1 Muhokeleni ila eli na utogozi mdodo, na msekupinzana nae kwa chila akuchigesa. 2 Want'hu hawakulingana, mnt'hu imwe kwa kutogola kwake akudya chint'hu chochote, mbali mnt'hu imwenga kwa kutogola kwake kudodo, akudya mboga za mazani muhala. 3 Ila mnt'hu akudya chila chint'hu aleke kumzela ila hakudya chila chint'hu. Na ila akudya mboga za mazani muhala aleke kumulamula ila akudya vint'hu vose, kwavila Mulungu kamtogola ivoeli. 4 Weye niani hata kumulamula msank'hani wa miago? Kutimalala egu kungwa kwake iyo ni sank'hano ya mkulu wake, ena nae natimalale kwavila Mndewa Yesu akudaha kumtimalisa. 5 Mnt'hu imwe akudaha kuitunya siku imwe kuwa ikufaya kuhuma siku imwenga, na mnt'hu imwenga akuona kuwa siku zose zikulingana. Chila mnt'hu na atende ivo kwa yala akuyatogola. 6 Ila akuona kuwa siku imwe ni nk'hulu kuhuma siku imwenga akutenda ivo ili amtunye Mndewa. Ila akudya chochote chila, nae akutenda ivo kwaajili ya kumtunya Mndewa, kwavila akumwink'ha hewala Mulungu. Vilavila ila akudya ndia akutenda ivo kwaajili ya kumtunya Mndewa, nae akumwink'ha hewala Mulungu. 7 Kwavila habule mnt'hu akukala kwaajili yake mwenyewe, wala habule mnt'hu akudanganika kwaajili yake mwenyewe. 8 Ikawa chiwagima, chiwagima kwaajili ya kumbwedeza Mndewa, na chikadanganika chikudanganika kwaajili ya kumbwedeza Mndewa. Ivo chikawa wagima egu chikadanganika cheye ni want'hu wa Mndewa. 9 Nio mana Kilisito kadanganika na kubwela mugima ili adahe kuwa Mndewa wa want'hu wose weli na ugima na wadanganike. 10 Ivo, hangi ukumulamula miago? Egu, hangi ukumzela miago? Kwavila cheye chose nachilamuligwe halongozi ha Mulungu. 11 Kwavila gesa ivoiyandikigwe muna Maandiko ya Mulungu, Mndewa akulonga,

"Nie ni Mulungu nili mgima,

chila mnt'hu naanitumbalile,

na chila mnt'hu naalonge yeye mwenyewe kuwa nie ni Mulungu."

12 Ivo, chila mnt'hu naalonge mbuli azitendile halongozi ha Mulungu.

13 Ivo, chileke kuwalamula wamwenga, mbali chitogolelane kuleka kutenda mbuli zikulonda kuwatenda wamwenga wagwe mzizambi. 14 Nie humanya kweli, Mndewa Yesu kanilagisa kuwa habule chint'hu chochote hachikufaya, mbali mnt'hu akaona kuwa chint'hu icho hachikufaya nachiwe hachikufaya kumwake mnt'hu iyo. 15 Ndugu yako akawa anachiholo kwa ndia ukudya, aho weye nauwe hukulongozigwa na ubwedo. Ivo icho ukudya kisekutenda ndugu yako age. Kwavila Kilisito kadanganika kwaajili yake. 16 Ivo, usekutogola chint'hu ukuchiona chidamana chizeligwa na wamwenga. 17 Kwavila umwene wa Mulungu sio kwa mbuli ya kudya na kung'wa, mbali umwene wa Mulungu ni mbuli ya kutogoligwa halongozi ha Mulungu, nt'hindiwalo na ubwedo ukulawana na Muhe wa Mulungu. 18 Ivo, mnt'hu akumsank'hanila Kilisito gesa ivo, iyo nio akumbwedeza Mulungu na kutogoligwa na want'hu. 19 Ivoelo, tendeni mbuli zidamane zila zikugala nt'hindiwalo na yala yakuchitaza kuzengana. 20 Elo, usekuibananga sank'hano ya Mulungu kwa mbuli ya ndia. Ndia zose zikufaya kudigwa, mbali haikufaya kudya ndia ila ikumtenda miago aingile mzizambi. 21 Vidamana usekudya nyama wala kung'wa divai, wala usekutenda chochote cha kumuhonza miago aingile mzizambi. 22 Ivo, tozeleza kila ukuchitogola hagati yako na Mulungu wako. Naabwede mnt'hu ila kutenda kila akuona kidamana bila kuilamula. 23 Mbali mnt'hu akawa ana mashaka na ndia ila akuidya akulamuligwa na Mulungu, naalamuligwe na Mulungu kwavila hadile kwa utogozi, na nt'hendwa yoyote haikulawana na utogozi ni zambi.