1 Na Sɔɔlʋ wɩɛ dɩmaŋ sɛ wʋ kpa gʋ ba n kʋ Sitifiŋ.

Dɩmʋŋ wɩɩ gana ba nyala lɩɛdɩra dikpeŋ gaa ga wɩɛ Yerusalem na fɔɩ sɛ ba kpiniŋ puseŋ jʋʋ Yudiya na Samariya tibi dʋɔ sɛ dɩkaka kpirida baa nyiŋeŋ.

2 Sɛ bakpa barɛ baa baa se Ɩsʋɔ na wuu Sitifiŋ sɛ ba wii na doŋ fa ɩ. 3 Ama Sɔɔlʋ fara wʋ a nyala lɩɛdɩra dikpeŋ gaa yela wʋ dɔŋ waasɛ dʋɔ wʋ a fɔŋɩ lɩɛdɩra baala na ala wʋ a tɔ ba danɛ.

4 Lɩɛdɩra baa ba puseŋ na, tawɩ Ɩsʋɔ wɩɛ abama gapɩlɛkʋma gaa ba ju na. 5 Sɛ Filipo ju Samariya dɩɛ janɛ garɛ naŋ ga tawɩ Kirisito* wʋsɛ dʋɔ wɩɛ dɩmaŋ. 6 Gʋ jama baa nyii Filipo dʋɔ, sɛ ba na adaŋgana daasɛ ŋii wʋ yɩɛ na, ba kpiniŋ ba kaŋ dɩla baa nyii ŋii wʋ tawɩ na. 7 Sɛ feliŋ sʋbʋ kuusi na doŋ lɩɩ bakpa fɔɩ tɩba sɛ buobi aba na baa ba jaɩ-jaɩ na fɔɩ yu lʋm chʋɔ. 8 Dɩmʋŋ dʋɔ asadi fɔɩ kɔŋ dɩɛ janɛ gaa naŋ.

9 Baalɛ wʋrʋ wʋŋ baa yagɛ ɩ sɛ Simoŋ wɩɛ Samariya dɩɛ naŋ. Aja yɩɛ takɩɛ saŋa garɛ mɩnaŋ, wʋ mʋ wʋ majigi yɩɛ adaŋgana dɩɛ janɛ gaa naŋ mʋ yɩɛ Samariyatina baa kpiniŋ mamachi. Wʋ a jiŋna wʋ wʋsɛ adugbe sɛ wʋ yɩɛ wʋkpa wʋjanɛ bɛ, 10 sɛ bakpa kpari na baa ba tana charɛ na kpiniŋ kaŋ dɩla nyii wʋ jaŋ. Sɛ ba tawɩ sɛ, <<Baalɛ wina n nyina Ɩsʋɔ doŋ gaa baa yagɛ sɛ Doŋ Gajanɛ gaa.>> 11 Ba kpaŋ ɩ akala takɩɛ wʋ mʋ wʋ majigi yɩɛ ba mamachi taŋgɩlɛ. 12 Ama gʋ ba lɩɛ Ɩsʋɔ Wɩɛ Abama ŋii Filipo tawɩ lɩɩna Ɩsʋɔ juori gaa dʋɔ na Yesu Kirisito yɩrɛ gaa di na, wʋ sɔ baala na ala. 13 Simoŋ tɩŋtɩŋ lɩɛ di sɛ wʋ sɔ ɩ. Sɛ wʋ kpaŋ Filipo ju gapɩlɛkʋma sɛ daasɛ na adaŋgana ajanɩɛ ŋii wʋ na na, yɩɛ ɩ doba.

14 Gʋ kpirida baa ba wɩɛ Yerusalem cha nyii gʋ Samariyatina lɩɛ Ɩsʋɔ wɩɛ di na, ba kpiri Petero na Yohane ba jaŋ. 15 Gʋ ba tala dɩmaŋ na, ba jɔ dɩga fa ba na baa yu Ɩsʋɔ Feliŋ ŋii. 16 Wʋ sɔ ba Kpaŋjuo Yesu yɩrɛ naŋ, akala takɩɛ Ɩsʋɔ Feliŋ ŋii n kɔŋ ta ba wʋrʋ dʋɔ ɔ. 17 Dɩmaŋ sɛ Petero na Yohane mʋ ba pamɩɛ jaga ba dʋɔ sɛ ba yu Ɩsʋɔ Feliŋ ŋii.

18 Gʋ Simoŋ na gʋ kpirida baa mʋ ba pamɩɛ jaga ba dʋɔ sɛ ba yu Ɩsʋɔ Feliŋ ŋii na, wʋ fa ba aterembie 19 sɛ wʋ tawɩ ba sɛ, <<N fa maŋ gba doŋ ŋina ŋarɛ ganaŋkʋ wʋkʋma wʋŋ ma mʋ ma pam jaga wʋ dʋɔ na, a yu Ɩsʋɔ Feliŋ ŋii.>>

20 Sɛ Petero lɩsɛ ɩ nʋɔ sɛ, <<Nyaŋ na nya aterembie kpiniŋ n warɩɛ. Akala takɩɛ nya fa nfɩɛrɛ sɛ nyaa dɩlɛ mʋ aterembie lɩɛ Ɩsʋɔ gafaasa gaa! 21 Nya n kpi daa dʋɔ yaa daa na nyaŋ dɩ ɩɩ kpara dɩtʋm gana naŋ ŋ, akala takɩɛ n digela n chirigi Ɩsʋɔ asanaŋ ŋ. 22 Biliŋi lɩɩ dɩmʋŋ dɩsʋbʋ jawʋ naŋ na nyaa jɔ dɩga fa Ɩsʋɔ. Akʋtɔfɩɛ wʋ a mʋ dɩmʋŋ nfɩɛrɛ ŋina ŋii nya fa n digela naŋ na chɩɛ nyaŋ. 23 Akala takɩɛ ma na gʋ dɩsɛchɩbɛ su n tɩba sɛ dɩsʋbʋ di n dʋɔ.>>

24 Dɩmaŋ sɛ Simoŋ lɩsɛ ɩ nʋɔ sɛ, <<Jɔ dɩga fa Kpaŋjuo wʋŋ fa maŋ ganaŋkʋ wɩɛ ŋii nya tawɩ na, ŋarɛ n baa kɔŋ ma dʋɔ.>>

25 Gʋ Petero na Yohane di Yesu wɩɛ ŋii dʋɔ seriya, sɛ ba tawɩ Kpaŋjuo wɩɛ ŋii fa ba na, ba bɔrɛ ju Yerusalem yela baa tawɩ wɩɛ abama ŋii Samariyatina dɩɛsɛ bisi fɔɩ naŋ.

26 Sɛ dɩtɩɛna Ɩsʋɔ gabʋɔ tawɩ Filipo sɛ, <<Kʋlʋ ju gbɩɛ gaa gaa ju tie na dʋɔ. Dɩmʋŋ gbɩɛ gaa ga lɩɩ Yerusalem gaa ju Gasa dɩɛ naŋ. Dɩtɩɛna ba aa ti pala na gbɩɛ gana a.>> 27 Dɩmʋŋ dʋɔ Filipo fara wʋ a ju, gʋ wʋ dɔŋ gbɩɛ dʋɔ na, wʋ jaŋina Itiyopiya wʋkpa wʋrʋ wʋŋ ba lɩsɛ wʋ julubie, wʋ yɩɛ bɩnɛ wʋkpari bɛ sɛ wʋ a kɩɛ Kandaki, wʋŋ wʋ yɩɛ Itiyopiya ala Juo aterembie dʋɔ. Baalɛ wina cha ju Yerusalem ga tʋm Ɩsʋɔ, 28 gʋ wʋ chaɩ lɔrɛ gaa beŋi a fɔŋɩ ga naŋ wʋ dɔŋ gbɩɛ dʋɔ wʋ a ju dɩɛ na yela wʋ a karaŋ Ɩsʋɔ ɔja Yisaya tanɛ gaa. 29 Sɛ Ɩsʋɔ Feliŋ tawɩ Filipo sɛ, <<Ju ga sɩŋ tirina lɔrɛ gaa beŋi a fɔŋɩ ga na.>>

30 Dɩmaŋ sɛ Filipo se ju lɔrɛ gaa beŋi a fɔŋɩ ga na jaŋ, sɛ wʋ nyii gʋ baalɛ wʋŋ a karaŋ Ɩsʋɔ ɔja Yisaya tanɛ gaa. Sɛ Filipo tasɛ ɩ sɛ, <<Nyaa nyii ŋii nyaa karaŋ na tie?>>

31 Sɛ baalɛ wʋŋ lɩsɛ ɩ nʋɔ sɛ, <<Sɩnɛ sɛ maa dɩlɛ nyii tie? Amʋɔ wʋrʋ lɩsɛ ŋɩ tie fa maŋ.>> Dɩmʋŋ dʋɔ wʋ yagɛ Filipo sɛ wʋ n jiŋ gaa cha wʋ jaŋ.

32 Itiyopiya wʋkpa wʋŋ cha wʋ a karaŋ dɩmʋŋ wɩɛ lɩɩ Ɩsʋɔ Sabɩɛwɩɛ ŋii naŋ sɛ,

<<Ba mʋ ɩ laŋ takɩɛ fie wʋŋ baa ga kʋ ɩ na,

sɛ wʋ kɩɛna bɛ takɩɛ fiebu wʋŋ wʋ n tawɩ bʋrʋ gʋ baa kuli wʋ fʋŋda,

dɩmʋŋ dʋɔ wʋ n fulu wʋ nʋɔ ɔ.

33 Ba disi ɩ asaju, sɛ ba n di wʋ wɩɛ ŋɩ gbɩɛ dʋɔ ɔ.

Mmʋɔ aaŋ dɩlɛ tawɩ wʋ gananabisi wʋsɛ dʋɔ wɩɛ?

Akala takɩɛ ba kara wʋŋ nkpa dʋɔ tibi dʋɔ bɛ.>>✝

34 Sɛ Itiyopiya wʋkpa wʋŋ tasɛ Filipo sɛ, <<Maa sʋlʋ nyaŋ bɛ tawɩ maŋ, Mmʋɔ wʋsɛ dʋɔ wɩɛ sɛ Ɩsʋɔ ɔja wʋŋ a tawɩ, wʋ tɩŋtɩŋ yaa wʋrʋ?>> 35 Dɩmaŋ sɛ Filipo sɩŋ dɩmʋŋ Ɩsʋɔ Sabɩɛwɩɛ ŋii wʋ karaŋ na dʋɔ sɛ wʋ tawɩ Yesu wʋsɛ dʋɔ wɩɛ abama ŋii fa ɩ.

36 Gʋ ba dɔŋ na gbɩɛ baa ju na, ba ga mɩɛna lɩŋ ŋarɛ sɛ Itiyopiya wʋkpa wʋŋ tasɛ ɩ sɛ, <<Kɩɛ lɩŋ mɩnaŋ, be n gara maŋ gbɩɛ sɛ ma n baa sɔ? 37 Sɛ Filipo tawɩ sɛ nya lɩɛ di n digela kpiniŋ naŋ na, nyaa dɩlɛ sɔ. Sɛ Itiyopiya wʋkpa wʋŋ lɩsɛ nʋɔ sɛ ma lɩɛ di takɩɛ Yesu Kirisito n nyina Ɩsʋɔ Bu wʋŋ.>>* 38 Sɛ wʋ dʋ ba sɛ ba n yela na lɔrɛ gaa beŋi a fɔŋɩ ga na a dʋɔsɩŋ. Sɛ Filipo na Itiyopiya wʋkpa wʋŋ tibi ju lɩŋ ŋii naŋ, sɛ Filipo sɔ ɩ. 39 Gʋ ba lɩɩ lɩŋ ŋii naŋ na, Ɩsʋɔ Feliŋ ŋii mʋ Filipo laŋ gabʋanaŋ, sɛ Itiyopiya wʋkpa wʋŋ n ti na ɩ ɩ, ama wʋ ju dʋɔ mʋ asadi wʋ a ju wʋ gbɩɛ. 40 Ama Filipo ga lɩɩ Asotusi dɩɛ naŋ, sɛ wʋ pala dɩɛsɛ-dɩɛsɛ kpiniŋ dʋɔ wʋ a tawɩ wɩɛ abama ŋii dɩɛsɛ kpiniŋ dʋɔ hali wʋ ga tala Kayisariya tibi dʋɔ.