1 Lomwe lusuku Yɛso kwesambanyɛ bakikiwa bakɛ umi na babele. Kwebahɛlɛ oɔma na boɔmɛ hakolo ha miha kyɔsɛ na ohɔnya bisumi. 2 Kwebahililɛ okya natɔkɔma Mwanɔ kwa Boɔlɔ bwa Abɛcha* na ohɔnya basǒmwa. 3 Kwebasambelɛ kɛte: «N'ta lwɛndɔ lwɛnyu mushitɛtɛ eto na emwɛ yɔsɛ , nǎngo otɛta abangɔ na lotaa na n'katɛ na bomɔna. Mushitɛtɛ ngobɔ chibele. 4 N'sɛsɛ kyɔkyɔsɛ kyamwekingela na om'pɔkɛla, chamakwɛ n'ya ná byamwesuela. 5 Nâmbɔ bato ba n'kemwɛ mboka baɛma om'pɔkɛla, humakwɛ n'keya mboka. Ela hamwehuma n'keya mboka, muhukumunɛ ahwele a o makolo mɛnyu. Na eya yebá bolɛhɔ wabele.»* 6 Ohwa, baya bakikiwa* betolilɛ lwɛndɔ okya naheta mboka wa mboka m'otɔkɔma Mwanɔ Kosɔka na ohɔnya basǒmwa.

7 Omaya mɛngɔ, Hɛlɔlɛ kwebɛlɛ ɔlɔ lya ebalɔ ya Galilaya kweholechɛ myanɔ kya Yɛso, kwebɛlɛ na matoba, ebalɔ bamwɛ bebɛlɛ okana kɛte: «I Yɔana N'tabii kwa kuka.» 8 Bangɛ bebɛlɛ okana kɛte: «I n'languchi Ɛlia kwamɔnea eyǎka.» Na bangɛ kɛte: «I komwɛ n'ŋanguchi cha ala kwakuka.»

9 Ela Hɛlɔlɛ kwekaninɛ kɛte: «I Nɛnɛ minɛ kweachichɛ n'swɛ kwa Yɔana. Koko kongɛ i nanyi kwande oholecha myanɔ kyakɛ?» Obibyɔ Hɛlɔlɛ kwebɛlɛ na yǒma ya om'mɔna.

10 Hesuelɛ baya bakikiwa ben'sambelɛ Yɛso byɔsɛ byabeitilɛ. Ohwa Yɛso kwekělɛ nǎbɔ kɔ na bato, lǒbe lwa mboka kya Bɛtɛsaila.

11 Ela bato bemaninɛ wakebɛlɛ, ben'laminɛ. Yɛso kwebapɔkɛlɛ nǎ obasɔmwa binywa bya Boɔlɔ bwa Abɛcha* nǎ bɛnɛ bebɛlɛ basǒmwá kwebáhɔnyinyɛ. 12 Mɛngɔ mɛnɛ chǒba lyesebɛlɛ osala, baya bakikiwa umi na babele besɛninɛ hɔka nakɛ na on'sambela kɛte: «Obɛsambela bato bakyɛ o maboka na o bitola byɛnɛ bye hɔka, baleɛbɛlɛ elewa na ibu ya obeta, yolo hanɔ hetwele i n'ta longo.»

13 Ela Yɛso kwebasambelɛ: «Bɛnywɛ mobahɛ elewa.» Ben'kailɛ: «Twe na mikate ketanɔ na swe chibele ka. Wehobɛnja tokyɛ obakolela elewa baba bato bɔsɛ?» 14 [ Na haya hebɛlɛ olanga balomyana ɛlufu atanɔ. ]

Yɛso kwesambelɛ balɔmbwɛ bakɛ kɛte: «Mosambelɛ bato bashamɛ hase m'bioto bya bato maumi matanɔ matanɔ.» 15 Balɔmbwɛ*beitilɛ mwebesambelɛ Yɛso na achamya bɔsɛ hase. 16 Ohwa biya, Yɛso kwekuhilɛ keya mikatɛ ketanɔ na chiya swe chibele, kwelɔlilɛ hakolo na obihalela. Ohwa, kwebinɔkilɛ, naoha balɔmbwɛ* bakɛ yolo bakabanyinyɛ bato. 17 Baya bato bɔsɛ belelɛ naokyota. Balɔmbwɛ betɔlilɛ makoko mɛnɛ meshikalɛ, bekilochɛ bitanga umi na bibele.

18 Lomwɛ lusuku, Yɛso kwebɛlɛ osaba kɛ buchima, balɔmbwɛ bakɛ bebɛlɛ hɔ̂ka nǎkɛ. Kɛ naobabocha bînɔ: «Bato behokana nɛnɛ nee nanyi?» 19 Bɔ naon'kǎ kɛte: «Bamwɛ behokana kɔkwɛ nǎ Yɔana n'chunji, na bangɛ kɛte wee Ɛlia, na bǎngɛ wee komwɛ hawǐngi ha ŋanguchi cha ala minɛ kwakuka.» 20 Obibyɔ, Yɛso kwebabuchichɛ: «Na bɛnywɛ mwee okana nɛnɛ nee nanyi?» Pɛtɛlɔ kwekailɛ kɛte: «Kɔkwɛ nǎ Kilishito mwǎna* kwa Abɛcha.»

21 Haya, Yɛso kwehanyinyɛ bakikiwa bakɛ bashikaninɛ n'to kɛkɛsɛ koya mwanɔ. 22 eyǎka Kwebakaninɛ kɛte: «Byelěngyɛ nɛnɛ Mwǎna kwa N'to nesosoɛ wɛ̌nɛ, naoɛmwa na baongo na bahɛla ba bibole* na nɔmbɔchi cha ndɔ*. Něhakwa, ela lusuku lwabotato nekuka.»

23 Ohwa, kwebakaninɛ bɔsɛ kɛte: «Nǎmbɔ n'to kwehobɛnja ondama, koleɛmɛ* kɛ mǐnɛ na kotɛtɛ n'salaba kwakɛ masuku mɔsɛ na kondamɛ 24 Yolo koya n'to kwe obɛnja ohɔnya mwɛkɔ kwakɛ kwekochiminya. Ela koya kwechiminya mwɛkɔ kwakɛ yolo yanyi, kwekohɔnya. 25 Eyǎka, we akɔɛlɔ nake n'to ohɛwa bomɔna bɔsɛ bwa ebalɔ, ela wa olechiminya na oletɔkya kɛ mǐnɛ? 26 Obibyɔ, Nǎmbɔ n'to kwambɔnɛna abolɛ na omɔnɛna abolɛ binywa byanyi, nɛnɛ Mwǎna kwa N'to lwanyi, něm'ɔnɛna abolɛ mɛngɔ mendechwa n'ta butukufu bwanɛ na bwa Tata, na butukufu bwa bakɛnji* bahaha. 27 Neon'sambela kěnɛ: we bamwɛ bɛnɛ be hanɔ, bashîwa bashinamɔna Boɔlɔ bwa Abɛcha*.»

28 Ohwa oeta olanga masuku enana, Yɛso ohwa otɔkɔma biya binywa, kwekuhilɛ Pɛtɛlɔ na Yakɔbɔ na Yɔana, kwehɛlilɛ nabɔ oaɔnɔ osaba Abɛcha*. 29 Hakebɛlɛ osaba, yɛnyi yakɛ yekalɔɛ, na ngobɔ kyakɛ kyesebɛlɛ kehaha na okɛngɛta wɛ̌nɛ. 30,31 M'eya yɛ̌ngɛ, mwetɔbɔɛ balomyana babele bebɛlɛ bakilolɛ na butukufu, Musa na Iliya. Baya bolomyana bebɛlɛ okɔmbɔla na Yɛso yolo ya lubu lwakɛ lwɛnɛ lwesele hɔka obɔ Yɛlusalɛma.

32 M'maya mɛngɔ, Pɛtɛlɔ na bɛ̌nakɛ bebɛlɛ babetɛ wɛ̌nɛ. Ela mɛngɔ mabebyuilɛ, bemɔninɛ butukufu bwa Yɛso, na baya bato babele bebɛlɛ bakimanɛ hamwɛ̂chi nǎkɛ. 33 Baya balomyana babele hɛnɛ habelɛanɛ na Yɛso, Pɛtɛlɔ kwen'kaninɛ Yɛso kɛte: «Ɔlɔ, i bibɛnju toshamɛ́ hanɔ. Tokubaɛ bitola bitato: emwɛ yɔbɛ na engɛ ya Musa na engɛ ya Ɛlia.» Ela pɛtɛlɔ Kushibɛlɛ omana byakebɛlɛ otɔkɔma. 34 Pɛtɛlɔ hakebɛlɛ kwěleotɔkɔma, lisu lyechǔlɛ obawila. Baya bakikiwa bemɔninɛ bɔ̌ba bwɛnɛ mɛngɔ mechǔlɛ leya lisu obawila. 35 M'leya lisu, mweholecheyɛ lete okana: «Koko nǎ mwananyi kwandesɔbɔlɛ, m'holechakwɛ kɛnyikɛ.»

36 Ohwa oholecha lea lete, baya bakikiwa bemɔninɛ Yɛso kwashikala kɛ buchima, beshaminɛ pi, na m'maya mɛngɔ bashikaninɛ o n'to kɛkɛsɛ biya byabemɔninɛ.

37 M'ɛshi mwakɛ, habebɛlɛ osala ohuma o toɔnɔ, eoto eolo ya bato yechulɛ osambana nakɛ. 38 M'eya eoto, n'to komwɛ̂chi kwetɔkɔmɛ lete leolo kɛte: «N'lɔmbɔchi! naotɛndɛlɛla, ondɔlɛlɛ koko mwanânyi, mwǎna kwa ehɛnɛ! 39 M'ha kwa bolobe kwehom'wata, na, om'hila koetɛ yɔka, na on'tekecha, na ehuchu om'huma o anywa. Koya m'ha kweon'sosola wɛ̌nɛ na kushiban'lɛa abelɔ na on'shika mwɛkɔ kolɛbɛlɛ. 40 Nasaba balɔmbwɛ bɔbɛ bakoběngɛ, ela basaɔ̂sha.»

41 Haya Yɛso kwekaninɛ kɛte: «Bɛnywɛ bato ba manɔ masuku bashi na washa eyaka bato babé, neshama nɛnyu mpaka mɛngɔ naké? M'paka mɛngɔ naké nebaom'ihya? Obɛ̌chwa na mwanɔ̌bɛ hanɔ.» 42 mɛngɔ mɛnɛ koya mwǎna kwebɛlɛ sɛna hɔka na Yɛso, hɔka haya, koya m'ha kwen'tɛlilɛ hase na om'eta bolobe. Ela Yɛso kwebingilɛ koya m'ha na ohɔnya koya mwǎna na on'suecha we sakɛ. 43 Bato bɔsɛ bekakelwɛ na boɔmɛ bǒlo bwa Abɛcha.

Mɛngɔ mɛnɛ baya bato bɔsɛ bebɛlɛ beleokakelwa yolo ya biya bikɔkɔ byɔsɛ byakeitilɛ, Yɛso kwesambelɛ balɔmbwɛ bakɛ kɛte: 44 «Holechiwɛ bisɔka byandeon'sambela: nɛnɛ Mwǎna kwa N'to netambolwa m'mabɔ̂ ma bato.» 45 Ela balɔmbwɛ bashitɔtɔbɔlɛ eya enywa. Eya enywa Yebɛlɛ ibiswɛ wabele yolo bashiemǎnɛ, na bebɛlɛ na bɔ̌ba bwa om'bocha ebalɔ ya eya enywa.

46 Ohwa biya, bakikiwa ba Yɛso bebɛlɛ oeta pǎ bɔka wa bɔka, yolo bamanɛ nanyi nǎ m'hɛla hawǐngi habɔ. 47 Yɛso kwemaninɛ biya byabebɛlɛ olanga m'mitema kyǎbɔ. Obibyɔ kwekuhilɛ mwǎna kwa alɛla, na om'beya hɔka nǎkɛ. 48 Kwebakaninɛ bînɔ: «N'to kɛkɛsɛ kwepɔkɛla koko mwǎna kwa alɛla o chǐna lyanyi, nɛnɛ nǎ kwapokɛla. Kɛkɛsɛ kwapɔkɛla nɛnɛ, i koya minɛ kwepililɛ nǎ kwapɔkɛla. I okana, koya minɛ kwe n'nuna hawǐngi hɛnyu nǎ m'hɛla.»

49 Obiya, n' kikiwa Yɔana kwekaninɛ kɛte: «N'lɔmbɔchi, twamɔna komwɛ n'to kweobenga miha o chǐna lyɔbɛ, na bɛswɛ twabɛnja om'hanya, yolo kushi komwɛ kwa enɔ eoto yɛto.» 50 Ela Yɛso kwen'kaninɛ kɛte: «Mushim'hanyɛ, Yolo koya minɛ kushiamango ɛto kwe lǒbe lwɛto.»

51 Masuku ma Yɛso okohiwa okya hakolo mesebɛlɛ hɔka, kwehambilɛ m'ongɔ (ibipakanyɛ) kwa okya Yɛlusalemu. 52 O bibyɔ, Yɛso kwetangichɛ bato. Baya bato bekělɛ, na bekingilɛ n'kemwɛ mboka kya Basamalia*, yolo ya on'lɔngɛcha ibu. 53 Ela bato ba keya mboka beɛminɛ om'pɔkɛla yolo kwebɛlɛ okya Yɛlusalɛmu.* 54 Bakikiwa bakɛ Yakɔbɔ na Yɔana, Habemɔninɛ bîya, bekaninɛ kɛte: «Ɔlɔ, ohobɛnja tosabé ahya uhuma hakolo asalɛ abachǐmywɛ?» 55 Ela Yɛso kwebakaloelɛ na obaambela*. 56 Oesula, Yɛso na balɔmbwɛ bakɛ bekělɛ o kengɛ mboka.

57 Mɛngɔ mebebɛlɛ Yɛso na balɔmbwɛ n'tela, komwɛ n'to kwen'sambelɛ Yɛso kɛte: «Nebáolama ɔsɛ we weba okya.» 58 Yɛso kwen'kaninɛ: «Mibwabwa kyebábá na mahondo ma obetela na tonɔnyi twebábá na bǐsa. Ela nɛnɛ Mwǎna kwa N'to nishibabá na ibu ya obetela.»

59 Ohwa, Yɛso kwekaninɛ kongɛ n'to kɛte: «Ndamakɛ.» Ela koya n'to kwen'kaninɛ kɛte: «Ɔlɔ, tanga ondea nakyɛ ochia tata.»

60 Yɛso kwen'kaninɛ kɛte: «Lɛakwɛ babu babɛochianɛ, ela kɔkwɛ obɛ̌kya nakanina bato Boɔlɔ bwa Abɛcha*.»

61 Kongɛ n'to kwechǔlɛ okanina Yɛso kɛte: «Ɔlɔ Nêbaolama, ela ndɛakɛ nitangɛ okya olaka bato ba sɛsɛ kyǎnyi.» 62 Yɛso kwen'sambelɛ kɛte: «Kɛkɛsɛ kwe na luasu yolo ya olema na koholɔla unyuma, kushilěngyɛ otɔkɔma Mwanɔ kwa Boɔlɔ bwa Abɛcha*.»