Dɩtʋm 11

Petero lɩsɛ bʋrʋkʋma gaa ga tibi na tie fa Yerusalem lɩɛdɩra dikpeŋ gaa

1 Sɛ kpirida baa na lɩɛdɩra baa ba wɩɛ Yudiya tibi dʋɔ kpiniŋ nyii gʋ baa ba ba yɩɛ Yudatina na gba lɩɛ Ɩsʋɔ wɩɛ dʋ na. 2 Dɩmʋŋ dʋɔ gʋ Petero bɔrɛ kɔŋ Yerusalem na, lɩɛdɩra karɩŋ baŋlɛ baa na ɩ di noro 3 sɛ ba tawɩ sɛ, <<Nya ju baa ba n kara ba baŋlɛ na waa dʋɔ sɛ nyaŋ na ba ɩ ga di.>>

4 Sɛ Petero fara wʋ a lɩsɛ bʋrʋkʋma gaa ga tibi na tie kʋrʋkʋrʋ wʋ a fa ba sɛ, 5 <<Ma wɩɛ Yopa dɩɛ janɛ gaa naŋ maa jɔ dɩga sɛ ma yu Ɩsʋɔ lɩsɛ kalaa. Ma na bʋrʋ garɛ gaa ga kɩɛna takɩɛ dukuru janɛ lɩɩ Ɩsʋɔ adugbe ga na ga nʋɔbɩsɩ anara gaa kɔŋ tibi, sɛ ga kɔŋ diele gaa ma wɩɛ na. 6 Gʋ ma kɩɛ ga tɩba na, ma na tibi dʋɔ namɩɛ baa ba wɩɛna nafara anara, kasɛ naŋ namɩɛ, namɩɛ baa baa kpii ba lorie dʋɔ, na jimbisi. 7 Dɩmaŋ sɛ ma nyii lofu garɛ gaa tawɩ maŋ sɛ Petero, kʋlʋ kʋ na nyaa tawʋ.>>

8 Sɛ wʋ lɩsɛ nʋɔ sɛ, <<Aye Kpaŋjuo, bʋrʋ gaa ga ba yɩɛ chɩrɩchɩrɩ yaa ga wɩɛna iniesi n jʋʋ ta ma nʋɔ ɔ.>>

9 Sɛ lofu gaa ti tawɩ lɩɩ Ɩsʋɔ adugbe bʋlatɛ sɛ, <<N baa ti yagɛ bʋrʋ gaa Ɩsʋɔ yɩɛ ga chɩrɩchɩrɩ sɛ ga wɩɛna iniesi.>> 10 Ŋina tibi gbɩɛta butoro sɛ ŋɩ kpiniŋ ŋɩ bɔrɛ ju Ɩsʋɔ adugbe.

11 Sɛ Petero ju dʋɔ tawɩ sɛ, <<Dɩmaŋ sɛ baala batoro baa ba kpiri ba lɩɩ Kayisariya ma jaŋ na, gaa dʋɔsɩŋ waa gaa ma wɩɛ ga dʋɔ na. 12 Sɛ Ɩsʋɔ Feliŋ tawɩ maŋ sɛ n baa mʋ wɩɛ ŋii kpii na maŋ na ba dɩɩ ju. Lɩɛdɩra lʋrʋ bana gba kpaŋ maŋ sɛ dɩ jʋʋ baalɛ wʋŋ waa dʋɔ. 13 Wʋ tawɩ daa ganaŋkʋ wʋ na Ɩsʋɔ gabʋɔ lɩsɛ wʋ wʋsɛ kalaa ɩ wʋ waa dʋɔ, sɛ wʋ tawɩ ɩ sɛ kpiri ju Yopa na baa yagɛ Simoŋ wʋŋ baa yagɛ ɩ sɛ Petero na. 14 Wʋ a kɔna nyaŋ wɩɛ ŋarɛ ŋii nyaŋ na n waa dʋɔtina kpiniŋ aja pala na yu mɔlɔgɩ.>>

15 Sɛ wʋ tawɩ sɛ, <<Gʋ ma fara maa tawɩ na, Ɩsʋɔ Feliŋ kɔŋ ba dʋɔ takɩɛ ganaŋkʋ wʋ chɩŋkpɩɛ kɔŋ daa dʋɔ na. 16 Dɩmaŋ sɛ ma nyiŋi wɩɛ ŋii Kpaŋjuo Yesu cha tawɩ sɛ Yohane mʋ lɩŋ bɛ sɔ, ama amɩɛ bɩrɛ, Ɩsʋɔ Feliŋ sɛ baa mʋ sɔ amɩɛ. 17 Dɩmʋŋ dʋɔ sɛ Ɩsʋɔ fa ba gafaasa gadʋŋdʋlʋŋ takɩɛ ganaŋkʋ wʋ fa daa baa dɩ lɩɛ Kpaŋjuo Yesu Kirisito di na, Mmʋɔ n nyina maŋ sɛ maa dɩlɛ gara Ɩsʋɔ gbɩɛ?>>

18 Gʋ baa nyii wɩɛ ŋina na, ba cha kuruŋ sɛ ba kalɩɛ Ɩsʋɔ tawɩ sɛ, <<Dɩmʋŋ bɩrɛ Ɩsʋɔ fa baa ba ba yɩɛ Yudatina na gba gbɩɛ sɛ ba n biliŋi lɩɩ dɩsʋbʋ naŋ na baa yu nkpa.>>

Lɩɛdɩra dikpeŋ gaa ga wɩɛ Antiyokiya

19 Dɩtɩɛna ganyala gaa ga kɔnɛ lɩɩna Sitifiŋ sɩŋ dʋɔ na yela sɛ lɩɛdɩra baa puseŋ ju taŋasɛ takɩɛ Fonisiya Kipurosi, Antiyokiya tibi dʋɔ yela baa tawɩ Yesu wʋsɛ dʋɔ wɩɛ baa fa Yudatina nyiŋeŋ. 20 Ama ba barɛ baa ba lɩɩ Kipurosi na Kireni ju Antiyokiya, sɛ ba fara baa tawɩ Kpaŋjuo Yesu wʋsɛ dʋɔ wɩɛ abama ŋii baa fa Girikitina gba. 21 Kpaŋjuo doŋ wɩɛ ba dʋɔ sɛ bakpa fɔɩ lɩɛ di sɛ ba biliŋi kɔŋ Kpaŋjuo jaŋ.

22 Gʋ Lɩɛdɩra dikpeŋ gaa ga wɩɛ Yerusalem nyii dɩmʋŋ wɩɛ ŋina na, sɛ ba kpiri Banabasi ju Antiyokiya dɩɛ naŋ. 23 Gʋ wʋ ga tala dɩmaŋ na, wʋ na gʋ Ɩsʋɔ wɩɩ wɩɛ ba dʋɔ, sɛ dɩ yɩɛ ɩ jʋŋ sɛ wʋ tawɩ dʋ ba kpiniŋ sɛ ba n ju dʋɔ mʋ ba agela kpiniŋ kpaŋ Kpaŋjuo gasiŋteŋ naŋ. 24 Gʋ Banabasi cha wʋ yɩɛ wʋkpa bam sɛ Ɩsʋɔ Feliŋ na lɩɛdi su wʋ tɩba na dʋɔ, bakpa fɔɩ lɩɛ Kpaŋjuo di.

25 Dɩmaŋ sɛ Banabasi ju Taasusi dɩɛ naŋ ga ja Sɔɔlʋ, 26 gʋ wʋ ga na ɩ na, wʋ mʋ ɩ kɔŋ Antiyokiya dɩɛ naŋ. Sɛ Banabasi na Sɔɔlʋ cha yela baa jaŋi lɩɛdɩra dikpeŋ gaa bɩriŋnʋɔ gaa kpiniŋ, sɛ ba kalaa bakpa fɔɩ. Antiyokiya dɩɛ naŋ sɛ ba chɩŋkpɩɛ yagɛ kpalɛnara baa sɛ Kirisitotina.

27 Dɩmʋŋ saŋa gana naŋ na, Ɩsʋɔ bajana barɛ lɩɩ Yerusalem kɔŋ Antiyokiya. 28 Sɛ ba tɩba wʋrʋ wʋŋ baa yagɛ ɩ sɛ Agabusi kʋlʋ sɩŋ sɛ Ɩsʋɔ Feliŋ pala na wʋ dʋɔ gbala sɛ dusoŋ janɛ gaa ga nʋɔ wɩɛ doŋ aja kɔŋ Roma tibi kpiniŋ dʋɔ. [Roma Juo Kaladiyosi saŋa sɛ ŋina tibi.] 29 Ŋina dʋɔ kpalɛnara baa kpa sɛ ba wʋkʋma aja chɔna wʋ doŋ gɩtɛ, na baa mʋ gaa fa lɩɛdɩra baa ba wɩɛ Yudiya tibi dʋɔ. 30 Sɛ ba yɩɛ dɩmʋŋ, sɛ ba mʋ ba gafaasa fa Banabasi na Sɔɔlʋ sɛ ba n mʋ ga fa lɩɛdɩra dikpeŋ bɩnɩɛ baa.