1 Maŋ Luka maa sabɩɛ tanɛ gana maa fa bɩnɛ Tiyofilosi. Ma tanɛ gaa ma chɩŋkpɩɛ sabɩɛ lɩɩna ŋii Yesu fara wʋ a yɩɛ na wʋ kalaa ŋii kpiniŋ 2 mʋ gaa tala wɩɩ gaa Ɩsʋɔ mʋ ɩ ju Ɩsʋɔ adugbe. Pɔɩ na wʋ a ju Ɩsʋɔ adugbe na, wʋ pala na Ɩsʋɔ Feliŋ ŋii dʋɔ kalaa wʋ kpirida baa wʋ lɩsɛ na ŋii ba n yɩɛ. 3 Yesu awʋrʋfʋɔ wʋrʋgbɩɛ na, wʋ lɩsɛ wʋ wʋsɛ kalaa wʋ kpirida baa gbɩɛsɛ fɔɩ dʋɔ na ŋii kalaa gʋ wʋ chaɩ nkpa naŋ. Gʋ feŋ nkpa naŋ wʋrʋgbɩɛ na, wʋ lɩsɛ wʋ wʋsɛ kalaa ba wɩɛ ŋɩla (40), sɛ wʋ tawɩ Ɩsʋɔ Juori gaa wɩɛ. 4 Ga wɩɩ darɛ, gʋ wʋ na ba a di na, wʋ dʋ ba sɛ, <<N baa lɩɩ Yerusalem, ama n daa gafaasa gaa Majuo tawɩ si sɛ wʋ a fa amɩɛ, gaa ɩ nyii gʋ ma tawɩ ga wɩɛ na. 5 Akala takɩɛ Yohane mʋ lɩŋ bɛ sɔ bakpa, ama wɩɛ akalasa ŋarɛ wʋrʋgbɩɛ na, Ɩsʋɔ aja mʋ wʋ Feliŋ sɔ amɩɛ.>>

6 Gʋ Yesu na wʋ kpirida baa sɩla na, ba tasɛ ɩ sɛ, <<Kpaŋjuo, dɩtɩɛna nyaa ti bɔrɛ mʋ juori gaa fa Isiralitina yaa?>>

7 Sɛ wʋ tawɩ ba sɛ, <<Ŋɩ ba yɩɛ amɩɛ wɩɛ takɩɛ n jiŋ saŋa yaa wɩɩ gaa Juo wʋŋ mʋ wʋ tɩŋtɩŋ wʋ yikuo lɩsɛ si na a. 8 Ama Ɩsʋɔ Feliŋ kɔŋ amɩɛ dʋɔ na ɩɩ yu doŋ, na ɩ yɩɛ ma seriyatina Yerusalem, Yudiya na Samariya tibi kpiniŋ dʋɔ, na tibi dʋɔ gapɩlɛkʋma.>>

9 Gʋ wʋ tawɩ ŋina taŋ na, Ɩsʋɔ mʋ ɩ ju Ɩsʋɔ adugbe yela baa kɩɛ ɩ sɛ Ɩsʋɔ tanɩɛ fu wʋ dʋɔ lɩɩ ba asa dʋɔ.

10 Gʋ baa kɩɛ Ɩsʋɔ tanɛ naŋ na dieli gʋ wʋ a ju na, gabʋanaŋ sɛ baala bala barɛ gaa sɩŋ ba jaŋ ba fuona abʋrɩ afʋlʋma. 11 Sɛ ba tasɛ ba sɛ, <<Galaliya baala, be n yɩɛ sɛ ɩ sɩmɩɛɩ jɩna ɩ kɩɛ adugbe? Yesu wʋdʋŋdʋlʋŋ wina wʋŋ ba mʋ ɩ lɩɩ amɩɛ jaŋ ju Ɩsʋɔ adugbe na, dɩmʋŋ sɛ wʋ a ti bɔrɛ kɔŋ ganaŋkʋ ɩ na ɩ wʋ a ju Ɩsʋɔ adugbe na.>>

12 Sɛ kpirida baa bɔrɛ lɩɩ bʋrɔŋ bie garɛ gaa baa yagɛ ga sɛ Olifi Dasɛ bʋrɔŋ dʋɔ ju Yerusalem. Lɩɩ Yerusalem ju dɩmaŋ aja yɩɛ mayili salɛ. 13 Gʋ ba tala Yerusalem dɩɛ naŋ na, ba jiŋ abaŋsʋrʋ ju adugbe danɛ gaa ba cha ba chaɩ ga tɩba na naŋ. Baa ba wɩɛ dɩmaŋ na n nyina Petero, Yohane, Jamesi na Andurusi, Filipo na Tomasi, Batolomiyo na Matiyo, Yakubu wʋŋ wʋjuo n nyina Alifiyosi na Simoŋ wʋŋ wʋ kpi Sɩlɔtɩ dikpeŋ gaa dʋɔ na, na Yudasi Yakubu bu. 14 Ba kpiniŋ na ala barɛ na Yesu wʋnaa Mariya na wʋnabie baa jaŋi saŋa kʋma baa jɔ dɩga.

15 Dɩmʋŋ gɩyɩɛnɩŋ ŋina naŋ na, Petero kʋlʋ sɩŋ Kirisito lɩɛdɩra tɩba [lɩɛdɩra dikpeŋ gaa aja yɩɛ bakpa gafie garɛ na nkuo] 16 sɛ wʋ tawɩ sɛ, <<Ma dɔŋa Yudatina, ŋɩ tiri gʋ Ɩsʋɔ Sabɩɛwɩɛ ŋii a kɔŋ tɩba ŋii Ɩsʋɔ Feliŋ pala na Dawidi dʋɔ tawɩ lɩɩna Yudasi wʋŋ wʋ aaŋ ja wʋ a pala ba asanaŋ na baa chaŋ Yesu na. 17 Yudasi cha kpi daa dʋɔ sɛ daa na ɩ n yɩɛ dɩmʋŋ dɩtʋm gana.>>

18 [Yudasi lɩɛ tibi lɩɩ tɔnʋɔ gaa wʋ yu lɩɩ wʋ dɩsʋbʋ gaa wʋ yɩɛ na naŋ, diele gaa wʋ sala wʋ nyi dʋɔ sɛ wʋ patɩɛ sɛ wʋ luobie kpiniŋ lɩɩ sɛ wʋ sɩŋ. 19 Wʋkʋma wʋŋ wʋ wɩɛ Yerusalem nyii wɩɛ ŋina, dɩmʋŋ dʋɔ baa yagɛ dɩmʋŋ tibi gana ba dɩtawɩ naŋ sɛ Akelidama, ga tie n nyina sɛ Asima Tibi.]

20 Sɛ Petero ti tawɩ sɛ ba sabɩɛ numba tanɛ gaa naŋ sɛ,

<<Wʋ waa n bɩrɩŋsɛ dɩtakpaŋ;

wʋrʋ n baa cha ga tɩba>>✝

Sɛ ba ti sabɩɛ sɛ,

<<N yela na wʋrʋ a sɩŋ wʋ nafara naŋ asanaŋtina dɩtʋm naŋ.>>✝

21 Dɩmʋŋ dʋɔ ŋɩ tiri gʋ dɩ n lɩsɛ baala baa tɩba wʋrʋ na wʋ a kpi daa dʋɔ. Dɩ daga na baalɛ wʋŋ a yɩɛ wʋŋ daa na ɩ dɩ palɛ saŋa gaa Kpaŋjuo Yesu chaɩ daa jaŋ na, 22 lɩɩ saŋa gaa Yohane sɔ bakpa Ɩsʋɔ sɔ mʋ gaa tala saŋa gaa ba mʋ Yesu lɩɩ daa jaŋ. Ŋɩ tiri gʋ dɩmʋŋ bakpa bana tɩba wʋrʋ a kpi daa dʋɔ na dɩɩ di Yesu feŋ lɩɩ sɩŋ naŋ dʋɔ seriya.

23 Dɩmʋŋ dʋɔ ba lɩsɛ bakpa bala. Baa n nyina Yosefu wʋŋ baa yagɛ ɩ sɛ Basabasi [sɛ ba ti baa yagɛ ɩ sɛ Jositosi] na Matiyasi. 24 Sɛ ba jɔ dɩga sɛ, <<Kpaŋjuo nya jiŋ wʋkʋma wina digela naŋ. Kalaa daa baala bala bana tɩba wʋŋ nya lɩsɛ na 25 wʋ a gaa yɩɛ kpirida dɩtʋm gaa Yudasi yela si sɛ wʋ ju diele gaa wʋ daga na.>> 26 Dɩmaŋ sɛ ba lɔ mbi, sɛ ba lɩsɛ Matiyasi. Dɩmʋŋ dʋɔ ba mʋ ɩ kpi kpirida gifi darɛ baa dʋɔ.