1 Misiku mi Mose midi kwandi kinsinsya ki bima bina kwiza kuntwala, kansi midi nkatika myabende kifwani ki bima bebyobyo ko. Ni hahoho, mii na lulendo ko lwe lungisa bantu* bebobo bana finama ku Nzambi, mu minkayulu mi bakwe tatamananga mu haana kadi ntangu, mpe kadi mumvu. 2 Tala ti bantu bebobo bakwe sambilanga Nzambi mu mutindu bewowo, bayiza ba nkumbu yimosi kaka bavedila, nganunu bazaba mu mayindu ti basidi dyaka na masumu ko. Buna, baketi bika mu haananga minkayulu mimvimba. 3 Kansi mu minkayulu bemyomyo, bantu bakwe bambukanga moyo mu masumu mawu kadi mumvu. 4 Mu dyambu ti, menga ma ngombe zimbakala na ma nkombo zimbakala malendi katula nakani masumu ko.

5 Ni hahoho, Klisto bu kedi kwiza mu nza, wuta ti:

«Wuyangalala minkayulu mpe makabu ko,

kansi ngeye nitu wumpaana.

6 Wuyena nakani kyese ko mu munkayulu we yoka kibulu kimvimba,

na minkayulu mu dyambu di ndemvokolo yi masumu ko.

7 Buna nina ta ti: "Meno nina kwiza mebende ku ngeye, Oo Nzambi ani,

mu sadila luzolo lwaku,

bonso bu wudi wusonama mu buuku mu nkumbu ani.*"»

8 Wuta ntete ti:

«Wuyangalala na wutambula

nakani munkayulu ko, nakani makabu ko,

nakani munkayulu we yoka kibulu kimvimba ko,

nakani minkayulu mu dyambu di ndemvokolo yi masumu ko.»

Mpeleko Misiku mina lomba mu haana minkayulu bemyomyo. 9 Mboki wubwesa ta ti:

«Meno nina kwiza mu sadila luzolo lwaku.»

Ni bwabobo Nzambi, wukatula minkayulu mintama mu hingisa wu wandi. 10 Yesu-Klisto wusadila luzolo lu Nzambi. Wuyekola nitu andi nkumbu yimosi kaka ki mankululu, musamu wawowo wutunga dyaka kintwadi kyeto na Nzambi.

11 Kadi nganga-Nzambi kwe telamanga kadi kilumbu mu sala kisalu kyandi. Mpe kadi ntangu, minkayulu myamyomyo kwandi kakwe haananga mikwe lembolo katulanga masumu. 12 Kansi Klisto, bu kahaana munkayulu wumosi kwandi mu dyambu di masumu, mboki wuzakala mimvu ka mimvu ku kooko ku lubakala lu Nzambi. 13 Bwabu, kwakoko kana kingila ti Nzambi kasa mitantu myandi bitentokolo bi bitambi byandi. 14 Buna mu munkayulu wumosi, wulungisa mimvu ka mimvu bantu ba katunga dyaka kintwadi na Nzambi .

15 Mpeve Yilongo mpe wututeela wo kimbangi bu kata ti:

16 «Tala bwedi bwaabela luwawanu lu naatunga nawu,

ku manima ma bilumbu bebyobyo, Mfumu teedi ti:

Naatuula ntumunu zani mu mitima myawu,

mpe naasonika zo mu mayindu mawu.

17 Naabambukila dyaka moyo masumu mawu na misamu myawu mimbi ko.»

18 Ni hahoho, ti masumu matambudi ndemvokolo, kusiidi dyaka mfunu ko mu haana minkayulu mu dyambu di masumu.

19 Ni hahoho zimpangi, tuu na kimpwanza mu kota mu kihinga ki hyokidi kilongo, mu dyambu di menga ma Yesu. 20 Wutuzibudila nzila yimoona na yimoyo mu hwahwa di mulele ha mwelo, mpila mosi ti, mu dyambu di nsuni andi. 21 Tweka bwabu na Mfumu Nganga-Nzambi yi batuudidi ha mutu wu nzo-Nzambi. 22 Tufinameeno bwabu ku Nzambi na mutima wu makedika, mpe na kiminu kimvimba, mutima wuvedila mu mayindu mambi na nitu yisukuka mu mamba mavedila. 23 Tusimbidileeno nakekete kivuvu kyeto ki tuna kwe samuningi, mu dyambu ti Nzambi wukwikama kadi mu nsilulu zandi. 24 Tusalasaneeno yeto na yeto, mwanki tusyamasana mu zola na mu hidika misamu mimbote. 25 Tunyafunandi mvukani zeto bonso bahiika bahikidi na kifu bekyokyo. Kansi tusyamasaneeno yeto na yeto, mu dyambu ti luna yena, kilumbu ki Mfumu kyeka lukufi.

26 Tala ti mu luzolo lweto, tuna tatamana mu sumuka, ku manima bu tumeni longoka kikedika, kusiidi dyaka munkayulu wulendi katula masumu ko. 27 Musamu wumosi wisidi, ni mu kingila mu bunkuta bubwingi, mfundusu yi Nzambi na tiya tungolo twaanyengisa mitantu myandi. 28 Tala ti muntu tinguni Misiku mi Mose, mu kimbangi ki bantu bole hoti batatu, bana muhonda wulembolo muyenina kyadi. 29 Tomeeno yindula bwedi bwabela bu nsembolo yihyokidi kitezo ku muntu nyafuni Mwana-Nzambi, safudi menga ma luwawanu ma bamubyekila ku Nzambi, mpe tyeki Mpeve yi mulemvo e? 30 Mu dyambu ti tuzebi yondowo wuta ti:

«Meno naavutula mambi mu mambi,

mpe meno naavutula mvutu yifwanakani ku kadi muntu»,

mpe wuta dyaka ti:

«Mfumu waafundisa mukangu andi.*»

31 Nsisi zidi mu bwa mu moko ma Nzambi yimoyo!

32 Bambukeeno moyo mu mpasi zi luyena mu ntangu yihyoka. Mu bilumbu bebyobyo, ku manima me tambula kya ku Nzambi, luyena mpasi zizingi, luvibidila mu nsinsani yingolo. 33 Bantu bahiika ha kati dyeno babatuka na babayenisa mpasi ha meso ma bantu. Kansi bahiika baba bakubama mu sadisa yobobo babedi yenisanga mpasi zi bobobo. 34 Luyena mpasi ha kimosi na zinkole, mpe lutambula mu kyese baluzika mvwilu eno, mu dyambu luzaba ti, ludi na bima bihyokidi bimvwama bikwe zinganga mimvu ka mimvu.

35 Bwabu luzimbisandi kivuvu kyeno ki lwaabakila musendo wunene. 36 Mu dyambu ti, luu na nsatu mu vibidila mu lungisa luzolo lu Nzambi na mu tambula nsilulu zi katusiila. 37 Mu dyambu ti, wusonama:

«Mwa ntangu dyaka yifyoti, nkatika yifyoti kwandi,

mpe yondowo fweti kwiza waakwiza,

kaazingila ko.

38 Muntu wulunungu ha meso mani, waazinga mu kiminu,

kansi tala ti vutukisi manima, naamuyangalala ko*.»

39 Yeto tudi bantu bebobo bakwe vutukisanga manima ko, mpe bana kwenda mu zimbala. Tudi bantu baa na kiminu na baa mu nzila yi mpulusu.