Dɩtʋm 21

Pɔɔlʋ ju Yerusalem

1 Gʋ dɩ kali lɩɛdɩra dikpeŋ gaa bɩnɩɛ baa taŋ na, dɩ mʋna ɔpʋ dʋɔ ju Kosi dɩɛ naŋ. Gʋ tɩɛna na, dɩ ju Rodosi dɩɛ naŋ, sɛ dɩ lɩɩ dɩmaŋ ju Patara dɩɛ naŋ. 2 Sɛ dɩ na pantuu janɛ garɛ gaa tɩɛsɛ gaa ju Fonisiya. Sɛ dɩ jʋʋ ga tɩba ju. 3 Gʋ dɩ tala diele gaa daa asa kɩɛna Kipurosi dɩɛ na, sɛ dɩ mʋna Kipurosi dɩɛ gaa tie ju Siriya. Sɛ dɩ dʋɔsɩŋ Tirosi dɩɛ naŋ, dɩmaŋ sɛ ba lɩsɛ gasʋlasɛ lɩɩ pantuu janɛ gaa naŋ. 4 Dɩ na kpalɛnara baa wɩɛ dɩmaŋ sɛ dɩ cha ba jaŋ gɩyɩɛnɩŋ lɩkarɛ. Sɛ Ɩsʋɔ Feliŋ pala na ba dʋɔ tawɩ Pɔɔlʋ sɛ, wʋ n baa ju Yerusalem. 5 Ama gʋ daa saŋa talɛ na, dɩ lɩɩ dɩmaŋ sɛ dɩ ju dʋɔ. Kpalɛnara baa kpiniŋ na ba ala na ba bie kpaŋ daa lɩɩ dɩɛ janɛ gaa naŋ gaa tala ɔpʋ gaa nʋɔ, dɩmaŋ sɛ dɩ luuŋ daa dʋna dʋɔ jɔ dɩga. 6 Gʋ dɩ kali dɔŋa taŋ na, sɛ dɩ jʋʋ pantuu janɛ gaa naŋ sɛ ba bɔrɛ ju dɩɛ.

7 Dɩ ju dʋɔ pala lɩŋ dʋɔ lɩɩ Tirosi sɛ dɩ dʋɔsɩŋ Potolemayi, dɩmaŋ sɛ dɩ yɩlɩ lɩɛdɩra baa ba wɩɛ dɩmaŋ na, sɛ dɩ cha ba jaŋ wiita bi. 8 Gʋ tɩɛna na, dɩ lɩɩ dɩmaŋ ju Kayisariya ga cha Filipo Ɩsʋɔ wɩɛ tawɩrɛ wʋŋ waa dʋɔ. Sɛ wʋ ti wʋ yɩɛ chɔnara lɩkarɛ baa tɩba wʋrʋ. 9 Wʋ wɩɛna bie ala jaŋ ba nara baa ba n saa ta a sɛ baa gbalɛ.

10 Gʋ dɩ cha dɩmaŋ wɩɛ akalasa ŋarɛ wʋrʋgbɩɛ na, Ɩsʋɔ ɔja wʋrʋ wʋŋ baa yagɛ ɩ sɛ Agabusi lɩɩ Yudiya kɔŋ dɩmaŋ. 11 Gʋ wʋ kɔŋ daa jaŋ na, sɛ wʋ mʋ Pɔɔlʋ tɩŋa naŋ ganya pɔgʋ wʋ tɩŋtɩŋ wʋ pamɩɛ na wʋ nafara tawɩ sɛ, <<Ɩsʋɔ Feliŋ tawɩ sɛ n na sɛ Yudatina baa ba wɩɛ Yerusalem na aja pɔgʋ dɩmʋŋ tɩŋa naŋ ganya gana ga kpaŋjuo, na baa mʋ ɩ ju ga fa baa ba ba yɩɛ Yudatina.>>

12 Gʋ dɩ nyii wɩɛ ŋina na, daa na bakpa baa ba wɩɛ dɩmaŋ sʋlʋ Pɔɔlʋ sɛ wʋ n baa ju Yerusalem. 13 Dɩmaŋ sɛ Pɔɔlʋ lɩsɛ nʋɔ sɛ, <<Be n yɩɛ sɛ ɩɩ wii sɛ ɩ yela sɛ maa bɔtaa dɩmʋŋ? Maŋ bɩrɛ ma kʋla ma wʋsɛ fa, naa pɔgʋ ŋii baa pɔga maŋ na nyiŋeŋ ŋ, ama Kpaŋjuo Yesu yɩrɛ gaa dʋɔ, maa sɩŋ Yerusalem.>> 14 Gʋ dɩ n dɩlɛ tawɩ na baa lɩɛ wɩɛ ŋii dɩ tawɩ ba di na, dɩ yela ɩ sɛ dɩ tawɩ sɛ, <<Kpaŋjuo jawʋ bɛ n kɔŋ tɩba.>>

15 Ŋina wʋrʋgbɩɛ na, sɛ dɩ kʋla daa wʋsɛ ju Yerusalem. 16 Kpalɛnara baa ba lɩɩ Kayisariya na, barɛ ti daa gbɩɛ kɔŋ Manasoŋ wʋŋ wʋ lɩɩ Kipurosi na waa dʋɔ, diele gaa dɩɩ ju ga cha. Wʋ yɩɛ kpalɛnara baa ba chɩŋkpɩɛ lɩɛ di na tɩba wʋrʋ bɛ.

Pɔɔlʋ ju gabʋɔ Yakubu dʋɔ

17 Gʋ dɩ tala Yerusalem na, lɩɛdɩra baa mʋ asadi lɩɛ daa. 18 Gʋ tɩɛna na, Pɔɔlʋ na daa baa dɩkaka na ju ga na Jamesi yela lɩɛdɩra dikpeŋ gaa bɩnɩɛ baa kpiniŋ wɩɛ dɩmaŋ. 19 Gʋ Pɔɔlʋ yɩlɩ ba na, sɛ wʋ kalaa tɩba na dieli bʋrʋ gaa Ɩsʋɔ pala na wʋ dɩtʋm dʋɔ yɩɛ baa ba ba yɩɛ Yudatina na tɩba fa ba.

20 Gʋ ba nyii dɩmʋŋ wɩɛ ŋina na, ba kalɩɛ Ɩsʋɔ. Dɩmaŋ sɛ ba tawɩ Pɔɔlʋ sɛ, <<Daa dʋɔ lɩɛdɩrɛ, nya na ganaŋkʋ Yudatina kɔrʋɔsɛ-kɔrʋɔsɛ lɩɛ di, na ganaŋkʋ ba kpiniŋ ba mʋ jawʋ gaa ga nʋɔ wɩɛ doŋ kpaŋ Mosesi mbara ŋii dʋɔ. 21 Ba tawɩ ba sɛ nyaa kalaa Yudatina kpiniŋ baa ba chaɩ baa ba ba yɩɛ Yudatina na tɩba, sɛ ba n yela Mosesi mbara ŋii dʋɔ di yela nyaa tawɩ ba sɛ ba n baa karɩɛ ba bie baŋlɛ yaa ba n baa kpaŋ daa ayɩɛsa dʋɔ. 22 Dɩ n yɩɛ sɩnɛ baa nyii gʋ nya kɔnɛ. Dɩmʋŋ dʋɔ be sɛ dɩɩ yɩɛ? 23 Dɩmʋŋ dʋɔ yɩɛ ŋii dɩ tawɩ nyaŋ na. Baala banara barɛ wɩɛ daa jaŋ baa ba ka ntaŋ na. 24 Mʋ baala bana na nyaa kpi ba dʋɔ na ɩ ju ga yɩɛ iniesi saŋ lɩsɛ, na nyaa tɔ ba nyie dʋɔ kɩmɩɛ na baa fʋŋ ba nyie. Na ba wʋkʋma a jiŋ gʋ wɩɛ ŋii ba tawɩ lɩɩ n dʋɔ na ba yɩɛ gasiŋteŋ ŋ, ama nyaŋ n tɩŋtɩŋ nyaa kpaŋ Mosesi mbara ŋii dʋɔ. 25 Lɩɩna baa ba ba yɩɛ Yudatina lɩɛdɩra baa bɩrɛ, dɩ fɩla mʋ nfɩɛrɛ sɛ dɩ sabɩɛ tanɛ fa ba sɛ ba n baa di adiya ŋii ba mʋ diesi gadiesa fa panɩŋ na asima, ba n baa tawʋ namɩɛ baa ba ŋarɛ ba kʋ, na baa lɩsɛ ba wʋsɛ lɩɩ danaŋburidi naŋ.>>

26 Gʋ tɩɛna na, Pɔɔlʋ mʋ baala baa sɛ wʋ na ba ju ga yɩɛ iniesi saŋ lɩsɛ. Sɛ wʋ ju Ɩsʋɔ tʋm danɛ naŋ ga si gɩyɩɛnɩŋ ŋii iniesi saŋ lɩsɛ ŋii aja taŋ na, na fa ŋii baa fa ba wʋkʋma na.

Ba chaŋ Pɔɔlʋ Ɩsʋɔ tʋm danɛ naŋ

27 Gʋ gɩyɩɛnɩŋ lɩkarɛ ŋii kakaa chonii na ŋii taŋ na, Yudatina barɛ baa ba lɩɩ Asiya tibi dʋɔ na Pɔɔlʋ Ɩsʋɔ tʋm danɛ gaa naŋ, sɛ ba fuosi dʋ jama baa kpiniŋ sɛ ba chaŋ ɩ 28 yela baa kuusi sɛ, <<Isiralitina n chɔna daa! Wina n nyina baalɛ wʋŋ wʋ a kalaa bakpa gapɩlɛkʋma wʋ a chicha daa bakpa, daa mbara na Ɩsʋɔ tʋm danɛ gana. Sɛ ŋii ŋɩ ti kpi na n nyina sɛ wʋ mʋ Girikitina kɔŋ daa Ɩsʋɔ tʋm danɛ gaa naŋ gaa yɩɛ Ɩsʋɔ tʋm danɛ chɩrɩchɩrɩ gana iniesi.>> 29 [Ba chɩŋkpɩɛ na Efiso wʋkpa Tirofimo na Pɔɔlʋ dɩɛ janɛ gaa naŋ, sɛ ba fa nfɩɛrɛ sɛ Pɔɔlʋ mʋ ɩ jʋʋ Ɩsʋɔ tʋm danɛ gaa naŋ.]

30 Sɛ siŋii kɔŋ dɩɛ janɛ gaa naŋ, sɛ bakpa baa se lɩɩ dɩɛ gaa gapɩlɛkʋma kɔŋ dɩmaŋ. Ba chaŋ Pɔɔlʋ sɛ ba fɔŋɩ ɩ lɩɩ Ɩsʋɔ tʋm danɛ gaa naŋ, gabʋanaŋ sɛ ba tɔ bʋɔlɩɛ ŋii kpiniŋ. 31 Gʋ baa ja baa kʋ ɩ na, wɩɛ ŋii ga mɩɛna Roma yuora bɩnɛ wʋŋ takɩɛ siŋii kʋlʋ Yerusalem dɩɛ kpiniŋ naŋ. 32 Gabʋanaŋ sɛ wʋ lɩsɛ yuora na asanaŋtina barɛ sɛ ba se ju jama baa jaŋ. Gʋ jama baa na yuora bɩnɛ wʋŋ na wʋ yuora na, sɛ ba yela Pɔɔlʋ tugu.

33 Sɛ yuora bɩnɛ wʋŋ kɔŋ gaa chaŋ Pɔɔlʋ sɛ wʋ dʋ sɛ ba mʋ agbaraŋgbaraŋ ala pɔgʋ ɩ. Dɩmaŋ sɛ wʋ tasɛ wʋ tɛ wʋŋ wʋ yɩɛ, na ŋii wʋ yɩɛ. 34 Sɛ jama baa tɩba barɛ kuusi tawɩ wɩɛ ŋarɛ, sɛ barɛ dʋɔ a kuusi baa tawɩ wɩɛ abaŋbaŋ. Lɩɩna siŋii ŋii dʋɔ, yuora bɩnɛ wʋŋ n dɩlɛ yu wɩɛ ŋii naŋ gasiŋteŋ ŋ, sɛ wʋ dʋ sɛ ba n mʋ Pɔɔlʋ ju yuora dɩchatɩŋ. 35 Gʋ Pɔɔlʋ ga tala diele gaa baa jiŋ baa jʋʋ yuora dɩchatɩŋ gaa naŋ na, gʋ jama baa chɩdɩsɛ na baa laragi ɩ dʋɔ yuora baa jiŋna Pɔɔlʋ adugbe. 36 Sɛ jama baa ba kpamɩna na ju dʋɔ baa kuusi sɛ, <<N kʋ ɩ.>>

Pɔɔlʋ tawɩ gara wʋ wʋsɛ

37 Gʋ yuora baa aja baa mʋ Pɔɔlʋ ju ba dɩchatɩŋ na, wʋ tasɛ yuora bɩnɛ wʋŋ sɛ, <<Maa dɩlɛ tawɩ nyaŋ wɩɛ ŋarɛ?>>

Sɛ wʋ tasɛ Pɔɔlʋ sɛ, <<Nyaa nyii Giriki dɩtawɩ?>>

38 Sɛ wʋ ti tasɛ ɩ sɛ, <<Naa nyaŋ n nyina Ijipiti wʋkpa wʋŋ n cha kʋlʋ sɩŋ Romatina dʋɔ, sɛ nya pala gatagapʋtina kɔrʋɔsɛ sɩ nara asanaŋ ju ifuli dʋɔ saŋa gaa ga lam naa?>>

39 Sɛ Pɔɔlʋ lɩsɛ nʋɔ sɛ, <<Ma yɩɛ Yuda wʋkpa bɛ sɛ ma lɩɩ Taasusi gaa ga wɩɛ Kilikiya tibi dʋɔ. Ma yɩɛ Taasusi dɩɛ janɛ kpari gaa dɩɛsɛ bu bɛ. Maa sʋlʋ nyaŋ, yela na maa tawɩ bakpa baa jaŋ.>>

40 Gʋ yuora bɩnɛ wʋŋ fa ɩ gbɩɛ na, Pɔɔlʋ kʋlʋ sɩŋ diele gaa baa jiŋ baa jʋʋ yuora baa dɩchatɩŋ, sɛ wʋ ŋɩrɛ jama baa pam sɛ ba n cha kuruŋ. Gʋ ba kpiniŋ ba cha kuruŋ na, sɛ wʋ tawɩ ba jaŋ Aramiki*21:40 Ɩsʋɔ Sabɩɛwɩɛ ŋarɛ wɩɛna Hibiri dɩtawɩ. dɩtawɩ naŋ.