1 Ivo ndugu zangu, kwavila Mulungu kachionela ubazi nk'hani, huwalombeni nk'hani ilaveni mweye wenyewe kwa Mulungu, muwe gesa nt'hambiko ili na ugima ila ya Mulungu na yakumbwedeza Mulungu. Vino nivo mkulondigwa kutenda kumfugamalila Mulungu. 2 Lekeni kugesa gesa want'hu wa isi ino ivo wakugesa, mbali mbidulwe kwakutendigwa wapya mgati yenu, ili mdahe kuyamanya yala akuyalonda Mulungu na kumanya mbuli ikudamana ikumbwedeza na ikamilike halongozi hake.

3 Kwa ujomwa niink'higwe na Mulungu, hulonga na mweye mose, chila mnt'hu aleke kulonda mbuli nk'hulu kufosa ivo akulondigwa awe, muipime wenyewe gesa ivo mwili kwa utogozi ula Mulungu amwink'hile chila mnt'hu. 4 Gesa ivomkumanya mtufi ni umwe na una mp'hingili nyingi, mbali chila mp'hingili ikutenda sank'hano yake. 5 Vilavila na cheye, ingawa chiwengi, mbali chimtufi umwe kwa kuiyunga na Kilisito, na chila mnt'hu ni chimp'hingili cha miyage. 6 Ivo chila mnt'hu ana chitumetume chake kulawana na ujomwa wa Mulungu achink'hile. Eli na chitumetume cha ulotezi naalotele kwa kutogola kwake. 7 Ila eli na udahi wa kusank'hana sankhano ya Mulungu naasank'hane. Eli na udahi wa kufunza naafunze. 8 Ila eli na udahi wa kuwagela moyo wamwenga naatende ivo. Ila akudaha kuwenk'ha wamwenga vint'hu eli navo naatende ivo kwa kudenk'helela. Mtimalizi naatimalalile kwa kugangamala na ila ana moyo wakuwataza wayage naatende ivo kwa denk'ho.

9 Wabwedeni wayenu na ubwedo wenu uleke kuwa naubilikizi wowote. Ivo ikulondigwa mleke kutenda zambi, bali mtende mbuli zidamane siku zose. 10 Mbwedane mweye kwa mweye gesa ndugu, kila mnt'hu amuone miage akufaya nk'hani. 11 Lekeni kuwa wavu muu kuisa, mbali msankanileni Mulungu kwa moyo wenu wosa. 12 Lolelo dyenu kufosela Mulungu uwatende mbwede, na mmahenyeko mfinyiliize na kugendelela kumulomba Mulungu siku zose. 13 Watazeni wayenu wakumtogola Kilisito gesa mweye vint'hu venu na muwahokele watafi kwa kudenk'helela.

14 Walombeleni yadamane wanongwa wenu ili Mulungu awenk'he yadamane na sio kuwenk'ha yehile. 15 Denk'heleleni hamwenga na wose wakudenk'helela, na lileni hamwenga na wala wakulila. 16 Mkale goya mweye kwa mweye. Lekeni kuigoda kuwa mkumanya kuhuma wamwenga, mbali mtogole kukala na want'hu mbugilambugila. Lekeni kuiona kuwa mna umanyi nk'hani.

17 Mnt'hu akawatendeleni mbuli ihile, mweye msekumuliha mbuli ihile, mbali mtende yala want'hu wakuyamanya kuwa yadamana. 18 Mtende mbuli yoyote ila mkuidaha ili muwe na nt'hindiwalo na want'hu wose.

19 Ndugu zangu mweye huwabwedeni, msekulihiza yehile, mbali mlekeleni Mulungu mbuli iyo, kwavila muna Maandiko ya Mulungu, Mulungu akulonga, "Mbuli ya kulihiza ni yangu nie." 20 Vilavila, Maandiko ya Mulungu yakulonga, "Mnongwa wako akawa na nzala, mwink'he ndia adye, akawa na nk'hilu mwik'he mazi ang'we. Ukatenda ivo, naumtende aone chinyala nk'hani."

21 Usekuhumwa na yehile, mbali yahume yehile kwa kutenda yadamane.