1 Lomwɛ lusuku lwa Sabatɔ, Yɛso kwebɛlɛ oheta m'mabala ma nganɔ. Balɔmbwɛ* bakɛ betolilɛ oala masoke ma nganɔ, betolilɛ oteya bikuma wa mabɔ̂ mabɔ, na obiya*.

2 Bamwɛ Bafalisayɔ bebabuchichɛ kɛte: «Yolo ya ě mwaeta byɛnɛ m'benda* kwɛto kwekohanyɛ oeta lusuku lwa Sabatɔ*?» 3 Yɛso kwebakailɛ kɛte: «We, mushinasɔma byɛnɛ Laole kweitilɛ hamwɛchi na bangɛnakɛ mɛngɔ mɛnɛ mabeholechɛ ndala? 4 Kwekingelɛ n'lobonga**, kwekuhilɛ mikatɛ kyɛnɛ bato bebɛlɛ batangelɛ Abɛcha. Kwekelelɛ na obaha bangɛ nakɛ bakebɛlɛ nakɛ. Na i bibole ka byewashiwɛ oya mikatɛ kya bîya.»* 5 Obiya, kwebasambelɛ kɛte: «I nɛnɛ Mwǎna kwa N'to nǎ ɔlɔ lya Sabatɔ*.»

6 Longɛ lusuku lwa Sabatɔ, Yɛso kwekingelɛ n'ta Shinagɔgi*, na kwetolilɛ osɔmya bato. N'lea Shinagɔgi* mwebɛlɛ komwɛ n'to n'elɛbɛchu sanda lyakɛ lya obɔ̂ olomɛ. 7 Nɔmbɔchi cha ndɔ* na Bafalisayɔ* belɔlilɛ Yɛso wɛ̌nɛ, yolo bamɔnɛ nâmbɔ kwehɔnya koya n'to lusuku lwa Sabatɔ*. Beitilɛ bǐya, yolo bamɔnɛ enywa ya on'shitaki. 8 Ela Yɛso kwebɛlɛ kwahǒhomana malangá mabɔ. Nǎ kwen'kaninɛ koya n'to kwa sanda lya elɛbɛ kɛte: «Kinuaka, na ochwɛ ombɛlɛ wa bato.» Koya n'to kwekimana na okya hawǐngi habɔ bɔsɛ.

9 Ohwa Yɛso kwebakaninɛ baya Bafalisayɔ na nɔmbɔchi cha ndɔ kɛte: «Nehom'bocha: wé, iě yɛnɛ m'benda*kwɛto kwebabɛnja tobeoeta lusuku lwa Sabatɔ*? Oeta bibɛnju aɔ bibé? Ohɔnya n'to aɔ om'haka?»

10 Yɛso, kwebalɔlilɛ bɔsɛ, nǎ kwekaninɛ koya n'to kɛte: «Kɔlɔlaka sanda lyɔbɛ.» Kwelekɔlɔlɛ na hɔka haya lyehɔninɛ. 11 Ela chiya nɔmbɔchi cha ndɔ* na Bafalisayɔ* bechikelelwɛ wɛ̌nɛ. Betolilɛ obochana kɛte bam'etɛ Yɛso ě.

12 Lomwɛ lusuku, Yɛso kwehɛlilɛ o aɔnɔ yolo kosabɛ Abɛcha. Kweyɛshishɛ busuku bɔsɛ m'osaba. 13 M'mɛshi mwǎkɛ ha m'ɛshi, kwebuchichɛ balɔmbwe* bakɛ, kwesɔbɔlɛ umi na babele hawǐngi habɔ, na kwebakinyiɛ chǐna lya «bakikiwa*» 14 Nǎ bâba: Shimɔni, (minɛ kwen'kinyiɛ chǐna lya Pɛtɛlɔ) na n'shiwabɔ kwebɛlɛ buchiwa Andɛlɛ, na Yakɔbɔ, na Yɔana na Filipɔ, na Balɔtɔmayɔ, 15 na Matayɔ, na Tɔma, na Yakɔbɔ mwǎna kwa Alufayɔ, na Shimɔni ( kwebɛlɛ buchiwa Sɛlɔti) 16 na Yola mwǎna kwa Yakɔbɔ, na Yola Ishikaliɔti (koya minɛ kwetambolɛ Yɛso).

17 Yɛso kwesalilɛ ohuma o aɔnɔ, kwe na bakikiwa* bakɛ. Hakehǐlɛ ha ibu yɛnɛ ye bolole, kwekimanɛ. Kwebangilɛ eoto ya balɔmbwɛ* bakɛ na bângɛ bato bɛ̌ngi ohumina ebalɔ yɔsɛ ya Yolɛya, na mboka kya Yɛlusalɛma, na lǒbe lwa mboka kya Tilɔ na Shilɔni kyɛnɛ kyebɛlɛ habamba ha echiba. 18 Baya bato bechǔlɛ yolo bam'holechɛ Yɛso, na kobahɔnyɛ bisumi byabɔ. Na bɛnɛ bebɛlɛ otɛnjiwa na miha bɔ lwabɔ kwebahɔnyinyɛ. 19 Batɔ bɔsɛ bebɛnjichɛ om'oma, yolo ya boɔmɛ́ bwebɛlɛ ohuma n'ta mwǎkɛ na obahɔnya bɔsɛ.

20 Ohwa, Yɛso kwelɔlilɛ balɔmbwɛ bakɛ, na obakanina kɛte:

«Komba bɛnywɛ bambuchu,

yolo Boɔlɔ bwa Abɛcha* i bwɛnyu.

21 Komba bɛnywɛ môholecha ndala manɔ mɛngɔ,

yolo mwekyota.

Komba bɛnywɛ moholela manɔ mɛngɔ,

yolo mwesɛa wa sasɔ.

22 «Komba bɛnywɛ nǎmbɔ bato bem'mɔnywa na om'bakola na on'toa na otɔkya ma chǐna mɛnyu,

yolo yanyi nɛnɛ Mwǎna kwa N'to.

23 Mɛngɔ mɛnɛ biya bikɔkɔ byeba om'hîla, mobɛ ashama na sasɔ m'oina, yolo ibam'beelɛ matabishi maolo hakolo. Ebalɔ basabɔ olo bêtelɛ ŋanguchi byɔka biya.

24 Ela bɛnywɛ bambɔna mwebakɔnamiwɛ,

yolo mwahohɛwa mwɛkɔ kwa lɛma lyɛnyu

25 Kɔnami bɛnywɛ mwebakyotɛ manɔ mɛngɔ,

yolo mangɛ mɛngɔ mweholecha ndala.

Kɔnami wɛnyu bɛnywɛ mohosɛa wa sasɔ manɔ mɛngɔ,

yolo mwelela na mwêban'lelɔ.

26 Kɔnami wɛnyu bɛnywɛ nǎmbɔ bato bɔsɛ beon'tɔna,

yolo nǎ byɔka biya byɛnɛ basabɔ olo bebɛlɛ tɔná ŋanguchi cha lulimi.

27 Yɛso kwekelelɛ otɔkɛma eyaka. Ela bɛnywɛ bɛnɛ mohopolecha nehobɛnja on'kanina bînɔ: «Tomango twɛnyu mobɛ otoonda, na baya bɛnɛ bebam'mɔnywa, mɔbɛ́ obaetela bisɔka. 28 Baya bɛnɛ beban'kɔnamina mobɛ obasabela Abɛcha yolo kobahalelɛ. Na baya bɛnɛ bebán'sobya mobɛ obasabela wa Abɛcha. 29 Nǎmbɔ n'to kwaohola o lemwɛ tama, on'kalochechɛ lêngɛ. Nǎmbɔ n'to kwahosapa echibabɔ yɔbɛ, on'shikilɛ na shimishi. 30 N'to kwahosaba eto yɔyɔsɛ ushin'kimɛ, aɔ kwahosapa eto yɔbɛ, ushibɛnjɛ kôsuechechɛ. 31 Biya byamwebabɛnja bato bam'etelɛ, moetelɛ bǎngɛ.

32 «Nâmbɔ mwebahobɛnja ka baya behom'bɛnja, wé, moholanga mwehɛwa ě? Ebalɔ bawa bobé lwabɔ bebabɛnja baya bɛnɛ bebababɛnja! 33 Eyǎka, nâmbɔ mwebaetela ka bisɔka baya bɛnɛ bebam'etela bisɔka, malepɔ naké yamwehɛwa? Ata bawa bobe lwabɔ bebaeta byɔka biya. 34 Nambɔ mwenasɔmbɔlɔcha ka baya bamweomana kɛte ben'lěpa, wé, mwepata akɔɛlɔ naké? Ata bawa bobé bebasɔmbɔlɔcha lwabɔ baya bɛnɛ benabalepa.

35 «Ela bɛnywɛ, mobɛ ǒnda tomango twɛnyu. Na mobɛ otoetela bisɔka. Eyǎka mobɛ osɔmbɔlɔcha, mushilǎngɛ osuechechiwa. Mwahoeta bîya, mwehɛwa matabishi maolo, eyǎka mwêba chikelwɛ bǎna ba Abɛcha kwe hakolo ha byɔsɛ, yolo kɛnyikɛ kwebaeta bisɔka o baya bashi na boswachi na o bawa bobé. 36 Mobɛ omɔnɛnana kɛnɛ nɛhɛ Sɛnyu.»

37 Yɛso kwetokɔmɛ́ eyaka kɛte: «Mushibɛ́ omɔna ka bibé bya bângɛ, yolo Abɛcha kushimɔnɛ byɛnyu. Mushibɛ okɔnamina bângɛ, yolo Abɛcha kushin'kɔnaminɛ lwɛnyu. Ela bɛnywɛ mobɛ olɛ̌lɛla bângɛ, yolo Abɛcha kon'lɛ̌lɛlɛ lwɛnyu. 38 Mobɛ oha bângɛ, yolo bɛnywɛ lwɛnyu Abɛcha kom'hɛ. Na biya byamwehɛwa byeba byelɔngiwɛ bisɔka, byabihielelwɛ, byekilola bɛ́ na otola omwakea. Byamwebabɛnja oha bângɛ, Abɛcha lwakɛ kwem'ha byɔka bîya.»

39 Eyǎka Yɛso kwebahɛlɛ engɛ eta kɛte: «Ehɔbu yelengyɛ olɔmbɔla ehɔbu nakɛ́? Nǎngo! Kwahon'lɔmbɔla chikelwɛ, byɔsɛ bibele byekwa m'ena. 40 N'lɔmbwɛ* kushinaheta n'lɔmbɔchi kwǎkɛ. Ela n'lɔmbwɛ kɛkɛsɛ minɛ kwahwa osɔma bisɔka, kwênabá nɛhɛ n'lɔmbɔchi kwǎkɛ.

41 «Yolo yaě wenamɔ̂na hiyǎnyi hyɛnɛ hyee n'lisɔ lya minɔ̌bɛ, ushihomɔná ehende ya n'te yɛnɛ ye n'lǐsɔ lyɔbɛ? 42 Yolo yaě wenakanina minɔ̌bɛ: ‹Lɛyaka naohunyɛ hiyǎnyi hyɛnɛ hye n'lǐsɔ lyɔbɛ.› Mɛngɔ mɛnɛ n'lǐsɔ lyɔbɛ́, mwěle ehende ya n'te? M'bona kɔkwɛ! Tangaka ohunya ehende ya n'te yɛnɛ yee n'lǐsɔ lyɔbɛ, na hawemɔna hololo wa om'hunya hiyanyi hyɛnɛ hyee n'lǐsɔ lya minɔ̌bɛ́!»

43 Yɛso kwekaninɛ eyǎka kɛte: «N'te kobɛnju kushibaha bikuma bibe, na n'te kobe kushibaha bikuma bibɛnju. 44 Bato bebamana n'te ohetela bikuma byakɛ. Bato bashibahɔmba bǔngɔ o n'te kwa asɛmɛkɛ, na bashibahɔmba bumú o n'te kwa esongwa. 45 Nǎ biya, n'to m'bɛnju kwebatɔkɔma binywa bibɛnju bye ohuma o n'tema kwakɛ. Ela n'to m'be, bibé byekebatɔkɔma byebahuma m'bibé byɛnɛ byebikilolɛ n'ta n'tema kwakɛ. Yolo anywa a n'to ebatɔkɔma ka binywa byɛnɛ byebikilolɛ n'ta n'tema kwakɛ.»

46 Yɛso kwekelelelɛ okana kɛte: «Yolo ya ě mwehombocha: ‹Ɔlɔ, Ɔlɔ› na mushioeta byɛnɛ byandehon'sambela?  47 Nehobɛnja om'mɔnya byɛnɛ n'to minɛ kohondama na oholecha binywa byanyi na obieta byɛnɛ byandeokana, kwem'hutanɛ: 48 kwem'hutanɛ na minɛ kwekubaɛ sɛsɛ kyǎkɛ. Kwetangilɛ otaba wɛ̌nɛ ohiya o ndanda. O leya ndanda, kwebiilɛ ɔ n'shingi kwa sɛsɛ kyǎkɛ. Hehǐlɛ hohé, lǒte lwekilolɛ, keya pela ketolilɛ ohola o keya sɛsɛ, keya sɛsɛ kishitekelɛ, yolo kyebɛlɛ ndi. 49 Ela n'to minɛ kohoeta nɛhɛ kohondama wa oholecha mwanɔ kwanyi na kushioeta byandeokana, kwem'hutanɛ na koya minɛ kwekubaɛ sɛsɛ kyakɛ o etɛtɛ bila otaba n'shingi. Mɛngɔ mehǐlɛ keya pela o keya sɛsɛ, hɔka haya keya sɛsɛ kyeondoɛ na otɔka wɛ̌nɛ.»