1 Lomwɛ lusuku lwa sabatɔ*, Yɛso kwekělɛ oya elewa o sɛsɛ kya komwɛ m'hɛla kwa Bafalisayɔ*. Bato bɛnɛ bebɛlɛ n'keya sɛsɛ, bebɛlɛ on'lɔla wɛ̌nɛ yolo bamɔnɛ byakêta. 2 Ombɛlɛ wa Yɛso webɛlɛ komwɛ n'to minɛ kwebɛlɛ na esumi ya ohela m'bele. 3 Yɛso kwebuchichɛ nɔmbɔchi cha Ndɔ* na Bafalisayɔ* kɛte: «Ndɔ* kyɛto kyebawasha aɔ kyebahanya ohɔnya n'to lusuku lwa Sabatɔ*?» 4 Ela beleshaminɛ pi. Yɛso kweominɛ koya n'sǒmwa na om'hɔnya, na kwen'kaninɛ kolekělɛ. 5 Ohwa, Yɛso kwebabuchichɛ eyǎka kɛte: «I nanyi hawǐngi hɛnyu, nambɔ mwanǎkɛ aɔ ŋɔmbɛ kyǎkɛ kyakula m'ena ya mǎte lusuku lwa Sabato* kushikya abelɔ na okehunya, ata nǎmbɔ i lusuku lwa Sabatɔ*?» 6 Ela bɔnyibɔ bashibamɔnɛ enywa ya on'kaa.

7 Yɛso kwemɔninɛ byɛnɛ bato bebuchiwɛ, byabebɛlɛ osɔbɔla bibu bya bitangi. Obibyɔ, kwebahaninɛ bînɔ: 8 «Nambɔ n'to elakɛ kwahôbocha o lohangwɛ, ushibɛ oshama o ibu ya hambɛlɛ. Ebalɔ wenachwa kongɛ n'to kwabochiwa kwa n'nyɛ̌mu ooheta. 9 Na koya minɛ kwem'ohetɛ kwabehiya, koya minɛ kwam'bocha bɛnywɛ bɔsɛ babele, kwenaokanina kɛte: ‹Shikilaka koko n'to ibu.› Haya wemɔna abolɛ a okya oshama o esuba ya onyuma. 10 Ela nambɔ wabochiwa , ketaka oshama o esuba ya onyuma. Obibyɔ, koya minɛ kwaobocha kwahohiya, kwenaokaniná kɛte: ‹Kɛnda lyanyi, chutaka onɔ ombɛlɛ. Haya, wěnyɛma hambɛlɛ ha bɔsɛ bɛnɛ wehoya nǎbɔ.› 11 Yolo kɛkɛsɛ minɛ kwebalehɛcha, kwesachiwa. Ela kɛkɛsɛ minɛ kwebalesacha, kɛ kwehɛchiwa.»

12 Ohwa Yɛso kwen'kaninɛ koya minɛ kwem'buchichɛ kɛte: «Mɛngɔ mɛnɛ we ohɛtana elewa ya m'onda, ebɛ ya chǒba, aɔ ya ekɔlɔ, ushibɛobocha ka makɛnda mɔbɛ, aɔ bashiwɛnyu, aɔ bibushi byɔbɛ aɔ babinji nɔbɛ mbɔnaka. Yolo wahoeta bîya, bɔlwabɔ beobocha oya wabɔ wa osɔmbɔcha ohetela biya bya webaetelɛ. 13 Ela, wahoeta m'onda, obɛobocha bambuchu na bitɛndɛ na lwǎta na bihɔbu. 14 Obibyɔ weba na miha, yolo baya bato bashina ya oosowechecha. Ela Abɛcha kweosɔmbɔcha mɛngɔ mɛnɛ baya bɛnɛ bee basɔka bekuka.»

15 Ohwa, komwɛ n'to hawǐngi ha baya bɛnɛ bebɛlɛ bashamɛ haya m'oya na Yɛso, hakeholechɛ biya binywa, kwen'kaninɛ kɛte: «Komba n'to koya kwêya elewa m'Boɔlɔ bwa Abɛcha*!» 16 Yɛso kwen'kailɛ ohetela ée eta kɛte: ‹‹Webɛlɛ komwɛ n'to minɛ kwelɔngichɛ m'onda kǒlo, na kwebuchichɛ bato bɛ̌ngi. 17 Hamehǐlɛ mɛngɔ ma oya, kwehililɛ n'kichi kwǎkɛ okanina baya bakebuchichɛ okana kɛte: ‹M'bɛchwa, yolo bito byɔsɛ byesele bilɔngiwɛ.› 18 Ela kwabâlwa, kwetolilɛ okana ebalɔ in'chibilɛ kushihǐyɛ. Kwa n'tangi kwen'kaninɛ kɛte: ‹Nekulilɛ lobálá, na nelěngyɛ okya olomɔna. Naotɛndɛlɛla ombɔnɛnɛ kɛnɛ.› 19 Kǒngɛ kwen'kaninɛ: ‹Nekulilɛ ŋɔmbɛ umi* cha olema mabala. Obinɔ, nehokya nǎchɔ netɔndɛ nemɔnɛ nambɔ cheɔsha oeta n'kelɔ. Naotɛndɛlɛla ombɔnɛnɛ kɛnɛ.› 20 Na kongɛ kɛte: ‹Nǎwele okɔnda, i ebalɔ nishǐchwa.›

21 «Koya n'kichi kwesuwelɛ wa ɔlɔ lyakɛ. Kwen'kaninɛ biya binywa byɔsɛ. Leya ɔlɔ lyakɛ halyeholechɛ bîya, lyechikelelwɛ wɛ̌nɛ. Na lyekanina koya n'kichi kwakɛ kɛte: ‹Ketaka abelɔ m'matela maolo na manɛ ma mboka. Ochwɛ na bambuchu, na bitɛndɛ, na bihɔbu na lwǎta.› 22 Ohwa, koya n'kichi kwesuwelɛ na okana kɛte: ‹Ɔlɔ, biya byawǎkanina naetɛ, nabieta. Ela ata bîya wele ibu.›  23 Lea ɔlɔ lyakɛ lyen'kaninɛ kɛte: ‹Ketaka m'matela mɔsɛ ma maboka manɛ na ma o mabala. Bato bɔsɛ bawemɔna, obahindilichɛ yolo bakingilɛ mwǎnyi, ebalɔ sɛsɛ kyanyi kyekilolɛ bato. 24 Kěnɛ nan'kanina kɛte ushi ata komwɛchi hawingi habaya bɛnɛ babuchiwa kwêya elewa kwanyi.› »

25 Lomwɛ lusuku, bato bɛ̌ngi bebɛlɛ olama Yɛso. Kwekaloɛ na obasambela kɛte: 26 «Koya minɛ kohobɛnja ondama, kokondɛ oheta sakɛ na n'akɛ, na m'achiakɛ, na bǎna bakɛ, na bashiwabɔ, na kachi chakɛ. Eyǎka kokondɛ oheta mwɛkɔ kwakɛ kɛ mǐnɛ. Nambɔ bishibîya kushinabá n'lɔmbwɛ* kwanyi. 27 N'to minɛ kushiɔsha otɛta n'salaba* kwǎkɛ, na okonda, kushinabá n'lɔmbwɛ* kwanyi.

28 «Nǎmbɔ komwɛ hawǐngi hɛnyu kohobɛnja okubaa sɛsɛ keolo wɛ̌nɛ, byelěngyɛ kotangɛ oshama, komɔnɛ nambɔ kwenabá na bomɔná bwakenaɔsha oeta nabɔ koya n'kelɔ na okohwa. 29 Ela, nâmbɔ kwatola n'kelɔ kwa okubaa n'sele, hanyuma kɛ na oiswa ohwa keya sɛsɛ, bɔsɛ bɛnɛ bebaokemɔna bebaon'sɛya 30 m'okana kɛte: ‹Koko n'to kwatola okubaa sɛsɛ, ela, kwasaɔsha ohulilisha n'kelɔ.›

31 «Mɛngɔ mɛnɛ ɔlɔ elakɛ lyehobɛnja onywa bita na lêngɛ ɔlɔ, byelěngyɛ kotangɛ oshama, lyemɔnɛ nambɔ ohetela oɔma wa bilusha byakɛ ɛlufu umi byakele nǎbyɔ, lyenaɔsha koya minǎkɛ minɛ kwe na ɛlufu maumi mabele. 32 Kwahomɔna kushiɔsha, kwenahila mwanɔ o koya kongɛ nakɛ mɛngɔ mɛnɛ kwěle kɔ, yolo kom'bochɛ byɛnɛ benaeta yolo babɛ na talala hawingi habɔ. 33 Wɛnyu bɛnywɛ nǎ byɔka bîya, ushi n'to hawǐngi hɛnyu minɛ kwenaba n'lɔmbwɛ* kwǎnyi nambɔ kushinalɛa byɔsɛ byakele nǎbyɔ.»

34 Yɛso kwekaninɛ eyǎka kɛte: «Mǐnyu kwebâbá eto esɔka. Ela nambɔ kwachiminya sa kyakɛ*, i ě yabenabêa n'ta yolo yasoechɛ sa kyakɛ? 35 Koya mǐnyu kushi na n'kelɔ kɔkɔsɛ, oba o bitɛtɛ aɔ oonaka. Bebakotɛla hamboka. Koya minɛ kwe na mato ma oholecha, koholechɛ!»