Kudanganika muna zizambi na kukala hamwenga na Kilisito
1 Elo chilongeki? Vino, chigendelele kutenda zambi ili ujomwa wa Mulungu wongezeke? 2 Bule! Kwa mbuli ya zambi cheye chidanganika muna zizambi, vino chikudahaze kugendelela kaidi kukala mzambi? 3 Egu, hammanyile kuwa cheye chose chibatizigwa muna Kilisito Yesu, chibatizigwa muna mukudanganika kwake? 4 Ivo chibatizigwe chizikigwa hamwenga nae ili gesa vila Kilisito ivoabwelile muugima, kwa nguvu za ukulu wa tata, ivoivo na cheye chidahe kukala muna ugima mpya. 5 Kwavila ikawa chiiyunga hamwe nae muukudanganika kwake, vilavila naachiyunge nae gesa vila yeye ivoabwelile muugima. 6 Chikumanya kuwa unt’hu wetu wa umwaka udanganika na kuhenyezwa hamwenga na Kilisito mumsalaba, ili nguvu ya zambi ibanangwe, chileke kuwa watwana wa zambi kaidi. 7 Kwavila mnt’hu yoyote akadanganika gesa ivo hamwenga na Kilisito, kaambuligwa kulawa mzizambi. 8 Ivo, ikawa chidanganika hamwenga na Kilisito, ivila chikutogola kuwa nachikale hamwenga nae. 9 Kwavila, chikumanya kuwa Kilisito kabwelezigwa kale muugima na sekeadanganike kaidi. Ivo kudanganika sekekumtalamile kaidi. 10 Kilisito ivo adanganikile kadanganika mala lumwe muhala, na kaihuma nguvu ya zambi na kukala kwake akukala kwa kubwedeza Mulungu.