Dɩtʋm 24

Ba pʋɩ Pɔɔlʋ Felisi asanaŋ

1 Wɩɛ anʋŋ wʋrʋgbɩɛ na, Ɩsʋɔ sei bɩnɩɛ naŋ bɩnɛ Ananiyasi, dɩɛ naŋ bɩnɩɛ barɛ na mbara jɩmɩrɛ wʋŋ baa yagɛ ɩ sɛ Tetulo na kɔŋ Kayisariya dɩɛ naŋ. Sɛ ba mʋ ba pʋɩ ŋii ba mʋ baŋ Pɔɔlʋ na kɔŋ Roma bɩnɛ wʋŋ wʋ a kɩɛ Isirali tibi dʋɔ na asanaŋ. 2 Gʋ ba yagɛ Pɔɔlʋ jʋʋ na, sɛ Tetulo fara wʋ a tawɩ ŋii wʋ mʋ pʋɩ Pɔɔlʋ Felisi asanaŋ sɛ, <<Nya chifuo dʋɔ nfɩɛrɛ mʋ abʋrɩ abama kɔŋ tibi gana dʋɔ sɛ dɩ yu wʋsɛfɩɛ taŋgɩlɛ n tie. 3 Felisi wʋkpari, gapɩlɛkʋma na gbɩɛ kʋma dʋɔ, daa asasu ŋina dʋɔ sɛ dɩɩ yɩlɩ nyaŋ fɔɩ. 4 Ama ganaŋkʋ ma aa nyala nyaŋ fɔɩ na dʋɔ, maa sʋlʋ nyaŋ sɛ nya n yu digela na nyaa nyii daa wɩɛ diguŋ.>>

5 <<Dɩ fɩla na baalɛ wina gʋ wʋ yɩɛ ganyala wʋkpa bɛ, sɛ wʋ a fuosi siŋii wʋ a dʋ Yudatina kpiniŋ tɩba dulunya gapɩlɛkʋma. Sɛ wʋ ti wʋ yɩɛ Nasarene akarɩɛ dikpeŋ gaa asanaŋtɛ, 6 sɛ hali wʋ ja wʋ a mʋ iniesi mʋ yɩɛ Ɩsʋɔ tʋm danɛ gaa, dɩmʋŋ dʋɔ dɩ chaŋ ɩ. 7 Ama yuora bɩnɛ Lisiyasi mʋ doŋ gaa lɩɛ ɩ lɩɩ daa pamɩɛ naŋ. 8 N tɩŋtɩŋ n kɩɛ tɩba na dieli na, nyaa dɩlɛ jiŋ gasiŋteŋ gaa lɩɩna pʋɩ ŋii dɩ mʋ baŋ ɩ na.>>

9 Sɛ Yudatina baa gba pʋɩ ɩ tawɩ sɛ ŋina kpiniŋ yɩɛ gasiŋteŋ bɛ.

10 Gʋ Roma tibi kɩɛrɛ wʋŋ ŋɩrɛ ba pam sɛ wʋ n tawɩ na, sɛ Pɔɔlʋ tawɩ sɛ, <<Ma jiŋ gʋ bɩŋsɛ fɔɩ mɩnaŋ gʋ n cha nya yɩɛ wɩɛ diri tibi gana dʋɔ. Dɩmʋŋ dʋɔ dɩ yɩɛ maŋ jʋŋ gʋ maa tawɩ ma wɩɛ gara ma wʋsɛ. 11 Nyaa dɩlɛ kɩɛ ŋɩ tɩba na nyaa nyii takɩɛ wɩɛ gifi ala mɩnaŋ gʋ ma ju Yerusalem ga tʋm Ɩsʋɔ. 12 Ma pʋɩra n na maŋ na wʋrʋ a di noro Ɩsʋɔ tʋm danɛ gaa naŋ ŋ, yaa maa fuosi maa dʋ jama baa Yudatina tʋm danɩŋ naŋ yaa dɩɛ janɛ gaa naŋ gatʋŋgʋrʋ ʋ. 13 Sɛ dɩtɩɛna ba aa dɩlɛ kalaa pʋɩ ŋii ba mʋ baŋ maŋ na tɩba fa nyaŋ ŋ. 14 Ama ma lɩɛ dʋ gʋ ma tʋm daa duluŋ Ɩsʋɔ takɩɛ wʋŋ wʋ yɩɛ Gbɩɛ gaa baa yagɛ sɛ akarɩɛ dikpeŋ na kpamɩrɛ. Ma lɩɛ bʋrʋkʋma gaa ga kpa Mosesi mbara ŋii, na ŋii ba sabɩɛ Ɩsʋɔ bajana baa tanɩɛ naŋ na di, 15 sɛ ma wɩɛna tamaa gadʋŋdʋlʋŋ Ɩsʋɔ naŋ takɩɛ baala bana takɩɛ feŋ lɩɩ sɩŋ naŋ wɩɛ fa bachirigisa na baa ba n chirigi na kpiniŋ. 16 Dɩmʋŋ dʋɔ saŋa kʋma maa chɩdɩsɛ ganaŋkʋ ma nfɩɛrɛ naŋ ba aa nyala maŋ Ɩsʋɔ na wʋkpa asanaŋ.>>

17 <<Gʋ ma lɩɩ Yerusalem bɩŋsɛ fɔɩ wʋrʋgbɩɛ na, ma bɔrɛ kɔŋ dɩmaŋ na maa gaa fa ma bakpa baa ba yɩɛ ayɔŋtina na afaasa, na maa diesi gadiesa. 18 Gʋ maa yɩɛ iniesi saŋ lɩsɛ, sɛ ma tam na sɛ ba na maŋ Ɩsʋɔ tʋm danɛ gaa naŋ. Jama taŋ ma jaŋ ŋ yaa ma n kpi siŋii ŋarɛ dʋɔ ɔ. 19 Ama Yudatina barɛ baa ba lɩɩ Asiya tibi na wɩɛ dɩmaŋ, baa sɛ nafʋɔ ba wɩɛna pʋɩ ŋarɛ na, dɩ daga baa kɔŋ nya asanaŋ jɩna gaa mʋ baŋ maŋ, 20 yaa bana baa ba wɩɛ jɩna n na n tawɩ dɩsʋbʋ gaa ba na ma dʋɔ saŋa gaa ma sɩmɩɛɩ dɩɛnaŋ bɩnɩɛ naŋ bɩnɩɛ baa asanaŋ na. 21 Amʋɔ bʋrʋ ga dʋŋdʋlʋŋ gana sɛ ma kuusi tawɩ, gʋ ma sɩmɩɛɩ ba asanaŋ na, ŋɩ yɩɛ lɩɩna atatina feŋ lɩɩ sɩŋ naŋ dʋɔ sɛ ma wɩɛ nya asanaŋ baa di ma wɩɛ jaŋ.>>

22 Dɩmaŋ sɛ Felisi wʋŋ wʋ jiŋ Gbɩɛ gaa dʋɔ wɩɛ na kʋna wɩɛ ŋii si, tawɩ sɛ, <<Sɛ yuora bɩnɛ Lisiyasi kɔnɛ na, maa di n wɩɛ, sɛ wʋ mʋ wɩɛ di ŋii si gɩyɩɛ gafɔlɛ.>> 23 Sɛ wʋ dʋ yuora gafie bɩnɛ wʋŋ sɛ wʋ n gie Pɔɔlʋ, ama wʋ n yela na wʋ a yu wʋ wʋsɛ na wʋ a fa wʋ dɩɛtina gbɩɛ na baa fa ɩ ŋii ŋɩ tiri ɩ na.

Ba mʋ Pɔɔlʋ kɔŋ Felisi na Durusila asanaŋ

24 Gɩyɩɛnɩŋ fɔɩ wʋrʋgbɩɛ na, Felisi na wʋ alʋ Durusila wʋŋ wʋ yɩɛ Yuda wʋkpa na kɔnɛ. Sɛ wʋ kpiri yagɛ Pɔɔlʋ na wʋ a nyii wʋ jaŋ gʋ wʋ tawɩ lɩɩna Yesu Kirisito lɩɛdi naŋ dʋɔ wɩɛ na. 25 Gʋ Pɔɔlʋ a tawɩ chirigi, chaŋ n wʋsɛ na wɩɛ di gaa gaa kɔŋ wɩɛ na, nyɩŋtɩɛ chaŋ Felisi sɛ wʋ tawɩ sɛ, <<Dɩtɩɛna dɩ mɩɛ dɩmʋŋ. Nyaa dɩlɛ lam. Ma yu saŋa na, maa kpiri yagɛ nyaŋ.>> 26 Dɩmʋŋ saŋa gana na, wʋ wɩɛna tamaa gʋ Pɔɔlʋ aja wʋ a fa ɩ wɩsɛ aterembie. Dɩmʋŋ dʋɔ wʋ a dɩlɛ wʋ a kpiri wʋ a yagɛ ɩ na wʋ na ɩ baa biri alijima.

27 Bɩŋsɛ sɩla wʋrʋgbɩɛ na, Pokiyo Fesito gaa baŋ Felisi nafara naŋ. Ama gʋ Felisi aja sɛ wʋ a yɩɛ bʋrʋ darɛ na Yudatina baa asasu wʋ dʋɔ na, wʋ yela Pɔɔlʋ danɛ dɩtʋɔtɩŋ.