1 Ivo mbuyangu, ikawa ukuwalamula wamwenga, hukudaha mbwi kuigombela hata ikawa weye ni niani. Kwa vila kwa kuwalamula wamwenga, ukuilondela mbuli zihile weye mwenyewe kwa vila naweye ukutenda mbuli zilazila ukuwalamulila wamwenga. 2 Chikumanya kuwa ulamuzi wa Mulungu kwa wala wakutenda mbuli gesa izo ni ulamuzi wa kweli. 3 Na weye ndugu yangu, ukuwalamula wala wakutenda mbuli izo kuno na weye ukuzitenda mbuli izoizo, vino, ukumanya ukudaha kuubenga ulamuzi wa Mulungu? 4 Egu, ukuuzela wingi wa ujomwa wake na kufinyiliza kwake na kugozela kwake, bila kumanya kuwa uo ujomwa wake ukukulongoza ili uleke zambi na kumbidukila Mulungu? 5 Mbali weye hukuhulika na haukulonda kuleka kutenda zambi, ivo ukuimemezela maya muna isiku ila ya lamulo dya Mulungu dikulonda kugubulwa. 6 Siku iyo Mulungu naamulihe kila mnt'hu kwa chila atendile. 7 Want'hu wala wakugendelela kutenda yajomwane na wakulonda kutunyigwa na kutogoligwa na kukala bila kudanganika, ao Mulungu naawenk'he ugima wa siku zose bila uhelelo. 8 Mbali kwa wala want'hu wakutenda mbuli zawe wenyewe na wala wakuilema kweli ya Mulungu na kukola mbuli zihile, wakumgela maya Mulungu, na Mulungu naawalamule. 9 Ivo, nakuwe na mahenyeko na magayo kwa want'hu wose wakutenda mbuli zihile, kwandusila kwa Wayahudi na kwa want'hu sio Wayahudi. 10 Mbali Mulungu naawatende wahongezigwe na kutogoligwa, nakuwe na nt'hindiwalo kwa want'hu wose wakutenda mbuli zidamane, kwandusila kwa Wayahudi na want'hu sio Wayahudi. 11 Kwavila, Mulungu akuwalamula want'hu gesa vila ikulondigwa bila kulola yeye niani. 12 Want'hu wose sio Wayahudi wala wakutenda zambi bila kuyamanya Malagilzo ya Mulungu amwink'hile Musa nawaangamile bila Malagilizo. Na wala Wayahudi wakutenda zambi kuno wakuyamanya Malagilizo ya Mulungu amwink'hile Musa nawalamuligwe na Malagilizo. 13 Kwavila sio wala wakuyahulika Malagilizo ndo nawatogoligwe halongozi ha Mulungu. Mbali wala wakuyahulika na kuyatenda Malagilizo ao ndo wakulonda kutogoligwa halongozi ha Mulungu. 14 Kwavila want'hu sio Wayahudi, wala wabule Malagilizo ya Musa, mbali wakatenda kulawa muna miyoyo yawe yala yakulondigwa na Malagilizo, ao wenyewe wakuwa na Malagilizo mgati mmwao, hamwenga na kuwa wabule Malagilizo ya Musa. 15 Want'hu ao ivowakukala wakulagisa kuwa wakumanya yala akuyalonda Mulungu gesa vila Mulungu kayaandika Malagilizo yake mgati mmwawe na magesa yawe yana udahi ya kulamula yadamane na yehile. 16 Kwa Mbuli Idamane ino huilonga, nivo ikulonda kuwa siku ya Mulungu akalonda kuzilamula mbuli zose zifisike za want'hu kufosela Yesu kilisito.

17 Mbali weye ukuitanga Muyahudi, na kuyasigamila Malagilizo na ukuigoda kuwa ni mnt'hu wa Mulungu. 18 Ukuyamanya yala akuyalonda Mulungu na ukudaha kusagula mbuli ukulondigwa kuzitenda, kwa vila kuifunza Malagilizo. 19 Weye ukuiona kuwa chilongozi wa want'hu hawakuona na ulumuli kwa wala want'hu wamdiziza, 20 ukuiona mfunza wa wahenye na mfunza wa want'hu hawanaumanya ukweli wa utogozi, kwavila ukulonga una umanyi wa kweli muna ayo Malagilizo. 21 Weye ukuwafunza wamwenga, hangi hukuifunza weye mwenyewe? Ukuwalongela wamwenga msekubawa mbali weye mwenyewe ukubawa. 22 Ukuwalongela wamwenga msekutenda uhank'hu, mbali weye mwenyewe ukutenda uhank'hu, ukwihizwa na nyank'hinti za milungu, mbali weye mwenyewe ukubawa vint'hu kulawa muzinyumba za kuwafugamalila milungu iyo. 23 Weye ukuigoda kuwa ukuyamanya Malagilizo, mbali ukumzela Mulungu kwa kuleka Malagilizo yake. 24 Gesa Maandiko ivoyalongile, "Want'hu wa isi zimwenga nawamdukane Mulungu kwaajili yenu mweye Wayahudi."

25 Kwavila ulungwana ukufaya nk'hani ukawa ukuyatoza Malagilizo, mbali ukawa kuyaleka ukuwa gesa mnt'hu hanaupata ulungwana. 26 Ivila, ikawa mnt'hu wa isi zimwenga hanapata ulungwana mbali akuyatenda yala yalagizwe muna Malagilizo Mulungu akumtogola mnt'hu iyo na akuwa gesa mnt'hu apatile ulungwana. 27 Ivo, want'hu wa isi zimwenga nawawawalamule mweye Wayahudi, ikawa muleka kuyatoza Malagilizo, na muna Malagilizo na ulungwana. Na kuno ao wayatoza Malagilizo na wanaulungwana. 28 Ino ni kulonga kuwa, sio chila mnt'hu akwelekigwa na Muyahuydi naawe ni muyahudi wa kweli, wala mnt'hu hakuwa mnt'hu wa Mulungu kwavila kenk'higwa ulungwana. 29 Mbali Muyahudi wa kweli ni ila eli Muyahudi kwa mgati, mbali ni ila apatile ulungwana muna umoyo wake. Mbuli ino ikutendwa na Muhe, na sio mbuli ya maandiko ya Malagilizo. Na mnt'hu eli vino nahokele utunyo kulawa kwa Mulungu na sikulawa kwa want'hu.