1 Itusung bafi ikuus na Antakiya i bɛ̀ batan fɛ́ ba yet bafi itees: aBarnabas nɛ aSimiyɔn, ayɔng fɛ́ ba ku yes aNiga, nɛ aLushiyos, ayɔng fɛ́ a ne na aSirin, nɛ aManayen, ayɔng fɛ́ a rasak gung ne agwɔm aHiridus, nɛ aShawulu. 2 Ba kin se ni ira awon ni itekap anu sak na aTisa, wat Kabik aJɛrɛ fɛ̀ ni iba, <<Di tun yin ba aBarnabas nɛ aShawulu zɛɛt nek kutomong fi in mi ka ba yes ba di ra ne.>> 3 Ama fɛ́ ba ya kashon na awon ni itekap anu me, ba di saas mbɔk naton ba aBarnabas nɛ aShawulu, ba di te itek ni ba, ba ka ba te ni irèn.

4 Ba aBarnabas nɛ aShawulu, ama fɛ́ Kabik aJɛrɛ mi ka ba tom, ba tseng sak na aSalushiya, ama fɛ́ ba won azɔng, ba nɔ ni kukyɛ ashi sak i bɛ́ na aSayipurus. 5 Ni izen fɛ́ ba tse ba ta ne aSalamis, ba shara ifɛ̀ Adakunom narɔ inyis baYahuda. AYohana aMarkus se ni i ka ba sɛs mo.

6 Ama fɛ́ ba mi teng ba kat kaakyɛ ni izek e, ba tse ba ta ni wɔp aPafos, ba nyim na anet aYahuda akak fɛ́ a ras kubok, ba ku yes ye aBar aJoshuwa, atan mbɔɔs. 7 A yet anet fɛ́ a di sɛs agwɔmna kabak mben e yɔng, iyerek wu yet aSarjiyus aBulus. Agwɔmna me yet atsitsɛng anet. Agwɔmna me sak na ba ku yes aBarnabas nɛ aShawulu nek a shim a fok ifɛ̀ Adakunom na anu bá. 8 Awɛt aLimas, anet kubok e (nek anɔng wu fɛ́ ba ku yes mo ni icɛn aGirik), a ka ba tɛnɛng, kɔng ba bi tirik nhwyɛ agwɔmna me na a shan atsak. 9 Awɛt aShawulu, ayɔng fɛ́ ba ku yes aBulus, ayɛt ishining na Kabik aJɛrɛ, a di sak ayisi gbit na aLimas, 10 a fɛ̀ ni wu, <<Ngɔn arim aShetan, afi imaan e ni ikyɛng itek! Wɔn mbɔɔs nanu ngɔn ne anyas kyɛk, ngɔn bi won ibeseng irén itek ifɛ́ Adakunom awɛ? 11 Kubɔk Adakunom se ni ifa ni ngɔn yɔkɔnɔng ana, i da sot akpatɔn, i da sok izen dang ni i ti i di mgbey kunom.>>

Ni izen izining, aming nɛ kurin kukak makiyi wat a fam ayisi wu, a kpa teng a wat mbɔk na tsɛt ayɔng fɛ́ a da ku tonong irèn.

12 Fɛ́ agwɔmna me di ikyɛng fi ite, a ku te yɔɔt, a shan atsak nek itees ifɛ̀ aTisa.

13 Wat aBulus nɛ bafidang itomong wu, ba won aPafos ba nɔ ni kukyɛ ashi sak na aPaga afi mben aPamfiliya. AYohana aMarkus, ka ba won a tɛ a bun sak na aRushelima. 14 Awɛt iba won aPaga, ba ya kashon ni kutseet sak na Antakiya afɛ́ aPisidiya. Atuk aSabat, ba tse ba nɔ narɔ inyis baYahuda, ba tse ba sonong. 15 Ama fɛ́ ba fa kufumung ntsi aMusa ni ijɛk batan, akɔk-ashon karɔ inyis baYahuda me fɛ̀ ni iba, <<Ábaruneng, ki i bɛ̀ yin kucɛɛt fi ku di ki barang banet ite nyɛk, ni fɛrɛng yin.>>

16 Wat aBulus dorok tsik, a waram mbɔk naton nɔng na ba te yuu, a fɛ̀ ni iba, <<Ábaruneng, banet aIsrela, ni ishɛrɛp bafi Ícɛn-iduk fɛ́ ba foos inyim Adakunom, wes yin ato yin ni imi! 17 Adakunom banet aIsrela kin myak badakop yit neme, a ka ba sak ba sot izit iratek na ba tsin rēn resek na aMasat, a da ne a ka ba tun ni kukyem kuratek. 18 A sok akabɔk ni nggɔn bá ayɛ nsɔk nnaas natse. 19 Ni izen fɛ́ ba tse ba ta ni mben aKanan, a ya icɛ́n kanakataat ni itsom, a ka ba nɔk mo mben e ni in sot nfuba. 20 Nkyɔrɔk e ngma kin sok ayɛ anakat anaas ina nsɔk ntoon.

<<Ama anɔng, Adakunom myak banet fɛ́ ba da sot bakɔk-ashon bá, nkum izen e yɔng sak izen atan aSamela. 21 Ni izen e yɔng, banet e tsɛt fok ye na ba ka ba nɔk agwɔm, nek anɔng, a ka ba nɔk aShawulu arim aKish, afi izɔrɔk aBanyami, a ya igwɔm naton ba ayɛ nsɔk nnaas. 22 Ama fɛ́ a mi tun aShawulu, Adakunom di te aDauda na a sot agwɔm bá. Adakunom fɛ̀ ane naton wu: <I mi sɛ aDauda, arim aJesi, anet fi imi di te iyɛ makiyi; a da nye ngma ikyɛng fi imi shim.>

23 <<A yet ni izɔrɔk aDauda ye fɛ́ Adakunom kin di bɛ́ na Anet-Isheshek sak na bafi aIsrela, fɛ́ a yet aYeso, kyɔn tɛ fɛ́ a kin di shiwu. 24 Na aYeso mo dang bɛ́, aYohana shara ngma bafi aIsrela ye, na ba tirik na ba won anɛn bá, nɔng ba bin ka ba ra abatisma.

25 <<Fɛ́ aYohana se ni igang kutomong wu, a fɛ̀, <Iyin di yin imi yet angan ɛ? Imi yet ayɔng e awo. Awey, ayɔng e bi bɛ́ ama hom, imi kyem ni in bisik iwe ikpatak wu awo.>

26 <<Ábaruneng, iyin fi i ne yin ni izɔrɔk aIbrahim, ni iyin Ícɛn-iduk fi ifos yin nnyim Adakunom, i yet nek iyit ba fɛ̀ Adakunom di tom ni ifɛ̀ isheshek deng. 27 Nek banet fɛ́ ba se ni aRushelima nɛ bágwɔm bá, ba kyem ba rēn kuri anet fɛ́ ayet aYeso awo, ko ba kyem ba rēn ikyɛng fɛ́ batan kin jɛk fɛ́ ba ka ba fa ne kaakyi kunom aSabat awo. Nek anɔng, ba di shining ifɛ̀ batan ba ku tsɛɛt mo ishɔt iku. 28 Ngma na avit inɛn fɛ́ ba sɛ ni wu fɛ́ ba da ku fɛt mo, ngma na anɔng, ba ra awon na aBilatus na a te ba ku fɛt. 29 Ama fɛ́ ba mi shining ngma ikyɛng fɛ́ ba jɛk naton wu, ba ma ku tik ni kum, ba tse ba ku nɛt ni isɔs ita. 30 Awɛt Adakunom ku donong ni iku, 31 aYeso sok nkɔs gaan na tonoso ice wu sak na bayɔng fɛ́ ba kin ne gung ni iwu na aGalili sak ibɛ ni aRushelima, fɛ́ ba yet bafi anu ifɛ̀ wu sak na banet.

32 <<Iyit tsin ki shara yin ifɛ̀ itek deng bà, ikyɛng fɛ́ Adakunom man rosom na badakop yit, 33 a mi ki shining yit ide, iyit fi in yet yit nnon bá, nek idonong aYeso ni iku. Kyɔn tɛ ba kin di jɛk na Abom afɛ́ faa,

<Ngɔn yet Arim hom;

Atut imi mi sot aDa ngɔn.>*13:33 Ban di yin: Abom 2:7.

34 Adakunom mi ku donong ni iku, a da tɛ a bush awo, a kin cɛɛt ane,

<In bi ki nɔk yin kunang ajɛrɛ,

atutup awɛng fi in kin

rosom na aDauda.>

35 Nek anɔng, a kin tɛ a fɛ̀

na Abom akak ye:

<Ngɔn da won aJɛrɛ ngɔn

na a bush awo.>*13:35 Ban di yin: Abom 2:7.

36 <<Nek ni izen fɛ́ aDauda kin se ni kutset, a kin nye ikyɛng fɛ́ Adakunom shim, ama anɔng, a ku, ba ku nɛt na arɛk badakop wu, a bush azɔng. 37 Awɛt ayɔng fɛ́ Adakunom ku donong ni iku me, a kin bush awo.

38 <<Nek anɔng, ábaruneng, in shim ni i rēn ane: ba kin ki shara yin ifuut anɛn yin ni iyerek aYeso Adakunom. 39 Ngma ayɔng fɛ́ a nɔɔk atsak ni iwu, a mi hwyet na kaakyi ikyɛng fi ntsi aMusa da kyem i ku nɔk awo. 40 Tot yin ace yin kɔng ikyɛng dɔng fɛ́ batan kin jɛk bi shining na ace yin:

41 <Fok yin, bafɛ́ a bush icɛɛt,

Won akpɔrɔk ki yisik yin,

kus yin,

nek imi da nye ikikak ni izen yin

idɔng fi i da kyem i nɔk yin

atsak ni ide awo,

ka akak fɛ́ a ki tak yin.> >>*13:41 Ban di yin: AHabakuk 1:5.

42 Ni izen fɛ́ ba aBulus nɛ aBarnabas se iwuruk narɔ inyis baYahuda me, banet e ka ba tsot akabɔk fok, na ba bɛ́ atuk aSabat ashon, ba bin ban cɛɛt ni iba naton ikyɛng e dɔng. 43 Ama fɛ́ banet e mi ka na ikaas, baYahuda dot nɛ bakak fɛ́ ba yet Ícɛn-iduk fɛ́ ba kuus nggɔn baYahuda, ba di kuus ba aBulus nɛ aBarnabas. Ba aBulus e, fɛ̀ ni iba ye, na ba ya kashon ayɛt itek fɛ́ Adakunom mi ka ba nɔɔk.

44 Fɛ́ aSabat nye, banet iwɔp e kusum ka na tusung nɔng ba da fok ifɛ̀ aTisa. 45 Ni izen fɛ́ baYahuda di kudyɛng banet, naman ka ba yit makiyi, ba kpa cɛɛt gadiring naton ikyɛng fɛ́ aBulus se ni icɛɛt e, na ba ku korok itok makiyi.

46 Awɛt aBulus nɛ aBarnabas, fɛrɛng ni iba na agap iyɛ ye, <<I se gbing-gbing ni iyit tun ki shara yin ifɛ̀ Adakunom ninyɛn. Yɔkɔnɔng fi iyin mi rayin iko, i mi tonong yin fok iyin kyem yin fi i da sɛ yin kutset vit igang e awo. Nek anɔng, iyit yɔng in tirik yit sak ni Ícɛn-iduk. 47 Nek ikyɛng de fɛ́ aTisa kin fɛ̀ ye,

<Imi mi ki sak yin

ni sot yin mgbey

sak ni Ícɛn-iduk,

nɔng i da bɛ́ yin ni isheshek

sak na banet azatse kusum.>*13:47 Ban di yin: AIshaya 49:6. >>

48 Ni izen fi Ícɛn-iduk fok anɔng, ba nye iyɛ ikan makiyi, ba tere ifɛ̀ aTisa; ngma bayɔng fɛ́ ba mi myak nek kutset vit igang shan atsak.

49 Ifɛ̀ aTisa nɔɔs kaakyɛ ni mben e. 50 Awɛt baYahuda di te banyining fɛ́ ba foos nnyim Adakunom, bayɔng fɛ́ ba foos ni iba, nɛ bamatek iwɔp e fɛ́ ba fɛrɛng na banet fok. Ba di te banet na ba dorok nhwyɛ nɛ ba ka ba nɔɔk mgbang, ba sak banet ro aBulus nɛ aBarnabas ni mben e. 51 Nek anɔng, iba ka ba waat ntong akpatak bá*13:51 Iwaat akpatak na baYahuda itonong fok, Adakunom mi rawu baYahuda fɛ́ ba raba ishan ifɛ̀ aTisa aYeso, nek anɔng a da ka ba tabak. Nek aYeso tees bafi imɛɛs wu na ba nye nɔng, ngma izen fɛ́ ba raba ifok ifɛ̀ bá, ngma ni ba. Ban di yin: AMarkus 6:11., naton ba, ba tseng sak ni aIkoniyum. 52 Bafi ikuus e ka na shining ni iyɛ ikan nɛ Kabik aJɛrɛ.