Dɩtʋm 27

Pɔɔlʋ mʋna lɩŋ dʋɔ ju Roma

1 Gʋ ba fa nfɩɛrɛ sɛ dɩ n cha lɩŋ dʋɔ ju Italiya na, ba mʋ Pɔɔlʋ na danɛtʋɔra barɛ dʋ yuora gafie bɩnɛ wʋŋ baa yagɛ ɩ sɛ Juliyosi, wʋŋ wʋ kpi Juo janɛ yuora dikpeŋ gaa dʋɔ na pam naŋ. 2 Sɛ dɩ jʋʋ pantuu janɛ gaa ga lɩɩ Adaramutino gaa ja gaa ju Asiya tibi dʋɔ ɔpʋ nʋɔ pantuu janɛ adaŋtɩŋ na sɛ dɩ lam. Sɛ Masidoniya wʋkpa Arisitakosi wʋŋ wʋ lɩɩ Tesalonika na kpi daa dʋɔ.

3 Gʋ tɩɛna na, sɛ dɩ tala Sidoŋ, sɛ Juliyosi lɩɩ wʋ dɩbam naŋ fa Pɔɔlʋ gbɩɛ sɛ wʋ n ju wʋ dɩɛtina jaŋ na baa fa ɩ ŋii ŋɩ tiri ɩ. 4 Gʋ dɩ lɩɩ dɩmaŋ na, dɩ ti mʋna ɔpʋ dʋɔ pala Kipurosi dɩlɩɩtɩŋ lɩɩna feliŋ ŋii ŋii jɔ ŋii jaŋina daa na dʋɔ. 5 Gʋ dɩ mʋna ɔpʋ gaa tɩtɩba Kilikiya na Pamfiliya salɛ ga tala Mira dɩɛ gaa ga wɩɛ Lisiya tibi dʋɔ na. 6 Dɩmaŋ sɛ yuora bɩnɛ wʋŋ na pantuu janɛ garɛ gaa ga lɩɩ Alesandiriya dɩɛ naŋ gaa ju Italiya sɛ wʋ mʋ daa ga dʋ ga tɩba. 7 Dɩ pala laakarɛ dʋɔ gɩyɩɛnɩŋ fɔɩ, dɩ yɩɛ wiliŋ fa daa pɔɩ sɛ dɩ tala Kinido dɩɛ naŋ. Gʋ feliŋ ŋii n fa daa gbɩɛ na dɩɩ ju diele gaa dɩɩ jawʋ na dʋɔ, dɩ mʋna ɔpʋ dʋɔ ju Kireti dɩlɩɩtɩŋ, Salimoni dɩɛ sinabie. 8 Gʋ dɩ dɔŋ ɔpʋ gaa nʋɔ na, dɩ yɩɛ wiliŋ fa daa pɔɩ sɛ dɩ gaa tala diele gaa baa yagɛ sɛ pantuu ajanɩɛ Dɩdaŋtɩŋ Gabam tirina Lasiya dɩɛ.

9 Dɩ taŋgɩlɛ gbɩɛ dʋɔ, sɛ lɩŋ ŋii dʋɔ palɩŋ yɩɛ nyɩŋtɩɛ, akala takɩɛ nʋɔ pɔgʋ*27:9 Ŋina yɩɛ Wɩɩ gaa Yudatina a di asadi adiya baa nyiŋi ganaŋkʋ ba yu dɩsʋbʋ mʋ chɩɛ na. Dɩmʋŋ Wɩɩ gana baa jɔ dɩga, sɛ baa pɔgʋ nʋɔ yela baa tʋŋ Ɩsʋɔ. saŋa lam. Dɩmʋŋ dʋɔ Pɔɔlʋ jɔ ba nyienaŋ tawɩ ba sɛ, 10 <<Baala, ma na gʋ daa gbɩɛ gaa aja kɔna jerebi na pantuu janɛ gaa na gasʋlasɛ ŋii a warɩɛ. Sɛ daa gba dɩɩ sɩŋ.>> 11 Ama yuora bɩnɛ wʋŋ n nyii Pɔɔlʋ wɩɛ ŋii i, sɛ wʋ kpaŋ ŋii pantuu kamɩrɛ na pantuu-tɛ wʋŋ tawɩ fa ɩ na dʋɔ. 12 Akala takɩɛ pantuu dɩdaŋtɩŋ gana taŋ dieli fa daŋ gbaŋgbaŋ saŋa a. Sɛ ba galaga lɩɛ dʋ takɩɛ ba n ju dʋɔ, akala takɩɛ ba wɩɛna tamaa gʋ baa tala Fonisi na baa cha dɩmaŋ gbaŋgbaŋ saŋa. Dɩmʋŋ pantuu dɩdaŋtɩŋ gana wɩɛ Kireti bɛ, sɛ ga asa a kalaa tie dɩsalɩtɩŋ na adugbe dɩsalɩtɩŋ.

Feliŋ janɛ jɔ ɔpʋ dʋɔ

13 Gʋ feliŋ ŋii ŋɩ nʋɔ taŋ doŋ fara jɔ lɩɩ tie na, ba jiŋ sɛ ba yu ŋii baa jawʋ na bɛ, dɩmʋŋ dʋɔ ba lɩsɛ nyɩŋgɩrɛ yuŋtɛ gaa gaa chaŋ pantuu janɛ gaa sɩŋ, sɛ dɩ mʋna Kireti ɔpʋ gaa nʋɔ. 14 Ama ŋɩ n taŋgɩlɛ sɛ feliŋ adoŋtina ŋarɛ ŋii baa yagɛ sɛ <<Dɩlɩɩtɩŋ feliŋ,>> jɔ lɩɩ dɩchafɩya gaa dʋɔ. 15 Gʋ pantuu janɛ gaa jaŋina feliŋ janɛ ŋii na, ga aa ti dɩlɛ gaa ju ga asanaŋ ŋ. Dɩmʋŋ dʋɔ dɩ yela ga fa feliŋ ŋii yela ŋii jɔ daa ŋɩ dɔŋ. 16 Sɛ dɩ mʋna dɩchafɩya pii garɛ baa yagɛ ga sɛ Kawuda dɩlɩɩtɩŋ, dɩ yɩɛ wiliŋ fa daa pɔɩ sɛ dɩ dɩlɛ pɔgʋ buori pii gaa. 17 Gʋ baala baa mʋ buori pii gaa dʋ pantuu janɛ gaa naŋ sɛ ba mʋ ganyasɛ pɔgʋ ga mata ga na. Sɛ nyɩŋtɩɛ chaŋ ba takɩɛ pantuu janɛ gaa aja gaa daŋ Ewuritisi tɩɛra diele gaa taŋ dɩkɩŋ na, dɩmʋŋ dʋɔ ba lɩsɛ nyɩŋgɩrɛ yuŋtɛ gaa gaa chaŋ pantuu janɛ gaa sɩŋ na, sɛ dɩ yela sɛ feliŋ ŋii a jɔ pantuu janɛ gaa ga dɔŋ. 18 Gʋ tɩɛna sɛ feliŋ janɛ ŋii ŋɩ nʋɔ wɩɛ doŋ a jɔ daa na, ba fara baa lɩsɛ gasʋlasɛ baa lɩɩ pantuu janɛ gaa naŋ baa lɔ lɩŋ naŋ. 19 Wɩɛ atorotɛ na, ba mʋ ba tɩŋtɩŋ ba pamɩɛ baa lɩsɛ pantuu janɛ gaa naŋ abʋrɩ baa lɔ lɩŋ ŋii naŋ. 20 Gʋ wiita yaa achikpebi n lɩɩ gɩyɩɛnɩŋ fɔɩ yela feliŋ janɛ ŋii saŋ ŋii jʋɔ na, dɩ ti tana tamaa takɩɛ dɩɩ yu mɔlɔgɩ ɩ.

21 Gʋ baala baa cha gɩyɩɛnɩŋ fɔɩ yela ba n di adiya wʋrʋgbɩɛ na, Pɔɔlʋ kʋlʋ sɩŋ ba asanaŋ tawɩ sɛ, <<Baala, nafʋɔ ɩ nyii ma wɩɛ ŋii ma tawɩ fa amɩɛ takɩɛ dɩ n baa lɩɩ Kireti na, nafʋɔ dɩmʋŋ jerebi ŋina n mɩɛna daa a. 22 Ama dɩtɩɛna maa sʋlʋ amɩɛ sɛ n yu digela, akala takɩɛ amɩɛ tɩba wʋrʋ ba aa sɩŋ ŋ, pantuu janɛ gaa nyiŋeŋ aaŋ ja gaa warɩɛ. 23 Daŋda yuluma, Ɩsʋɔ wʋŋ ma yɩɛ wʋ teri, sɛ maa tʋŋ ɩ na gabʋɔ, gaa sɩŋ ma jaŋ 24 tawɩ sɛ, <Pɔɔlʋ, n baa se nyɩŋtɩɛ. Ŋɩ tiri gʋ nyaa sɩŋ Juo Kayisa asanaŋ na wʋ a di n wɩɛ, gʋ Ɩsʋɔ wɩɩ n dʋɔ na dʋɔ, wʋ mʋ baa ba kpi n dʋɔ lɩŋ ŋii dʋɔ na kpiniŋ nkpa fa ba.> 25 Dɩmʋŋ dʋɔ baala, n yu digela akala takɩɛ ma wɩɛna lɩɛdi Ɩsʋɔ naŋ takɩɛ ŋii tibi ganaŋkʋ wʋ tawɩ maŋ na. 26 Ama ŋɩ tiri gʋ pantuu janɛ gaa a daŋ dɩchafɩya garɛ dʋɔ.>>

Ɔpʋ dʋɔ awʋrʋfʋɔ

27 Gɩyɩɛnɩŋ gifi anara wɩɩ yuluma na, feliŋ janɛ ŋii saŋ ŋii jɔ daa ŋii logo Adiratiki Ɔpʋ dʋɔ. Go aja yɩɛ takɩɛ tɩɛtɩtɩba na, sɛ pantuu janɛ gaa dɩtʋm yɩɛra baa na gʋ ba tirina dedambi. 28 Sɛ ba mʋ ganya pɔgʋ nyɩŋgɩrɛ lɔ dʋ lɩŋ ŋii naŋ na baa kɩɛ ŋɩ dɩkɩŋ, sɛ ba na gʋ dɩmaŋ dɩkɩŋ yɩɛ nafara gafie na nkuo. Gʋ ba ju asanaŋ chonii na, ba ti lɔ ganya gaa dʋ lɩŋ ŋii naŋ sɛ ba na gʋ dɩmaŋ dɩkɩŋ yɩɛ nafara ŋɩnara salaa. 29 Sɛ dɩ yɩɛ daa nyɩŋtɩɛ takɩɛ dɩɩ ga sʋɔ akpa bʋɛ, sɛ ba lɩsɛ nyɩŋgɩrɩɛ ayuntina ŋii ŋii chaŋ pantuu janɛ gaa sɩŋ na anara lɔ dʋ lɩŋ naŋ pantuu janɛ gaa wʋrʋgbɩɛ, sɛ ba jɔ dɩga sɛ tɩɛ n na bileŋ. 30 Gʋ pantuu janɛ gaa dɩtʋm yɩɛra baa ja sɛ ba n se lɩɩ ga tɩba na dʋɔ, ba buoli buori pii gaa jaga ɔpʋ gaa dʋɔ, sɛ ba yɩɛ takɩɛ baa ga lɩsɛ nyɩŋgɩrɩɛ ayuntina ŋii ŋii chaŋ pantuu janɛ gaa sɩŋ na dʋ lɩŋ naŋ pantuu janɛ gaa asanaŋ. 31 Dɩmaŋ sɛ Pɔɔlʋ tawɩ yuora bɩnɛ wʋŋ na yuora baa sɛ, <<Baala bana n cha pantuu janɛ gana naŋ na, ɩ ɩɩ dɩlɛ yu mɔlɔgɩ ɩ.>> 32 Dɩmʋŋ dʋɔ yuora baa karɩɛ ganyasɛ ŋii ŋɩ chamɩna buori pii gaa tɩba na, sɛ ba yela ga sɛ ga lam.

33 Pɔɩ na a tala tafɩlɛ na, sɛ Pɔɔlʋ sʋlʋ ba kpiniŋ sɛ ba n di adiya. Sɛ wʋ tawɩ ba sɛ, <<Gɩyɩɛnɩŋ gifi anara mɩnaŋ gʋ ɩɩ dana ɩɩ kɩɛ, sɛ ɩŋ di adiya a. 34 Dɩtɩɛna maa sʋlʋ amɩɛ sɛ n di adiya na ɩ cha nkpa naŋ. Amɩɛ tɩba wʋrʋ nyɩnyʋɔ garɛ gba ba aa kuli tʋsʋ ʋ.>> 35 Gʋ Pɔɔlʋ tawɩ ŋina taŋ na, wʋ mʋ bodobodo garɛ sɛ wʋ yɩlɩ Ɩsʋɔ ba kpiniŋ ba asanaŋ. Sɛ wʋ jaɩ ga tɩba sɛ wʋ fara wʋ a tawʋ. 36 Sɛ ba kpiniŋ yu tawɩ dʋ sɛ ba di adiya. 37 Daa baa dɩ wɩɛ pantuu janɛ gaa naŋ na, nʋɔ yɩɛ gafisi sɩla na ŋitoro sala na lʋrʋ (276). 38 Gʋ ba di pa na, ba lɩsɛ gamɩsɛ ŋii ŋɩ wɩɛ pantuu janɛ gaa naŋ na lɔ dʋ ɔpʋ naŋ, na gaa kʋlʋ yuŋ.

Pantuu janɛ gaa warɩɛwʋ

39 Gʋ tɩɛna na, pantuu janɛ gaa dɩtʋm yɩɛra baa n dɩlɛ jiŋ ɔpʋ nʋɔ gadʋŋdʋlʋŋ gaa a. Ama ba na dedambi diele gaa tɩɛra wɩɛ, dɩmaŋ sɛ ba yɩɛ ba nfɩɛrɛ takɩɛ nafʋɔ baa dɩlɛ na, ba n mʋ pantuu janɛ gaa ga daŋ. 40 Sɛ ba karɩɛ ganyasɛ ŋii ŋɩ chamɩna nyɩŋgɩrɩɛ ayuntina ŋii ŋii chaŋ pantuu janɛ gaa sɩŋ na sɛ ŋɩ sala ɔpʋ naŋ, dɩmʋŋ saŋa gana ba buoli ganyasɛ ŋii ŋɩ chamɩna daasɛ ŋii. Dɩmaŋ sɛ ba mʋ dukuru janɛ gaa adugbe fa feliŋ ŋii na ŋii jɔ pantuu janɛ gaa daŋ ɔpʋ gaa nʋɔ. 41 Ama pantuu janɛ gaa sʋɔ tɩɛra diele gaa taŋ dɩkɩŋ na sɛ ga daŋ. Sɛ ga asanaŋ jʋʋ tɩɛra naŋ sɛ ga aa ti dɩlɛ gaa ju asanaŋ ŋ. Sɛ feliŋ janɛ ŋii jɔ ga wʋrʋgbɩɛ sɛ ga salɩɛ aguŋda-aguŋda.

42 Sɛ yuora baa fa gbɩɛsɛ nfɩɛrɛ sɛ baa kʋ danɛtʋɔra baa, na ba n baa yu gbɩɛ sala lɩŋ na baa se. 43 Ama yuora bɩnɛ wʋŋ aja sɛ wʋ a mɔlɔgɩ Pɔɔlʋ nkpa, sɛ wʋ n yela na baa yɩɛ ba gbɩɛsɛ nfɩɛrɛ ɛ. Wʋ dʋ baa baa dɩlɛ sala lɩŋ na sɛ ba n chɩŋkpɩɛ puli sala tɩba, na baa sala ju dedambi dʋɔ. 44 Sɛ baa ba kakaa na mʋ ba wʋsɛ fu-fu dasɛ ajanɩɛ yaa pantuu janɛ gaa aguŋda ŋii dʋɔ ju dedambi dʋɔ. Dɩmʋŋ gbɩɛ gana dʋɔ sɛ wʋkʋma mʋna ga tala dedambi dʋɔ na alaŋfiya.