1 Gʋ Fesito kɔŋ Kayisariya tibi dʋɔ wɩɛ atoro wʋrʋgbɩɛ na, wʋ lɩɩ dɩmaŋ ju Yerusalem, 2 dɩmaŋ sɛ Ɩsʋɔ sei bɩnɩɛ na Yudatina asanaŋtina baa kɔŋ wʋ asanaŋ gaa tawɩ ba pʋɩ wɩɛ baŋ Pɔɔlʋ. 3 Sɛ ba sʋlʋ Fesito sɛ wʋ n yɩɛ ŋii ŋii su ba asa fa ba, na wʋ a yela na Pɔɔlʋ a kɔŋ Yerusalem. Akala takɩɛ ba kʋla ba wʋsɛ takɩɛ baa fu gbɩɛ naŋ na baa kʋ ɩ. 4 Sɛ Fesito lɩsɛ nʋɔ sɛ, <<Pɔɔlʋ saŋ wʋ wɩɛ danɛ dɩtʋɔtɩŋ Kayisariya, sɛ ba aa taŋgɩlɛ ɛ, ma tɩŋtɩŋ maa ju dɩmaŋ. 5 N lɩsɛ amɩɛ asanaŋtina barɛ na maŋ na ba dɩɩ ju, sɛ baalɛ wina yɩɛ bʋrʋ gaa ga taŋ dieli na, na ɩ pʋɩ ɩ dɩmaŋ.>>

6 Gʋ Fesito cha ba jaŋ wɩɛ jiŋinara yaa gifi wʋrʋgbɩɛ na, wʋ lɩɩ dɩmaŋ ju Kayisariya. Gʋ tɩɛna na wʋ cha takɩɛ wɩɛ diri sɛ wʋ dʋ sɛ ba n mʋ Pɔɔlʋ kɔŋ wʋ asanaŋ. 7 Gʋ Pɔɔlʋ kɔŋ dɩmaŋ na, Yudatina baa ba lɩɩ Yerusalem na sɩmɩɛɩ logo ɩ, sɛ ba tawɩ pʋɩ ŋii ŋɩ nʋɔ wɩɛ doŋ fɔɩ baŋ ɩ, ŋii ba n dɩlɛ kalaa tɩba a.

8 Dɩmaŋ sɛ Pɔɔlʋ tawɩ gara wʋ wʋsɛ sɛ, <<Ma n yɩɛ bʋrʋ gaa ga taŋ dieli chicha Yudatina mbara ŋii yaa Ɩsʋɔ tʋm danɛ gaa yaa Juo Kayisa a.>>

9 Ama gʋ Fesito a ja wʋ a yɩɛ ŋii ŋii su Yudatina baa asa na dʋɔ, wʋ tasɛ Pɔɔlʋ sɛ, <<Nyaa ja sɛ nyaa ju Yerusalem, na maa di n wɩɛ ma asanaŋ dɩmaŋ lɩɩna pʋɩ ŋina dʋɔ yaa?>>

10 Sɛ Pɔɔlʋ lɩsɛ nʋɔ sɛ, <<Dɩtɩɛna ma sɩmɩɛɩ nya asanaŋ takɩɛ nya yɩɛ wɩɛ diri Juo Kayisa wɩɛ didiitiŋ, dɩmaŋ sɛ dɩ daga gʋ ba n di ma wɩɛ. Ma n yɩɛ Yudatina baa bʋrʋ gaa ga taŋ dieli i, takɩɛ ganaŋkʋ n tɩŋtɩŋ nya jiŋ na dieli na. 11 Nafʋɔ ma di dɩpʋɛ ŋii ma yɩɛ sɛ ŋɩ daga sɩŋ na, ma n pɩɛ sɛ ma aa sɩŋ ŋ. Ama sɛ Yudatina pʋɩ ŋii ba mʋ baŋ maŋ ba yɩɛ gasiŋteŋ ŋ bɩrɛ na, wʋrʋ taŋ gbɩɛ na wʋ a lɩsɛ maŋ fa ba a. Maa sʋlʋ sɛ Kayisa n di ma wɩɛ!>>

12 Gʋ Fesito na wʋ bɩnɩɛ mʋ sawʋra wʋrʋgbɩɛ na, ba tawɩ Pɔɔlʋ sɛ, <<Nya sʋlʋ sɛ Kayisa n di nya wɩɛ. Kayisa jaŋ sɛ nyaa ju!>>

13 Wɩɛ akalisa ŋarɛ wʋrʋgbɩɛ na, Juo Agiripa na Benisi kɔŋ Kayisariya dɩɛ naŋ na baa gaa yɩlɩ Fesito. 14 Gʋ ba cha dɩmaŋ gɩyɩɛnɩŋ fɔɩ na, sɛ Fesito tawɩ Pɔɔlʋ wɩɛ fa Juo wʋŋ sɛ, <<Baalɛ wʋrʋ wɩɛ jɩna gʋ Felisi yela ɩ takɩɛ danɛtʋɔrɛ. 15 Gʋ ma ju Yerusalem na, Ɩsʋɔ sei bɩnɩɛ na Yudatina bɩnɩɛ baa mʋ pʋɩ kɔŋ gaa baŋ ɩ sɛ ba sʋlʋ maŋ sɛ ma n fu ɩ dɩpʋɛ.>>

16 Sɛ Fesito tawɩ juo sɛ, <<Ma tawɩ ba sɛ ŋɩ ba yɩɛ daa Romatina ayɩɛsa takɩɛ dɩ n fu wʋrʋ dɩpʋɛ pɔɩ na wʋ a jaŋi wʋ pʋɩra a, na wʋ a yu gbɩɛ tawɩ wɩɛ mʋ gara wʋ wʋsɛ lɩɩ ba pʋɩ ŋii dʋɔ. 17 Gʋ ba sɩla ma jaŋ jɩna na, ma n taŋgɩlɛ dʋɔ ɔ, gʋ tɩɛna na, ma ju ga cha wɩɛ diri gbeli dʋɔ sɛ ma dʋ sɛ ba n mʋ baalɛ wʋŋ kɔŋ dɩmaŋ. 18 Gʋ wʋ pʋɩra baa kʋlʋ sɩŋ baa tawɩ na, ba n dɩlɛ mʋ wɩɛ asʋbʋɛ pʋɩ ɩ ŋii nafʋɔ ma asa jagaɩ dʋɔ na a. 19 Ama ba na ɩ di noro lɩɩna ba tɩŋtɩŋ ba tʋm dʋɔ, na lɩɩna baalɛ wʋŋ wʋ sɩŋ sɛ baa yagɛ ɩ sɛ Yesu wʋŋ Pɔɔlʋ a tawɩ sɛ wʋ chaɩ nkpa naŋ. 20 Sɛ ma ba jiŋ ŋii ma n yɩɛ na maa kɩɛ wɩɛ ŋii naŋ na dieli i. Dɩmʋŋ dʋɔ ma tawɩ ɩ sɛ, wʋ a ja sɛ wʋ a ju Yerusalem na maa ga di wʋ wɩɛ dɩmaŋ pʋɩ ŋina dʋɔ. 21 Sɛ Pɔɔlʋ sʋlʋ sɛ ba n yela Juo janɛ Kayisa a mʋ nfɩɛrɛ na wʋ a di wʋ wɩɛ, ma dʋ sɛ ba n gie e ga tala gʋ maa mʋ ɩ ga fa Kayisa.>>

22 Dɩmaŋ sɛ Agiripa tawɩ Fesito sɛ, <<Ma tɩŋtɩŋ maa ja sɛ maa nyii baalɛ wina nʋɔ naŋ wɩɛ.>>

Sɛ Fesito lɩsɛ nʋɔ sɛ, <<Chifuo nyaa nyii wʋ nʋɔ naŋ wɩɛ.>>

23 Gʋ tɩɛna na, Juo Agiripa na Benisi desina ba wʋsɛ sɛ ba mʋ jilima na asadi jʋʋ dijaŋitiŋ gaa, sɛ yuora bɩnɩɛ na dɩɛ janɛ gaa asanaŋtina baa kpaŋ ɩ. Sɛ Fesito dʋ sɛ ba n ga mʋ Pɔɔlʋ kɔŋ. 24 Sɛ Fesito tawɩ sɛ, <<Juo Agiripa na amɩɛ baa ɩ wɩɛ daa jaŋ jɩna na kpiniŋ. Baalɛ wina wʋŋ ɩɩ na ɩ na, Yudatina baa ba wɩɛ Yerusalem na Kayisariya na kpiniŋ sʋlʋ maŋ lɩɩ wʋ dʋɔ. Sɛ ba kuusi sɛ wʋ n ti daga wʋ a cha nkpa naŋ ŋ. 25 Ma na gʋ wʋ n yɩɛ bʋrʋ gaa ga daga sɩŋ ŋ, ama gʋ wʋ sʋlʋ sɛ Juo janɛ Kayisa n di wʋ wɩɛ na dʋɔ, ma yɩɛ ma nfɩɛrɛ takɩɛ maa mʋ ɩ ju Roma. 26 Ama ma tana wɩɛ bi gaa maa sabɩɛ ga fa wʋ Kpaŋjuo Kayisa lɩɩ wʋ dʋɔ ɔ. Dɩmʋŋ dʋɔ ma mʋ ɩ kɔŋ amɩɛ kpiniŋ amɩɛ asanaŋ, fɔŋfɔŋ nyaŋ Juo Agiripa, takɩɛ ganaŋkʋ dɩ kɩɛ wɩɛ ŋii tɩba na dieli na, maa dɩlɛ yu wɩɛ ŋarɛ na maa sabɩɛ lɩɩna ŋii ŋii lɩɩ ŋɩ tɩba kɔŋ. 27 Maa tamaa sɛ ŋɩ taŋ dieli takɩɛ ma n mʋ danɛtʋɔrɛ ju yela ma aa dɩlɛ kalaa wɩɛ ŋii ba chamɩna baa pʋɩ ɩ na tɩba a.>>