1 Sɛ Ɩsʋɔ seina, Ɩsʋɔ tʋm danɛ kɩɛrɛ bɩnɛ, na Sadukitina kɔŋ Petero na Yohane jaŋ gʋ ba saŋ baa tawɩ baa fa bakpa baa na. 2 Sɛ ba kara biŋbira fɔɩ akala takɩɛ kpirida baa a kalaa bakpa baa yela baa tawɩ sɛ gʋ Yesu feŋ lɩɩ sɩŋ naŋ dʋɔ, atatina gba aja feŋ kɔŋ nkpa naŋ. 3 Sɛ ba chaŋ Petero na Yohane gʋ ŋɩ yɩɛ bʋyanɔ na dʋɔ ba mʋ ba ga tɔ danɛ hali tɩɛna. 4 Ama ba fɔɩ baa ba nyii wɩɛ ŋii na lɩɛ di, sɛ baala baa nʋɔ yɩɛ bɔlɩŋ takɩɛ bakpa kɔrʋɔsɛ sɩ nʋŋ.

5 Gʋ tɩɛna na, Yudatina asanaŋtina, dɩɛ bɩnɩɛ na Mosesi mbara bakalaasa baa sɩla Yerusalem. 6 Baa ba sɩla dɩmaŋ na n nyina Ɩsʋɔ sei bɩnɩɛ naŋ bɩnɛ Anasi, Kayifasi, Yohane, Alesanda na baala barɛ baa ba yɩɛ sei bɩnɩɛ naŋ bɩnɛ wʋŋ lʋŋtina. 7 Sɛ ba mʋ Petero na Yohane kɔŋ gaa sɩŋ ba asanaŋ sɛ ba fara baa tasɛ ba sɛ, <<Yikuo gamʋɔ yaa Yɩrɛ gamʋɔ naŋ sɛ ɩɩ yɩɛ ŋina?>>

8 Sɛ Petero wʋŋ Ɩsʋɔ Feliŋ su wʋ tɩba na tawɩ ba sɛ, <<Yudatina asanaŋtina na dɩɛ bɩnɩɛ! 9 Sɛ dɩbam gaa dɩ yɩɛ fa buobi wina dʋɔ sɛ ɩ yagɛ daa jaŋ ɩɩ tasɛ daa ganaŋkʋ wʋ yu lʋm chʋɔ na, 10 dɩmʋŋ bɩrɛ amɩɛ na Isiralitina kpiniŋ n jiŋ ŋina takɩɛ ŋɩ yɩɛ Yesu Kirisito Nasarati wʋkpa wʋŋ ɩ jɔ ɩ daŋ gasagasa dʋɔ, sɛ Ɩsʋɔ feŋsi ɩ lɩɩ sɩŋ naŋ na yɩrɛ naŋ sɛ baalɛ wina wʋŋ wʋ sɩmɩɛɩ amɩɛ asanaŋ n na yu lʋm chʋɔ.>> 11 Yesu wina n nyina

<<Bʋɩ gaa amɩɛ danɛ mara pɩɛ ga na,

gaa aaŋ ja gaa chaŋ danɛ gaa dɩkɔŋ naŋ na doŋ.>>✝

12 Mɔlɔgɩ taŋ wʋrʋ tɩba a, akala takɩɛ yɩrɛ garɛ taŋ tibi gana dʋɔ sɛ ba mʋ ga fa bakpa sɛ ba n pala na ga dʋɔ na baa mɔlɔgɩ daa a.

13 Gʋ ba na gʋ Petero na Yohane yu digela sɛ ba jiŋ gʋ ba n kpalɩɛna tanɛ ama ba yɩɛ bakpa bɛ dɩmʋŋ na, dɩ yɩɛ ba doba. Sɛ ba jiŋ gʋ baala bana cha kpaŋ Yesu. 14 Ama gʋ ba na baalɛ wʋŋ ba chɔ ɩ sɩmɩɛɩ ba jaŋ na, ba n dɩlɛ tawɩ bʋrʋ o. 15 Dɩmʋŋ dʋɔ ba dʋ sɛ ba n lɩɩ wɩɛ diri danɛ gaa naŋ sɛ ba tawɩ ba nyiŋeŋ-nyiŋeŋ. 16 Sɛ ba tasɛ dɔŋa sɛ, <<Sɩnɛ sɛ dɩɩ yɩɛ dɩmʋŋ baala bana? Wʋkʋma wʋŋ wʋ wɩɛ Yerusalem jiŋ gʋ ba yɩɛ adaŋgana ŋii ŋɩ goriei sɛ dɩ ɩɩ dɩlɛ pɩɛ ŋɛ ɛ. 17 Ama ganaŋkʋ wɩɛ ŋii ba aa yalagi bakpa naŋ na dʋɔ, dɩ daga na dɩɩ jɔ bakpa bana nyienaŋ sɛ ba n baa ti tawɩ dɩmʋŋ yɩrɛ gana wɩɛ fa wʋrʋ.>>

18 Dɩmaŋ sɛ ba ti bɔrɛ yagɛ ba dʋ ba sɛ ba n baa ti tawɩ yaa kalaa Yesu yɩrɛ naŋ kpiniŋ-kpiniŋ. 19 Ama Petero na Yohane lɩsɛ ba nʋɔ sɛ, <<Amɩɛ tɩŋtɩŋ n fa nfɩɛrɛ ŋina dʋɔ takɩɛ ŋɩ wɩɛ dieli Ɩsʋɔ asanaŋ sɛ dɩ n nyii amɩɛ jaŋ yaa Ɩsʋɔ jaŋ? 20 Akala takɩɛ dɩ ɩɩ dɩlɛ yela bʋrʋ gaa dɩ na sɛ dɩ nyii dʋɔ wɩɛ dɩtawɩ ɩ.>>

21 Gʋ ba ŋaŋsɛ ba fɔɩ wʋrʋgbɩɛ na, ba yela ba sɛ ba lam. Ba n dɩlɛ fa nfɩɛrɛ yu gbɩɛ gaa baa sɩŋ dʋɔ fɔŋɩ ba dɩlɛ ɛ, akala takɩɛ bakpa baa kpiniŋ a kalɩɛ Ɩsʋɔ ŋii ŋɩ tibi na dʋɔ. 22 Baalɛ wʋŋ ba pala na adaŋgana gbɩɛ dʋɔ chɔ ɩ na kii bɩŋsɛ ŋɩla (40).

23 Gʋ ba yela Petero na Yohane na, ba bɔrɛ ju ba dɔŋa lɩɛdɩra baa jaŋ ga tawɩ ba bʋrʋkʋma gaa Ɩsʋɔ sei bɩnɩɛ na dɩɛ bɩnɩɛ tawɩ ba na kpiniŋ. 24 Gʋ ba nyii ŋina na, ba mʋ nʋɔ garɛ jɔ dɩga fa Ɩsʋɔ tawɩ sɛ, <<Kpaŋjuo Ɩsʋɔ, nyaŋ n lɔ Ɩsʋɔ adugbe na tie, ɔpʋ na ŋɩ tɩba bʋrʋkʋma. 25 Nya mʋna n Feliŋ ŋii dʋɔ yela sɛ daa duluŋ Dawidi, n tʋmɩrɛ gʋ wʋ tawɩ sɛ,

<<Be n yɩɛ sɛ atawɩ yɩrɩ a kara biŋbira?

Be n yɩɛ sɛ bakpa gbɩɛsɛ nfɩɛrɛ yɩɛ kpakpuo?

26 Tibi dʋɔ juoneŋ kʋlʋ sɩŋ kʋla ba wʋsɛ,

sɛ dɩɛ asanaŋtina sɩla bʋga

kʋlʋ sɩŋ Ɩsʋɔ

na wʋ Lɩsɛrɛ Wʋŋ dʋɔ.>>✝

27 Gasiŋteŋ, Hɛrɔdɩ na Pontiyosi Pilato na baa ba ba yɩɛ Yudatina na Isiralitina baa ba wɩɛ dɩɛ janɛ gana naŋ sɩla sɛ ba kʋlʋ sɩŋ Yesu n tʋmɩrɛ dɩchɩrɩchɩrɩ wʋŋ nya lɩsɛ na dʋɔ. 28 Sɛ ba yɩɛ bʋrʋ gaa ga pala na n doŋ na n jawʋ naŋ ŋii nya cha fa ŋɩ dʋɔ nfɩɛrɛ takɩɛ ŋii tibi na. 29 Dɩtɩɛna Ɩsʋɔ, kɩɛ ba ŋaŋsɛ dʋɔ na nyaa yela n tʋmɩrɛ a dɩlɛ tawɩ n wɩɛ digela doŋ naŋ. 30 Tɩɛŋɩ n pam na nyaa pala na Yesu n tʋmɩrɛ dɩchɩrɩchɩrɩ wʋŋ yɩrɛ naŋ chɔ bakpa na nyaa yɩɛ adaŋgana daasɛ na mamachi wɩɛ.

31 Gʋ ba jɔ dɩga taŋ na, diele gaa ba jaŋi na jigisi. Sɛ Ɩsʋɔ Feliŋ su ba kpiniŋ sɛ ba mʋ digela doŋ tawɩ Ɩsʋɔ wɩɛ.

32 Lɩɛdɩra baa kpiniŋ yɩɛ bʋdʋŋdʋlʋŋ bɛ digela na nfɩɛrɛ naŋ. Ba wʋrʋ ba aa tawɩ sɛ wʋ tɩŋtɩŋ wʋ akpaŋta yɩɛ wʋ nyiŋeŋ wʋ teri i, ama baa kpara bʋrʋkʋma gaa ba wɩɛna. 33 Sɛ Kpirida baa mʋ doŋ ju dʋɔ di Kpaŋjuo Yesu feŋ lɩɩ sɩŋ naŋ dʋɔ seriya, sɛ Ɩsʋɔ wɩɩ wɩɛ ba kpiniŋ dʋɔ. 34 Wʋrʋ taŋ lɩɛdɩra baa tɩba sɛ bʋrʋ darɛ tiri i. Akala takɩɛ baa ba wɩɛna tibi yaa waasɛ na saŋa mʋ ju saŋa na baa yaa ŋɛ na baa mʋ aterembie ŋii kɔna 35 kpirida baa na baa kpara fa wʋkʋma ganaŋkʋ ŋɩ tiri ɩ na.

36 Sɛ Yosefu, Lewi wʋkpa wʋŋ wʋ lɩɩ Kipurosi, wʋŋ kpirida baa a yagɛ ɩ sɛ Banabasi [ga tie a kalaa sɛ Tawɩ dʋ wʋkpa] na, 37 yaa wʋ tibi gaa wʋ wɩɛna na, sɛ wʋ mʋ aterembie ŋii kɔna kpirida baa.