1 Lomwɛ lusuku Yɛso kwebɛlɛ a emwɛ ibu m’osaba. Lwakehulɛ osaba, komwɛ m’balɔmbwɛ bakɛ kwen’sambelɛ kɛte: «Ɔlɔ, otosɔmyɛ osaba, nɛhɛ byeitilɛ Yɔana obalɔmbwɛ bakɛ. »

2 Yɛso kwebasambelɛ kɛte: «hamwebaosaba mobɛ́okana bînɔ:

‹Tata!

chǐna lyɔbɛ le tɔnywɛ!

boɔlɔ bɔbɛ bochwɛ!

3 Obɛ otoha elewa yeto ya masuku mɔsɛ.

4 Obɛ otolɛ̌lɛla bobé bwɛto,

ebalɔ bɛswɛ lwɛto twebalɛ̌lɛla baya bɛnɛ bebatoetela bobé,

ushibɛ́ otolɛa tokingelɛ m’bikinjwa.› »

5 Eyǎka Yɛso, kwebasambelɛ balɔmbwɛ bakɛ ê eta: «Nǎmbɔ komwɛ kwɛnyu kwe na kɛnda lyakɛ na koya kenda lyakɛ kwǎkya wakɛ m’bwingi na busuku na on’sambela kɛte: ‹Kɛnda, ebombo enɔ otangɛ opa mikatɛ ketato. 6 Yolo kenda lyanyi lya pihila, na lye n’lwɛndɔ nishi nayaom’ha.› 7 Nǎmbɔ koya kwe n’ta sɛsɛ kwahoon’kǎ kɛte: ‹Ushitɛnjɛ! Nahohamba n’changɔ. Nɛnɛ na bǎna banyi twahobeta. Nishibyoa eyǎka naohɛ mikatɛ.› 8 Nan’kanina kɛte nǎmbɔ kushibyoa om’ha yolo kɛ i kɛnda lyakɛ, kwebyoa na om’ha byɔsɛ byakwasaba yolo ya koya n’to kwekelelelɛ na osaba.

9 Obibyɔ nɛnɛ nan’sambela bînɔ: «Mobɛ osaba yolo mohɛwɛ, mobɛoɛba na mwemɔna, mobɛ ohola n’changɔ na mwesulilwa. 10 Yolo kɛkɛsɛ kwebasaba nǎ kwebahɛwa, na koya minɛ kwebaɛba nǎ kwebamɔna, na koya kwebahola n’changɔ nǎ beban’sulila. 11 Wé, we komwɛ hawîngi hɛnyu minɛ mwǎnakɛ kwahosaba swé, kwem’ha ndɔa? 12 Nǎmbɔ mwǎna kwahon’saba leke, kwem’ha ngɛlɛngɛlɛ? 13 Nǎmbɔ bɛnywɛ bato babé mwebahá bǎna bɛ́nyu bito bibɛnju, chikelwɛ sɛnyu kwa hakolo kwêha Ntema Kohaha o baya beban’saba kɔ.»

14 Lomwɛ lusuku, Yɛso kwebɛlɛ obenga m’ha kwɛnɛ kweitilɛ komwɛ n’to amɛmɛ. Hɔka haya, koya m’ha kwem’muminɛ na koya n’to kwetolilɛ otɔkɔma. Eoto ya bato yebɛlɛ haya yekakelwɛ wɛ̌nɛ. 15 Ela bamwɛ m’baya bato bekaninɛ kɛte: «Koko n’to kwehobenga miha o boɔmɛ bwa Bɛlɛzɛbuli, m’hɛla kwa miha.» 16 Bangɛ ben’tɔndilɛ okana kobamɔnyɛ emwɛ ekake, yolo bamanɛ nǎmbɔ kwahuma hakolo.

17 Ela Yɛso kwemaninɛ malanga mabɔ, kwebakaninɛ bînɔ: «Nǎmbɔ bato ba bomwɛ boɔlɔ beoholana bɔka wa bɔka, boya boɔlɔ bushinakimana, na elɔngɔ yɔsɛ yɛnɛ bato beoholana bɔka wa bɔka eya elɔngɔ ishinakimana. 18 Nǎmbɔ Ehengele lwakɛ kweolehola bita, boɔlɔ bwakɛ bwekimana wé? Nehokana binɔ, i yolo mwehokana kɛte nee obenga miha na boɔmɛ bwa Bɛlɛzɛbuli. 19 Nǎmbɔ nehobenga miha o boɔmɛ bwa Bɛlɛzɛbuli, bǎna bɛnyu behokebenga o boɔmɛ bwa nanyi? Obibyɔ baya bǎna bɛnyu nǎbemɔnya kɛte mushi na ndɔ. 20 Ela nɛnɛ nǎmbɔ nehobenga miha oboɔmɛ bwa Abɛcha, manakwɛ kɛte boɔlɔ bwa Abɛcha* bwahohiya wamwele.

21 «N’to kwa m’ɔ̌mu minɛ kwe na poto, kwebakonga sɛsɛ kyakɛ, bomɔna bwakɛ bwebabá talala. 22 Ela nǎmbɔ n’to kwa m’ɔ̌mu om’heta kɛ, kwǎchwa olwa bita nǎkɛ, kwen’sapa maya mapoto mɔsɛ makebɛlɛ oleutakecha na okabanya bito byɔsɛ byakan’sapa.

23 «Kɛkɛsɛ kushiolelonga wanyi, i amango anyi, koya minɛ kushiombwasha osambanya, kwehosala. »

24 Yɛso kwekaninɛ eyǎka kɛte: «M’ha kwahobengwa n’ta mwa n’to, kwebakya na hetaheta n’ta longo oɛba ibu ya olehɔcha. Nambɔ kwasamɔna ibu, kwebalesambela kɛte: ‹Nesuela o sɛsɛ kyǎnyi kyandahûma.› 25 Haosuela wakɛ, kwebanga keya sɛsɛ kye kehakelwɛ na olɔngiwa bisɔka. 26 Obibyɔ, kwebakya okoha kengɛ miha njwe oheta kɛ. Bɔsɛ bechwa okingela n’keya sɛsɛ na oleshamina mɔ. Obibyɔ, koya n’to kwesosoa wɛ̌nɛ oheta habotangi.»

27 Yɛso hakebɛlɛ otɔkɔma bîya, komwɛ m’achana m’eya eoto ya bato kwehunyinyɛ lete leolo okana kɛte: «Kohalelwɛ m’achana minɛ kweobutilɛ na ookɔkya!» 28 Ela Yɛso kwen’kailɛ: «I bahalelwɛ baya bɛnɛ bebaholecha binywa bya Abɛcha na obiwata.»

29 Omɔna eoto ya bato yebɛlɛ okya na bǔla, Yɛso kwebasambelɛ kɛte: «Bato ba manɔ masuku bashibabɛnju. Behobɛnja bamɔnɛ abandelechɔ a ekake, ela bashihɛwa ekake nǎmbɔ ishi eya ya n’languchi Yɔna. 30 Biya byebɛlɛ Yɔna abandelechɔ o bato ba ninawi*11.30 Sɔmakwɛ Yɔna 3.3-5. Na byɛnɛ byeba nɛnɛ Mwǎna kwa N’to abandelechɔ o bato ba manɔ masuku.

31 M’masuku ma ateka m’achi kwa ɔlɔ uhuma kusini*11.31 Sɔmakwɛ Ɔlɔ letangi 10. 1-10 kwe kukela hamwɛchi nɛ̌nyu yolo ya on’shitaki. Yolo kɛ kwehuminɛ kɔ, ochwa oholecha binywa bya lwɛ̌nyi lwa ɔlɔ Sɔlɔmɔnɔ. Obibyɔ, koko kwe hanɔ i m’hɛla oheta Sɔlɔmɔnɔ! 32 Mɛngɔ mɛnɛ loya lusuku lwa ateka lwe hiya, bato ba ninawi lwabɔ bekuka lomwɛ̂chi na bɛnywɛ bato ba manɔ masuku yolo ban’shitaki. Yolo habeholechɛ binywa bya n’languchi Yɔna, belebɛchichɛ. Obibyɔ, koko minɛ kwe hanɔ i m’hɛla oheta Yɔna!

33 Yɛso kwekaninɛ eyǎka: «Ushi n’to kwebalamywa yěngɛ na oebisa aɔ oewila m’etanga, ela kwebaebea hakolo o yɔbɔ, yolo bato bɛnɛ beokingela n’sɛsɛ bamɔnɛ yěngɛ. 34 Mɛ̌so mɔbɛ nǎ yɛ̌ngɛ ya m’bele kɔbɛ, nǎmbɔ mɛ̌sɔ mobɛ me pɔ, m’bele kɔbɛ kɔsɛ kweba n’ta yɛ̌ngɛ. Ela Mɛ̌sɔ mɔbɛ nǎmbɔ me matɔ̌kɛ, nǎ m’bele kɔbɛ lwakɔ kweba n’ta n’tɔ. 35 O bibyɔ obɛ lwɛngɛ lolomɛ, yolo yɛ̌ngɛ ye n’ta mɔ̌bɛ ishikaloɛ oba n’tɔ. 36 Obibyɔ, nǎmbɔ m’bele kɔbɛ kɔsɛ kwe n’ta yɛ̌ngɛ, na ushi yeba ye n’ta n’tɔ, m’bele kɔbɛ kɔsɛ kweba n’ta yɛ̌ngɛ yɛ̌nɛ, nɛhɛ biya byɛnɛ yɛ̌ngɛ yebalamia yɛngɛ yakɛ.»

37 Mɛngɔ mɛnɛ Yɛso kwehulɛ otɔkɔma, komwɛ m’falisayɔ* kwen’kalibishɛ wakɛ o sɛsɛ oya elewa, Yɛso kwekělɛ na oshama oya elewa. 38 Koya M’falisayɔ kwekakelwɛ omɔna Yɛso kwebɛlɛ oya kushi n’lekɔkɛ mabɔ̂.

39 Yɛso kwebasambelɛ kɛte: «Bɛnywɛ Bafalisayɔ mwebakɔka bilɛkɔ na mbata hamboka, ela n’ta mitema kyɛ̌nyu mwen’kiluchu etema na bobé. 40 Bɛnywɛ bashi na lwɛ̌nyi, momane okana, koya minɛ kwelɔngichɛ hamboka nǎ minɛ kwelɔngichɛ ná n’ta byɔ̂ka bîya? 41 Mobe oha ba mbuchu bito bye n’ta mbata na n’ta bilɛkɔ, yolo byɔsɛ byebɛ bihahachu wa mwele.

42 «N’shicha wɛnyu bɛnywɛ Bafalisayɔ, yolo mwebahunyá eba ya umi ya abale, na elewe, ná bingɛ byanyi byebalewa, ela mwebakibelela ndɔ na lǒndɔ lwa Abɛcha. Biya na byamwelěngyɛ obieta mushi kibelelɛ ohunya eba ya umi ya biya bîngɛ byɔsɛ.

43 «N’shicha wɛnyu bɛnywɛ Bafalisayɔ*, yolo mwebabɛnja oshama m’bibu bya bitangi n’ta mashinagɔgi. Eyǎka mwebabɛnja otanyiwa wa onyɛ̌mu m’bibu bya bato bɛ̌ngi. 44 N’shicha kwɛnyu, yolo mwebaba nɛhɛ bichwate bishiomɔnɛa, ná bato behonyata hakolo hakɛ bashiomana.»

45 Komwɛ hawǐngi ha nɔmbɔchi cha ndɔ kwen’sambelɛ Yɛso kɛte: «N’lɔmbɔchi, m’okana bibyɔ watotoa ná bɛswɛ.»

46 Yɛso kwen’kailɛ kɛte: «N’shicha wɛnyu lwɛ̌nyu nɔmbɔchi cha ndɔ! yolo mwebatɛcha bato michikɔ kyɛnɛ kishinatɛta n’to, ela bɛnywɛ mushibabea ata n’ywɛ kwɛnyu obawasha. 

47 «N’shicha kwɛnyu, yolo mwebakubaela bichwate bya ŋanguchi chɛnɛ bamasɛnyu olo behakilɛ. 48 Obibyɔ, mweoeta bolɛhɔ na owashana na bikɔkɔ bya bamasɛnyu olo, yolo bɔnyibɔ na behakilɛ chichɔ ŋanguchi, na bɛnywɛ mweokubaela bichwate byabɔ. 49 Yolo ya bîya, Abɛcha kwehokanɛ n’ta lwɛ̌nyi lwakɛ kɛte: ‹Nibahichicha ŋanguchi* na bakikiwa*. Ela bebaohaka bamwɛ na bângɛ bebasosola.› 50 Haesula ee elɔngɔ yesabwa mashi ma ŋanguchi* mɔsɛ mɛnɛ mesuilɛ tango obombwa wa ebalɔ. 51 Oya ohakwa wetolilɛ we Abɛli, m’paka we Zakalia*11.51 M’alakɔ a ala, Bayola bemaninɛ okana minɛ kwebulɛ kwa n’tangi i Abɛli na kwaesula kwebɛlɛ n’languchi Zakaliya. Sɔmakwɛ Botangi 4.8; Bito bya masuku kwa bobele 24. 20-22 minɛ kwabehakilɛ m’lobonga hawǐngi ha etambolelɔ na ibu ya ehahachu. Chikelwɛ nehon’sambela mashi ma baya bato bɔsɛ meba o miswɛ kyɛ̌nyu bɛnywɛ bato ba manɔ masuku.

52 «N’shicha kwɛnyu bɛnywɛ nɔmbɔchi cha ndɔ, yolo mohobisa bangɛ bato ahɔngɔlɔ, yolo bashimǎnɛ binywa bya obahǐcha wa Abɛcha, bɛnywɛ bɛnɛ mushiobɛnja okingela mwɛ, ela mwehsochibila bato bashikingelɛ.» 53 Yɛso hakehuminɛ n’keya sɛsɛ, Bafalisayɔ na nɔmbɔchi cha ndɔ betolilɛ om’bocha binywa bǐngi wa songo, 54 yolo bamɔnɛ ndela kya om’wata o binywa byakɛ.