1 Jiso kʉ̂ʉ nyíɛ nuɔ-bʉə, kóʼ gɛ̀ ndəŋ kwɔŋ, ndʉʉ ndə ɔ dùʼ sê vâafɔʼɔ-bi gwè mbʉə ɔ, 2 ɔ chʉ́ʉhə kə́ dàhə bɔŋ.

Ɔ ghɔ̀ŋ mbɔ,

3 "Tʉʉjyu nɔ bɛ yi-bʉə-yə ndə bɔ̂ŋ kínə mbɔ bɔ̂ŋ mə kwáa ŋwɔŋ-yʉə fɛ, bʉʼka Sɔ́ʼ Fɔŋ Yuo nɔ bɛ yʉə-yə.

4 Tʉʉjyu nɔ bɛ yi-bʉə-yə ndə bɔ̂ŋ tʉʼ gwía nduɔ bʉʼka bə bu yá fyiihə-ʉə.

5 Tʉʉjyu nɔ bɛ yi-bʉə-yə ndə bɔ̂ŋ lʉ̀ ŋwɔŋ-yʉə sê, bʉʼka bɔ̂ŋ bu yú chisêkə.

6 Tʉʉjyu nɔ bɛ tʉ bʉə ndə jyʉʉ mətə́nə ndyʉndyʉ tʉʼ yɔ́ʼ bɔŋ, bʉʼka bə bu yúʼ bɔŋ tə bɔ̂ŋ yúo.

7 Tʉʉjyu nɔ bɛ yi-bʉə-yə ndə bɔ̂ŋ tʉʼ kie tʉvyiikə ndəŋ bəbɛʼbʉə, bʉʼka bə bu dʉ̀ʼ tʉvyiikə tʉ bɔŋ.

8 Tʉʉjyu nɔ bɛ yi-bʉə-yə ndə bɔ̂ŋ kie mu fyii tʉ́ʉnə, bʉʼka bɔ̂ŋ bu nyíɛ Nyii.

9 Tʉʉjyu nɔ bɛ yi-bʉə-yə ndə bɔ̂ŋ tʉʼ chìi mbɔ b̈ʉə kie fyiighʉ́ənə, bʉʼka bə bu tíi bɔŋ nə vâa-Nyii.

10 Tʉʉjyu nɔ bɛ yi-bʉə-yə ndə bə tʉʼ chɔ́ŋhə bɔŋ bʉʼka bɔ̂ŋ tə́nə ndyʉndyʉ ghɔŋbə Nyii, bʉʼka Fɔŋ Yuo tʉʼ sɔ́ʼ bɔŋ.

11 "Tʉʉjyu nɔ bɛ tʉ bii ndə bəbɛʼbʉə tʉʼ chɛ̀ŋtə bii, kə́ chɔ́ŋhə bii bɔŋleʼ kə́ gìe ntɛ-bənu-bʉəbʉə-hə inchəŋ kətʉ-bii təmə mɔ̀ʼ luu-i fɛ, bʉʼka mɔ. 12 T̈ʉʉ-yii kə́ sʉ́ʼnə bɔŋleʼ bʉ̀ʉ, bʉʼka kɛŋbə-ii bu yɔ́ŋ yuo, bʉʼka bɔ̂ŋ nɔ kə́ chɔ́ŋhə haʼ bʉəyʉkəŋgieNyii nɔ ndə bɔ̂ŋ kə gwè hə bəshʉ bii.

13 "Bii nɔ bɛ chʉəʼ tʉ wʉʉnəmbikə, kaʼ bɔŋ məsʉ́ʼnə chʉəʼ nɔʼ mì, bəkɔ a chìi ka chɔ i buŋ bʉ̀nə leʼ sʉ́ʼnə? I mə leʼ kwáa ndə nubɛʼkə fɛ, yaʼkɛŋ mbɔ b̈ə tyù, kə́ tòʼtə ndəŋ ghɔ.

14 "Bii nɔ bɛ kɛʼɛ tʉ wʉʉnəmbikə. Yəŋkwɛʼtəŋkə ndə bə bɔ́ŋ ndəŋ kwɔŋ mə nə líi fɛ. 15 Wo kyinə chúʼ kɛʼɛ kwóhə shyiikə ndəŋ ghɔ fɛ, bɔŋ ɔ chɔ̀ʼhə fùɔ ndəŋ kəfɔ, i báa kɛ̀ʼ yəŋbə tʉ bʉə bənchəŋ mu njaa. 16 Kɛʼɛ-yii nɔ kie ndə məbáa haʼ nɔ bəshʉ bəbɛʼbʉə, mbɔ bɔ̂ŋ chʉʼ nyíɛ fɔʼɔ-jyujyu-yii, kɔ́ kuŋhə tʉ Tie-yii ndə ɔ bɛ yuo.

17 "Kə bii mə kwɔ̀ʼtə mbɔ mɔ gwè ndə məbʉ́əhə nuʼ-Mushi fɛ byuunɔ nubə ndə bʉəyʉkəŋgieNyii kə dàhə fɛ. Mɔ gwè ndə məbʉ́əhə fɛ, mɔ nɔ gwè ndə məchìi ï fyú shʉəŋ. 18 Nɔʼ m̈ɔ shyíi bii nə shʉəŋ mbɔ, tə yuo ghɔŋbə chisêkə yi kə mì, vaadyʉʼʉ kəŋgie kʉʉ yi bɛ́ mu nuʼ-Nyii-ɔ̄ŋ fɛ, byuunɔ vaakəŋwia mə nə bɛ́ ndəŋ nuʼ-Nyii-ɔ̄ŋ fɛ, tə nchəŋnchəŋ-ɛŋ yaʼ yi fyú sê. 19 Nɔ ndʉʉmɛ, wotəmiyɔŋ ndə ɔ bə́ʼ mbyu nuʼ-Mushi buŋ ndə ɔ kwɔ̀ʼtə mbɔ bɛ vaantikəniʼ, kə́ dàhə bəbɛʼbʉə ndə məchìi haʼ nɔ, bu bɛ ndyiʼtə-wo-kə mu bʉə ndə Fɔŋ Yuo tʉʼ sɔ́ʼ bɔŋ. Bɔŋ wotəmiyɔŋ ndə ɔ tʉ́ʼ mbʉ nuʼ-Mushi bɔŋleʼ kə́ dàhə, bə bu tíi ɔ nə wokwɛʼtəŋ mu bʉə ndə Fɔŋ Yuo tʉʼ sɔ́ʼ bɔŋ. 20 Nɔʼ m̈ɔ shyíi bii mbɔ yaʼkɛŋ mbɔ mətə́nə ndyʉndyʉ-a yaʼ tíŋ yi-bʉə-yə ndə bɔ̂ŋ tʉʼ dàhə nuʼ-Mushi ghɔŋbə yi-bʉə-Falasi-yə fɛ, Fɔŋ Yuo mə nə sɔ́ʼ a fɛ.

21 "Bii nɔ nə yʉ́ mbɔ bə nɔ nə ghɔ̀ŋ tʉ bʉə-bəshʉ mbɔ, ‘Kə bii mə shùɔ wo yí fɛ, wo ndə ɔ shùɔ wo yí, bu tə́nə mu njaafɛ̀ʼ.’ 22 Bɔŋ nɔʼ m̈ɔ shyíi bii mbɔ wo ndə tʉʉ-i tʉʼ byʉ́ʼ tʉ liŋ-iŋ bu tə́nə mu njaafɛ̀ʼ. Wo ndə ɔ chɛ̀ŋ liŋ-iŋ bu tə́nə mu njaafɛ̀ʼ bʉə-Juu. Wo ndə ɔ gìe tʉ liŋ-iŋ mbɔ, ‘Nɔ̌ʼ-ɔ̄ŋ,’ təmə ɔ bu bɛ fia ndə məgɛ̀ mu viʼi.

23 "Kaʼ a gwè nə kɔkə-a kəyəŋfɛ̀ʼndɛŋNyii, gwè dàa chɔ, kwɛ́nə mbɔ liŋ-aŋ kie nukə te a, 24 shúʼhə kɔkə-a tʉ́ʼ bəshʉ kəyəŋfɛ̀ʼndɛŋNyii, fəŋ gɛ̀, bii liŋ-aŋ lìʼ mbʉ ntuu, ä gwè ndʉʉmɛ kɔ́ kɔkə-a.

25 "Kaʼ wo mɔ̀ʼ nukə kətʉ-a, lʉ̀ a kə́ gɛ̀ nə aŋ fɛʼɛ, nyíɛ ɔŋ, bii ɔ chʉʼ lìʼ mbʉ fɛʼɛ ndʉʉ ndə bii ɔ bíe sêfia, byuunɔ təmə ɔ bu gɛ̀ kɔ́ a tʉ wo chʉ̀ə fɛʼɛ mu njaafɛ̀ʼ. Mbʉ wo chʉ̀ə fɛʼɛ kɔ́ a tʉ wo-shia-kəfʉəŋ, ɔ kɔ́ a chaŋ. 26 Nɔʼ m̈ɔ shyíi a nə shʉəŋ mbɔ a mə leʼ dʉ̀ʼ tʉkə-a mbi fɛ, tə a yaʼ lɔ̀ʼ tə lɔ̀ʼ nə ŋii-kəghɔ-bə-a.

27 "Bii nɔʼ kə yʉ́ mbɔ bə nɔ nə ghɔ̀ŋ mbɔ, ‘Kə a mə gháa bəsəŋ fɛ.’ 28 Bɔŋ nɔʼ m̈ɔ shyíi bii mbɔ kaʼ wo lɛ́nə woke nə shʉ bəsəŋ təmə ɔ nɔʼ gháa bəsəŋ ghɔŋ ɔŋ mu fyii-ɔ. 29 Kaʼ kwii-vaashʉ-mɔʼnə-aŋ tʉ́ʉhə a, a chìi bʉ̂ʼʉ, ä chʉ́ʼ fyúhə mɛ̀ʼ. Bʉʼka i nɔ bʉ̀ʉ mbɔ a bɛ́ yəŋ-mbʉə-kə-a imɔʼ, tə chàa mbɔ b̈ə mɛ̀ʼ ŋkwê mbʉə-a inchəŋ mu viʼi. 30 Kaʼ kwiimɔʼnə-aŋ chìi a, a chìi bʉ̂ʼʉ, ä chʉ̀ə fyúhə mɛ̀ʼ. Bʉʼka i nɔ bʉ̀ʉ mbɔ a bɛ́ yəŋ-mbʉə-kə-a imɔʼ tə chàa mbɔ ŋ̈kwê mbʉə-a inchəŋ gɛ̀ mu viʼi.

31 "Bə nɔ nə ghɔ̀ŋ mbɔ, ‘Wo ndə ɔ fyúhə vi-i lɔŋ, ɔ nɔ kie ndə məkɔ́ ŋwɔʼnə tʉ ɔŋ ndə mədʉ̀ʼ mbɔ ghɔŋ ɔŋ nɔʼ wɔ̀ʼtə lɔŋ.’ 32 Bɔŋ nɔʼ m̈ɔ shyíi bii mbɔ wotəmiyɔŋ ndə ɔ wɔ̀ʼtə lɔŋ ghɔŋ vi-i yaʼkɛŋ bʉʼka nu-bəsəŋ-kə, nɔʼ chìi mbɔ ɔ̈ gháa bəsəŋ. Bɔŋ wo ndə ɔ leʼ lʉ̀ woke ndə ɔ nɔʼ wɔ̀ʼtə lɔŋ, nɔʼ gháa bəsəŋ ghɔ.

33 "Bii nɔʼ kə bìʼ yʉ́ ndə bə kə ghɔ̀ŋ tʉ bʉə-bəshʉ mbɔ, ‘Kə a mə kàa nukə nə mbii fɛ, a bɔŋ kie ndə məfɔ̀ʼ nukə ndə a nɔʼ kə kàa tʉ Tiekətʉ.’ 34 M̈ɔ bɔŋ shyíi bii mbɔ, kə a mə nə kàa nubɛʼkə təmiyɔŋ fɛ, kə bɛ yie yuo, bʉʼka nɔ bɛ yetə-Nyii-kə, 35 byuunɔ yie chisêkə, bʉʼka nɔ bɛ yəŋ-tʉ́ʼ-nchɔʼ-Nyii-hə-kə, byuunɔ yie Jɛlosalɛŋ, bʉʼka nɔ bɛ yəŋkwɛʼtəŋkə ndə mbʉ Fɔŋ bəfɔŋ bɛ chɔ. 36 Kə a mə kàa nukə te tʉkə-a fɛ, bʉʼka a mə chìi mbyu nyu-i fyùʼ, byuunɔ mbyu nyu-i fʉ́əŋ fɛ. 37 B̈ii kʉ̂ʉ kə ghɔ̀ŋ mbɔ, ‘Əŋ’ nɔ, kə bɛ ‘Əŋ’ byuunɔ ‘Mbee’ nɔ, kə bɛ ‘Mbee.’ Nubɛʼkə ndə i tíŋ yɔ̄ŋ-yə, nɔ gwè hə kəghɔ-Sata.

38 "Bii nɔʼ kə yʉ́ ndə bə kə ghɔ̀ŋ mbɔ, ‘Kaʼ wo tóʼ shʉ-a, b̈ə leʼ tóʼ yi-yə ghɔ, kaʼ wo chóʼ gyʉəʼə-a, b̈ə chóʼ yi-yə ghɔ.’ 39 Bɔŋ nɔʼ m̈ɔ shyíi bii mbɔ, kə a mə kə́ kɔ̀ɔtə ndə məbʉ̀nə tyú bʉ̂ʼʉ tʉ wo-bʉ̂ʼʉ fɛ. Bɔŋ kaʼ wo chʉ̀əʼhə a gwúu ghɔkə chu-a kwiimɔʼnə, ä jʉhə. 40 Kaʼ wo lʉ̀ a ndə məgɛ̀ nə aŋ mu njaafɛ̀ʼ mbɔ ɔ̈ fí ndyi mu mbʉə-a, ä kɔ́ ndyi-fəʼə-a ghɔ tʉ ɔŋ. 41 Kaʼ wo kwɛ̀ŋhə aŋ ndə mətòʼ gɛ̀ tə dàa nə bəghǔu təghyʉʉ təkwiitia nə wuŋ taa, ä gɛ̀ bii ɔ vɛʼ bûu. 42 Kaʼ wo gháa fɔkə kəghɔ-a, ä kɔ́ tʉ ɔŋ, kə a mə tɛ́ŋ ndə məchɔ́ʼhə fɔkə tʉ wo ndə ɔ chɔ́ʼhə fɔkə kəghɔ-a fɛ.

43 "Bii nɔʼ kə yʉ́ ndə bə kə ghɔ̀ŋ mbɔ, ‘Kʉ̀ʉ wo-kətoʼ-a, bàa wo-bàa-a.’ 44 M̈ɔ bɔŋ shyíi bii mbɔ b̈ii kʉ̀ʉ bʉə-bàa-bii, gháaNyii tʉ bʉə ndə bɔ̂ŋ tʉʼ chɔ́ŋhə bii, 45 mbɔ b̈ii chʉʼ bɛ vâa-Tie-yii ndə ɔ bɛ yuo. Bʉʼka ɔ̃ nɔ chìi chichi-i, ï kə́ báa ndəŋ bʉə-bʉ̂ʼʉ ghɔŋbə bʉə jyujyu mɔʼɔ, bɔŋ-kə́-leʼ tə́ŋ wyuu ï kə́ fyíi ndəŋ bʉə gìe shʉəŋ leʼnə bʉə ndə bɔ̂ŋ gòʼ təmə kə́ gìe shʉəŋ fɛ. 46 Bʉʼka kaʼ bii kʉ̀ʉ haʼ bʉə ndə bɔ̂ŋ kʉ̀ʉ bii, kɛŋbə-ii bɛ ka? Bʉə fí tashi nə mbii tʉʼ fɔ̀ʼ haʼ nɔ fe? 47 Kaʼ bii bɔŋ kə́ gìe bə haʼ tʉ bəliŋ-bii, i dʉ̀ʼ mbɔ bii chìi ka tə chàa bəbɛʼbʉə? Kaa haʼ nɔ ndə bʉə ndə bɔ̂ŋ gòʼ təmə bɛ bʉə-Juu fɛ tʉʼ fɔ̀ʼ ghɔ fe? 48 Mbəŋ-yii ndʉʉmɛ, nɔ kie ndə məbɛ kʉ̀ʼnə haʼ ndə Tie-yii ndə ɔ bɛ yuo bɛ kʉ̀ʼnə.