1 Sɛ Yesu tawɩ jama baa na wʋ kpalɛnara baa sɛ, 2 <<Mbara bakalaasa na Farasitina baa nyiŋeŋ n wɩɛna yikuo na baa dɩlɛ kalaa Mosesi mbara ŋii tie. 3 Dɩmʋŋ dʋɔ ŋɩ tiri gʋ n nyii ba wɩɛ na ɩ yɩɛ bʋrʋkʋma gaa ba tawɩ amɩɛ na. Ama n baa yɩɛ bʋrʋ gaa baa yɩɛ na, akala takɩɛ ba tɩŋtɩŋ baa di ba kalaa dʋɔ ɔ. 4 Baa pɔgʋ gasʋlasɛ anyuŋtina mʋ sɩlɛ bakpa, ama ba tɩŋtɩŋ bɩrɛ baa ja sɛ baa mʋ ba pam nyiŋbie gba chɔna ba a.>>

5 Gʋ baa ja baa yɩɛ bʋrʋkʋma na bakpa a na ba dʋɔ na, ba yɩɛ nam tanɛ adaka a pii-pii ŋii baa sabɩɛ Ɩsʋɔ wɩɛ baa dʋ ŋɩ tɩba, ŋii baa mʋ baa pɔgʋ ba tulie na ba pamɩɛ dʋɔ na ajanɩɛ, na ŋii baa mʋ baa saga ba adugbe gagbasɛ nʋɔsɛ na gba ajalɩŋtina. 6 Baa ja achaatɩŋ ŋii ŋɩ wɩɛ jilima na asadi adiya di tie, na achaatɩŋ ajanɩɛ Yudatina tʋm danɩŋ naŋ, 7 baa ja sɛ bakpa a luuŋ yɩlɩ ba gɩyɩɛnɩŋ naŋ na baa yagɛ ba sɛ, <<Bakalaasa.>>

8 Ama amɩɛ bɩrɛ n baa yela na baa yagɛ amɩɛ sɛ, <<Bakalaasa>> akala takɩɛ ɩ wɩɛna wʋkalaasa wʋdʋŋdʋlʋŋ bɛ sɛ amɩɛ kpiniŋ ɩ yɩɛ dɔŋa lɩɛdɩra bɛ. 9 N baa yagɛ wʋrʋ tibi gana dʋɔ sɛ, <<Juo>> akala takɩɛ ɩ wɩɛna Juo wʋdʋŋdʋlʋŋ bɛ Ɩsʋɔ adugbe. 10 Yaa n baa yela na baa yagɛ amɩɛ <<Wʋkalaasa>> akala takɩɛ ɩ wɩɛna wʋkalaasa wʋdʋŋdʋlʋŋ bɛ, wʋŋ n nyina Kirisito wʋŋ. 11 Amɩɛ tɩba wʋjaŋ-janɛ aja yɩɛ amɩɛ tɩba tʋmɩrɛ. 12 Akala takɩɛ wʋkʋma wʋŋ wʋ a jiŋna wʋ wʋsɛ na, Ɩsʋɔ aja kɔna ɩ tie, sɛ wʋkʋma wʋŋ wʋ a kɔna wʋ wʋsɛ tie na, Ɩsʋɔ aja jiŋna ɩ adugbe.

13 Sɛ Yesu ju dʋɔ tawɩ sɛ, <<Amɩɛ Mosesi mbara bakalaasa na Farasitina, amɩɛ aluguusitina amɩɛ lakʋ! Akala takɩɛ ɩ tɔ Ɩsʋɔ Juori gaa bɔlɛ ɩ fa bakpa. Amɩɛ tɩŋtɩŋ ɩŋ jʋʋ o sɛ ɩ gara baa baa ja sɛ baa jʋʋ na gbɩɛ. 14 Amɩɛ mbara bakalaasa na Farasitina, amɩɛ aluguusitina amɩɛ lakʋ! Akala takɩɛ ɩ mʋna kpiŋjim gbɩɛ dʋɔ ɩ lɩɛ bakʋlapʋna gapatɩɛ, sɛ ɩ yɩɛ aluguusitina baa ɩ jɔ dɩga jalɩŋtɛ ɩ fa Ɩsʋɔ ɩ kalaa bakpa. Dɩmʋŋ dʋɔ Ɩsʋɔ aja fɔŋɩ amɩɛ dɩlɛ fɔɩ.>>*23:14 Naa asabɩɛ wɩɛ ŋii kpiniŋ n wɩɛna ŋina a

15 Amɩɛ mbara bakalaasa na Farasitina, amɩɛ aluguusitina amɩɛ lakʋ! Akala takɩɛ ɩ ju gbɩɛ gapɩlɛkʋma ɩ ja wʋkpa wʋrʋ na wʋ a biliŋi gaa kpi amɩɛ dʋɔ na ɩ tʋm, sɛ ɩ yu wʋrʋ kpi amɩɛ dʋɔ na, ɩɩ yela na wʋ a daga dɩla fɔŋɩwʋ gbɩɛta bʋla awʋrʋfʋɔ bʋala naŋ kii amɩɛ tɩŋtɩŋ.

16 Amɩɛ mbara bakalaasa na Farasitina baa ɩ kɩɛna takɩɛ bataŋpʋna baa baa pala bakpa asanaŋ, amɩɛ lakʋ. Ɩ kalaa sɛ, <<Sɛ wʋrʋ ka Ɩsʋɔ tʋm danɛ ntaŋ na, ba yɩɛ bʋrʋ ʋ, ama sɛ wʋrʋ ka aterembie asɩɛma ŋii ŋɩ wɩɛ Ɩsʋɔ tʋm danɛ naŋ ntaŋ na, ŋɩ tiri gʋ wʋ a di wʋ ntaŋ ŋii dʋɔ.>> 17 Amɩɛ bataŋpʋna bamalaŋpʋna! Gamʋɔ n nyina gakpari, aterembie asɩɛma yaa Ɩsʋɔ tʋm danɛ gaa gaa yela sɛ aterembie asɩɛma ŋii a yɩɛ chɩrɩchɩrɩ naa? 18 Ɩ ti tawɩ sɛ, <<Sɛ wʋrʋ ka gadiesa dɩgbɩŋgbɩŋ ntaŋ na, ba yɩɛ bʋrʋ ʋ, ama wʋrʋ ka gafaasa gaa ga jaga ɩ ga dʋɔ na, ŋɩ tiri gʋ wʋ a di wʋ ntaŋ ŋii dʋɔ.>> 19 Amɩɛ bataŋpʋna. Gamʋɔ n nyina ga kpari, gafaasa yaa gadiesa dɩgbɩŋgbɩŋ gaa ga yela sɛ gafaasa gaa yɩɛ chɩrɩchɩrɩ naa? 20 Dɩmʋŋ dʋɔ wʋŋ wʋ ka gadiesa dɩgbɩŋgbɩŋ ntaŋ na, wʋ ka dɩgbɩŋgbɩŋ na gafaasa gaa ga jaga ɩ dʋɔ na kpiniŋ. 21 Sɛ wʋŋ wʋ ka Ɩsʋɔ tʋm danɛ gaa ntaŋ na, wʋ ka tʋm danɛ gaa na Ɩsʋɔ wʋŋ wʋ chaɩ ga tɩba na ntaŋ. 22 Sɛ wʋŋ wʋ ka Ɩsʋɔ adugbe ntaŋ na, wʋ ka Ɩsʋɔ juorigbeli na Ɩsʋɔ wʋŋ wʋ chaɩ ga dʋɔ na ntaŋ.

23 Mbara bakalaasa na Farasitina, amɩɛ aluguusitina, amɩɛ lakʋ! Akala takɩɛ ɩ tɔ amɩɛ jagɩɛ, akpinie na kielasɛ dʋɔ gifi naŋ garɛ ɩ fa Ɩsʋɔ. Ama ɩ pɩɛ mbara ŋii tɩba gaa ga yɩɛ ga kpari takɩɛ di wɩɛ ŋɩ gbɩɛ dʋɔ, gɩyɔŋ na gasiŋteŋ fa Ɩsʋɔ. Ŋina n daga na ɩ yɩɛ na n baa yela gifi naŋ garɛ tɔ. 24 Mbara bakalaasa na Farasitina baa ɩ kɩɛna takɩɛ bataŋpʋna baa baa pala bakpa asanaŋ. Ɩ chatɛ lɩŋ ɩ lɩsɛ chʋɔsɛ, ama ɩ liri nyɔma.

25 Mbara bakalaasa na Farasitina, amɩɛ aluguusitina, amɩɛ lakʋ! Akala takɩɛ ɩ yalɛ amɩɛ gafɩsɩ na achuŋputuŋ wʋrʋgbɩɛ, ama dɩsɛ chɩbɛ na wʋsɛ gɩbaa dɩlɛ cham n su ŋɩ tɩba. 26 Amɩɛ Farasitina bataŋpʋna! N chɩŋkpɩɛ yalɛ gafɩsɩ na achuŋputuŋ ŋii tɩba, na ŋɩ wʋrʋgbɩɛ gba a yɩɛ chɩrɩchɩrɩ?

27 Mbara bakalaasa na Farasitina, amɩɛ aluguusitina, amɩɛ lakʋ. Ɩ kɩɛna bɛ takɩɛ bʋɔsɛ ŋii ba bɔlɛ ŋɩ dʋɔ ŋɩ wɩɛ dieli, ama ŋɩ tɩba bɩrɛ, ŋmaba na iniesi abʋrɩ n su ŋɛ. 28 Dɩmʋŋ sɛ ɩ yɩɛ bachirigisa bakpa asa dʋɔ, ama amɩɛ tɩba bɩrɛ, aluguusi wɩɛ na wɩɛ asʋbʋɛ n su amɩɛ.

29 Mbara bakalaasa na Farasitina, amɩɛ aluguusitina, amɩɛ lakʋ! Akala takɩɛ ɩ ma bʋɔsɛ ɩ fa Ɩsʋɔ bajana sɛ ɩ desina bachirigisa bʋɔsɛ. 30 Sɛ ɩ tawɩ sɛ, <<Nafʋɔ dɩ cha dɩ wɩɛ daa duluŋ saŋa na, nafʋɔ dɩɩ kpi ba dʋɔ na dɩ kʋ Ɩsʋɔ bajana baa a.>> 31 Dɩmʋŋ dʋɔ wɩɛ ŋii ɩ tawɩ na di seriya baŋ amɩɛ tɩŋtɩŋ sɛ ɩ yɩɛ baa ba kʋ Ɩsʋɔ bajana baa ganana bie na bɛ. 32 N kpaŋ amɩɛ duluŋ nafara na ɩ kʋ bakpa takɩɛ ganaŋkʋ ba yɩɛ na.

33 Amɩɛ dʋmɩɛ! Amɩɛ baa ɩ kɩɛna takɩɛ dʋmɩɛ sɔrɛtina. Sɩnɛ sɛ ɩ dɩlɛ se lɩɩ dɩpʋɛ gaa baa fuu amɩɛ mʋ ju awʋrʋfʋɔ bʋala naŋ naa? 34 Dɩmʋŋ dʋɔ maa kpiri bajana, wɩɛ jimɩra na mbara bakalaasa amɩɛ jaŋ. Ɩ kʋ ba tɩba barɛ na ɩ jɔ barɛ daŋ gasagasa dʋɔ, barɛ dʋɔ ɩ taɩ ba amɩɛ tʋm danɩŋ naŋ na ɩ pala dɩɛsɛ-dɩɛsɛ dʋɔ gɩŋ ba. 35 Dɩmʋŋ dʋɔ, Ɩsʋɔ aja fɔŋɩ amɩɛ dɩla bachirigisa kpiniŋ baa ɩ kʋ ba tibi gana dʋɔ lɩɩ wʋchirigisa Abeli dʋɔ ga tala Sakariya wʋŋ wʋjuo n nyina Barakiya na dʋɔ, wʋŋ ɩ kʋ ɩ Ɩsʋɔ tʋm danɛ na gadiesa dɩgbɩŋgbɩŋ tɩtɩba na. 36 Maa tawɩ sɛ n nyii na dieli sɛ dɩla fɔŋɩwʋ ŋina kpiniŋ aja kɔŋ dɩmʋŋ gɩnanaŋ gana dʋɔ.

37 Sɛ Yesu ju dʋɔ tawɩ sɛ, <<O Yerusalemtina, Yerusalemtina! Amɩɛ baa ɩ kʋ Ɩsʋɔ bajana sɛ ɩ lɔ baa Ɩsʋɔ kpiri ba amɩɛ jaŋ na bʋɛ. Maa ja sɛ maa sila amɩɛ na maa gie amɩɛ takɩɛ ganaŋkʋ dijim naa a sila wʋbie wʋ baŋasɛ naŋ sɛ wʋ a gie ba na. Ama ɩŋ kpa a. 38 N nyii, Ɩsʋɔ aja lɩsɛ wʋ asa lɩɩ amɩɛ dɩɛ janɛ dʋɔ na gaa yɩɛ dɩtakpaŋ. 39 Maa tawɩ amɩɛ sɛ ɩɩ ti na maŋ ŋ ga tala saŋa gaa ɩ tawɩ sɛ, <Kusee n nyina wʋŋ wʋ a kɔŋ Kpaŋjuo yɩrɩɛ naŋ na.>✝23:39 Num 118:26.>>