʼ-Nyii bʉʼka nuʼ-lɔʼɔ-yii? 4 Bʉʼka Nyii nɔ kàhə mbɔ, ‘Kɔ́ kuŋhə tʉ naa-aŋ ghɔŋ tie-a,’ bɔŋleʼ kàhə mbɔ, ‘Wotəmiyɔŋ ndə ɔ gìe nu-bʉə-kə kətʉ tie-e byuunɔ kətʉ ŋkwê-i nɔ kie ndə məkwú.’

5 "Bii bɔŋ ghɔ̀ŋ mbɔ, ‘Kaʼ wo gìe tʉ tie-e byuunɔ tʉ ŋkwê-i mbɔ, "Fɔkə ndə mɔ kie ndə məkɔ́ tʉ a, mɔ nɔʼ kɔ́ tʉ Nyii," 6 ɔ kie ndə mə leʼ kɔ́ kuŋhə tʉ tie-e fɛ.’ Nɔ, bʉʼka nuʼ-lɔʼɔ-yii, bii nɔ tʉʼ bʉ́əhə ŋgieNyiikə. 7 Bii bʉə làhə shʉ! Adaya nɔ kə gìe i kʉ̀ʼnə ndə ɔ kə téʼ ntəŋ ndə i gwè hə kəghɔ-Nyii te bii, kə́ ghɔ̀ŋ mbɔ:

8 ‘Bʉə-bɔ̄ŋ nɔ tʉʼ lə̀ʼtə mɔ nə wuochubə-ʉə,

bɔŋ fyiihə-ʉə dɔ̀ŋnə mbʉə mɔ.

9 Bɔ̂ŋ nɔ tʉʼ lə̀ʼtə mɔ njʉnjʉ,

bʉʼka bɔ̂ŋ nɔ tʉʼ dàhə nuʼ-bʉəməsʉʉ, fi nə bɛ nuʼ-Nyii.’ " *

10 Ɔ tíi mbʉ bʉə mbʉə ɔ, ghɔ̀ŋ tʉ bɔŋ mbɔ, "B̈ii yʉ́ chʉʼ kínə, 11 kaa fɔkə ndə i sʉ́ʉ chu-wo ndə i bʉ́əhə ɔŋ fɛ, bɔŋ nɔ bɛ nukə ndə i fyú hə chu-wo ndə i bʉ́əhə ɔŋ." 12 Ndʉʉmɛ, mbʉ vâafɔʼɔ gwè ghɔ̀ŋ tʉ ɔŋ mbɔ, "A kínə mbɔ tʉʉ bʉə-Falasi kə byʉ́ʼ ndə bɔ̂ŋ kə yʉ́ nukə-ɔ̄ŋ ndə a kə gìe nɔ mɛ?"

13 Ɔ bə̀ŋhə tʉ bɔŋ mbɔ, "Ŋgwie təmiyɔŋ ndə gòʼ təmə bè Tie-ɔ ndə ɔ bɛ yuo fɛ, bə bu sòʼ. 14 Mɛ̀ʼtə bɔŋ chɔ, bɔ̂ŋ nɔ bɛ bəfʉ̀əŋtəshʉ ndə bɔ̂ŋ tʉʼ dʉ̀ʼ fia. Bɔŋ kaʼ fʉ̀əŋtəshʉ kə́ dʉ̀ʼ fia tʉ fʉ̀əŋtəshʉ, bɔ̂ŋ bənchəŋ bu gwù mu byʉʉ."

15 Bɔŋ Bita ghɔ̀ŋ tʉ ɔŋ mbɔ, "Fʉ̀ʼtə nukə ndə mbʉ kəchəŋ bɛ yɔŋ tʉ baʼa."

16 Jiso bə̀ŋhə mbɔ, "I dʉ̀ʼ mbɔ mbəŋ-yii kínə ghɔ fɛ mɛ? 17 Bii kínə mbɔ fɔkə təmiyɔŋ ndə i sʉ́ʉ mu chu, tíŋ gɛ̀ mu bətɔ, bə nɔ́ kəbu fe? 18 Bɔŋ ñukə ndə i fyú hə chu-wo, nɔ kóʼ hə mu fyii-ɔ, kə́ bʉ́əhə yɔŋ bʉ́əhə wo. 19 Bʉʼka nubə ndə i kóʼ hə mu fyii-wo nɔ bɛ bəŋkwɔʼtə bʉəbʉə, məyí wo, məgháa bəsəŋ, bəsəŋ ntɛntɛhə, lʉʼbə, mənú gwù nə mbii leʼnə məbʉ́əhə-yie bəbɛʼbʉə. 20 Nɔ bɛ nubə nɔ ndə i bʉ́əhə wo. Bɔŋ məyú fɔbə təmə sʉ̀ ghɔkə fɛ, mə bʉ́əhə wo fɛ."

21 Jiso lɔ̀ hə chɔ, fyúhə ŋwɔŋ-ɛŋ gɛ̀ mu bie Taa ghɔŋ Sidɔŋ. 22 Kə nyíɛ, wokebɛʼ ndə ɔ lɔ̀ hə Kana kə́ chí mu bie-ghɔ̄, fyú gwè kə́ gwía ghɔ̀ŋ mbɔ, "Oo Tiekətʉ, V̈aa-Dɛbi, kə ẗʉkə-a vyíi ndəŋ mɔ. L̃yʉʉhəbʉəbʉəkə nɔ chʉʼ jyʉ́ʉhə vaa-ɔ̄ŋ vaabəke nɔʼ kɔ́ ŋgʉəʼ tʉ ɔŋ daa."

23 Bɔŋ təmə ɔ bə̀ŋhə ŋgiekə tʉ ɔŋ fɛ. Vâafɔʼɔ-bi gwè kə́ fʉ̀ʉtə ɔŋ, ghɔ̀ŋ tʉ ɔŋ mbɔ, "Jə̀ŋ ɔŋ ɔ gɛ̀, bʉʼka ɔ tʉʼ tòʼ kwʉ̀ʉnə kətʉ-baʼa."

24 Ɔ bə̀ŋhə ghɔ̀ŋ mbɔ, "Bə nɔ nə tə́ŋ mɔ bə haʼ tʉ binjyʉʉhə mu Isilɛ ndə bɔ̂ŋ nɔʼ bɛ́."

25 Bɔŋ mbʉ woke-ghɔ̄ gwè kwíʼtə bəshʉ ɔ kə́ ghɔ̀ŋ mbɔ, "Tiekətʉ, kwáa mɔ."

26 Ɔ bə̀ŋhə mbɔ, "I kʉ̀ʼnə ndə mə lʉ̀ fɔyu-vaambuɔ-bə mɛ̀ʼ tʉ bûhə fɛ."

27 Ɔ bə̀ŋhə mbɔ, "Ɔŋ Tiekətʉ, bɔŋ bɛ le, bûhə nɔ lɛ̀ʼtə kwuʼkwuʼ bəfɔ-ghɔ̄ ndə ĩ gwùtə hə ndəŋ tebele tie-yʉə."

28 Ndʉʉmɛ, Jiso bə̀ŋhə tʉ ɔŋ mbɔ, "Oo naa, a nɔ mɔ̀ʼfyii-a ndəŋ mɔ shʉ́əshʉ́ə! Nukə ndə a tʉʼ kʉ́ʉ, ï bɛ haʼ nɔ tʉ a." Vaa-ɛ kie nchʉʼ haʼ ndʉʉghɔfii.

29 Jiso lɔ̀ hə chɔ gɛ̀ kə́ tòʼ ŋgwuu taanə-kəghəŋ-Galili-kə. Ɔ leʼ lɔ̀ kóʼ gɛ̀ kwɔŋ gɛ̀ dùʼ sê chɔ. 30 Nuɔ-bʉə-buŋmbi gwè tʉ ɔŋ, gwè nə bəlɛŋ, bəfʉ̀əŋtəshʉ, bəlɛŋ ntɛntɛhə, bəchie leʼnə bəbɛʼbʉə buŋmbi, gwè mɔ̀ʼtə bɔŋ bəshʉ Jiso, ɔ chʉ́ʼ bɔŋ. 31 I chíe chu mbʉ nuɔ-bʉə ndə bɔ̂ŋ nyíɛ, bəchie kə́ kwə́ʼ, bəlɛŋ ntɛntɛhə kə́ bɛ shʉ́əshʉ́ə, bəlɛŋ kə́ tòʼ, bəfʉ̀əŋtəshʉ kə́ bʉ̀nə nyíɛ yəŋkə. Bɔ̂ŋ lə̀ʼtə Nyii-bʉə-Isilɛ.

32 Ndʉʉmɛ, Jiso tíi vâafɔʼɔ-bi mbʉə ɔ, ghɔ̀ŋ mbɔ, "Tʉkə-ɔŋ nɔ tʉʼ vyíi ndəŋ nuɔ-bʉə-bɔ̄ŋ, bʉʼka bɔ̂ŋ nɔʼ bɛ baʼa bɔŋ ndəŋ chîbə itia təmə kie fɔkə ndə məyú fɛ. Təmə mɔ bɔŋ kʉ̀ʉ ndə məbyʉ̀hə bɔŋ nə jyʉʉ fɛ, təmə bɔ̂ŋ bu fyú gwùtə sêfia."

33 Mbʉ vâafɔʼɔ-bi ghɔ̀ŋ tʉ ɔŋ mbɔ, "Bəkɔ baʼa kie bəbele fa muŋkɔ-fɛ̄ŋ, tə i yúʼ nuɔ-bʉə-bɔ̄ŋ buŋmbi nɔ?"

34 Jiso bíʼtə tʉ bɔŋ mbɔ, "Bii kie mbyu-bele-hə isɛʼɛ?" Bɔ̂ŋ ghɔ̀ŋ mbɔ, "Təkwiitia leʼnə mbyu-mbɔʼ-hə məniʼ."

35 Ɔ kʉ̂ʉ kàhə mbʉ nuɔ-bʉə mbɔ b̈ɔ̂ŋ dùʼtə sê, 36 ɔ lʉ̀ mbʉ mbyu-bele-hə təkwiitia leʼnə mbʉ mbyu-mbɔʼ-hə, kʉ̂ʉ kɔ́ ndɔ chɔ, bə́ʼtə mbʉ bele kɔ́ tʉ vâafɔʼɔ-bi, mbʉ vâafɔʼɔ-bi kə́ gyʉ̀ətə tʉ mbʉ nuɔ-bʉə-tə.

37 Bɔ̂ŋ bənchəŋ yú tə yúotə. Mbʉ vâafɔʼɔ bʉ̀nə byíi kwuʼkwuʼ-i, i lə́ŋ shyiibə təkwiitia. 38 Bʉə ndə bɔ̂ŋ kə yú, nɔ nə bɛ ŋkɔŋ-bʉə-hə kwi, təmə bə súu bəke ghɔŋbə vâambuɔ fɛ. 39 Ndʉʉ ndə ɔ kə wɔ̀ʼhə mbʉ nuɔ-bʉə-tə, ɔ kóʼ mu kəbuu gɛ̀ mu bie Magada.