1 Gʋ dɩ tala dedambi dʋɔ na alaŋfiya na, sɛ dɩ jiŋ gʋ baa yagɛ dɩchafɩya gaa sɛ Malita. 2 Sɛ dɩchafɩya gaa dʋɔ bakpa lɩɛ daa sɛ ba lɩsɛ ba dɩbam yɩɛ fɔɩ kalaa daa. Gʋ duoni a nɩɛ sɛ warɛ wɩɛ na dʋɔ, ba dʋ bʋala fa daa sɛ dɩ n wʋlʋ. 3 Sɛ Pɔɔlʋ kʋla dasɛ sɩla, gʋ wʋ chamɩna wʋ a dʋ bʋala naŋ na, sɛ bʋala gaa awulawula yela sɛ dʋm lɩɩ dasɛ ŋii naŋ gaa pɔgʋ Pɔɔlʋ pam. 4 Gʋ dɩchafɩya gaa dʋɔ bakpa na gʋ dʋm wʋŋ chɔlɔgaɩ Pɔɔlʋ pam dʋɔ na, sɛ ba tawɩ dɔŋa sɛ, <<Baalɛ wina aja yɩɛ gatagapʋ wʋkpa bɛ, ŋɩ wɩɛ tɩba takɩɛ wʋ n sɩŋ ɔpʋ gaa naŋ ŋ, panɛ wʋŋ baa yagɛ ɩ sɛ Di Wɩɛ Ŋɩ Gbɩɛ Dʋɔ na, ba aa yela na wʋ a yu nkpa a.>> 5 Ama Pɔɔlʋ ŋmati dʋm wʋŋ dʋ bʋala gaa naŋ yela bʋrʋ n yɩɛ ɩ ɩ. 6 Bakpa jiŋ sɛ wʋ a pʋ yaa wʋ a sala na wʋ a sɩŋ gabʋanaŋ bɛ. Ama gʋ ba daa taŋgɩlɛ sɛ ba na gʋ bʋrʋ n yɩɛ ɩ na, ba biliŋi ba nfɩɛrɛ sɛ ba tawɩ sɛ, wʋ yɩɛ panɛ bɛ.

7 Popilosi wʋŋ wʋ yɩɛ asanaŋtɛ wʋkpari dɩchafɩya gana dʋɔ na wɩɛna tibi garɛ tirina dɩmaŋ. Wʋ lɩɛ daa wʋ waa dʋɔ, kɩɛ daa sɛ wʋ yɩɛ dɩbam fa daa wɩɛ atoro. 8 Popilosi wʋ Juo cha wʋ duwei wʋ a kili gɩbɩrɩma yela wʋ a jʋɔwʋ. Sɛ Pɔɔlʋ jʋʋ ga kɩɛ ɩ sɛ wʋ mʋ wʋ pam jaga wʋ dʋɔ, sɛ wʋ jɔ dɩga fa ɩ sɛ wʋ yu lʋm chʋɔ. 9 Gʋ ŋina tibi na, sɛ lʋmɩɛtina baa ba kakaa ba wɩɛ dɩchafɩya gaa dʋɔ na kpiniŋ kɔnɛ, sɛ ba yu lʋm chʋɔ. 10 Sɛ ba bu daa gbɩɛsɛ fɔɩ dʋɔ, gʋ saŋa tala na dɩɩ ju na, ba fa daa abʋrɩ ŋii ŋɩ tiri daa.

11 Gafɩtasɛ atoro wʋrʋgbɩɛ na, dɩ ga jʋʋ pantuu janɛ gaa ga lɩɩ Alesandiriya sɛ ga dʋɔsɩŋ dɩchafɩya dʋɔ warɛ saŋa na. Ba sabɩɛ Ata aba panɩŋ Kasita na Poluki jaga ga dʋɔ. 12 Dɩ ga tala Surakawasa dɩɛ naŋ, sɛ dɩ cha dɩmaŋ wɩɛ atoro. 13 Dɩ lɩɩ dɩmaŋ pala lɩŋ dʋɔ ga tala Regiyoŋ dɩɛ naŋ. Tɩɛna na feliŋ jɔ lɩɩ tie, gʋ tɩɛ ti na na, sɛ dɩ ga tala Potiyolo dɩɛ naŋ. 14 Dɩmaŋ sɛ dɩ na lɩɛdɩra barɛ, sɛ ba lɔ pam yagɛ daa sɛ dɩ n cha ba jaŋ soji garɛ. N na sɛ dɩ pala ga tala Roma. 15 Gʋ lɩɛdɩra baa ba wɩɛ dɩmaŋ nyii gʋ dɩɩ kɔnɛ na, sɛ ba barɛ ju gbɩɛ taŋasɛ gaa jaŋina daa dɩɛsɛ ŋii baa yagɛ ŋɛ sɛ Apiya Gɩyɩɛ naŋ, sɛ barɛ gaa jaŋina daa Mʋɔra Aduweitiŋ Atoro. Gʋ Pɔɔlʋ na ba na, wʋ yɩlɩ Ɩsʋɔ sɛ wʋ yu tawɩ dʋ. 16 Gʋ dɩ tala Roma na, ba fa Pɔɔlʋ gbɩɛ sɛ wʋ n cha wʋ nyiŋeŋ, sɛ ba fa ɩ yuorɛ sɛ wʋ n gie ɩ.

17 Wɩɛ atoro wʋrʋgbɩɛ na, Pɔɔlʋ yagɛ Yudatina asanaŋtina baa gaa jaŋi. Gʋ ba jaŋi na, wʋ tawɩ ba sɛ, <<Ma dɔŋa Isiralitina, ŋɩ wɩɛ tɩba takɩɛ ma n yɩɛ bʋrʋ baŋ daa bakpa yaa daa duluŋ ayɩɛsa a, sɛ ba chaŋ maŋ Yerusalem dɩɛ naŋ mʋ maŋ dʋ Romatina pamɩɛ naŋ. 18 Ba kɩɛ ma wɩɛ naŋ na dieli na, ba ja baa yela maŋ, akala takɩɛ ma n yɩɛ dɩsʋbʋ gaa ga daga baa kʋ maŋ ŋ. 19 Ama gʋ Yudatina baa pɩɛ na, sɛ dɩ ŋɩrɛ maŋ takɩɛ ma n sʋlʋ Juo Kayisa na wʋ a di ma wɩɛ, naa sɛ ma wɩɛna pʋɩ ŋarɛ maa mʋ baŋ ma tɩŋtɩŋ ma bakpa a. 20 Ŋina dʋɔ sɛ ma sʋlʋ sɛ maa na amɩɛ, na maŋ na amɩɛ dɩɩ tawɩ. Isiralitina tamaa dʋɔ sɛ ba mʋ agbaraŋgbaraŋ pɔgʋ maŋ.>>

21 Sɛ ba lɩsɛ nʋɔ sɛ, <<Dɩ n yu tanɛ garɛ lɩɩ Yudiya lɩɩna n dʋɔ ɔ, sɛ daa dɔŋa baa ba lɩɩ dɩmaŋ kɔŋ na, wʋrʋ n tawɩ wɩɛ asʋbʋɛ ŋarɛ lɩɩ n wʋsɛ dʋɔ ɔ. 22 Ama dɩɩ ja sɛ dɩɩ nyii nya nfɩɛrɛ bɛ, akala takɩɛ dɩ jiŋ gʋ bakpa baa ba wɩɛ gapɩlɛkʋma a tawɩ baa baŋ dɩmʋŋ dikpeŋ gana.>>

23 Sɛ ba si gɩyɩɛ garɛ takɩɛ ba na Pɔɔlʋ ba n jaŋi, sɛ bakpa fɔɩ kɔŋ diele gaa wʋ chaɩ na. Wʋ kalaa ba wɩɛ ŋii tɩba sɛ wʋ di Ɩsʋɔ Juori gaa dʋɔ seriya fa ba lɩɩ nafo ga tala bʋyanɔ. Wʋ pala na Mosesi mbara na Ɩsʋɔ bajana baa sabɩɛ wɩɛ ŋii dʋɔ chɩdɩsɛ tawɩ ba na baa lɩɛ wɩɛ ŋii wʋ a tawɩ na di lɩɩna Yesu wʋsɛ dʋɔ wɩɛ. 24 Sɛ ba barɛ lɩɛ wɩɛ ŋii wʋ tawɩ na di, ama barɛ dʋɔ n lɩɛ di i. 25 Sɛ bakpa baa n nyii dɔŋa tie e, sɛ ba fara baa lɩɩ dɩmaŋ gʋ Pɔɔlʋ tawɩ wɩɛ taŋ na sɛ, <<Ɩsʋɔ Feliŋ pala na Ɩsʋɔ ɔja Yisaya dʋɔ tawɩ gasiŋteŋ fa amɩɛ duluŋ sɛ,

26 <<Ju bakpa bana jaŋ ga tawɩ ba sɛ,

Ɩɩ nyii, ama ɩɩ nyii tie e,

ɩɩ kɩɛ, ama ɩɩ na a.

27 Akala takɩɛ bakpa bana agela wɩɛ doŋ,

ba tɔ ba dɩla,

ba fu ba asa.

Naa dɩmʋŋ na, nafʋɔ ba asa aja na,

baa nyii,

ba agela a nyii wɩɛ tie,

na baa biliŋi lɩɩ ba dɩsʋbʋ naŋ kɔŋ ma jaŋ, na maa chɔ ba.>>✝

28 Sɛ Pɔɔlʋ ju dʋɔ tawɩ sɛ, <<Dɩmʋŋ dʋɔ maa ja na ɩ jiŋ takɩɛ Ɩsʋɔ nkpa mɔlɔgɩ ju baa ba ba yɩɛ Yudatina na jaŋ, na baa nyii.>> 29 Gʋ Pɔɔlʋ tawɩ ŋina taŋ na, Yudatina baa lɩɩ dɩmaŋ yela ba nyiŋeŋ-nyiŋeŋ baa di noro ŋii ŋɩ nʋɔ wɩɛ doŋ.*

30 Pɔɔlʋ cha dɩmaŋ bɩŋsɛ sɩla kpiniŋ wʋ tɩŋtɩŋ wʋ waa gaa wʋ a tɔ ga dʋɔ kɩm na tɩba. Sɛ wʋ lɩɛ baa baa kɔŋ baa bʋɔ wʋ dʋɔ na kpiniŋ. 31 Wʋ yu digela tawɩ Ɩsʋɔ Juori gaa dʋɔ wɩɛ sɛ wʋ kalaa Kpaŋjuo Yesu Kirisito wʋsɛ dʋɔ wɩɛ yela wʋrʋ n dɩlɛ gara ɩ gbɩɛ ɛ.