1 BaKorinti 12

Kurɔm kuzining ni nkap dot

12 Kurɔm anet awe se burang, ngma ni nkap zizɛɛt-zizɛɛt fi ku bɛ̀; ne ngma nkap dot fi ku bɛ́, ngma nsot kurɔm kuzining. Anet-Isheshek yɔng a se anɔng. 13 Nek ngma yit ba kin ki ra yit abatisma ne*12:13 Ke: Nɛ; ke ayet. Kabik kazining sak ni kurɔm kuzining, ke ni i yet baYahuda kɛ bafɛ́ aGirik ayi, ke asam kɛ nnon ari ayi, ngma ba kin ki nɔɔk yit Kabik kazining e in sɔ yit.

14 Fok yin, ba nye kurɔm na abak azining awo, tit nkap dot-dot. 15 Ki kutak fi ku fɛ̀, <<Nek da imi yet kubɔk awo, vit ikyɛng fi i di moon ni kurɔm,>> kutak e da kyem ku tɛn ice ko ni kurɔm nek ikyɛng fi ku fɛ̀ awo. 16 Ki kuto fi ku fɛ̀, <<Nek da imi yet iyisi awo, vit ikyɛng fi i di moon kurɔm,>> Kuto me da tɛn ice ko ni kurɔm nek ikyɛng fi ku fɛ̀ awo. 17 Ki kurɔm kusum fi ku yet ayisi, ke anet e foos na akyɛ? Ki kurɔm kusum fi ku yet wɔn ato, ke anet foos nkɔn na akyɛ? 18 Awɛt Adakunom saas nkap irɔm, kaa kungan ko kpaf narɔ fi iwu shim. 19 Ke ngma nkap e fi in yet kukap kuzining kyɛk, ki kurɔm e se akyɛ? 20 Ti in da se, nkap dot-dot, awɛt kurɔm kuzining.

21 Da iyisi da kyem i fɛ̀ ni kubɔk, <<Imi da shim awo!>> Kɛ ni ice fɛ̀ ni kutak, <<Imi da shim awo!>> 22 Akuce anɔng, nkap irɔm fi in se tɛ vit ina na agap, ina na ba kyem ba nye ikikak dang ina awo. 23 Nkap irɔm e fi in yɛrɛ yit kurat na, in nesek yit ina iratek gyet awo, nkap irɔm fɛ́ ba tonoso ina awo, ba berese ina gyatgyat awo, 24 nyɔng fɛ́ ba tonoso tsɛt anɔng awo. Awɛt Adakunom moon nkap irɔm e, a nɔɔk iratek sak ni nyɔng fi in bɛ̀ kurat, 25 kɔn ikaba bi se nate nkap irɔm e, tit kukap irɔm e kukaa gyerep kuyaa. 26 Ke abak akak tsin sɔ mgbang, ni ishɛrɛp nkap e sɔ mgbang gung ni iko; kɛ abak akak sɛ iratek, ni ishɛrɛp nkap e sɔ nta gung ni iko.

27 Yɔkɔnɔng iyin ba i yet yin kurɔm Anet-Isheshek, kaangan yin yet abak irɔm e.