1 Ni hahoho, tufweti kangama nakekete mu misamu mi tuyuwa, mwanki tulembolo zimbala. 2 Mu dyambu ti, Nzambi mambu ma kasamuna ku zinkaka zeto mu nzila yi zimbazi makedika madi. Wonso muntu wusafula mo mpe walembolo tumimina mo, wutambula kitumbu kifwanakani, 3 Buna bwedi twaavuukila tala ti tunyafuni mpulusu yiyinene beyoyo e? Mfumu, yandi bende wuntete wusamuna yo. Ku manima, bantu bebobo bayuwa Mfumu, batulonka makedika ma mpulusu beyoyo. 4 Mpe Nzambi wulonka makedika ma kimbangi kyawu mu bidimbu, mu misamu mingitukulu, mu bimangu bi mumpila-mumpila na mu minkayulu mi Mpeve Yilongo mi kahaana bonso buba luzolo lwandi.

5 Mu dyambu ti, ka ku nsye luyaalu lu zimbazi ko, Nzambi katuula nza yina kwiza ku mutwala, yi tuna zonzila. 6 Kuu na muntu mu Masonama wuta kimbangi eki:

«Muntu, nani kadi mwanki wumubambukila moyo e?

Hoti mwana muntu, nani kadi mwanki wumukeba e?

7 Mu mwa ntangu yifyoti, wumukulula ha ntadisi yi zimbazi,

mboki wumulwika mpu yi nkembo na yi nzitusu,

8 wutuula bima bimvimba ku nsye bitambi byandi.»

Tala ti Nzambi wumuhaana luyaalu lu bima bimvimba, buna lonka ti kasisa kima kilembolo ba ku nsye luyaalu lwandi ko. Bwabu tuna yena ko ti bima bimvimba bituulu ku nsye luyaalu lwandi. 9 Kansi nki tuna yena e? Yesu mu mwa ntangu yifyoti, bamukulula ha ntadisi yi zimbazi, mboki bamulwika mpu yi nkembo na yi nzitusu. Bila nki e? Mu dyambu ti, wuyena mpasi na wufwa. Mpe mu mulemvo wu Nzambi, Yesu wufwa mu vuukisa bantu bamvimba. 10 Nzambi wuhidika bima bimvimba, mpe yandi vwidi bima bimvimba. Wusa ti kalungisa Yesu mu nzila yi zimpasi zi kayena, mu kotisa baala babingi mu nkembo andi. Mu dyambu ti mpulusu awu yifuma ku Yesu, mpe yandi wuna banata koko.

11 Buna, Yesu kwe vedisanga bantu mu masumu mawu na yobobo bameni vedoso, bamvimba Tata dimosi badi. Ni hahoho, Yesu kana yena nsoni ko mu batumisina zimpangi zandi, 12 bu kata ti:

«Mbo nasamuna nkumbu aku ku zimpangi zani,

mbo nakukembisa ha kati di bundu di bantu.*»

13 Wuta mpe ti:

«Mbo nasa kivuvu kyani mu Nzambi.»

Wuta dyaka ti:

«Meno ewu, ha kimosi na baala bampaana Nzambi.*»

14 Bu tuzebi ti baala bebobo bamvimba baa na nsuni na menga, Yesu mpe yandi bende wuyiza ba muntu bonso yawu, mu lufwa lwandi, wubedisa Nkadyampemba wuu na ngolo ze honda bantu. 15 Ni bwabobo kakuudila yobobo baba, luzingu lwawu lumvimba, ku nsye kinanga mu dyambu di bunkuta bu lufwa. 16 Mu dyambu ti, kayiza mu sadisa zimbazi ko, kansi mu sadisa baala baa mu nkuna yi Abalahami. 17 Ni hahoho, kafweti fwanakana mu mimvimba bonso zimpangi zandi, mwanki kiza kaba Mfumu Nganga-Nzambi wufuluka mu nkenda, mpe kaba muntu wulunungu mu kisalu kyandi ha ntadisi yi Nzambi, mwanki katula masumu ma bantu. 18 Mu dyambu ti, Yesu yandi bende wuyena mpasi bu bamutonta. Ni hahoho, yandi lendi sadisa bantu baa mu ntontolo.