1 Ndugu zangu, icho huchilonda mmoyo wangu na kuchilomba kwa Mulungu ni Waizilaeli wayangu wahonyigwe. 2 Huwalongeleni kweli, want'hu ao wakuilava nk'hani kumulonda Mulungu, mbali kumulonda kwao Mulungu hakukufaya. 3 Kwavila hawamanyile Mulungu ivoakuwatenda want'hu watogoligwe halongozi hake. Nao wakaandusa kugeza kukola nzila yawe wenyewe, wailema nzila ya Mulungu ya kuwatenda want'hu watogoligwe halongozi hake. 4 Ivo kwiza kwa Kilisito kuyatenda malagilizo yawe sio chint'hu cha kusegamiligwa haukutogoligwa want'hu halongozi ha Mulungu, mbali want'hu wakutogoligwa halongozi ha Mulungu kwa kumtogola Kilisito.

5 Kwa mbuli iyo ya mnt'hu kutogoligwa halongozi ha Mulungu kwa kukola Malagilizo, Musa kandika vino, "Mnt'hu yoyote akatenda vila malagilizo yakulonda, naakale vila malagilizo yakulonda." 6 Mbali kula kutogoligwa halongozi ha Mulungu kwa nzila ya kutogola, kukulonga vino, "Usekulonga mumoyo wako, niyani naakwele kuulanga?" Kulonga ivo kulinga gesa, kumgala Kilisito hano hai isi. 7 Wala usekulonga "Niyani naatelemke hadi kuzimu?" Uko nio kulonga, kumbweleza muugima Kilisito. 8 Hata ivo Maandiko ya Mulungu yakulonga vino, "Mbuli ya Mulungu ihaguhi naweye, immumlomo mwako na immoyo mmwako." Mbuli iyo nio ila chikalile chikuilonga. 9 Kwavila ukalonga mmulomo mmwako, "Yesu ni Mndewa." Na ukatogola mmoyo mmwako kuwa Mulungu kambweleza mugima, nauhonyeke. 10 Kwavila mnt'hu akatogola kwa moyo wake, akutogoligwa halongozi ha Mulungu, na mnt'hu akatogola na kulonga kwa mulomo wake, naahonyeke. 11 Mandiko ya Mulungu yakulonga vino, "Mnt'hu yoyote akulonda kumtogola Yesu sekeagumigwe chinyala." 12 Habule mbuli ikulonda kuwabagula hagati ya Wayahudi na want'hu sio Wayahudi, kwavila Mulungu ni Mulungu wa want'hu wose, nae akuwataza want'hu wose wakumulomba. 13 Gesa Mandiko ya Mulungu ivoyakulonga, "Mnt'hu yoyote akulonda kumtanga Mndewa kwa kumulomba, naahonyigwe." 14 Mbali nawamulombeze ila hawakumtogola? Na wadaheze kumtogola ikawa hawanahulika mbuli zake? Nawahulikeze bila ya mnt'hu wa kuwalongela? 15 Nao nawadaheze kulonga mbuli ya Mulungu bila kutumigwa? Gesa Mandiko ya Mulungu ivo yakulonga, "Ni mbuli yakubwedeza nk'hani kwiza kwa want'hu wakuilonga Mbuli Idamane!" 16 Mbali sio want'hu wose hawaihokele Mbuli Idamane. Hata Isaya mulotezi wa Mulungu kalonga, "Mndewa, niyani aitogolile nt'hume yetu?" 17 Ivo, kutogola kukwandusa muukuhulika Mbuli Idamane, na Mbuli iyo Idamane ikwiza kwa kuhulika mbuli ya Kilisito. 18 Mbali huuza, vino, want'hu ao hawahulike mbuli iyo? Ena, wahulika, gesa Mandiko ya Mulungu ivoyakulonga,

"Want'hu walonga nt'hume ya Mulungu chila hant'hu mui isi,

na want'hu wakahulika nt'hume ya Mulungu chila hant'hu mui isi."

19 Huuza kaidi, vino, ikudahika kuwa want'hu wa Izilaeli wakala hawamanyile? Bule! Musa mwenyewe kalonga kuusu mbuli iyo,

"Naniwatende muwaonele miongo want'hu sio wa isi yangu

Naniwatende Waizilaeli waone maya kufosela want'hu hawakumanya chochote."

20 Isaya mulotezi wa Mulungu akalonga bila kuogoha mbuli alongeligwe na Mulungu kuwa,

"Niilagisa kumwawe kwa want'hu wakalile hawakunilonda,

niwatenda wanimanye kumwawe want'hu hawaziuzile mbuli zangu."

21 Mbali kwa mbuli ya Waizilaeli, Mulungu kalonga, "Msanya wose niwagololela mikono yangu kuwahokela want'hu hawakuhulika na hawakutogola."