1 Ohwa ochundiwa, Yɛso kwesuelɛ ohuma o lǒte lwa Yɔlɔlani, kwen'kilolɛ na N'tema Kohaha. Koya N'tema Kohaha kwen'lɔmbɔlɛ okya n'ta longo. 2 Oya, Ehengelé kwen'tɔndilɛ mɛngɔ ma masuku maumi mana. M'maya mɛngɔ mɔsɛ, kushibɛlɛ oya eto, wala onywa. Ohwa maya masuku kweholechɛ ndala.

3 Ná Ehengelé kwen'sambelɛ binɔ: «Nambɔ chikelwɛ kɔkwɛ wee Mwǎna kwa Abɛcha, kaninaka lele lewɛ lyekaloɛ n'katɛ.» 4 Yɛso kwen'kailɛ kɛte: «I bikɔliwɛ n'ta Lokɔlɔ Lohaha kɛte: ‹N'to kushibâbá yolo ya oya n'katɛ ka*.› »

5 Ohwa, Ehengelé kwen'kuhilɛ eyaka Yɛso o ibu ya hakolo, kwem'mɔnyinyɛ hɔka haya boɔlɔ bɔsɛ bwa ebalɔ. 6 Ehengelé kwen'sambelɛ kɛte: «Neoha boɔmɛ́ bɔsɛ na bomɔná bwakɛ bɔsɛ. Yolo bibi byɔsɛ bepɛlɛ nɛnɛ, na nɛnɛ nenaha kɛkɛsɛ kwandebɛnja. 7 Bobo bɔsɛ bomɔna bwêba bɔbɛ nǎmbɔ wǎnɛmbɛtɛla.» 8 Yɛso kwen'kailɛ kɛte: «Mikɔlɔ Kehaha i kekanɛ kɛte:

‹Obɛ olɛmbɛtɛla Ɔlɔ Abɛcha kɔ̌bɛ,

na on'kelela kɛ mǐnɛ ka*.› »

9 Ohwa haya, Ehengelé kwen'kuhilɛ Yɛso m'paka Yɛlusalɛma, na kwem'hɛchichɛ hakolo ha Lobonga*, kɛ naon'sambela kɛte: «Nǎmbɔ chikelwɛ kɔkwɛ wee Mwǎna kwa Abɛcha, letɛlakɛ hase, 10 yolo ibikɔliwɛ n'Lokɔlɔ Lohaha kɛte:

‹Abɛcha kwehicha bakɛnji* bakɛ baokǒngɛ.›

11 Eyǎka ibikɔlilwɛ kɛte:

‹Beowata m'mabɔ̂ mabɔ,

yolo ushilehyatalɛ okolo o lewɛ.› »

12 Yɛso kwen'kailɛ kɛte: «Mikɔlɔ Kehaha i kekanɛ kɛte: ‹Ushibɛ otɔnda Ɔlɔ Abɛcha kɔ̌bɛ*.› » 13 Ehengelé hakehulɛ on'tɔnda Yɛso o matela mɔsɛ, kwetangilɛ on'lɛa.

14 Ohwa haya, Yɛso kwesuelɛ m'ebalɔ ya Galilaya kwebɛlɛ n'kelolɛ na oɔma wa N'tema Kohaha. Na mwanɔ kwakɛ kwewelelɛ m'ebalɔ yɔsɛ ya Galilaya na bibalɔ bya ŋumba. 15 Na kwetolilɛ osɔmya bato m'mashinagɔgi* mabɔ, na bato bɔsɛ bebɛlɛ on'tɔna.

16 Lomwɛ lusuku Yɛso kwekělɛ o mboka kya Nasalɛti wɛnɛ wakeɔmɛnɛ. Lusuku lwa Sabatɔ* halwewelelɛ, kwekingelɛ n'ta Shinagɔgi* nɛhɛ lyebɛlɛ kɔlɔbɛchi lyakɛ. Kwekimanɛ yolo kosɔmyɛ Mikɔlɔ Kehaha. 17 Bem'hɛlɛ binga lya etabɔ ya ebole* Isaya. Kwěbungulɛ, na kwebangilɛ hɛnɛ hehakɔliwɛ kɛte:

18 «N'tema kwa Abɛcha kwe hakolo hanyi,

kwasɔbɔla nebɛ otɔkɔma Mwanɔ Kosɔka o ba mbuchu,

Kwapila yolo nasambelɛ bahambwa kɛte besulwa.

Na bihɔbu kɛte byemɔna,

na bɛnɛ behomɔnyɛnywa, kɛte bashimɔnyɛnywɛ eyǎka.

19 Na obasambela bato kɛte mwâ kwa mwandɔ wa Ɔlɔ Abɛcha kwahiyá*.»

20 Ohwa osɔma, Yɛso kwembungilɛ ěya etabɔ, kwěsuechɛ on'kichi kwa leya Shinagɔgi*, kɛ nǎoshama. Bato bɔsɛ bebɛlɛ n'lea shinagɔgi* ben'lɔlilɛ wɛ̌nɛ. 21 Ohwa osɔma, Yɛso kwetolilɛ obasambela kɛte: «Lolo Lokɔlɔ Lohaha lwamwaholecha, nehon'sɔmɛna lwawelela lênɔ.»

22 Bato bɔsɛ, besɛ̌lɛlɛ Yɛso, na okakelwa na binywa bibɛnju byaketɔkɔmɛ. Betolilɛ okana binɔ: «We, koko kushi mwǎna kwa Yosofo?» 23 Yɛso kwebakaninɛ kɛte: «Nikiti mwesambela koko m'hengo kohobɛnja okana é: ‹N'kilahi lehɔnyɛ kɔkwɛ minɛ.› Eyǎka mwesambela kɛte: ‹Twaholecha byɔsɛ byawǎeta oya Apɛlɛnaumu, obibyɔ obietɛ na n'kenɔ mboka kyɔ̌bɛ.› » 24 Yɛsu kwetɔkɔmɛ eyǎka binɔ: «Nehon'kanina kěnɛ kɛte: ushi n'languchi*minɛ kwebanyɛmiwa m'boka kyǎbɔ. 25 Ela holechiwɛ! kěnɛ nehon'kanina, webɛlɛ mɛngɔ ma n'languchi Elia bǎchana babulwa bɛ̌ngi m'ebalɔ ya Ishilaɛli. M'maya mɛngɔ, mbula kyelɛilɛ olɔwa n'ta miâ ketato na myɛ̌chi n'toba. Na webɛlɛ ndala keolo m'ebalɔ yɔsɛ*. 26 Ata biya, Abɛcha kushihililɛ Ɛliya owasha m'achana m'bulwa kɛkɛsɛ hawǐngi habɔ. Ela, kwem'hililɛ ka wa m'achana m'bulwa komwɛchi kwa mboka kya Salɛpati m'ebalɔ ya Shilɔni.

27 «Eyǎka, m'ebalɔ ya Ishilaɛli mɛngɔ mɛnɛ Ɛlisha kwebɛlɛ n'languchi, webɛlɛ bashɔndɔ mitala. Ela kushibɛlɛ kɛkɛsɛ kwehɔnyinywɛ, ela Namani, kwa ebalɔ ya Suliya*.»

28 Bato bɔsɛ bɛnɛ bebɛlɛ n'shinagɔgi* habeholechɛ biya binywa, bechikelelwɛ wɛ̌nɛ. 29 Bekimanɛ, na om'hunya Yɛsɔ hamboka ha mboka kyǎbɔ. Bem'bolilɛ mpaka o sɔngɔ lya hiya hiaɔnɔ wɛnɛ keya mboka kyebɛlɛ kekubahwɛ hakolo hahyɔ. Bebɛlɛ na langa lya on'tɛla oehɔnga. 30 Ela Yɛso kwebasɔtɔɛ na olekela.

31 Ohwa, Yɛso kwěsalelɛ mpaka mboka kya Apɛlɛnaumu m'ebalɔ ya Galilaya. Lusuku lwa Sabatɔ* halwehǐlɛ kwesɔminyɛ bato. 32 Bato, bekakelwɛ omɔna byakebɛlɛ osɔmya, yolo binywa byakɛ byebɛlɛ na boɔmɛ.

33 N'ta Shinagɔgi mwebɛlɛ komwɛ n'to minɛ kwebɛlɛ na m'ha. Koya n'to kwetolilɛ okololoa m'okana binɔ: 34 «Hɛ! Yɛso kwa mboka kya Nazalɛti, twaoeta ě? Wachwa otochimya? Nem'omanɛ bisɔka. Kɔkwɛ nǎ M'haha minɛ Abɛcha kwehililɛ!»

35 Yɛso kweambelɛ koya m'ha wɛ̌nɛ kɛte: «Chamaka pi! Humaka n'ta mwa koko n'to!» Koya m'ha, kwen'kushishɛ koya n'to hase, hambɛlɛ ha bato, na kwem'huminɛ bila om'eta bibé.

36 Bato bɔsɛ bekakelwɛ wɛ̌nɛ, betolilɛ osambelana bɔkawabɔka kɛte: «Ee i ekɔkɔ ya okakecha! Yolo kohobenga miha wa oɔma wakɛ kyehumɛ o n'to, na hɔka haya kyǎm'huma.» 37 Na mwanɔ kwa Yɛso kwewelelɛ ɔsɛ m'eya ebalɔ.

38 Mɛngɔ mɛnɛ Yɛso kwehuminɛ n'leya shinagɔgi*, kwekělɛ wa Shimɔni. Hakehîlɛ oya kwebangilɛ n'nakɛ boɔ kwa Shimɔni kwebɛlɛ osomwa wɛ̌nɛ na lɔnda. Nǎ ben'tɛndɛlɛlɛ Yɛso kom'hɔnyɛ. 39 Nǎ Yɛso kwechǔlɛ na okimana hɔka nǎkɛ, na kweambelɛ leya lɔnda. Hɔka haya leya lɔnda lyem'huminɛ. Hɔka haya koya m'ma kwekinuɛ na otola obaɛbɛla elewa. 40 Hayehǐlɛ ekɔlɔ, bato bɔsɛ bɛnɛ bebɛlɛ na basǒmwa, bechǔlɛ nabɔ we Yɛso, na kɛ kwebîlɛ mabɔ̂ makɛ hakolo ha kila komwɛ kwabɔ na kwebahɔnyinyɛ bɔsɛ. 41 Miha kyehuminɛ basomwa bɛ̌ngi. Hakyebɛlɛ ohuma, kyebɛlɛ okya nakololoa kɛte: «Kɔkwɛ nǎ Mwǎna kwa Abɛcha!» Ela Yɛso kwekeambelɛ, na okehanya kishitɔkɔmɛ eyaka, yolo kyemaninɛ okana kɛnyikɛ nǎ Kilishito*.

42 M'mɛshi mwǎkɛ ham'mɛshi kɔsɛ, Yɛso kwechuilɛ m'mboka na okya ushi bato. Na eoto ya bato yetolilɛ om'ɛba. Habem'mɔninɛ betɔndilɛ on'chibila yolo kushihumɛ eyǎka. 43 Ela, Yɛso kwebasambelɛ kɛte: «I bisɔka nasɔmyɛ Mwanɔ Kosɔka kwa Boɔlɔ bwa Abɛcha* m'mangɛ maboka, yolo Abɛcha kwepililɛ yolo ya biya.»

44 Yɛso kwekelelelɛ osɔmya Mwanɔ Kosɔka m'mashinagɔgi mɔsɛ ma ebalɔ ya Yolɛa.