1 Hulonda mummanye lumbu dyetu Foibe, ila akusank'hanila want'hu wamtogolile Kilisito weli mdibululu da Kenkelia. 2 Muhokeleni goya kwaajili ya Mndewa gesa vila want'hu wa Mulungu ivo wakuhokelwa, Mwink'heni chochote chila akuchilomba kulawa kumwenu, kwavila yeye kawa mtazi wa want'hu wengi, nanie vilavila kanitaza. 3 Ndamsileni Pilisila na Akila, wasank'hani wayangu muna usank'hani wa Kilisito Yesu. 4 Want'hu ao walawila muukauje kukomigwa ili nie nihone. Ikulondigwa wahongezwe, sio nie muhala nio hulondigwa niwahongeze, mbali vilavila kwa want'hu wa Mulungu sio Wayahudi wakumtogola Kilisito. 5 Ndamsileni want'hu wamtogole Kilisito, ao wakufikana mzinyumba zawe. Vilavila ndamsileni mbuyangu Epaineto ila akalile wamwanduso kumtogola Kilisito kulawa mkoa wa Asia. 6 Ndamsileni Malia ila asank'hanile nk'hani kwa ajili yenu. 7 Ndamsileni Andiloniko na Yuniya, ao ni ndugu zangu wakalile mchifungo hamwenga na nie, ao wakumanyika nk'hani na watumigwa, na ao wanilongola kumtogola Kilisito. 8 Ndamsileni mbuyangu Ampiliato, ino ni miangu mui kuiyunga na Mndewa. 9 Ndamsileni Ulibano, msank'hani miyetu mukumsank'hanila Kilisito, vilavila humlamsa mbuyangu Staku. 10 Ndamsileni Apele, agezigwe na kulagisa kuwa Kilisito akumtogola kweli. 11 Ndamsileni ndugu yangu Helodioni, na want'hu wamtogole Kilisito weli mui kaya ya Nalikiso waiyungile na Mndewa. 12 Ndamsileni Tilifaina na Tilifosa, wanawake ao wakuilava nkhani kumsank'hanila Mndewa. Vilavila humlamsa ndugu yangu Pelisi, iyo nae ni mwenamke kailava nkhani kumsankhanila Mndewa. 13 Ndamsileni Lufo, mnt'hu mgangamavu nk'hani mukumsank'hanila Mndewa, hamwenga na mami yake, akalile ge mami yangu ivila. 14 Ndamsileni Asinkilito na Filegoni na Helima na Hema na want'hu wose weli hamwenga nao. 15 Ndamsileni Filologo, Yuliya, Nelea na Lumbu jake, na Olimpa, na want'hu wose wa Mulungu weli hamwenga nao. 16 Lamsaneni kwa kulagisa mkubwedana. Ndamsa zenu kulawa kwa want'hu wose wamtogole Kilisito.

17 Ndugu zangu, huwalombeni nk'hani kuwa muiteganye na wanthu wala wakuwatenda muibananganikilwe, na kuwatenda want'hu wengi waleke kukola yala mfunzigwe. Muinege na want'hu ao, 18 kwavila want'hu gesa ao hawakumsank'hanila Kilisito Mndewa wetu, mbali wakusank'hanila zinda zawe. Kwa mbuli zawe zidamane na ulongelo wawo wa kuhembuliza na kuyazaganya myoyo ya want'hu wadamane. 19 Kwavila chila mnt'hu kahulika mbuli za utegelezi wenu mui mbuli Idamane, nie nimemwa na denk'ho kulu kwaajili yenu, mbali hulonda muwe na umanyi muna zimbuli zidamane na mleke kutenda mbuli zihile. 20 Mulungu akuwenk'heni nthindiwalo, seke akawe kumuhonda Shetani hasi ya migulu yenu. Wende wa Mndewa wetu Yesu Kilisito ukale na mweye. Tawile. 21 Msank'hani miangu, Timoseo akuwalamsa. Vilavila Lukio na Yasoni na Sosipita, Wayahudi wayangu vilavila wakuwalamsani. 22 Na nie Telitio niandikile balua ino, huwalamsa kwa zina dya Mndewa. 23 Mkaya wangu Gayo, hamwenga na want'hu wose wamtogole Kilisito wala wakufikana haikaya yake wakuwalamsa. Vilavila na Elasito mkulu wa kutimalila hela mdibululu dino na ndugu yetu Kwalito wose wakuwalamsa. 24 Wende wa Mndewa wetu Yesu Kilisito uwe hamwenga na mweye mose. Tawile.

25 Elo, atunyigwe Mulungu eli na udahi wa kuchitenda chigangamale muukutogola kwetu kufosela Mbuli Idamane ya Yesu Kilisito nikalile huilonga kumwenuniil. Mbuli iyo ikala ifisika siku nyingi. 26 Mbali haluse mbuli iyo igubulwa na ikumanyika kufosela maandiko ya walotezi na kwa lagilizo da Mulungu wa siku zose bila nk'homelezo ugubuligwa kwa want'hu, ili want'hu wa isi zose wamtogole na wamtegeleza. 27 Mulungu eli adumwenga na eli na umanyi wose, atunyigwe kufosela Yesu Kilisito siku zose bila nk'homelezo. Tawile.