Mateus 4

Bə mùutə Jiso

1 LyʉʉhəNyiikə chóʼ Jiso kóʼ gɛ̀ nə nɔŋ mu kwɔŋkəyəŋnə mbɔ Debulu mùutə ɔŋ mbɔ ɔ̈ gwù mu bʉ̂ʼʉ. 2 Ndʉʉ ndə ɔ nɔʼ kə jì muu ndə bəndʉʉnəchî wuŋ kwi ghɔŋbə bəndʉʉbətyuʼ wuŋ kwi, jyʉʉ yɔ́ʼ ɔ. 3 Mbʉ Debulu gwè ghɔ̀ŋ tʉ ɔŋ mbɔ, "Kaʼ bɛ mbɔ a bɛ VaaNyii, téʼ tʉ ŋgoʼhə-ɔ̄, i bə̀ŋ bele."

4 Ɔ bɔŋ bə̀ŋhə mbɔ, "Bə nɔ nyɔ̀ʼ mu ŋwɔʼnə-Nyii mbɔ,

‘Wo mə kə́ chí mbi bə haʼ bʉʼka bele fɛ,

bɔŋ bəkɔ ɔ chí bʉʼka ŋgiekə təmiyɔŋ ndə i fyú hə chu-Nyii.’ " *4:4 Məbìʼ Kɔ́ Nuʼ 8:3.

5 Ndʉʉmɛ, mbʉ Debulu lʉ̀ ɔ, gɛ̀ nə nɔŋ mu yəŋkwɛʼtəŋNyiikə ndə i bɛ ŋkʉʉ, gɛ̀ chìi ɔ kóʼ tə́nə jɔŋ kətʉ njaafɛ̀ʼndɛŋNyii*, 6 ghɔ̀ŋ tʉ ɔŋ mbɔ, "Kaʼ a bɛ VaaNyii, ä sɛ́ʼ fɛ̄ŋ chə́ŋ sê, bʉʼka ŋwɔʼnə-Nyii nɔ ghɔ̀ŋ mbɔ,

‘Ɔ bu kàhə bʉəntəŋ-bi bɔ̂ŋ kə́ chyìi a jyujyu.

Bɔ̂ŋ bɔŋ-bu-leʼ bɛ̀ʼ a kəghɔ-bɔŋ,

bʉʼka a mə yi kwɔ̀ŋ wukə-a ndəŋ ŋgoʼ.’"*4:6 Ŋwɔʼnə-təLyuu* 91:11-12.

7 Jiso bə̀ŋhə tʉ ɔŋ mbɔ, "Bə nɔ bìʼ nyɔ̀ʼ mu ŋwɔʼnə-Nyii mbɔ, ‘A kie ndə məyúotə Nyii Tiekətʉ-a fɛ.’ " *4:7 Məbìʼ Kɔ́ Nuʼ 6:16.

8 Debulu bìʼ lʉ̀ ɔ, kóʼ gɛ̀ nə nɔŋ ndəŋ kwɔŋ ndə i də̀ʼ daa, dʉ̀ʼ lɔʼ-bətə̂ŋ-tə inchəŋ ndə i kə bɛ kəwʉʉnəmbi ghɔŋbə məgʉə-yʉə tʉ ɔŋ, 9 ghɔ̀ŋ tʉ ɔŋ mbɔ, "Mɔ bu kɔ́ fɔbə-ɔ̄ŋ tʉ a inchəŋ, kaʼ a bʉ́ʉnə sê lə̀ʼtə mɔ."

10 Ndʉʉmɛ, Jiso bə̀ŋhə tʉ ɔŋ mbɔ, "Lɔ̀ hə fɛ̄ŋ gɛ̀, Sata! Bə nɔ nyɔ̀ʼ mu ŋwɔʼnə-Nyii mbɔ, ‘A nɔ kie ndə mələ̀ʼtə Nyii Tiekətʉ-a, kə́ fɔ̀ʼ haʼ tʉ ɔŋ tətɛʼ ɔ.’ " *4:10 Məbìʼ Kɔ́ Nuʼ 6:13.

11 Ndʉʉmɛ, mbʉ Debulu lɔ̀ hə mbʉə ɔ gɛ̀, bʉəntəŋNyii gwè, kə́ fɔ̀ʼ tʉ ɔŋ.