1 Bʉə-Falasi ghɔŋbə bʉə-Sadusi gwè ndə məmùutə Jiso, bíʼtə tʉ ɔŋ mbɔ ɔ̈ chìi nukəcheʼkə ndə i lɔ̀ hə kəghɔ-Nyii, b̈ɔ̂ŋ nyíɛ. 2 Ɔ bə̀ŋhə tʉ bɔŋ ghɔ̀ŋ mbɔ, "Ñɔ bɛ ndʉʉbuumbi nɔ, bii ghɔ̀ŋ mbɔ, ‘Mbi bu bɛ jyujyu bʉʼka yuo nɔ kəmbuu.’ 3 Kʉ̂ʉ bɛ ndʉʉsɛŋkə nɔ, bii ghɔ̀ŋ mbɔ, ‘Fʉʉkə bu shʉ́ə laa bʉʼka yuo nɔ bɛ kəmbuu, wyuu bɔŋ-kə́-leʼ kóʼ.’ Bii nɔ kínə ndə məfʉ̀ʼtə nubə te ntɛhə ndə yuo bɛ yɔŋ, təmə bɔŋ məfʉ̀ʼtə ntɛhə ndə cheʼbə bɛ nduɔ fɛ. 4 Ŋgwie bʉ̂ʼʉ ghɔŋbə ŋgwie-bəsəŋ nɔ tʉʼ bíʼtə cheʼkə, bɔŋ təmə bə kʉʉ kɔ́ cheʼbɛʼkə tʉ bɔŋ fɛ, yaʼkɛŋ haʼ cheʼ-Jona-kə." Ɔ mɛ̀ʼtə bɔŋ gɛ̀ nə wi.

5 Ndʉʉ ndə vâafɔʼɔ-bi dàa muu gɛ̀ ndəŋ ibɛʼ-yə viakə, bɔ̂ŋ lèʼnə ndə məlʉ̀ bele. 6 Bɔŋ Jiso ghɔ̀ŋ tʉ bɔŋ mbɔ, "B̈ii láa, kə́ lɛ́nə jyujyu te yî-bʉə-Falasi ghɔŋbə bʉə-Sadusi." 7 Bɔ̂ŋ chʉ́ʉhə məkwə́ʼ mu bɔŋ kə́ ghɔ̀ŋ mbɔ, "Baʼa gwè nə bele fɛ." 8 Bɔŋ Jiso kə́ kínə nukə-ɔ̄ŋ, ghɔ̀ŋ mbɔ, "Oo bii ndə bii mɔ̀ʼfyiihə-ii ndəŋ mɔ məniʼ, chìi ka bii kə́ kwə́ʼtə tʉ ŋwɔŋtə-ii mbɔ bii kie bele fɛ? 9 Bii bíe təmə nɔʼ kínə fɛ mɛ? Bii bíe kwɛ́nə mbyu-bele-hə-īŋ itaa tʉ ŋkɔŋ-bʉə-hə itaa le, leʼnə ntyʉʉ bəshyii ndə bii kə byíi le fɛ mɛ? 10 Byuunɔ mbyu-bele-hə təkwiitia tʉ ŋkɔŋ-bʉə-hə kwi leʼnə ntyʉʉ bəshyii ndə bii kə byíi le fɛ mɛ? 11 Chìi ka təmə bii mə kínə mbɔ mɔ kə́ kwə́ʼ te bə bele fɛ? B̈ii láa yî-bʉə-Falasi ghɔŋbə bʉə-Sadusi."

12 Bɔ̂ŋ chèʼnə ndʉʉghɔfii mbɔ ɔ kə́ kwə́ʼ tʉ bɔŋ te bə yî bele fɛ, ɔ nɔ nə kə́ kwə́ʼ te bə nukə ndə bʉə-Falasi ghɔŋbə bʉə-Sadusi kə́ dàhə.

13 Ndʉʉ ndə Jiso kə gwè dàa mu bie Kasalia Filibai, ɔ bíʼtə tʉ vâafɔʼɔ-bi mbɔ, "Bʉə tʉʼ ghɔ̀ŋ mbɔ Vaa-Woməsʉʉ bɛ nda?"

14 Bɔ̂ŋ ghɔ̀ŋ mbɔ, "Bəbɛʼbə nɔ ghɔ̀ŋ mbɔ a la bɛ Jɔŋ ndə ɔ̃ kɔ́ muu, bəbɛʼbə kə́ ghɔ̀ŋ mbɔ a la bɛ Ɛlaja, bəbɛʼbə ghɔ̀ŋ mbɔ a la bɛ Jelimia byuunɔ mbyu yʉkəŋgieNyiibɛʼ." 15 Ɔ ghɔ̀ŋ tʉ bɔŋ mbɔ, "Bɔŋ bii tʉʼ ghɔ̀ŋ mbɔ mɔ bɛ nda?"

16 Samu Bita ghɔ̀ŋ mbɔ, "A nɔ bɛ mbʉ Wo ndə Nyii Kùŋ Tə́ŋ, mbʉ VaaNyii ndə mbʉ Nyii bɛ ghɔ."

17 Jiso bə̀ŋhə tʉ ɔŋ mbɔ, "Biʼbə nɔ bɛ ya-yə, Samu vaa-Jona! Bʉʼka kɛ̀ʼ mbɔʼ mbʉə byuunɔ fɔbʉəkə kɛ̀ʼ yɔ̄ŋ-yə tʉ a fɛ, nɔ kɛ̀ʼ bə Tie-ɔ ndə ɔ bɛ yuo. 18 Mɔ bɔŋ shyíi a mbɔ mbəŋ-aŋ nɔ bɛ Bita (ndə i bɛ mbɔ ŋgoʼ) mɔ bɔŋ bu fʉ̀ə chɔshi-ɔ ndəŋ ŋgoʼ-fɛ̄ŋ təmə ghʉəʼ-kwú-kə mə nə ghɔ́ʼ ɔ fɛ. 19 Mɔ bu kɔ́ nchoʼ-kəfʉəŋ-Sɔ́ʼ-Fɔŋ-Yuo-kə tʉ a, nukə təmiyɔŋ ndə bii chíe kəchisê, bə bu fəŋ chíe yuo, nukə təmiyɔŋ ndə bii chóʼ kəchisê, bə bu fəŋ chóʼ yuo." * 20 Ɔ shyùu tyunə-vâafɔʼɔ-bi-kə mbɔ bɔ̂ŋ mə shyíi wo mbɔ ɔ bɛ mbʉ Wo ndə Nyii Kùŋ Tə́ŋ fɛ.

21 Lʉ̀ hə ndəŋ vɛʼ-ghɔ̄, Jiso chʉ́ʉhə məfʉ̀ʼtə tʉ vâafɔʼɔ-bi mbɔ ɔ la kie ndə mə-yaʼ-kóʼ gɛ̀ Jɛlosalɛŋ, gɛ̀ nyíɛ ŋgʉəʼ ndəŋ nubə buŋmbi kəghɔ-bəntəŋbəshʉ, bətiefɛ̀ʼndɛŋNyii leʼnə bʉə dàhə nuʼ-Mushi, bə yí ɔ, kʉ̂ʉ bɛ chîbə itia nɔ, bə bʉ̀nə kóʼhə ɔŋ. 22 Bita lʉ̀ ɔ ghɔ́ŋ ɔŋ fí ŋwɔŋ-yʉə ɔ bɔ̌ŋ, ɔ chʉ́ʉhə kə́ sɔ́ʼ ɔ, kə́ ghɔ̀ŋ mbɔ, "N̈yii fə́ŋhə maa-kɔ̄ŋ chutəyi-a, Tiekətʉ! Yɔ̄ŋ-yə ntɛ-kənu mə nə fyú tʉ a fɛ." 23 Ɔ kíahə ŋwɔŋ-ɛŋ ghɔ̀ŋ tʉ Bita mbɔ, "Bʉ̀nə bɔ̌ŋ mɔ Sata! A nɔ bɛ ŋkyʉʉhəkə tʉ mɔ. Bʉʼka a tʉ́ʼ ndaahə-a ndəŋ nu-Nyii-bə fɛ, a nɔ tʉ́ʼ bə ndəŋ nu-bʉəməsʉʉ-bə."

24 Ndʉʉmɛ, Jiso ghɔ̀ŋ tʉ vâafɔʼɔ-bi mbɔ, "Kaʼ wo mu bii kʉ̀ʉ ndə məgwè hə bɔ̌ŋ mɔ, ɔ nɔ kie ndə mətɛ́ŋ ŋwɔŋ-ɛŋ, bɛ̀ʼ tyʉntɔɔnəkə-i, gwè hə bɔ̌ŋ mɔ. 25 Bʉʼka wo ndə ɔ tʉʼ kʉ́ʉ ndə məkwáa ŋkwiitʉ-e bu bɛ́, bɔŋ wo ndə ɔ kɔ́ ŋkwiitʉ-e bʉʼka mɔ, bu kie ŋkwiitʉ-e. 26 Sii wo bu bɛ ka, kaʼ ɔ kie wʉʉnəmbikə inchəŋ bɔŋ bɛ́ ŋkwiitʉ-e? Byuunɔ, bɛ ka ndə bəkɔ wo kɔ́ ndə məchʉ̀ʼ ŋkwiitʉ-e? 27 Bʉʼka Vaa-Woməsʉʉ nɔ kie ndə məgwè ghɔŋbə bʉəntəŋ-bi mu məŋwɔʼ Tie-e, ndʉʉmɛ, ɔ bu kɛ̀ŋ wotəmiyɔŋ haʼ ndə ɔ kə fɔ̀ʼ. 28 M̈ɔ shyíi bii nə shʉəŋ mbɔ, bəbɛʼbʉə mu bii ndə bɔ̂ŋ tə́nə fɛ̄ŋ kʉʉ yúotə kwú fɛ, tə bɔ̂ŋ yaʼ yi nyíɛ Vaa-Woməsʉʉ ɔ kə́ gwè nə Fɔŋ."