1 "B̈ii láa bʉʼka mə kə́ chìi nubə ndyʉndyʉ bə ndə mədʉ̀ʼ tʉ bʉə mbɔ b̈ɔ̂ŋ nyíɛ, bʉʼka kaʼ bii chìi nɔ, bii mə kie kɛŋbə kəghɔ-Tie-yii ndə ɔ bɛ yuo fɛ. 2 Nɔ, ndʉʉ ndə a tʉʼ kɔ́ tʉ bʉə-mbʉʼ, a kie ndə mə-kə́-lɔ̀ʼ fɛ, ndə bʉə làhə shʉ chìi mu njaagháaNyii ghɔŋbə tɔʼnə fiatə, mbɔ bəbɛʼbʉə chʉʼ kə́ chʉ̀ʉ bɔŋ. Nɔʼ m̈ɔ shyíi bii nə shʉəŋ mbɔ bɔ̂ŋ nɔʼ kie kɛŋbə-ʉə. 3 Bɔŋ ndʉʉ ndə a tʉʼ kɔ́ tʉ bʉə-mbʉʼ, kə a mə chìi kwiiŋkwie-a kínə nukə ndə kwiimɔʼnə-aŋ tʉʼ fɔ̀ʼ fɛ, 4 mbɔ kɔkə-a chʉʼ bɛ mu bəliinə. Tie-a ndə ɔ tʉʼ nyíɛ mu bəliinə bu kɛ̀ŋ aŋ.

5 "Ndʉʉ ndə bii tʉʼ gháaNyii, bii kie ndə məbɛ nə bʉə làhə shʉ fɛ. Bʉʼka bɔ̂ŋ nɔ kʉ̀ʉ ndə mətə́nə gháaNyii mu-njaagháaNyii-hə leʼnə tɔʼnə fiatə, mbɔ b̈əbɛʼbʉə kə́ nyíɛ bɔŋ. Nɔʼ m̈ɔ shyíi bii nə shʉəŋ mbɔ, bɔ̂ŋ nɔʼ kie kɛŋbə-ʉə. 6 Bɔŋ ndʉʉ ndə a tʉʼ gháaNyii, gɛ̀ mu njəŋ njaa-a fúu chusii, gwía tʉ Tie-a ndə ɔ bɛ mu bəliinə. Tie-a ndə ɔ tʉʼ nyíɛ mu bəliinə bu kɛ̀ŋ aŋ.

7 "Ndʉʉ ndə bii tʉʼ gháaNyii, kə bii mə kə́ yʉ̀ʼ ŋgie-njʉnjʉ-bə ndə bʉə ndə bɔ̂ŋ gòʼ təmə bɛ bʉə-Juu tʉʼ fɔ̀ʼ fɛ, bʉʼka bɔ̂ŋ nɔ kwɔ̀ʼtə mbɔ bə bu yʉ́ bɔŋ bʉʼka ŋgie-yɔ́ŋyɔ́ŋ-bə. 8 Kə bii mə bɛ nə bɔŋ fɛ, bʉʼka Tie-yii nɔ kínə fɔkə ndə bii byúu, bii buŋ kə́ bíʼtə. 9 B̈ii kə́ gháaNyii ndʉʉmɛ, mənɔ,

Tie-yaʼ ndə a bɛ yuo,

tə bə kóʼhə yie-a ndə i bɛ ŋkʉʉ ghɔʼ.

10 Tə ndʉʉ yi gwè ndə a bu sɔ́ʼ bʉə bənchəŋ nə Fɔŋ,

tə bə fɔ̀ʼ ŋkʉʉnə-tʉʉ-a kəchisê haʼ ndə bə tʉʼ fɔ̀ʼ yuo.

11 Kɔ́ baʼa nə fɔyubə ndə baʼa kie ndə məyú, ndəŋ chîmbikə təmiyɔŋ,

12 bɔŋleʼ sʉ̀fyii-a ndəŋ bʉ̂ʼtə-aʼ,

haʼ ndə baʼa nɔʼ sʉ̀fyiihə-aʼ ndəŋ bʉ̂ʼ-bəbɛʼbʉə-tə ndə bɔ̂ŋ nɔʼ chìi tʉ baʼa.

13 Kə a mə mɛ̀ʼtə baʼa gwù mu nubə ndə bəkɔ i chìi baʼa chìi bʉ̂ʼʉ fɛ, bɔŋ fyúhə baʼa mu bʉ̂ʼʉ. *

14 "Bʉʼka, kaʼ bii sʉ̀fyiihə-ii hə ndəŋ bʉ̂ʼ-bəbɛʼbʉə-tə ndə bɔ̂ŋ fɔ̀ʼ tʉ bii, Tie-yii ndə ɔ bɛ yuo bu leʼ sʉ̀fyii-i hə ndəŋ bʉ̂ʼtə-ii ghɔ. 15 Bɔŋ kaʼ bii gòʼ təmə sʉ̀fyiihə-ii hə ndəŋ bʉ̂ʼ-bəbɛʼbʉə-tə ndə bɔ̂ŋ fɔ̀ʼ tʉ bii fɛ, Tie-yii mə sʉ̀fyii-i hə ndəŋ bʉ̂ʼtə-ii ghɔ fɛ.

16 "Ndʉʉ ndə bii tʉʼ jì muu, kə bii mə bɛ vínəvínə nə bʉə làhə shʉ fɛ, bʉʼka b̃ɔ̂ŋ nɔ bʉ́əhə mbe-shʉ-yʉə mbɔ bəbɛʼbʉə chʉʼ nyíɛ mbɔ bɔ̂ŋ la tʉʼ jì muu. Nɔʼ m̈ɔ shyíi bii nə shʉəŋ mbɔ bɔ̂ŋ nɔʼ kie kɛŋbə-ʉə. 17 Bɔŋ ndʉʉ ndə a tʉʼ jì muu, sʉ̀ shʉ-a, shyìi, 18 bʉʼka məjì muumə-a mə bɛ mbɔ bəbɛʼbʉə kə́ nyíɛ, bɔŋ nɔ kie ndə mənyíɛ Tie-a ndə ɔ bɛ mu bəliinə. Tie-a ndə ɔ tʉʼ nyíɛ mu bəliinə bu kɛ̀ŋ aŋ.

19 "Kə bii mə lə̀ŋ fʉʼkə tʉ ŋwɔŋtə-ii kəchisê, kəyəŋ ndə ŋkɔʼhə ghɔŋbə kɔŋkə bu bʉ́əhə leʼnə yəŋkə ndə bəlʉʼʉ bu bə́ʼ sʉ́ʉ lʉ́ʼ fɛ. 20 B̈ii bɔŋ lə̀ŋ fʉʼkə-ii bə yuo, kəyəŋ ndə ŋkɔʼhə ghɔŋbə kɔŋkə mə bʉ́əhə fɛ leʼnə yəŋkə ndə bəlʉʼʉ mə bə́ʼ sʉ́ʉ chɔ lʉ́ʼ fɛ. 21 Bʉʼka yəŋkə ndə fʉʼkə-a bɛ chɔ, nɔ yəŋkə ndə fyii-a bu bɛ ghɔ chɔ.

22 "Shʉ-a nɔ bɛ kɛʼɛ-mbʉə-a, haʼ ndə kɛʼɛ kɛ̀ʼ yəŋbə nɔ. Kaʼ shʉ-a bɛ jyujyu, ndə i dʉ̀ʼ mbɔ ghɔkə-a nɔ bɛ iyɔ̀ʼnə, i kɛ̀ʼ mbʉə-a inchəŋ.

23 "Bɔŋ kaʼ shʉ-a bɛ bʉəbʉə ndə i dʉ̀ʼ mbɔ a bɛ wo shʉ̀əŋtə, mbʉə-a nchəŋnchəŋ-ɛŋ bɛ ilə́ŋnə nə njəŋkə. Kaʼ kɛʼɛ ndə a kie mbʉə-a bɛ njəŋkə, mbʉ kənjəŋ bu gʉ́ə ntyʉʉ təka?

24 "Wo mə kie bətiefɔʼɔ bəbûu fɛ, bʉʼka ɔ bu bàa imɔʼ kʉ̀ʉ ibɛʼ-yə, byuunɔ ɔ bu kɔ́ fyii-i tʉ imɔʼ, jɛ́ŋhə ibɛʼ-yə. Nyii ghɔŋbə fɔ-kəwʉʉnəmbi-bə mə bɛ bətiefɔʼɔ-ba bənchəŋ fɛ.

25 "Nɔ, nɔʼ m̈ɔ shyíi bii, kə bii mə kə́ lə̀ŋnə te məchimbi-yii fɛ, te fɔkə ndə bii bu yú byuunɔ te fɔkə ndə bii bu nú fɛ, təkɔmə mbʉə-a te fɔkə ndə a bu mɔ̀ʼ fɛ. Məchimbi-a chàa fɔyubə fe? Mbʉə-a chàa ndyihə fe? 26 B̈ii lɛ́nə ndə nuɔ-mbi-mə. Bɔ̂ŋ kyinə shùɔ ŋgwiehə fɛ, təmə kə́ lʉ̀ fɔyubə mutɔ fɛ, byuunɔ kie ghɔ̂ʼ ndə məmɔ̀ʼ chɔ fɛ, bɔŋ Tie-yii ndə ɔ bɛ yuo kə́ yúʼ bɔŋ. Bii bɔŋ gʉ́ə shʉ-ɔ chàa bɔŋ fe? 27 Bɔŋ bɛ nda mu bii ndə kaʼ fyii-i kə́ chɔ́ŋhə ɔŋ, bəkɔ ɔ bìʼ vaa kəkʉʉ mbi ndəŋ məchimbi-i?

28 "Bɔŋ chìi ka fyii-a kə́ chɔ́ŋhə aŋ te ndyihə? B̈ii lɛ́nə yii-ŋkɔ-bə muŋkɔ, nyíɛ ntɛ ndə bɔ̂ŋ tʉʼ kóʼ, bɔ̂ŋ kyinə fɔ̀ʼ fɔʼɔ fɛ byuunɔ túŋ ndyi fɛ, 29 bɔŋ nɔʼ m̈ɔ shyíi bii mbɔ buŋ Salamu mu məgʉə-e inchəŋ kə kɔ́ʼ ŋwɔŋ-ɛŋ tə dàa mbyu imɔʼ mu bɔŋ fɛ. 30 Bɔŋ kaʼ Nyii kə́ shʉ̀tə ŋkɔ muŋkɔ, ndə i tʉʼ kóʼ laa, sɛŋ bɛ yɔ̂ŋ nɔ, bə chʉ́ə tɔ̀ŋ mu kyʉ, ɔ bu shʉ̀tə bii daa fe? Oo bii bʉə ndə bii mɔ̀ʼfyiihə-ii ndəŋ Nyii haʼ məniʼ. 31 Nɔ, kə fyiihə-ii mə kə́ chɔ́ŋhə bii, bii kə́ ghɔ̀ŋ mbɔ, ‘Baʼa bu yu ka?’ byuunɔ, ‘Baʼa bu nú ka?’ byuunɔ, ‘Baʼa bu mɔ̀ʼ ka mbʉə-baʼa?’ fɛ. 32 Bʉʼka bʉə ndə bɔ̂ŋ gòʼ təmə bɛ bʉə-Juu fɛ nɔ tʉʼ nyʉ́ʉ hə bɔ̌ŋ fɔbə-ɔ̄ŋ inchəŋ, Tie-yii ndə ɔ bɛ yuo bɔŋ kínə mbɔ bii nɔ tʉʼ byúu fɔbə-ɔ̄ŋ inchəŋ. 33 B̈ii bɔŋ fəŋ gwía Sɔ́ʼ-Nyii ŋkəŋ ghɔŋbə mə bɛ ndyʉndyʉ tʉ ɔŋ, bə bu kɔ́ fɔbə-ɔ̄ŋ tʉ bii inchəŋ ghɔ.

34 "Nɔ, kə fyiihə-ii mə kə́ chɔ́ŋhə bii te yɔ̂ŋ fɛ, bʉʼka yɔ̂ŋ bu kie yi-yə nchɔŋhəmə. Chîmbikə təmiyɔŋ nɔ kie yi-yə bɛʼkə ndə i kʉ̀ʼnə tʉ ɔŋ.