1 Jiso fyú hə mu njaafɛ̀ʼndɛŋNyii kə́ gɛ̀ nə wi, ndʉʉ ndə vâafɔʼɔ-bi gwè kə́ dʉ̀ʼ njaahə ndə i bɛ chunjaafɛ̀ʼndɛŋNyii. 2 Ɔ bɔŋ bə̀ŋhə tʉ bɔŋ mbɔ, "B̈ii nyíɛ njaahə-ɔ̄ŋ inchəŋ nɔ mɛ, bii tʉʼ nyíɛ fe? M̈ɔ shyíi bii nə shʉəŋ mbɔ, mbyu ŋgoʼ kʉʉ yi káa liɛŋ liŋ-iŋ chɔ təmə bə kùu mɛ̀ʼ sê fɛ."

3 Ndə Jiso kə dùʼ ndəŋ Kwɔŋ-bəTyʉ-Oli, vâafɔʼɔ-bi gwè bíʼtə tʉ ɔŋ bɔ̌ŋbɔ̌ŋ mbɔ, "Shyíi baʼa nə ndʉʉ ndə nubə-ɔ̄ŋ inchəŋ bu yi fyú chɔ, leʼnə ntɛ kəcheʼ ndə i bu yi dʉ̀ʼ məgwe-a leʼnə məlìʼ mbi?"

4 Jiso bə̀ŋhə tʉ bɔŋ mbɔ, "B̈ii láa mbɔ wo mə yi fə́ʼhə bii fɛ. 5 Bʉʼka bʉə buŋmbi bu yi gwè yie-mɔ, kə́ ghɔ̀ŋ mbɔ, ‘Mɔ nɔ bɛ mbəŋ-ɛŋ ndə Nyii Kùŋ Tə́ŋ,’ bɔŋ-bu-leʼ fə́ʼhə bʉə buŋmbi. 6 Bii bu yʉ́ chɔ̂tə ghɔŋbə nchyʉhə-chɔ̂-mə. Kə i mə chɔ́ŋhə bii fɛ, bʉʼka nubə-ɔ̄ŋ nɔ kie ndə məfyú sê, təmə bɔŋ nɔʼ bɛ bə mə lìʼ mbi fɛ. 7 Bʉʼka lɔʼ-bətə̂ŋ-tə bu lɔ̀ tə́nə ghɔŋbə bəbɛʼlɔʼ-bətə̂ŋ-tə, bəfɔŋ bətə̂ŋ bu lɔ̀ tə́nə ghɔŋbə bəbɛʼbəfɔŋ-bətə̂ŋ. Chyʉʉ bu gwù, chisêkə ŋʉ̀ʼnə bəyəŋbəyəŋ. 8 Nchəŋnchəŋ bənu-ɔ̄ŋ nɔ bɛ haʼ nchʉʉhə-kəyɔʼ-Nyii ndə i byùu woke.

9 "Ndʉʉmɛ, bə bu yá bii chɔ̀ʼhə kɔ́, bə chɔ́ŋhə bii tə buŋ yí bii, lɔʼ-bətə̂ŋ-tə bənchəŋ bàa bii bʉʼka bii mɔ̀ʼfyiihə-ii ndəŋ mɔ. 10 Ndʉʉmɛ, bʉə buŋmbi bu mɛ̀ʼtə məmɔʼfyiihə-ʉə ndəŋ Nyii, kə́ fɛ̀ŋ ŋwɔŋtə-ʉə, bɔŋleʼ bàanə shʉtə-ʉə. 11 Buŋmbi bʉəyʉkəŋgieNyii nə mbii bu fyú, fə́ʼhə bʉə buŋmbi. 12 Bʉ̂ʼʉ bu bìʼ yɔ́ŋ gɛ̀ nə shʉbə, ŋkʉ̂ʉ ndə bʉə buŋmbi kie, bu ghʉ́ə. 13 Bɔŋ wo ndə ɔ lyʉ̀ʉtə́nə tə gɛ̀ dàa ndə liʼ-i bu kie ŋkwaaNyii. 14 Ntəŋjyujyu-ɔ̄ te Sɔ́ʼ Fɔŋ Yuo, bə bu lɔ̀ʼ yə̀ŋ wʉʉnəmbikə fúu ndə mənú gwù, mbɔ lɔʼ-bətə̂ŋ-tə inchəŋ chʉʼ yʉ́, ndʉʉmɛ mbi bu lìʼ.

15 "Ndʉʉ ndə bii bu nyíɛ nu-ŋkwɔŋŋkwɔŋ-kə ndə i bʉ́əhə njaa-Nyii ndə Dania yʉkəŋgieNyii kə kwə́ʼ te yɔŋ, kə́ tə́nə kəyəŋ kəchɔŋ nɔ (ẅo ndə ɔ tʉʼ tíi ŋwɔʼnə-ɔ̄ŋ, kínə nukə ndə yɔ̄ŋ-yə bɛ yɔŋ), 16 ndʉʉ ndə yɔ̄ŋ-yə fyú sê nɔ, b̈ʉə ndə bɔ̂ŋ bɛ mu Judia nyʉ́ʉ kóʼ ndəŋ kwɔŋhə. 17 Wo ndə ɔ bɛ kətʉ njaa, * mə shíʼ sê ndə məgɛ̀ lʉ̀ fɔkə mu njaa-ɔ fɛ, 18 kə wo ndə ɔ bɛ mutɔ mə leʼ bʉ̀nə chunjaa ndə məgɛ̀ lʉ̀ ndyi-i fɛ. 19 I bu nə tɛ̀nə tʉ bəke gʉʼnə ghɔŋbə bəke ndə bɔ̂ŋ tʉʼ nyùuhə vâa ndəŋ chî-ghɔ̄-bə. 20 B̈ii gháaNyii mbɔ ndʉʉ ndə bii bu nə kə́ nyʉ́ʉ chɔ, mə yi bɛ ndəŋ shyʉʉ-fəʼə byuunɔ ndəŋ Chîlɔʼkə fɛ. 21 Bʉʼka bu yi bɛ ndʉʉ-ghɔ̄ nɔ, ŋgʉəʼ shʉ́əshʉ́ə bu yi bɛ ghɔ təmə ntɛ-ɛ nɔʼ nə bɛ ghɔ fɛ lʉ̀ hə ndəŋ ŋgwunə-mbi tə gwè dàa laa, təmə bɔŋ-bu-leʼnə bɛ ghɔ fɛ. 22 Kaʼ Nyii kʉ̌ʉ kə gòʼ təmə nɔʼ kə shùʼtə chî-ghɔ̄-bə fɛ, təmə mbyu woməsʉʉ imɔʼ nə bìi fɛ. Bɔŋ bʉʼka bʉə ndə ɔ nɔʼ kə séʼ bɔŋ, bə bu shùʼtə chî-ghɔ̄-bə.

23 "Kaʼ wo gìe tʉ bii ndʉʉghɔfii mbɔ, ‘B̈ii nyíɛ! Mbʉ Wo ndə Nyii Kùŋ Tə́ŋ nɔ fɛ̄ŋ’ byuunɔ, ‘Ɔ le fīi,’ kə bii mə bɛ́ŋ fɛ. 24 Bʉʼka bʉə-mbii ndə bɔ̂ŋ tʉʼ lʉ̀ ŋwɔŋ-yʉə ndə məbɛ bʉə ndə Nyii Kùŋ Tə́ŋ ghɔŋbə bʉəyʉkəŋgieNyii nə mbii, bu kóʼ kə́ chìi nubəcheʼkwɛʼtəŋbə ghɔŋbə nuchíechukwɛʼtəŋbə ndə məfə́ʼhə bʉə, kaʼ i kʉ̂ʉ yùhə təmə bɔ̂ŋ nɔ buŋ fə́ʼhə bʉə ndə bə nɔʼ kə séʼ bɔŋ. 25 B̈ii yʉ́, mɔ nɔʼ shyíi bii nə nubə-ɔ̄ŋ i buŋ yi fyú sê.

26 "Nɔ, kaʼ bə gìe tʉ bii mbɔ, ‘B̈ii nyíɛ, ɔ le mu kwɔŋkəyəŋnə,’ kə bii mə gɛ̀ chɔ ndə mənyíɛ fɛ. Kaʼ bə ghɔ̀ŋ mbɔ, ‘B̈ii nyíɛ, ɔ nɔ bɛ mu kəntoʼ kəyəŋ-bəliinə,’ kə bii məyʉ́ nukə ndə bɔ̂ŋ ghɔ̀ŋ fɛ. 27 Bʉʼka haʼ ndə leʼnə-wyuu-kə, báa kwii ndə chichi sɔ́ʼ chɔ gɛ̀ dàa kwii ndə chichi tʉʼ sʉ́ʉ chɔ chusii-ɔ, nɔ bɛ haʼ nɔ, ndə Vaa-Woməsʉʉ bu yi gwè. 28 Bʉʼka yəŋkə ndə ŋkwu-wo-kə bɛ chɔ nɔ yəŋkə ndə wuwubə bu chə̀ŋtə chɔ.

29 "Haʼ ndʉʉmɛ ndə ndʉʉ ŋgʉəʼ-shʉ́əshʉ́ə-ghɔ̄ nɔʼ tíŋ nɔ,

njəŋkə gwù ndəŋ chichi

təmə chisuu leʼ báa fɛ,

bəlɔʼɔ yuo bu gwùtə,

bə bɔŋleʼ ŋɛ̀hə nu-shʉ́əshʉ́ə-bə ndə bɔ̂ŋ bɛ yuo. *

30 "Ndʉʉmɛ, cheʼkə bu fyú yuo ndə mədʉ̀ʼ məgwè Vaa-Woməsʉʉ, lɔʼ-bətə̂ŋ-tə inchəŋ kəchisê bu kə́ lí. Bɔ̂ŋ bu nyíɛ Vaa-Woməsʉʉ, ɔ kə́ shíʼ gwè hə ndəŋ mbɔʼ-yuo-kə nə ghʉəʼkə leʼnə məŋwɔ̀ʼkwɛʼtəŋ. 31 Bə bu tʉ́ʉ gyʉəʼə nə ghʉəʼkə, ɔ tə́ŋ bʉəntəŋ-bi, kɔ́ mbi ndə məchə̀ŋtə bʉə ndə ɔ nɔʼ kə séʼ bɔŋ ndəŋ byûu-mbi-tə kwi, lɔ̀ hə ndə byûu yuo imɔʼ, gɛ̀ dàa ndə ibɛʼ-yə.

32 "B̈ii lʉ̀ ndaa hə ndəŋ tyʉ-fik-kə nduɔ, ndʉʉ ndə ntɔŋtə-i wùʼtə chʉ́ʉhə məkɔ́ fyuŋ-fefe-bə, bii kínə mbɔ ndʉʉkəbyʉʉ nɔʼ kə́ŋhə. 33 Nɔ bɛ haʼ nɔ, ndʉʉ ndə bii nyíɛ nubə-ɔ̄ŋ inchəŋ, bii kínə mbɔ ɔ nɔʼ kə́ŋhə mbʉə mbʉ təchulɔŋ. 34 Nɔʼ m̈ɔ shyíi bii nə shʉəŋ mbɔ ŋgwie-wo-ɔ̄ kʉʉ mì təmə nubə-ɔ̄ŋ inchəŋ nɔʼ fyú sê fɛ. 35 Yuo ghɔŋbə chisêkə bu mì təmə ŋgiekə-ɔŋ bɔŋ bu nə mì fɛ.

36 "Bɔŋ ndə chî-ghɔ̄-kə byuunɔ mbʉ ndʉʉ ndə ɔ bu gwè chɔ, wotəmiyɔŋ kínə fɛ, tə buŋ kɔmə bʉəntəŋNyii ndə bɔ̂ŋ bɛ yuo, byuunɔ mbʉ Vaa, nɔ bɔŋ kínə haʼ mbʉ Tie tətɛʼ ɔ.

37 "Vɛʼ ndə Vaa-Woməsʉʉ bu yi bʉ̀nə gwè chɔ, nɔ bu yi bɛ haʼ ndə vɛʼ Nua. 38 Bʉʼka nɔ nə bɛ ndəŋ chî-ghɔ̄-bə, muu buŋ lìhə wʉʉnəmbikə, bʉə nɔ nə kə́ yú, kə́ nú, kə́ gɛ̀ lɔŋ, bɔŋ-kə́-leʼ kɔ́ lɔŋ tə gɛ̀ dàa ndəŋ chîkə ndə Nua kə ŋíi chɔ mu kəbuukwɛʼtəŋ. 39 Təmə bɔ̂ŋ chèʼnə fɛ, tə muu gwè lìhə bɔŋ bənchəŋ, bɛ̀ʼ bɔŋ gɛ̀ nə yɔŋ. Nɔ bɛ haʼ nɔ ndə i bu yi bɛ vɛʼ ndə Vaa-Woməsʉʉ bu gwè. 40 Ndʉʉmɛ, bʉə bəbûu bu bɛ mutɔ, bə lʉ̀ mbyu wo-imɔʼ, mɛ̀ʼtə imɔʼ. 41 Bəke bəbûu bu tə́nə mashʉŋ kə́ gɔ̀ baakə, bə lʉ̀ mbyu wo-imɔʼ, mɛ̀ʼtə imɔʼ. 42 Nɔ, b̈ii káa nə tʉbə-i ghɔʼ bʉʼka bii kínə chîkə ndə Tiekətʉ-yii bu bʉ̀nə gwè chɔ fɛ.

43 "Bɔŋ b̈ii kínə yɔ̄ŋ-yə, mbɔ kaʼ ŋwɔ̌ŋ-njaa kʉ̂ʉ kínə ndʉʉ ndə lʉʼ bu gwè chɔ bətyuʼ, təmə ɔ nɔ kə́ chí nə shʉ-i iŋɔ́ʼnə təmə mɛ̀ʼtə njaa-ɛ, bə bə́ʼ sʉ́ʉ muŋgɔ fɛ. 44 Nɔ, mbəŋ-yii ghɔ nɔ kie ndə məshʉ̀tə ŋwɔŋ-yii bʉʼka mbɔ Vaa-Woməsʉʉ bu bɔ̀ʼtə gwè ndʉʉ ndə a gòʼ təmə kínə fɛ.

45 "Bɛ nda ndʉʉmɛ, bɛ vaafɔ̀ʼ gìe shʉəŋ ndə ɔ kie mukətʉ súunə? Nɔ bɛ vaafɔ̀ʼ ndə tiefɔ̀ʼ nɔʼ tʉ́ʼ ɔ ndə mə-kə́-lɛ́nə bəbɛʼbə vâafɔʼɔ ndə mə-kə́-kɔ́ fɔyubə-ʉə tʉ bɔŋ ndə ndʉʉ bəfɔyu. 46 I bu yi bʉ̀ʉ tʉ maa-yīŋ vaafɔ̀ʼ ndə tiefɔ̀ʼ bu yi kə bʉ̀nə nyíɛ ɔŋ, ɔ kə́ fɔ̀ʼ jyujyu. 47 Nɔʼ m̈ɔ shyíi bii nə shʉəŋ, ɔ bu dùʼhə ɔŋ, ɔ bɛ wokwɛʼtəŋ ndəŋ fɔbə-i inchəŋ. 48 Bɔŋ kaʼ vaafɔ̀ʼ-ghɔ̄ bɛ bʉəbʉə, kə́ gìe tʉ ŋwɔŋ-ɛŋ mbɔ, ‘Tiefɔʼ-ɔ bu tùu,’ 49 ndʉʉmɛ, ɔ chʉ́ʉhə məgwúutə bəbɛʼvâafɔʼɔ, kə́ yú bɔŋleʼ nú ghɔŋbə bəmbuuməndʉʼ, 50 mbʉ tiefɔʼ-ɛ bu bɔ̀ʼtə gwè ndəŋ chîkə ndə ɔ gòʼ təmə kə́ chyìi ɔ fɛ, gwè ndəŋ ndʉʉ ndə ɔ gòʼ təmə kínə fɛ. 51 Ɔ bu chètə ɔŋ bəŋkwutəbəŋkwutə jə̀ŋ ɔŋ kɔ́ mu bʉə làhə shʉ. Kəyəŋ-ghɔ̄, gwia ghɔŋbə mbʉə liŋnə shʉ́əshʉ́ə bu bɛ chɔ."