1 Chila mnt'hu akulondigwa awahulike vilongozi wa selikali, kwavila ulongozi wose ukulawa kwa Mulungu na vilongozi ao waikigwa na Mulungu. 2 Ivo mnt'hu yoyote akadilema lagizo da vilongozi wa selikali, kadilema lagilizo da Mulungu, na ao wakutenda ivo nawalamuligwe. 3 Kwavila vilongozi hawakuogohwa na want'hu wala wakutenda mbuli zidamane, mbali wakuogohwa na wala want'hu wakutenda mbuli zihile, ivo ukalonda usekumuogoha kilongozi, ukulondigwa utende mbuli zidamane nae nakutunye. 4 Kwavila vilongozi wa selikali ni wasank'hani wa Mulungu wakusank'hana kwaajili ya kuwatazani mweye, mbali ukatenda mbuli zihile ogoha, kwavila vilongozi hawakulamula kukawa kubule ubananzi. Ao ni wasak'hani wa Mulungu na Mulungu akuwalamula wala wakutenda mbuli zihile. 5 Ivo, mkulondigwa kuwategeleza vilongozi, mbali sio kwa kuogoha maya ya Mulungu, mbali kwavila mweye nio mkumanya kuwa Mulungu nio akubweda muwe mkutenda ivo.

6 Kwaajili ya mbuli iyo mweye mkuliha kodi, kwavila vilongozi ni wasank'hani wa Mulungu, kwa vila siku zawe zose wakulongoza. 7 Ivo, muliheni kila mnt'hu icho mkudaigwa, ikawa ni nt'haja liheni nt'haja, ikawa ushulu liheni ushulu, akulondigwa kuogohwa muogoheni.

8 Mleke kudaigwa chint'hu chochote na mnt'hu mbali muibwede. Kwavila ila akumbweda miage akuwa kayatenda Malagilizo. 9 Kwavila Malagilizo ayo yakulonga vino, "Usekutenda ugoni, Usekukoma, usekumelela mate." Malagilizo yano na yamwenga yose yaikigwa mdilagilizo dimwe da, "Mbwede miago gesa ivoukuibweda weye." 10 Ivo ukambweda miago hukudaha kumtendela miago mbuli ihile. Kwavila ubwedo ukutenda gesa Malagilizo ivoyakulagiliza. 11 Namweye tendeni vino kwa kuchimanya chipindi chiwile nacho haluse, ni chipindi cha kuinuka mzint'hongo, kwavila uhonyi wetu uhaguhi nk'hani kufosa chipindi chila ivo chiandusile kumtogola Mndewa. 12 Chilo chihaguhi na kucha, na lugunzu uhaguhi na kwingila. Ivo chileke kutenda mbuli zihile zila want'hu wakutenda mdiziza, chitende mbuli zidamane za muulumuli. 13 Siku zose chikulondigwa chikale goya, kwavila chikukala muulumuli wa msanya, na sio kwa kubunk'hanya, kung'wa upele, kulonda chila chint'hu chiwe chako, uhank'hu, ndwagi na miongo. 14 Badala ya kutenda mbuli zihile, mgese na mtende gesa Mndewa wetu Yesu Kilisito.