1 "Bəkɔ bə fʉ̀ʼ Sɔ́ʼ Fɔŋ Yuo ndə vâabəke wuŋ ndə bɔ̂ŋ gòʼ təmə nɔʼ nə kínə bələŋ fɛ ndə bɔ̂ŋ lʉ̀ bəlaŋ-bʉə gɛ̀ ndə məbìatə wo ndə ɔ tʉʼ chìi lɔŋ. 2 Bətaa hə mu bɔŋ nɔ kə bɛ bʉə kətʉ chíenə, bəbɛʼbə bətaa kə́ bɛ bʉə ndə bɔ̂ŋ kie mukətʉ súunə. 3 Mbʉ bətaa ndə bɔ̂ŋ kə bɛ bənɔ̌ʼɔ le, lʉ̀ bəlaŋ-bʉə təmə lʉ̀ kalashi * fɛ. 4 Bɔŋ bīŋbə ndə bɔ̂ŋ kie mukətʉ súunə le, bɔ̂ŋ lʉ̀ bəbutʉtə ilə́ŋnə nə kalashi ghɔŋbə bəlaŋ-bʉə. 5 Mbʉ wo chìi lɔŋ tùu ndə məgwè, bɔ̂ŋ chʉ́ʉhə ndə məjyùu kə́ bɔŋleʼ bɛ́ŋ mbɛŋhə. 6 Kʉ̂ʉ bɛ ndʉʉkwɔnəmbi, bə chʉ́ʉhə ndə mətíitə, kə́ ghɔ̀ŋ mbɔ, ‘B̈ii nyíɛ! Mbʉ wo chìi lɔŋ nɔ! B̈ii fyú bìatə ɔŋ.’

7 "Mbʉ vâabəke-ghɔ̄bə lɔ̀ hə sê bənchəŋ kóʼhə bəlaŋ-bʉə. 8 Vâabəke ndə bɔ̂ŋ kə bɛ bənɔ̌ʼɔ ghɔ̀ŋ tʉ bī-ndaa-bə mbɔ, ‘B̈ii kɔ́ baʼa nə vaadyʉʼʉ kalashi-yii bʉʼka bəlaŋ-baʼa tʉʼ shíʼ.’ 9 Bɔŋ mbʉ vâabəke ndaa bə̀ŋhə mbɔ, ‘I mə kʉ̀ʼnə tʉ baʼa leʼnə mbəŋ-yii fɛ, b̈ii gɛ̀ tʉ bʉə vyii gɛ̀ nyúɔ yii-yə.’

10 "Ndə bɔ̂ŋ kə́ gɛ̀ ndə məgɛ̀ nyúɔ, mbʉ wo ndə ɔ tʉʼ chìi lɔŋ gwè, sʉ́ʉ mu njaa ghɔŋbə vâabəke ndə bɔ̂ŋ nɔʼ kə shʉ̀tə ŋwɔŋtə-ʉə ndə məyú lɔŋ, bə fʉ̀əŋ chusii. 11 Kʉʉkə məniʼ, bəbɛʼvâabəke-bīŋ gwè ghɔ kə́ ghɔ̀ŋ mbɔ, ‘Tiekətʉ! Tiekətʉ! Chóʼ chusii tʉ baʼa.’ 12 Bɔŋ ɔ bə̀ŋhə tʉ bɔŋ mbɔ, ‘Nɔʼ m̈ɔ shyíi bii nə shʉəŋ mbɔ mɔ kínə bii fɛ.’

13 "Nɔ, b̈ii láa lɛ, bʉʼka bii kínə chî-ghɔ̄-kə fɛ, təmə bɔŋ kínə mbʉ ŋgwɔʼmbi fɛ.

14 "Sɔ́ʼ Fɔŋ Yuo bu yi bɛ nə wo ndə ɔ tʉʼ gɛ̀ mətòʼ, ndə ɔ tíi vâafɔʼɔ-bi, chɔ̀ʼhə fɔbə-i kɔ́ tʉ bɔŋ. 15 Ɔ kə́ kɔ́ tʉ wo ghʉə ndə bəkɔ ɔ fɔ̀ʼ nə yɔŋ. Ɔ kɔ́ tʉ fəŋ wo bəkwo kyʉə itaa, mbyu kwo kə́ bɛ kyʉə ghʉə ndə bəkɔ wo-fɔ̀ʼ ndə ŋgʉʼhə wuŋ bûu, kɔ́ tʉ ibɛʼ-yə bəkwo kyʉə ibûu, kɔ́ tʉ ibɛʼ-yə kwo-kyʉə imɔʼ. Ndʉʉmɛ, ɔ lɔ̀ gɛ̀ nə wi mətòʼ. 16 Wo ndə bə kə kɔ́ bəkwo kyʉə itaa tʉ ɔŋ, lɔ̀ haʼ ndʉʉmɛ gɛ̀ ndə məchìi mbɛʼnə nə yɔŋ, sii bəbɛʼbəkwo kyʉə itaa. 17 Wo ndə ɔ kə kie bəkwo kyʉə ibûu, sii bəbɛʼbəkwo ibûu. 18 Bɔŋ wo ndə ɔ kə kie mbyu kwo-kyʉə imɔʼ gɛ̀ tyúu sê gwɛ̀ŋ kyʉə tiefɔʼ-ɛ chɔ.

19 "I kʉ̂ʉ chí dɔ̀ŋnə, tiefɔʼ-yʉə bʉ̀nə gwè tíi bɔŋ ndə məgwè shyíi ɔ ndə bɔ̂ŋ fɔ̀ʼ nə mbʉ kyʉə. 20 Wo ndə ɔ kə kie bəkwo kyʉə itaa, gwè nə sii ndə bəkwobɛʼbə itaa ghɔ̀ŋ mbɔ, ‘Tiefɔʼ, a nɔ nə kɔ́ bəkwo kyʉə tʉ mɔ bəkwo itaa, i nɔ síihə bəbɛʼbə bəkwo itaa.’ 21 Tiefɔʼ-ɛ gìe tʉ ɔŋ mbɔ, ‘A nɔ fɔ̀ʼ jyujyu, a nɔ yʉʼ vaafɔ̀ʼ, bɔŋ-kə́-leʼ bɛ wo-shʉəŋ. A nɔʼ gìe shʉəŋ ndə vaa-kəfɔ məniʼ, mɔ bu dùʼhə a nduɔ ndəŋ yi-yɔ́ŋyɔ́ŋ-yə. Nduɔ, kə́ kie ntɛ tʉʉjyu haʼ ndə tiefɔʼ-a kie.’

22 "Wo ndə ɔ kə kie bəkwo kyʉə ibûu fyú gwè ghɔ, ghɔ̀ŋ mbɔ, ‘Tiefɔʼ, a nɔ nə kɔ́ bəkwo kyʉə tʉ mɔ bəkwo ibûu, i nɔ síihə bəbɛʼbə bəkwo ibûu.’ 23 Tiefɔʼ-ɛ gìe tʉ ɔŋ mbɔ, ‘A nɔ fɔ̀ʼ jyujyu, a nɔ yʉʼ vaafɔ̀ʼ, bɔŋ-kə́-leʼ bɛ wo-shʉəŋ. A nɔʼ gìe shʉəŋ ndə vaa-kəfɔ məniʼ, mɔ bu dùʼhə a nduɔ ndəŋ i yɔ́ŋyɔ́ŋ-yə. Nduɔ, kə́ kie ntɛ tʉʉjyu haʼ ndə tiefɔʼ-a kie.’ 24 Wo ndə ɔ kə kie mbyu kwo-kyʉə imɔʼ fyú gwè bəshʉ ghɔ̀ŋ mbɔ, ‘Tiefɔʼ, mɔ nɔ nə kínə mbɔ a nɔ bɛ wo shʉ́əshʉ́ə, kə́ kwɛ̀tə ntɔŋmə ndə a gòʼ təmə bè fɛ, kə́ byíi ntɔŋmə kəyəŋ ndə a gòʼ təmə yʉ̀ʼ ŋgwiehə chɔ fɛ. 25 Nɔ, mɔ nɔ kə kə́ fàa, gɛ̀ tyúu sê gwɛ̀ŋ kyʉə-a chɔ. Nyíɛ! Nɔ bɛ fɔkə nɔ ndə bɛ ya-yə.’

26 "Bɔŋ Tiefɔʼ-ɛ bə̀ŋhə tʉ ɔŋ mbɔ, ‘A nɔ bɛ vaafɔ̀ʼ buuŋbʉə, bɔŋ-kə́-leʼ bɛ wo-bəghʉʉhə! A kə kínə mbɔ m̃ɔ nɔ kwɛ̀tə ntɔŋmə ndə mɔ gòʼ təmə bè fɛ, kə́ byíi ntɔŋmə kəyəŋ ndə mɔ gòʼ təmə yʉ̀ʼ ŋgwiehə chɔ fɛ fe? 27 Bɔŋ chìi ka ndʉʉmɛ, təmə a gɛ̀ mɔ̀ʼ kyʉə-ɔ mu baŋ mbɔ mɔ chʉʼ yi kə́ gwè nɔ lʉ̀ kyʉə ndə bɛ yɔŋ-yə ghɔŋbə sii fɛ? 28 B̈ii fí mbʉ kyʉə kəghɔ-ɔ, kɔ́ tʉ wo ndə ɔ kie bəkwo wuŋ le. 29 Bʉʼka wotəmiyɔŋ ndə ɔ kie, bə bu bìʼ yi-yɔ́ŋyɔ́ŋ-yə chɔ, ɔ chʉʼ kie buŋmbi daa. Bɔŋ wo ndə ɔ gòʼ təmə kie fɛ, buŋ vaadyʉʼʉ ndə ɔ kie, bə bu fí hə kəghɔ-ɔ. 30 B̈ii mɛ̀ʼ vaafɔ̀ʼ njʉnjʉ-ɔ̄ mu kənjəŋ. Kəyəŋ-ghɔ̄, gwia bu bɛ chɔ ghɔŋ mbʉə liŋnə shʉ́əshʉ́ə bu bɛ chɔ.’

31 "Ndʉʉ ndə Vaa-Woməsʉʉ bu gwè mu məŋwɔʼmə-i, ghɔŋbə bʉəntəŋNyii bənchəŋ gwè mɔʼɔ, ndʉʉmɛ, ɔ bu yétə ndəŋ yetə-məgʉ́ə-kə-i. 32 Lɔʼ-bətə̂ŋ-tə inchəŋ kəwʉʉnəmbi chə̀ŋtə bəshʉ ɔ, ɔ bu tíetə bʉəməsʉʉ ndə nchyii bihə tíetə binjyʉʉhə fyúhə mu biŋgoʼhə. 33 Ɔ bu tʉ́ʼtə binjyʉʉhə kwiimɔʼnə-ɔŋ, tʉ́ʼtə biŋgoʼhə kwiiŋkwie-ɔ. 34 Ndʉʉmɛ, mbʉ Fɔŋ bu bʉ́ tʉ bʉə ndə bɔ̂ŋ bɛ kwiimɔʼnə-ɔŋ mbɔ, ‘B̈ii gwè, bii ndə Tie-ɔ nɔʼ bìʼ bii nə tʉʉjyu, gwè kie yii-yə yʉʉ mu sɔ́ʼ Nyii ndə ɔ nɔʼ kə shʉ̀tə tʉ́ʼ tʉ bii wʉʉnəmbikə buŋ nə chʉ́ʉhə. 35 Bʉʼka vɛʼ ndə jyʉʉ nə kə́ yɔ́ʼ mɔ, bii kɔ́ fɔyubə tʉ mɔ, vaatʉʉ-ɔ yəŋ, bii kɔ́ fɔkə mɔ nú, mɔ bɛ ntoʼŋgwe, bii lʉ̀ mɔ chunjaa-bii, 36 mɔ kə́ tòʼ kənchiʼtʉʉ, bii véʼ ndyi tʉʉ-mɔ, mɔ kə́ yɔ́ʼyɔ́ʼ, bii gwè lɛ́nə yɔʼkə-ɔŋ, bə fʉ̀əŋ mɔ chaŋ, bii gwè nyíɛ mɔ.’

37 "Ndʉʉmɛ, bʉə ndə bɔ̂ŋ bɛ ndyʉndyʉ tʉ Nyii bu bə̀ŋhə mbɔ, ‘Tiekətʉ, baʼa kə nyíɛ aŋ ndʉʉka ndə jyʉʉ tʉʼ yɔ́ʼ a, tʉ baʼa kɔ́ fɔyubə tʉ a, nyíɛ aŋ fa ndə tʉʉ-a yə́ŋ baʼa kɔ́ fɔkə tʉ a, a nú? 38 Bɛ ndʉʉka ndə baʼa nyíɛ aŋ, a kə́ bɛ ntoʼŋgwe baʼa lʉ̀ a chunjaa baʼa byuunɔ kənchiʼtʉʉ véʼ ndyi tʉʉ-a? 39 Bɔŋ bɛ ndʉʉka ndə baʼa nyíɛ aŋ, a kə́ yɔ́ʼyɔ́ʼ byuunɔ mu njaa-chaŋ baʼa gwè mətòʼ tʉ a?’ 40 Mbʉ Fɔŋ bu bə̀ŋhə tʉ bɔŋ mbɔ, ‘Nɔʼ m̈ɔ shyíi bii nə shʉəŋ, ndə bii kə fɔ̀ʼ tʉ ndyiʼtə-wo-kə mu bəliŋ-bɔŋ-bɔ̄ŋ, bii nɔ nə kə́ fɔ̀ʼ tʉ mɔ.’

41 "Ɔ bu ghɔ̀ŋ ndʉʉmɛ, tʉ bʉə ndə bɔ̂ŋ bɛ kwiiŋkwie mbɔ, ‘B̈ii kwɛ̀ʼtə mbʉə mɔ, bii ndə ndɔŋ Nyii bɛ ndəŋ bii, gɛ̀ mu viʼi ndə bə kə shʉ̀tə tʉ Debulu ghɔŋbə bʉəntəŋ-bi təmə i kie liʼ-i fɛ. 42 Bʉʼka vɛʼ ndə jyʉʉ kə yɔ́ʼ mɔ, bii kə kɔ́ fɔyubə tʉ mɔ fɛ, vaatʉʉ-ɔ yəŋ, bii kɔ́ fɔkə mɔ nú fɛ, 43 mɔ kə́ bɛ ntoʼŋgwe təmə bii lʉ̀ mɔ chunjaa-bii fɛ, mɔ kə́ tòʼ kənchiʼtʉʉ, bii véʼ ndyi tʉʉ-mɔ fɛ, mɔ kə́ yɔ́ʼyɔ́ʼ, bə fʉ̀əŋ mɔ chaŋ, təmə bii gwè nyíɛ mɔ fɛ.’ 44 Ndʉʉmɛ, bɔ̂ŋ bu bə̀ŋhə ghɔ mbɔ, ‘Tiekətʉ, baʼa kə nyíɛ aŋ ndʉʉka ndə jyʉʉ tʉʼ yɔ́ʼ a byuunɔ nyíɛ aŋ fa nə jyʉʉ muu byuunɔ a kə́ bɛ ntoʼŋgwe byuunɔ a kə́ bɛ kənchiʼtʉʉ byuunɔ a kə́ yɔ́ʼyɔ́ʼ, byuunɔ a kə́ bɛ mu njaa-chaŋ təmə baʼa kwáa a fɛ?’ 45 Ndʉʉmɛ, ɔ bu bə̀ŋhə tʉ bɔŋ ghɔ̀ŋ mbɔ, ‘Nɔʼ m̈ɔ shyíi bii nə shʉəŋ, ndə bii kə gòʼ təmə fɔ̀ʼ tʉ ndyiʼtə-wo-kə mu bʉə-bɔ̄ŋ fɛ, bii kə fɔ̀ʼ tʉ mɔ fɛ.’ 46 Ntɛ bʉə-bʉəbʉə-bɔ̄ŋ bu gɛ̀ kəyəŋ nyíɛ ŋgʉəʼ təmə liʼ-i ghɔ fɛ, bʉə ndə bɔ̂ŋ bɛ ndyʉndyʉ tʉ Nyii gɛ̀ ndə məchímbi təmə liʼ-i ghɔ fɛ."