Mateus 20

Bʉə-fɔʼɔ-mutɔ

1 "Sɔ́ʼ Fɔŋ Yuo nɔ bɛ nə ŋwɔ̌ŋ-njaa ndə ɔ fyú mbi ndʉʉsɛŋkə bətyuʼbətyuʼ ndə məgɛ̀ kʉ́ʉ bʉə-fɔʼɔ ndə məgɛ̀ mutɔ-bətyʉ-kə-i gɛ̀ kwɛ̀tə ntɔŋmə. 2 Ndʉʉ ndə ɔ shʉ̀tə ghɔŋbə mbʉ bʉə-fɔʼɔ ndə mə-kə́-lɔ̀ʼ bɔŋ nə kyʉə fɔʼɔ kəchîmbi, ɔ tə́ŋ bɔŋ kɔ́ mutɔ-bətyʉ-kə-i ndə məgɛ̀ kə́ kwɛ̀tə ntɔŋmə.

3 "Ɔ kʉ̂ʉ fyú kə́ tòʼ gɛ̀, dàa vyii ndə bəchî bɔmɔʼ ndʉʉsɛŋkə, nyíɛ bəbɛʼbʉə, bɔ̂ŋ kə́ tə́nə chɔ njʉnjʉ. 4 Ɔ ghɔ̀ŋ tʉ bɔŋ mbɔ, ‘B̈ii gɛ̀ mbʉ mutɔ bətyʉ-ghɔ̄, fɔkə ndə i kʉ̀ʼnə tʉ bii, mɔ bu kɔ́.’ 5 Bɔ̂ŋ gɛ̀. Ɔ kʉ̂ʉ bìʼ fyú mbi kə́ tòʼ ndʉʉbeʼ leʼnə bəchî itia ndʉʉnəchî, bìʼ chìi haʼ nɔ. 6 Kʉ̂ʉ bìʼ bɛ nə bəchî itaa ndʉʉbuumbi ɔ fyú gɛ̀ mbi nyíɛ bəbɛʼbʉə bɔ̂ŋ kə́ tə́nə. Ɔ ghɔ̀ŋ tʉ bɔŋ mbɔ, ‘Chìi ka bii kə́ lʉ́ʉtə tə́nə fɛ̄ŋ lʉ̀ hə ndʉʉsɛŋkə mənɔ?’

7 "Bɔ̂ŋ bə̀ŋhə tʉ ɔŋ mbɔ, ‘Bʉʼka wo chʉʼ lʉ̀ baʼa ndə fɔʼɔ fɛ.’ Ɔ ghɔ̀ŋ tʉ bɔŋ mbɔ, ‘B̈ii gɛ̀ mutɔ bətyʉ-ghɔ̄.’ 8 Kʉ̂ʉ bɛ ndʉʉbuumbi mbʉ ŋwɔ̌ŋ-mutɔ ghɔ̀ŋ tʉ vaafɔ̀ʼkwɛʼtəŋ ndə ɔ tʉʼ lɛ́nə vâafɔʼɔ-bi mbɔ, ‘Tíi vâafɔʼɔ lɔ̀ʼ bɔŋ ndə fɔʼtə-ʉə, chʉ́ʉhə ndə ndyiʼtə-bʉə-bə gɛ̀ lìʼtə ndə fəŋ-bʉə-tə.’ 9 Ndʉʉ ndə bʉə ndə bə kə lʉ̀ bɔŋ ndə bəchî itaa ndʉʉbuumbi kə gwè, bə kə́ lɔ̀ʼ wo hə mu bɔŋ nə kyʉə fɔʼɔ kəchîmbi, 10 bʉə ndə bə kə lʉ̀ bɔŋ fəŋ, kə́ gwè ndə məfì lɔʼɔbə-ʉə, kə́ kwɔ̀ʼtə mbɔ bə bu lɔ̀ʼ bɔŋ i yɔ́ŋ, bə bɔŋ lɔ̀ʼ wo mu bɔŋ haʼ nə kyʉə fɔʼɔ kəchîmbi. 11 Bɔ̂ŋ kʉ̂ʉ fí mbʉ kyʉə, chʉ́ʉhə kə́ luŋtə te mbʉ ŋwɔ̌ŋ-mutɔ, 12 kə́ ghɔ̀ŋ mbɔ, ‘Yɔ̄ŋ-yə ndyiʼtə-bʉə-bə nɔ fɔ̀ʼ haʼ məniʼ, a bɔŋ lɔ̀ʼ baʼa bɔŋ ndyʉndyʉ, ndə baʼa nyíɛ ŋgʉəʼ ndə chîmbi-ŋkwɔŋ-kə chichi kə́ tɔ̀ŋ baʼa.’

13 "Bɔŋ ɔ bə̀ŋhə tʉ mbyu wo mu bɔŋ mbɔ, ‘Tieŋkɔŋ-ɔŋ, mɔ tʉʼ chìi mɔ̀ʼmbɛ fɛ. Baʼa kə shʉ̀tə ndə kyʉə fɔʼɔ kəchîmbi fe? 14 Lʉ̀ fɔkə ndə bɛ ya-yə gɛ̀ chunjaa. Nɔ kʉ̀ʉ mɔ, ndə məkɔ́ tʉ ndyiʼtə-wo-fɔ̀ʼɔ-kə-ɔ̄ŋ haʼ ghʉə ndə mɔ kɔ́ tʉ a. 15 Bəkɔ mɔ séʼ ndə məfɔ̀ʼ nukə nə fɔkə ndə bɛ yɔŋ-yə fe? Byuunɔ, a tʉʼ bʉ́əhə shʉ-a bʉʼka fɔʼɔ-jyujyu-ɔ mɛ?’

16 "Nɔ, bʉə ndə bɔ̂ŋ bɛ ndyiʼtəbə bu yi bɛ fəŋtə, fəŋtə bɛ ndyiʼtəbə."