Dɩtʋm 23

1 Sɛ Pɔɔlʋ kɩɛ dɩɛnaŋ bɩnɩɛ naŋ bɩnɩɛ dikpeŋ gaa surumm sɛ wʋ tawɩ sɛ, <<Ma dɔŋa Yudatina, ma jiŋ gʋ ma nfɩɛrɛ naŋ ba aa nyala maŋ lɩɩna chawʋ gaa ma cha Ɩsʋɔ asanaŋ gaa tala dɩmʋŋ wɩɩ gana a.>> 2 Dɩmaŋ sɛ Ɩsʋɔ sei bɩnɩɛ naŋ bɩnɛ Ananiyasi dʋ baa ba sɩmɩɛɩ tirina Pɔɔlʋ na sɛ ba n jɔ wʋ nʋɔ dʋɔ. 3 Dɩmaŋ sɛ Pɔɔlʋ tawɩ ɩ sɛ, <<Ɩsʋɔ aja jɔ nyaŋ wʋŋ nya kɩɛna takɩɛ gabaŋdɩɛ gafʋlʋm. N cha dɩmaŋ di ma wɩɛ ganaŋkʋ mbara ŋii kalaa, ama nyaŋ n tɩŋtɩŋ nya warɩɛ mbara ŋii takɩɛ nya dʋ sɛ ba n jɔ maŋ!>>

4 Sɛ baa ba sɩmɩɛɩ tirina Pɔɔlʋ na tawɩ sɛ, <<Ɩsʋɔ sei bɩnɩɛ naŋ bɩnɛ sɛ nyaa tɩwʋ?>>

5 Sɛ Pɔɔlʋ lɩsɛ nʋɔ sɛ, <<Ma dɔŋa Isiralitina, ma ba jiŋ sɛ wʋ yɩɛ Ɩsʋɔ sei bɩnɩɛ naŋ bɩnɛ ɛ, akala takɩɛ ba sabɩɛ si sɛ, <N baa tawɩ wɩɛ asʋbʋɛ baŋ asanaŋtɛ wʋŋ wʋ a kɩɛ n bakpa dʋɔ.>✝23:5 Ɛsa 22:28.>>

6 Gʋ Pɔɔlʋ jiŋ gʋ bakpa baa barɛ yɩɛ Sadukitina sɛ ba barɛ dʋɔ yɩɛ Farasitina na, wʋ kuusi dɩɛnaŋ bɩnɩɛ naŋ bɩnɩɛ baa tɩba tawɩ sɛ, <<Ma dɔŋa Isiralitina, ma yɩɛ Farasi wʋkpa na Farasi wʋkpa bu bɛ. Ma sɩmɩɛɩ baa di ma wɩɛ lɩɩna tamaa gaa ma wɩɛna gʋ atatina aja feŋ lɩɩ sɩŋ naŋ na dʋɔ.>> 7 Gʋ wʋ tawɩ ŋina na, sɛ noro kɔŋ Farasitina na Sadukitina baa tɩtɩba, sɛ bakpa baa ba jaŋi na kpara tɩba. 8 [Sɛ Sadukitina baa tawɩ sɛ feŋ lɩɩ sɩŋ naŋ taŋ ŋ, sɛ Ɩsʋɔ gabʋɔsɛ yaa feliŋ taŋ ŋ, ama Farasitina baa bɩrɛ lɩɛ ŋina kpiniŋ dʋ.]

9 Sɛ siŋii gaa ga nʋɔ wɩɛ doŋ kɔnɛ, sɛ mbara bakalaasa baa barɛ baa ba yɩɛ Farasitina na, kʋlʋ sɩŋ baa di noro doŋ dʋɔ baa tawɩ sɛ, <<Dɩ n na bʋrʋ gaa ga taŋ dieli baalɛ wina dʋɔ ɔ. Akʋtɔfɩɛ feliŋ yaa Ɩsʋɔ gabʋɔ n tawɩ wʋ jaŋ.>> 10 Sɛ noro gaa nʋɔ yɩɛ doŋ sɛ nyɩŋtɩɛ chaŋ yuora bɩnɛ wʋŋ, takɩɛ baa chati Pɔɔlʋ tɩba aguŋda. Sɛ wʋ dʋ yuora baa sɛ ba n ju ga lɩɛ Pɔɔlʋ lɩɩ jama baa jaŋ doŋ dʋɔ, na baa mʋ ɩ kɔŋ yuora dɩchatɩŋ gaa.

11 Gʋ tɩɛna yuluma na, Kpaŋjuo gaa sɩŋ tirina Pɔɔlʋ tawɩ ɩ sɛ, <<Yu digela! Ganaŋkʋ nya di ma wʋsɛ dʋɔ seriya Yerusalem na, dɩmʋŋ gba sɛ ŋɩ tiri gʋ nya n di ma wʋsɛ dʋɔ seriya Roma dɩɛ naŋ.>>

Ba jɔ dɩkɔŋ sɛ baa kʋ Pɔɔlʋ

12 Gʋ tɩɛna na, Yudatina baa barɛ wɩsɛ jaŋi jɔ dɩkɔŋ ka ntaŋ sɛ, ba aa di i yaa ba aa nyʋɔ ɔ ga tala gʋ baa kʋ Pɔɔlʋ 13 Baala baa ba jɔ dɩmʋŋ dɩkɔŋ gana na kii ŋɩla (40). 14 Ba ju Ɩsʋɔ sei bɩnɩɛ na dɩɛ naŋ bɩnɩɛ baa jaŋ ga tawɩ sɛ, <<Dɩ ka ntaŋ gaa ga nʋɔ wɩɛ doŋ takɩɛ dɩ ɩɩ di bʋrʋ ʋ ga tala gʋ dɩɩ kʋ Pɔɔlʋ. 15 Dɩtɩɛna amɩɛ na dɩɛnaŋ bɩnɩɛ naŋ bɩnɩɛ dikpeŋ gaa n tawɩ yuora bɩnɛ wʋŋ sɛ wʋ n mʋ Pɔɔlʋ kɔŋ amɩɛ asanaŋ, na ɩ yɩɛ takɩɛ ɩ ja sɛ ɩ nyii wʋ wɩɛ ŋii tɩba na dieli. Dɩ yɩɛ sɩrɩya takɩɛ dɩɩ kʋ ɩ pɔɩ na wʋ a tala jɩna.>>

16 Ama gʋ Pɔɔlʋ gagbelabie baalɛ jaŋ nyii dɩmʋŋ dɩkɔŋ gaa ba jɔ na, wʋ ju yuora dɩchatɩŋ gaa ga tawɩ Pɔɔlʋ.

17 Dɩmaŋ sɛ Pɔɔlʋ yagɛ yuora gafie bɩnɩɛ baa tɩba wʋrʋ tawɩ ɩ sɛ, <<Mʋ yeleŋbu wina ju yuora bɩnɛ wʋŋ jaŋ, wʋ wɩɛna wɩɛ ŋarɛ na wʋ a tawɩ ɩ.>> 18 Dɩmʋŋ dʋɔ wʋ mʋ ɩ ju yuora bɩnɛ wʋŋ jaŋ.

Sɛ yuora gafie bɩnɛ wʋŋ tawɩ sɛ, <<Pɔɔlʋ danɛtʋɔrɛ wʋŋ n kpiri yagɛ maŋ sɛ ma n mʋ baalɛ wina kɔna nyaŋ, akala takɩɛ wʋ wɩɛna wɩɛ ŋarɛ wʋ a tawɩ nyaŋ.>>

19 Sɛ yuora bɩnɛ wʋŋ chaŋ yeleŋbu wʋŋ pam naŋ mʋ ɩ lɩɩ laraŋ, sɛ wʋ tasɛ ɩ sɛ, <<Be wɩɛ sɛ n wɩɛna na nyaa tawɩ maŋ?>>

20 Sɛ wʋ tawɩ yuora bɩnɛ wʋŋ sɛ, <<Yudatina baa tawɩ kpa sɛ baa sʋlʋ nyaŋ na nyaa mʋ Pɔɔlʋ kɔŋ dɩɛnaŋ bɩnɩɛ naŋ bɩnɩɛ dikpeŋ gaa asanaŋ chifuo, na baa yɩɛ takɩɛ baa ja sɛ baa nyii wʋ wɩɛ ŋii tɩba na dieli. 21 Ama n baa nyii tie fa ba, akala takɩɛ bakpa baa kii ŋɩla gʋ baa fu gbɩɛ naŋ na baa da ɩ. Ba ka ntaŋ sɛ ba aa di i yaa ba aa nyʋɔ ɔ ga tala gʋ baa kʋ ɩ. Dɩtɩɛna ba yɩɛ sɩrɩya ba dana takɩɛ nyaa kpa ŋii ba sʋlʋ nyaŋ na.>>

22 Sɛ yuora bɩnɛ wʋŋ tawɩ yeleŋbu wʋŋ sɛ wʋ n pala, sɛ wʋ dʋ ɩ sɛ, <<N baa tawɩ wʋrʋ sɛ nya tawɩ wɩɛ ŋina fa maŋ.>>

Ba mʋ Pɔɔlʋ ju Roma tibi kɩɛrɛ Felisi jaŋ

23 Sɛ yuora bɩnɛ wʋŋ yagɛ wʋ yuora gafie bɩnɩɛ bala dʋ ba sɛ, <<N yela na yuora gafisi sɩla, yuora baa baa cha abeŋi dʋɔ ŋitoro sala na yuora baa baa lɔ banɩŋ gafisi sɩla a yɩɛ sɩrɩya, na baa ju Kayisariya yuluma karafɩɛ saŋgʋ. 24 N ja abeŋi fa Pɔɔlʋ ganaŋkʋ baa mʋ ɩ ju na alaŋfiya ga fa Felisi wʋŋ wʋ yɩɛ Roma bɩnɛ wʋŋ wʋ a kɩɛ Isirali tibi dʋɔ na.>>

25 Sɛ wʋ sabɩɛ tanɛ tawɩ sɛ,

26 Maŋ Kaladiyosi Lisiyasi aaŋ sabɩɛ dɩmʋŋ tanɛ gana maa fa nyaŋ Felisi Roma tibi kɩɛrɛ Wʋkpari.

Maa yɩlɩ nyaŋ.

27 Yudatina baa n chaŋ dɩmʋŋ baalɛ wina baa ja baa kʋ ɩ, ama maŋ na ma yuora dɩ kɔŋ gaa lɩɛ ɩ, akala takɩɛ ma jiŋ gʋ wʋ yɩɛ Roma dɩɛsɛ-bu bɛ. 28 Maa ja maa jiŋ kpɩnɩdɩ dʋɔ sɛ baa pʋɩ ɩ, dɩmʋŋ dʋɔ ma mʋ ɩ kɔŋ ba dɩɛnaŋ bɩnɩɛ naŋ bɩnɩɛ dikpeŋ gaa asanaŋ. 29 Ma na gʋ ba pʋɩ ŋii yɩɛ ba mbara dʋɔ wɩɛ tasɛ bɛ. Ama pʋɩ ŋarɛ taŋ ŋii baŋ ɩ takɩɛ dɩ daga baa kʋ ɩ yaa baa tɔ ɩ danɛ dɩtʋɔtɩŋ ŋ. 30 Gʋ ba tawɩ maŋ dɩkɔŋ gaa ba jʋɔ takɩɛ baa kʋ baalɛ wina na, ma yɩɛ bileŋ mʋ ɩ kɔna nyaŋ. Sɛ ma tawɩ wʋ pʋɩra baa sɛ ba n kɔŋ nya asanaŋ gaa tawɩ wɩɛ ŋii ba chamɩna baa pʋɩ ɩ na.

31 Dɩmʋŋ dʋɔ yuora baa yɩɛ ganaŋkʋ ba dʋ ba na, sɛ ba mʋ Pɔɔlʋ dɩmʋŋ yuluma gana ju taŋasɛ Antipatiri dɩɛ naŋ. 32 Gʋ tɩɛna na, ba yela sɛ yuora baa baa cha abeŋi dʋɔ, ju dʋɔ mʋ ɩ ju sɛ yuora baa ba dɔŋ na bɔrɛ kɔŋ ba dɩchatɩŋ. 33 Gʋ yuora baa baa cha abeŋi dʋɔ tala Kayisariya na, ba mʋ tanɛ ga fa Roma tibi kɩɛrɛ wʋŋ sɛ ba mʋ Pɔɔlʋ dʋ wʋ pamɩɛ naŋ. 34 Sɛ Roma tibi kɩɛrɛ wʋŋ karaŋ tanɛ gaa sɛ wʋ tasɛ tibi gaa wʋ lɩɩ ga dʋɔ. Gʋ wʋ jiŋ gʋ wʋ lɩɩ Kilikiya na, 35 wʋ tawɩ sɛ, <<Nya pʋɩra tala jɩna na, sɛ maa di n wɩɛ.>> Dɩmaŋ sɛ wʋ dʋ sɛ ba n kɩɛ Pɔɔlʋ dʋɔ Hɛrɔdɩ juorigbɩɛ gaa naŋ.